Anyikwenzi awaMayala Awana muBabiloni
MPANJI 75
Anyikwenzi awaMayala Awana muBabiloni
MWANTA Nebukaneza hakusenda aIsarela ejima ataña chikupu nakuyitwala muBabiloni. Nkumininaku mwanta hakutondahu hadi anyikwenzi alubanji nawa akweti maana nankashi. Awana hadi awa diwanyikwenzi yiwunakumona aha. Wumu diyi Danyeli, niamakwawu asatu eniBabiloni ayitenaña nawu Shadaraki, Meshaki niAbedinego.
Nebukaneza hakukeña kudizisha anyikwenzi kulonda akalakaleña muchipañu chindi. Hanyima yakuyidizisha hadi yaaka yisatu wukatondahu hohu akweti maana chikupu kulonda akamukwasheñaku kuketula nyiloña. Mwanta nakukeña anyikwenzi kwikala akola kumujimba hampinji yanakuyidizishawu. Dichi hakuleja añamba jindi nindi ayinkeña wejima wawu yakudya yayiwahi nivinyu neyi yoyadyañayi yomweni nichisaka chindi.
Talaña mukwenzi Danyeli. Wuneluki chanakumulejayi mukulumpi wawañamba jaNebukaneza Ashipenazi? Danyeli nakumuleja nindi hanakukeña kudya kwakuwahi kwakumesa yamwantaku. Ilaña Ashipenazi hakwakamena. Hakuhosha nindi, ‘Mwanta watoñola dehi yuma yimwatela kudya nikunwa. Neyi himukumwekana chiwahi neyi anyikwenzi amakwawuku, watela kunjaha.’
Dichi Danyeli hakuya kudi nhembi wakunjikawu kudi Ashipenazi kuhemba yena niakwawu asatu. Hakuhosha nindi, ‘Mwani atweseki hadi mafuku 10. Yakudya atwinkeña kwayisakola niyakunwa atwinkeña menji. Dichi wukatwesekeji nawa nyikwenzi amakwawu anakudya yakudya yamwanta wukatali akamwekanahu chiwahi.’
Nhembi hakwiteja kwila chenichi. Chimunahiti mafuku 10, Danyeli nawakwawu asatu hiyakumwekana chiwahi nankashi kubadika anyikwenzi ejima. Dichi nhembi hakuyileka atwalekihu kudyaña yisakola chatela kudyaña yakudya yayinkañayi mwanta.
Hakukuma kwayaaka yisatu anyikwenzi ejima hiyakuyitwala kudi Nebukaneza. Hanyima yakuhosha nawu wejima wawu, mwanta hakuwana neyi Danyeli nawakwawu asatu diwu asweja maana. Dichi hakuyihemba kulonda amukwasheñaku muchipañu. Nawa neyi mwanta nayihuli aDanyeli, niShadaraki, niMeshaki, niAbedinego lwihu hela nayinki muloña wakala, elukaña mapampa 10 kubadika atupristu indi hela akwamaana.
