MPANJI 70

Yona naNshi Weneni

TALAÑA iwu muntu wudi mumenji. Wudi mukukala kwakweni, netuku? Ona inshi keña amuminyi! Wunamwiluki iwu muntu? Ijina dindi diyi Yona. Twayenu tutali cheñililiyi muniku kukala kweneni.

Yona hikaprofwetu kaYehova. Hanashimbuli hohu chanti, hanyima yakufwa kwakaprofwetu Elisha Yehova hakumwila Yona nindi: ‘Yaku mumusumba weneni waNinive. Kutama kwawantu amumusumba kunasweji nankashi nawa nakukeña eyi wuyileji hanichi.’

Ilaña Yona hakeñeli kuya kwokuku. Dichi hakukandama muwatu wunakuya kukabadi kacheñi kaNinive. Yehova hanatiyi kuwaha chanatemukiyi Yonaku. Hakwilisha mpepela yeneni. Hiyikukunka chakwila watu wudi mukukala kwakujiya. Akwakwendesha watu hiyakutiya woma nankashi, hiyakubilela kudi akishi awu nawu ayikwashi.

Nkumininaku Yona hakuyileja nindi: ‘Nadifukulaña kudi Yehova Nzambi waleñeli maseki nimawulu. Dichi nakutemuka kuzata mudimu wanalejiyi Yehova nindi nikoñi.’ Dichi akwakwendesha watu hiyakumwihula nawu: ‘Indi etu tukukwila ñahi kulonda mpepela yileki?’

Yona hakuhosha nindi, ‘Ñumbilenu hakaluñalwiji, nikaluñalwiji kakumwena cheñi.’ Akwakwendesha watu hiyanakukeña kwilamuku, ilaña mpepela chiyinaswejeshi nkumininaku hiyakumumbila Yona mumenji. Hohenohu mpepela hiyikuleka, kaluñalwiji hikakumwena cheñi bete-ti.

Chineli Yona hakuya nakunekama kwishina damenji, inshi weneni hakumuminya. Ilaña kufwa nehi. Hakushakama mafuku asatu mwivumu danshi nimwaana niwufuku. Yona hakuneña nankashi muloña hamwovwahilili Yehova nakuya kuNiniveku. Dichi wuneluki chaneliyi?

Yona hakulomba wukwashu kudi Yehova. Yehova hakwilisha inshi kumusanzila Yona kumaseki awuma. Hanyima yanichi Yona hakuya kuNinive. Ichi komana hichinakutuleja chichalema kwila mwejima mukuhoshayi Yehovaku?

Mukanda wamuBayibolu waYona.