MPANJI 71

Nzambi Nakani Paradisa

IWU dimwevulu waparadisa yidi neyi yina yamwekesheliyi Nzambi kudi kaprofwetu kindi Isaya. Isaya wadiñaku hanyima yaYona.

Paradisa yalumbulula “itempa” hela “paaki.” Komana hichinakwanukishahu chuma chimu chitwamonahu dehi muniwu mukandaku? Dinakumwekana neyi itempa dadiwahi dayileñeleliwu Adama naEvu kudi Yehova Nzambi, hidimuku? Hanu dinu iseki dejima damba kekala paradisa?

Yehova wamulejeli kaprofwetu kindi Isaya kusoneka hansañu yaparadisa yayiha yinakwinza yawantu jaNzambi. Wahosheli nindi: ‘Tuñwidi nianyikoku akashakama hamu mukuwunda. Anyana kañombi nianyana kamutupa akadyila hamu, kansi wanyanya diwakayihembaña. Hela mukeki hiyakamusuma neyi nakuhema nakapela wafwanaku.’

Amavulu anateli kuhosha nawu, ‘Ichi hichinatweshi kumwekanaku. Heseki hadi kukala kufuma tuhu kunyaka nawa kukatwalekahu.’ Ilaña toñojokakuhu: Mukala wamuchidinyi wayinkeliyi Nzambi Adama naEvu?

Nzambi wayinkeli Adama naEvu muparadisa. Hamuloña wakwila hohu nawu adikañili naNzambi dichiyajimbesheliwu mukala wawu wawuwahi, ashinakajili nikufwa. Nzambi wakana nindi wakayinka antu amukeña chochina chuma chachiwahi chajimbesheliwu Adama naEvu.

Muparadisa yinakwinza kwosi chuma chakakatishañana hela kukisañana. Mwakekala kuwunda kwakweni. Antu ejima akekala akola kumujimba nawa amuzañalu. Chakekala neyi chochakeñeliyi Nzambi nindi chikali hakusambila. Ilaña tukudiza kumbindi chakaletayi Nzambi ichi.

Isaya 11:6-9; Chimwekeshu 21:3, 4.