Anakaani Kufukama
MPANJI 77
Anakaani Kufukama
WUNAKWANUKA kutiyahu nsañu yanawa anyikwenzi asatu? Eña, hiyamabwambu jaDanyeli akaanini kudya yakudya yadiña yatama. EniBabiloni ayiteneneña nawu Shadaraki, niMeshaki niAbedinego. Hanu dinu yitali ichi. Muloñadi chanabuliliwu kufukaminawu iwu mukishi weneni neyi chinakwilawu akwawu ejima? Tutalenu ntahi.
Wunakwanuka nshimbi jasonekeliyi Yehova yomwenindi jatenañawu nawu Nshimbi Ikumi? Yatachi diyi iyi: ‘Bayi wakadifukula kudi anzambi acheñiku, chiña ami hohu.’ Awa anyikwenzi ahanu anakwovwahila ilu lushimbi, hela chakwila hichuma chaswayi kwilaku.
Nebukaneza mwanta waBabiloni, natambiki antu alema amavulu kwinza nakulemesha iwu mukishi wunemikiyi. Nakumishi tuhu kuhosha nawantu nindi: ‘Chimwatiya hiyakwimba jimpuña, nitudada niyuma yakwimba yacheñi nayacheñi, mukufukama nakudifukula kumukishi wawuru. Muntu wukubula kufukama nakudifukula akumuumbila mukachi kaluteñi ludi nakubidima kesi hohenohu.’
Chineli Nebukaneza yeluki nindi aShadaraki, niMeshaki niAbedinego hiyanafukamini mukishiku, hakuzuwa nankashi. Hakwila kulonda amuleteliwu. Hakuyinka cheñi mpinji yikwawu kulonda afukamini mukishi. Ilaña anyikwenzi hiyakukuhwelela mudi Yehova. Hiyakumuleja Nebukaneza nawu, ‘Nzambi yetu yitwakalakelaña natweshi kutupulwisha kudeyi. Hela chakwila hakutupulwishaku, hitukufukamina mukishi weyi wawuruku.’
Nebukaneza chinatiyiyi ichi, hakusweja nikuzuwa. Luteñi ludi tuhu mukamwihi dichi hakuhosha nindi: ‘Kazakasenu luteñi mapampa katanu nakayedi kubadika muyaluzakasilañawu dikalu!’ Dichi hakuleja amayala asweja ñovu amunjita yindi kuyikasa aShadaraki, niMeshaki niAbedinego nakuyumbila muluteñi. Luteñi lunasweji kutata chakwila nyizuzu yakesi hiyikujaha awa amayala asweja ñovu. Indi chumanyi chamwekeni kudi anyikwenzi asatu iyombililiwu mukachi kaluteñi?
Mwanta hakutala mukachi kaluteñi, hakutiya woma nankashi. Hakwihula nindi: ‘Etu hitwanatilamu amayala asatu akukasa dehi mukachi kaluteñi lunakubidima kesiku?’
Ambuñindi hiyakwakula nawu, ‘Eña dimu.’
Yena nindi, ‘Ilaña ami namoni amayala awana anakwendujoka mukesi. Hiyakukasaku, nawa kesi hikanakuyochaku. Wamuchiwana nakumwekana neyi nzambi.’ Mwanta hakuswila kwakwihi nachenzelu chaluteñi nakubilela nindi: ‘Shadaraki! Meshaki! Abedinego! Idikenumu enu añamba jaNzambi Wabadika!’
Chanedikiwu, wejima wawu hiyakumona neyi hiyanasukumiku. Mwanta hakuhosha nindi: ‘Nzambi yawaShadaraki, niMeshaki niAbedinego yalemi! Watemesha kañelu kindi kulonda ayipulwishi muloña hiyafukamina mukishi nakudifukula kudi nzambi wudi wejimaku chiña Nzambi yawu hohu.’
Komana ichi hichitalilu chachiwahi chakusha chikuhwelelu mudi Yehova chitwatela kwimbujolaku?
