MPANJI 74

Iyala Wabula Woma

TALAÑA antu anakumuseha iwu mukwenzi. Wunamwiluki ijina dindi? Diyi Yeremiya. Hikaprofwetu walema nankashi waNzambi.

Chelili Mwanta Yosiya atachiki kuhumona akishi mwituña, Yehova hakumuleja Yeremiya nindi ekali kaprofwetu Kindi. Hela chochu, Yeremiya hakutoñojoka nindi wuchidi kansi nankashi hakwila nawu yekali kaprofwetu. Ilaña Yehova hakuhosha nindi Wukumukwasha.

Yeremiya hakuyileja aIsarela kuleka kwila yuma yatama. Hakuhosha nindi, ‘Antu akamatuña adifukulaña kudi anzambi akutwamba.’ Ilaña aIsarela amavulu hiyakudifukula kudi akishi chatela kudifukula kudi Yehova Nzambi walala. Chineli Yeremiya ayileji antu nindi Nzambi wukayibabesha muloña wakutama kwawu, hiyakukumina dakumuseha.

Yaaka yinahiti. Yosiya hakufwa, chimwahitili tukweji tusatu mwanindi Yehoyakimi hakwikala mwanta. Yeremiya hakutwalekahu nakuleja antu nindi: ‘Yerusalema akamujilumuna neyi himukuhimpa yililu yenuku.’ Atupristu hiyakumukwata Yeremiya nakumuleja nawu: ‘Watela kufwa muloña wakuhosha yuma iyi.’ Dichi hiyakuleja atulamba amuIsarela nawu: ‘Yeremiya watela kufwa muloña nahoshi chatama kutalisha hamusumba wetu.’

Indi Yeremiya wukwiladi dinu? Hanatiyi womaku! Hakuyileja wejima wawu nindi: ‘Yehova wantemesheli kulonda nihoshi iyi yuma kudenu. Neyi himukuhimpa nshakaminu yenu yatamaku, Yehova wukajilumuna Yerusalema. Ilaña ilukenu chumiche: Neyi mukunjaha, mukujaha muntu wunabuli kukoña katama.’

Atulamba hiyakumumbaku Yeremiya, ilaña aIsarela hiyanahimpi yililu yawu yatamaku. Chimwahitili mafuku Nebukaneza, mwanta wakuBabiloni hakwinza nakulwisha Yerusalema. Nkumininaku Nebukaneza hakwilisha aIsarela kwikala añamba jindi. Hakusenda makombakaji awantu amavulu kuBabiloni. Chitoñojoki chichikwikala neyi antu akwacheñi akusenda kumukala wenu nakukutwala kwituña dawenyi!

Yeremiya 1:1-8; 10:1-5; 26:1-16; 2 Anyanta 24:1-17.