MPANJI 64

Solomoni Natuñi Tembeli

HENOHU Davidi kanda yofwi, wamwinkeli Solomoni wuloñeshelu wakufuma kudi Nzambi mwakutuñila tembeli yaYehova. Mumwaka wamuchiwana wakuyula kwindi, Solomoni hakutachika kutuña tembeli, nawa hichikusenda yaaka yitanu nayiyedi nichikunku hakuyimanisha. Makumi amakombakaji awantu, azataña kutembeli nawa itala hidikufwa mali amavulu nankashi. Muloña wakwila azatishili wuru nisiliva yayivulu.

Tembeli yikweti tupeka tuyedi twamaneni neyi twadiña mutabanaka. Ilaña tupeka twenitu twamaneni mapampa kayedi kubadika twamutabanaka. Solomoni hakusha chimbañu chachitiyañenu mukachi kakapeka kamutembeli, niyuma yikwawu yahembeleleñawu mutabanaka anayitenteki mukapeka kekwawu.

Chinamanishiwu kutuña tembeli, hiyakwila chawija cheneni. Solomoni hakufukama kumbidi yatembeli, nakulomba neyi chiwunakumona hamwevulu. Solomoni hakuhosha kudi Yehova nindi: ‘Hela iwulu dejima hidinateli kukuwanineyiku, indi iyi tembeli yikuwanini. Ilaña, Eyi Nzambi yami, mwani atiyi antu jeyi neyi anenzi nakulombela hanidi iluña.’

Chanamanishiyi Solomoni kulomba, kesi hikakuholoka mwiwulu. Hikakwocha nyilambu yawanyama yalambwiliwu. Nawa mutembeli himukwinzala chejeji chakufuma kudi Yehova. Ichi chinakumwekesha nawu Yehova natiyilili, nawa natiyi kuwaha tembeli nikulomba kwaSolomoni. Tembeli yikwikala iluña kukwinzañawu antu nakudifukula bayi mutabanakaku.

Solomoni hakuyula munjila yayiwahi hampinji yayilehi nawa antu adi namuzañalu. Ilaña Solomoni hakusumbula ambanda amavulu akumatuña acheñi abulaña kudifukula kudi Yehova. Wunamumoni wumu hadi wena wunakudifukula kudi mukishi? Nkumininaku añodijidi hiyakumwilisha Solomoni kudifukula kudi anzambi acheñi. Wuneluki chuma chinamwekani chineli Solomoni akoñi mwenimu? Hanakuyihemba cheñi antu chiwahiku. Hakwikala nawukatu, nawa antu hiyadi namuzañalu cheñiku.

Solomoni hakumuhilisha Yehova hachumichi, hakumuleja nindi: ‘Nakakutambula wanta, nakuwuhana kudi muntu wacheñi. Hinakela chenichi mumpinji yakuhanda kweyiku, chiña mumpinji yakuyula kwamwaneyi. Ilaña hinakafumisha antu ejima amuwanta kudi mwaneyiku.’ Tutalenu chichamwekeni.

1 Kushindulula 28:9-21; 29:1-9; 1 Anyanta 5:1-18; 2 Kushindulula 6:12-42; 7:1-5; 1 Anyanta 11:9-13.