MPANJI 1

Nzambi Natachiki Kuleña Yuma

YUMA yejima yayiwahi yitukweti yafuma kudi Nzambi. Waleñeli itañwa kulonda ditwinkeña chejeji nampinji yamwaana, waleñeli cheñi nikakweji nitutumbwa kulonda yitwinkeña chejeji nampinji yawufuku. Nzambi waleñeli maseki kulonda tushakameñahu.

Ilaña itañwa, nikakweji, nitutumbwa, nimaseki hiyadiña yuma yatachi yaleñeliwu kudi Nzambiku. Wuneluki chuma chadiña chatachi kuleña? Nzambi wasambilili kuleña antu adi neyi yena. Wenawa antu hitunatweshi kuyimonaku neyi chochitwabulaña kumumona Nzambi. MuBayibolu awantu ayitenaña nawu añelu. Nzambi waleñeli añelu kulonda ashakameña nindi mwiwulu.

Kañelu wakusambila waleñeliyi Nzambi wadiña wambukaku chikupu nawakwawu. Wadiña Wedi waNzambi, nawa wazatileña hamu naTata yindi. Wamukwashiliku Nzambi kuleña yuma yikwawu yejima. Wamukwashiliku Nzambi kuleña itañwa, nikakweji, nitutumbwa hamu tuhu niiseki detu.

Indi iseki dadiña ñahi hanoyu mpinji? Hatachi kwosi muntu niwumu washakamineña hamasekiku. Hihadiña chumaku, ilaña hadiña hohu kaluñalwiji kamu keneni kamenji mpata yejima. Ilaña Nzambi wakeñeleña nindi antu ashakameña hamaseki. Dichi watachikili kutwiloñeshela yumiyi. Chumanyi cheliliyi?

Chatachi, heseki hakeñekeleña chejeji. Dichi Nzambi waleñeli itañwa kulonda ditoñekeña hamaseki. Wadileñeli kulonda kwikaleña mpinji yamwaana nimpinji yawufuku. Hanyima yanichi Nzambi wasefwili iseki hewulu damenji akaluñalwiji.

Hakusambila hamaseki hihadiña chuma chidi chejimaku. Hamwekeneña neyi iwu mwevulu yiwunakumona hanu. Hihadiña nkenu ninyitondu hela anyamaku. Mukaluñalwiji himwadiña inshiku. Nzambi wadiña namudimu weneni wakwila iseki dikali iluña dadiwahi kushakamahu kudi antu nianyama.

Yeremiya 10:12; Akolose 1:15-17; Kutachika 1:1-10.