MPANJI 7

Iyala Womika

CHELILIWU antu anatachiki dehi kuvula hanu hamaseki, antu amavulu akoñeleña yuma yatama neyi yoyakoñeleñayi Kena. Ilaña iyala wumu wadiña wambukaku. Iwu iyala ijina dindi diyi Enoki. Enoki wadiña iyala womika. Antu ejima adiñaku akoñeleña yuma yatama, hakwila Enoki watwalekelihu nakumukalakela Nzambi.

Wuneluki muloña waweni antu akunyima kuna chakoñeleleñawu yuma yatama? Esekaku kutoñojoka, Hinyi wakojejeli Adama niEvu abuleña kumwovwahila Nzambi nakudya kumukabu wayilekesheliyi Nzambi? Eña, wadiña kañelu watama. Bayibolu yamutenaña nawu Satana. Nawa wakeñaña kwilisha antu ejima kwikala atama.

Ifuku dimu, Yehova Nzambi wamwilili Enoki nindi aleji antu hachuma chiyabulileñawu kukeña kutiya. Chadiña chakwila nawu: ‘Ifuku dimu, Nzambi wamba kakisañana antu ejima.’ Antu chachitiyiliwu hadaha azuwili nankashi. Azuwili chakwila hiyakukeña nikumujaha Enoki. Aha dinu Enoki wateleleli kwikala womika hakuyileja antu hachuma chakeñeliyi Nzambi kukoña.

Nzambi hakeñeli nindi Enoki yoshakami nyaka yayivulu nawantu atamaku. Enoki washakamini nyaka 365 hohu. Muloñadi chitunahosheli netu “nyaka 365 hohu”? Muloña antu amunowu mafuku adiña akola nankashi kubadika alelu dinu, nikushimbula ashimbwileña chikupu. Muloña mwana kaEnoki, Metusela washakamini nyaka 969!

Ilaña chelili Enoki nafwi dehi, antu asweja nikusweja kukoña yuma yatama. Bayibolu yahoshaña nawu, ‘yuma yejima yiyatoñojokeleñawu yadiña yatama hohu,’ nawa ‘iseki daswejeli madombu.’

Wuneluki muloña waweni waletesheli iseki kwikala nakukala kweneni munana mafuku? Muloña wakwila Satana wadiña nanjila yayiha yakukokwelamu antu kulonda akoñeña yuma yatama. Tukudiza haniji hambidi.

Kutachika 5:21-24, 27; 6:5; Aheberu 11:5; Yuda 14, 15.