MPANJI 68

Atwansi Ayedi awaMayala Anasañuki

NEYI wufwa, mama yeyi wukutiya ñahi neyi akusañula? Watela kutiya muzañalu nankashi! Hanu dinu, muntu wunafwi watela kusañuka? Chamwekanahu dehi?

Talaña iwu iyala, niniwu mumbanda, nikansi weyala. Iwu iyala diyi kaprofwetu Elija. Iwu mumbanda hintuluwa wamumusumba waZarefwati, hakwila kansi weyala himwanindi. Ifuku dimu iwu kansi weyala hakukata. Hakukata nankashi, nkumininaku yofwa nikufwa. Elija hakumwila mumbanda nindi: ‘Nyinki mwana.’

Elija hakumutwala mwana wafwa hetala dahewulu, yomukamika nihakadidi. Hakulomba nindi: ‘Eyi Yehova, musañuli iwu mwana.’ Mwana yatachika nikona! Elija hakumusulwisha heshina, hakumwila mumbanda nindi: ‘Tala mwaneyi nahandi!’ Dimuloña waweni wunazañaleliyi mama yindi.

Kaprofwetu mukwawu waYehova walema ijina dindi diyi Elisha. Wazataña neyi nkwashi yaElija. Ilaña mukuhita kwampinji Yehova hakumuzatisha Elisha kwila yihayamisha. Ifuku dimu Elisha hakuya kumusumba waShunemi, kweniku mumbanda wumu hakumuhemba chiwahi nankashi. Chimunahiti mafuku mumbanda yeniwu hakuvwala mwana weyala.

Ifuku dimu nantetemena, cheliliyi mwana nakuli dehi, hakuya kudi tata yindi wunakuzata mwiha. Hohenohu mwana hakwaba nindi: ‘Nafwi mutu wunakate-e!’ Chanamutwaliwu kwitala, yafwa nikufwa. Ochineñi chinatiyiyi mama yindi! Hohenohu mumbanda hakuya nakumutambika Elisha.

Chanashikiyi Elisha, hakwiñila mwitala namwana wafwa. Hakulomba kudi Yehova, hakubulumana hamujimba wamwana. Mumpinji yantesha mujimba wamwana hiwukwila niiyena, hakuchihula mapampa katanu nakayedi. Owu muzañalu wunatiyiyi mama yindi chineli yeñili awani mwanindi wamumi!

Antu amavulu nankashi afwa. Ichi chinaleteli yisaka yawu nimabwambu jawu chineñi nankashi. Hitukweti ñovu yakusañula afuku. Ilaña Yehova wukweti. Kumbidi tukudiza chakasañulayi yihita yawantu kuwumi.

1 Anyanta 17:8-24; 2 Anyanta 4:8-37.