MPANJI 6

Mwana Wamuwahi niMwana Watama

TALAÑA aKena naAbeli hanu. Wejima wawu anakuli dehi. Kena nekali dehi mukwakudima. Wadimaña yakudya yansachi ninyikabu niyisakola.

Abeli nekali dehi kabiña kanyikoku. Wakeña kuhemba tunyaana kanyikoku. Anakuli dehi nakwikala anyikoku amaneni chikupu nawa Abeli nekali namulaka wawanyikoku atadikayi.

Ifuku dimu aKena naAbeli atwalili nyilambu kudi Nzambi. Kena hakutwala yakudya yadimineñayi. Hakwila Abeli hakutwala anyikoku indi amawahi. Yehova wamutiyili kuwaha Abeli nimulambu windi. Hakwila Kena nimulambu windi hawutiyili kuwahaku. Wuneluki muloña waweni?

Hichidi namuloña wakwila nawu mulambu waAbeli wunabadiki waKenaku. Muloña Abeli himuntu wamuwahi. Wamukeña Yehova nimana kwindi. Hakwila Kena watama; hamukeña mana kwindiku.

Dichi Nzambi hakumwila Kena nindi chiña yohimpi yililu yindi. Ilaña Kena hatiyililiku. Kena hakuzuwa nankashi muloña Nzambi wakeñeliku Abeli kubadika yena. Kena wahosheli namana kwindi Abeli nindi, ‘Twatuyi ntahi mumpata.’ Cheliliwu adi dehi mumpata nkawawu, Kena wamunyamukilili manakwindi Abeli. Wamunyamukilili mana kwindi chakola chakwila yamujaha nikumujaha. Komana ichi hichadiña chuma chatama cheliliyi Kenaku?

Hela chakwila Abeli wafwa, Nzambi wuchidi kumwanuka. Abeli wadiña wamuwahi, nawa Yehova hajimbalaña muntu wamuchidiwuku. Ifuku dimu Yehova Nzambi wamba kamufuntisha Abeli kuwumi. Hayina mpinji, Abeli hamba kafwa cheñiku. Wamba kashakama hanu hamaseki haya nyaka. Komana hichatela kwikala chachiwahi kudiluka nawantu adi neyi Abeliku?

Ilaña Nzambi hatiyaña kuwaha nawantu adi neyi Kenaku. Hakwila Kena cheliliyi najahi dehi mana kwindi, Nzambi wamubabesheli kuhitila mukumutemwina kwituña dakwakulehi chikupu nakwadiña chisaka chindi chejima. Cheliliyi Kena hakuya nakushakama kwituña dakwakulehi, wasendelihu muhelindi wumu owu wekalili iñodindi.

Mukuhita kwampinji Kena nañodindi atachikili kuvwala anyana. Anyana kaAdama naEvu amakwawu awamayala niawambanda adisumbwili, niwena nawa avweli anyana. Mukuhita kwampinji hamaseki hadiña antu amavulu nankashi. Twayenu tuhajikihu hadantu amu.

Kutachika 4:2-26; 1 Yowanu 3:11, 12; Yowanu 11:25.