Danyeli muWina WawaNyitupa
MPANJI 79
Danyeli muWina WawaNyitupa
LELWAME-E! Chinamwekani neyi kwiji Danyeli wudi mukukala kwakweni. Ilaña anyitupa hiyanakumukatishaku! Wuneluki muloña waweni? Hinyi wunamuumbili Danyeli imu mudi anyitupa ejimawa? Tutalenu chichidi.
Mwanta wakuBabiloni diyi iyala wejina daDariyusa. Wamukeña Danyeli nankashi muloña Danyeli wekala chiwahi nawa wukweti maana. Dariyusa hakumutonda Danyeli kwikala mukulumpi wakuyula muwanta windi. Ichi hichikuletesha amayala amakwawu kumutiyila Danyeli ichima, dichi hiyakwila ñane-e.
Hiyakuya kudi Dariyusa nakuhosha nawu: ‘Tunaditeji, Eyi mwanta netu watela kutuña nshimbi yakwila nawu hadi mafuku 30 kwosi muntu wukulomba kudi nzambi wacheñi hela muntu chiña kudeyi hohu, Eyi mwanta. Yowu muntu wukudikaña, chiña amuumbila mudi anyitupa.’ Dariyusa haneluki muloña waweni awantu chanakukeñelawu kutuña ilu lushimbiku. Ilaña hakutoñojoka nindi himaana amawahi, dichi hakusoneka ilu lushimbi. Ichi dinu nshimbi hiyakuyihimpaku.
Chineli Danyeli yeluki ilu lushimbi, hakuya kwitala dindi nakulomba neyi chelileñayi dikalu. Awantu atama elukili nawu Danyeli hakuleka kulomba kudi Yehovaku. Anatiyi kuwaha muloña chinamwekani neyi yitoñojoka yawu yakukeña kumujaha Danyeli yinakuzatika.
Chineli Mwanta Dariyusa yeluki muloña waweni awantu chakeñeleliwu kutuña ilu lushimbi, hakuneña nankashi. Ilaña hakutwesha kuhimpa ilu lushimbiku, dichi chiña ahani lusesa kulonda Danyeli amuumbili muwina wawanyitupa. Ilaña mwanta hakumuleja Danyeli nindi: ‘Nakuhweleli nami Nzambi yeyi yiwakalakelaña wukakuhandisha.’
Dariyusa hakuneña chakwila hamwenihu nitulu wuna wufukuku. Kwifuku dikwawu hakutemukila kuwina wawanyitupa. Wunatweshi kumumona ahana. Hakubilela nindi: ‘Danyeli kambuña Nzambi wahanda! Nzambi yeyi yiwakalakelaña natweshi kukuhandisha kudi anyitupa?’
Danyeli hakwakula nindi, ‘Nzambi watemesha kañelu kindi, najiki mutunwa twawanyitupa dichi hiyankatishaku.’
Mwanta hakutiya kuwaha nankashi. Hakuleja kulonda amwidishimu Danyeli muwina. Kulondelahu hakukwata amayala atama akeñeli kumujaha Danyeli hiyakuyumbila mudi anyitupa. Iku kanda ashiki nikwishina dawina, anyitupa hiyakuyikwata nakuyikotola mafwaha awu ejima.
Dichi Mwanta Dariyusa hakusonekela antu ejima amuwanta windi nindi: ‘Nashimu nshimbi nami muntu wejima watela kwovwahila Nzambi yaDanyeli. Welaña yihayamisha yamaneni. Wamuhandishili Danyeli hakubula kumudya kudi anyitupa.’
