MPANJI 66

Yezebeli—Mwadi Watama

HANYIMA yakufwa kwaMwanta Yerobowami, mwanta wejima wukuyula wanta wanyitaña 10 wakukabeta kaluwunda kaIsarela watama. Mwanta Ahabi dimwanta waswejesha kutama hadi ejima. Wuneluki muloña waweni? Muloña weneni hiñodindi, Yezebeli Mwadi watama.

Yezebeli himumbanda kaIsarelaku. Himwana kamwanta wakuZidoni. Wadifukulaña kudi nzambi wakutwamba Bayali, nawa hakwilisha Ahabi niaIsarela amavulu kudifukula kudi Bayali. Yezebeli wamuhela Yehova nawa hakujaha atuprofwetu indi amavulu. Amakwawu chiña aswama mumayeñu muloña abuli kuyijaha. Neyi Yezebeli nakukeña chuma, watela nikujaha muntu kulonda achitambuli.

Ifuku dimu Mwanta Ahabi hakuneña nankashi. Dichi Yezebeli hakumwihula nindi: ‘Muloñadi chiwunaneñeli lelu?’

Ahabi hakwakula nindi, ‘Muloña wachuma chanlejeliyi Naboti. Nakeñeli nami nilandi itempa dindi danyivinyu. Ilaña wanlejeli nindi hakudinlandishaku.’

Yezebeli hakuhosha nindi, ‘Bayi wakamenaku. Nukukutambwiladu.’

Yezebeli hakusonekela nyikanda akulumpi amumusumba mwashakamaña iwu iyala Naboti. Hakuyileja nindi, ‘Kalejenu antu amukunkulwayi ahoshi nawu Naboti natuki Nzambi nimwanta. Dichi mumwidishi Naboti hanji yamusumba mumwasi malola nichikufwayi.’

Yezebeli chanatiyiyi nindi Naboti nafwi dehi, hakumuleja Ahabi nindi: ‘Ichi dinu yaku wutambuli itempa dindi danyivinyu.’ Komana hiwukwiteja neyi Yezebeli atela kumubabesha hamuloña wakwila chuma chatama ñanaku?

Mukuhita kwampinji, Yehova hakutemesha iyala wejina daYehu kulonda amubabeshi. Chanachitiyiyi Yezebeli nindi Yehu nakwinza, hakudikwita wulombu kumesu indi nakudiloñesha kulonda amwekani lubanji. Ilaña chanenziyi Yehu hakumumona Yezebeli hanjanena, hakuleja amayala adi muchipañu nindi: ‘Munatenu mwishina!’ Amayala hiyakovwahila neyi chiwunakumona hamwevulu. Hiyakumunatila mwishina hakufwa nikufwa. Iku dikukuma kwaYezebeli, Mwadi watama.

1 Anyanta 16:29-33; 18:1-4; 21:1-16; 2 Anyanta 9:30-37.