MPANJI 69

Kansi waMumbanda Nakwashi Iyala Mukwa Ñovu

WUNELUKI chinakuhoshayi iwu kansi wamumbanda? Nakuleja mumbanda hadi kaprofwetu kaYehova Elisha niyuma yakuhayamisha yamukwashañayi Yehova kwila. Mumbanda hamwiluka Yehovaku, muloña hikaIsarelaku. Tutalenu muloña waweni wunekaliliyi iwu kansi wamumbanda mwitala daniwu mumbanda.

Iwu mumbanda hikaSiriya. Nfumwindi diyi Nayamani, mukulumpi wamashidika akuSiriya. Iwu kansi wamumbanda kaIsarela amukwatili kudi akaSiriya, dichi amuleteli kudi iñoda Nayamani kulonda ekali ñamba yindi.

Nayamani wukweti musoñu watama watenañawu nawu mbumba. Iwu musoñu watela nikuletesha nyisunyi yamuntu kulamoka. Ichi dichinakumulejayi kansi wamumbanda iñoda Nayamani nindi: ‘Natoñi chiña nkaaka yami waya kudi kaprofwetu kaYehova kuIsarela. Wadi kumuuka mbumba yindi.’ Nkumininaku hiyakumulejamu nfumwa niwu mumbanda awa mazu.

Nayamani hakukeñesha nankashi nindi amuuki; dichi hakukasa lwendu lwakuya kuIsarela. Chanashikiyi kuna, hakuya kwitala daElisha. Elisha hakuleja ñamba yindi kuleja Nayamani nindi ayi nakuwela muKaloña Yodana mapampa katanu nakayedi. Ichi hichikumuhilisha Nayamani nankashi, hakuhosha nindi: ‘Tuloña twakumukala wetu twatuwahi kubadika twamu Isarela!’ Hanyima yakuhosha mwenimu, Nayamani hakuya.

Ilaña wumu hadi añamba jindi hakumuleja nindi: ‘Eyi mwanta, neyi Elisha wakuleja kwila chuma chakola, wadi kuchikoña. Dichi dinu muloñadi chiwunabulili kuwela neyi chahoshayi?’ Nayamani hakutiyilila chanahoshiyi ñamba yindi, hakuya nakudibula muKaloña Yodana mapampa katanu nakayedi. Chanadibuliyi mujimba windi hiwukukola!

Nayamani hakutiya muzañalu nankashi. Hakufunta kudi Elisha nakumuleja nindi: ‘Ichi dinu neluki dehi chikupu nami Nzambi wamuIsarela diyi Nzambi walala nkawindi heseki dejima. Dichi mwani, tambulaku chawaana kudami.’ Ilaña Elisha hakwakula nindi: ‘Nehi, hinikuchitambulaku.’ Elisha neluki nindi chikwikala chatama neyi wukutambula chawaana, muloña Yehova diyi wamuuka Nayamani. Ilaña ñamba yaElisha Gehazi hakukeña kutambula china chawaana.

Dichi Gehazi hakwila mwenimu. Chineli Nayamani nayi dehi, Gehazi hakumulondela. Gehazi hakuhosha nindi: ‘Elisha nantemeshi nikuleji nindi nakukeña chawaana cheyi ahani kudi amabwambu jindi anamwendeli.’ Awa himakudi aweni. Ilaña Nayamani haneluki nindi himakudiku; dichi hakumwinkahu Gehazi yuma.

Chanafuntiyi Gehazi kumukala, Elisha hakwiluka chuma chaneliyi. Yehova wamulejeli. Hakuhosha nindi: ‘Hamuloña wanichi chuma chatama chiwunakoñi, mbumba yaNayamani yikukutuntulukila.’ Hohenohu hiyikumukwata!

Tunatweshi kudizilahu chumanyi kuyuma yejimiyi? Chatachi, twatela kwikala neyi kansi wamumbanda nikuhosha hadi Yehova. Chinatweshi kwikala chachiwahi nankashi. Chamuchiyedi, hitwatela kwikala adinyamuna neyi chadiñayi Nayamani hakusambilaku, ilaña twatela kovwahila añamba jaNzambi. Chamuchisatu, hitwatela kutwamba neyi cheliliyi Gehaziku. Komana hitunatweshi kudiza jajivulu kuhitila mukutaña Bayiboluku?

2 Anyanta 5:1-27.