MPANJI 72

Nzambi Namukwashi Mwanta Hezekiya

WUNELUKI muloña waweni iwu iyala chanakulombelayi kudi Yehova? Muloña wankahi chanatentekeliyi iyi nyikanda kumbidi yakameña kaYehova? Iwu iyala diyi Hezekiya. Diyi mwanta wanyitaña yiyedi yaIsarela yakukabeta kambwela. Nawa wudi mukukala kwakweni. Muloñadi?

Muloña amashidika akuAshuri anakisañani dehi nyitaña 10 yakukabeta kaluwunda. Yehova wetejeli ichi kuzatika muloña antu adiña atama. Ichi dinu amashidika akuAshuri anenzi nakulwa nawanta wanyitaña yiyedi.

Mwanta wakuAshuri namutemesheli Mwanta Hezekiya nyikanda katataka. Iyi dinyikanda yinatentekiyi Hezekiya kumesu aNzambi. Nyikanda yinamusawuli Yehova, nakumuleja Hezekiya kulonda abuli kulwa. Dimuloña waweni wanakulombelayi Hezekiya nindi: ‘Eyi Yehova, tupulwishi kudi mwanta wawaAshuri. Kulonda nyuza yejima yikeluki nawu yeyi Nzambi hohu.’ Komana Yehova wukutiya kulomba kwaHezekiya?

Hezekiya himwanta wamuwahi. Hadi neyi anyanta atama awanta wanyitaña 10 yamuIsarela, hela neyi tata yindi Ahazi Mwanta watamaku. Hezekiya wadiña nakashinshi kakwovwahila nshimbi jaYehova jejima. Dichi, chanamanishiyi Hezekiya kulomba, kaprofwetu Isaya hakumutemeshela awa mazu akufuma kudi Yehova nindi: ‘Mwanta wakuAshuri hakwinza kuYerusalemaku. Kwosi niwumu hadi amashidika indi wukuswila kwakwihi. Hiyakwasa nsewu hela yimu hamusumbaku.’

Talaña hamwevulu wudi hanidi ifu. Wunamwiluki yamweni awa mashidika anafwi? Himashidika aweni Ashuri. Yehova watemesheli kañelu kindi, dichi muwufuku wumu kañelu wajahili amashidika aweni Ashuri 185,000. Dichi mwanta wakuAshuri hakuleka kulwa hakufunta kwindi.

Wanta wanyitaña yiyedi anawupulwishi, nawa antu hiyakwikala nakuwunda hakapinji kanti. Hanyima yakufwa kwaHezekiya mwanindi Manase hakwikala mwanta. Manase namwanindi Amoni amusinsili hanyima yindi hiyanyanta atama nankashi. Dichi ituña hidikwinzala cheñi nawubanji nimadombu. Chanamujahiwu Mwanta Amoni kudi añamba jindi, mwanindi Yosiya hakwikala mwanta wawanta wanyitaña yiyedi.

2 Anyanta 18:1-36; 19:1-37; 21:1-25.