Antu Asweja Kutaluka Heseki
MPANJI 8
Antu Asweja Kutaluka Heseki
NEYI CHAKWILA muntu wumu nakwiza kumbidi yeyi nawa kuleha kwindi kudi neyi kuleha kwakapala kamwitala deyi, wunateli kutoñojoka neyidi? Muntu yenowu wasweja kutaluka! Mwalala hampinji yimu kwadiña antu asweja kutaluka hanu heseki. Bayibolu yahoshaña nawu atata jawu adiña añelu afumini mwiwulu. Indi ichi chazatikili ñahi?
Anukaku neyi, kañelu watama Satana wadiña nakuzata nañovu nakukojeja kukala. Wesekeleña nawa kwilisha añelu jaNzambi kwikala atama. Mukuhita kwampinji, añelu amakwawu atachikili kumutiyilila Satana. Alekeli mudimu wayinkeliyi Nzambi nindi akoñeña mwiwulu. Dichi enjili hamaseki nakudibalumuna awenawu kwikala nanyijimba yawuntu. Wuneluki muloña waweni?
Bayibolu yahoshaña nawu muloña anyana kaNzambi awamayala amweni ambanda alubanji hamaseki nawa akeñeli kushakama nawu hamu. Dichi enjili hamaseki nakusumbula ambanda wenawa. Bayibolu yahoshaña nawu ichi chadiña chaluwa, muloña Nzambi waleñeli añelu nindi ashakameña mwiwulu.
Chelili añelu niañondi jawu avwali nyikeki, nyikeki yeniyi yadiñi yambukaku. Hakusambila hekwawu hiyamwekeneña kwambuka chikupuku. Ilaña akulileña swayi-swayi, nakwikalilaku nañovu kushika tuhu nimpinji yiyaswejeliwu kutaluka.
Awa antu ataluka adiña atama. Namuloña wakusweja kupama niñovu, akatishileña antu. Esekeli kukanjikija antu ejima kwikala atama neyi chochiyadiñawu.
Enoki wafwili, ilaña haniyi mpinji hamaseki hadiñileña muntu wumu wadiñi wamuwahi. Ijina daniwu muntu wadiñi Nowa. Mpinji yejima Nowa welileña mwejima mwamulejeliyi Nzambi kwila.
Ifuku dimu Nzambi wamulejeli Nowa nindi mpinji Yindi yinashiki dehi yakujilumuna antu ejima atama. Ilaña Nzambi wukahandisha Nowa nichisaka chidi nianyama amavulu. Twayenu tutali Nzambi chakoñeliyichi.
