Muloña Wunakutemukila Davidi
MPANJI 59
Muloña Wunakutemukila Davidi
HANYIMA yakwila Davidi namujahi dehi Goliyati, mukulumpi wamashidika awaIsarela Abineri hakumutwala kudi Sawulu. Sawulu hakumutiya Davidi kuwaha nankashi. Hakumwilisha mukulumpi wamashidika indi nawa hakumusenda kulonda ashakameña hetala damwanta.
Nkumininaku, chanafuntiwu amashidika kuyayiliwu nakulwa nawaFwilistinu, ambanda hiyakwimba nawu: ‘Sawulu najahi makombakaji, ilaña Davidi najahi makumi amakombakaji.’ Ichi hichikumuletela Sawulu ichima muloña Davidi anamwinki kalemesha kumubadika yena. Ilaña mwana kaSawulu Jonatani hanatiyi ichimaku. Wamukeña Davidi nankashi, nawa Davidi niyena wamukeña Jonatani. Dichi muwuyedi wawu hiyakudikasa nawu akatwalekahu kwikala amabwambu.
Davidi weluka kwimba kadada nankashi, nawa Sawulu watiyaña kuwaha chembañayi. Ifuku dimu ichima daSawulu hidikumuletesha kwila chuma chatama. Henohu Davidi nakwimba kadada, Sawulu hakunona iyoña dindi nakumwasa, nindi: ‘Nikumuhanwishadu Davidi nzwa-a nikumbañu.’ Ilaña Davidi hakuleya, iyoña hidikumulweza. Chimwahitili mafuku Sawulu hakumulweza cheñi Davidi neyoña dindi. Davidi hakwiluka nindi watela kwikala wasoñama nankashi.
Wunakwanuka chikaninu chakaniniyi Sawulu? Wahosheli nindi wukuhana mwanindi wamumbanda kwikala iñoda iyala wukamujaha Goliyati. Nkumininaku Sawulu hakuleja Davidi nindi watela kusenda mwanindi wamumbanda Mikali, ilaña chiña asambili kujaha ayilumbu aFwilistinu 100. Chitoñojoki! Sawulu nakuhweleli chikupu nindi Davidi akumujaha kudi aFwilistinu. Ilaña hiyanamujahiku, dichi Sawulu hakumwinka Davidi mwanindi wamumbanda kulonda ekali iñodindi.
Ifuku dimu Sawulu hakuleja Jonatani niañamba jindi ejima nindi nakukeña kumujaha Davidi. Ilaña Jonatani hakumuleja tata yindi nindi: ‘Bayi wumujaha Davidiku. Kanda yakwilañahu dehi katamaku. Ilaña, yuma yejima yakoñeliyi yadiña yakukwasha eyi chikupu. Wenkeli wumi windi mukukala hampinji yamujahiliyi Goliyati, nawa chiwachimweni watiyili kuwaha.’
Sawulu hakumutiyilila mwanindi, dichi hakusanyika nindi hakamujaha Davidiku. Hiyakumuleta cheñi Davidi, hakukalakela mwitala daSawulu neyi chelilañayi dikalu. Hela chochu, ifuku dimu henohu Davidi nakwimba, Sawulu hakumwasa cheñi Davidi iyoña. Davidi hakuleya, iyoña hidikushimata mumbañu. Aka dikapampa kamuchisatu! Davidi hakwiluka nindi ichi dinu watela kutemuka!
Wenowu wufuku Davidi hakuya kwitala dindi. Ilaña Sawulu hakutemesha antu akumujaha. Mikali neluki chinakukeña kwilayi tata yindi. Dichi hakumuleja nfumwindi nindi: ‘Neyi hiwukutemuka nawufukowuku, kumadiki wukafwa.’ Wenowu wufuku Mikali hakumukwasha Davidi kwidikila hanjanena. Hadi yaaka yitanu nayiyedi Davidi watela kuswama mumaluña amavulu kulonda Sawulu abuli kumumona.
