MPANJI 81

Kukuhwelela Muwukwashu waNzambi

MAKOMBAKAJI awantu endeli lwendu lwalulehi lwakufuma kuBabiloni nakuya kuYerusalema. Chashikiliwu, kuwana Yerusalema yichidi yakisika chikupu. Kwosi muntu washakamañamuku. A Isarela atela kutuña yuma yejima cheñi.

Chuma chatachi chinatuñiwu hikameña. Idi hiluña datela kulambwilahu nyilambu yawanyama, hela chawaana kudi Yehova. Chimunahiti tukweji twantesha aIsarela hiyakutachika kutuña tembeli. Ilaña ayilumbu ashakamaña mwituña damukamwihi hiyanakukeña aIsarela atuñiku. Dichi hiyakweseka kuyitiyisha woma kulonda aleki kutuña. Nkumininaku awa ayilumbu hiyakumwila mwanta wamuha wawaPeresi kutuña lushimbi lwakulekesha mudimu wakutuña.

Yaaka chiyihita. Munahiti dehi yaaka 17 kufuma hafuminiwu aIsarela muBabiloni. Yehova hakutemesha atuprofwetu twindi aHagayi naZekariya kulonda kuleja antu kutachika kutuña cheñi. Antu hiyakukuhwelela muwukwashu waNzambi, nawa hiyakuyovwahila atuprofwetu. Hiyakutachika kutuña cheñi, hela tuhu lushimbi lwadiña nawu hiyatela kutuñaku.

Dichi nyuli kaPeresi wejina daTatenayi hakwinza nakuyihula aIsarela wuswa wuyakwetiwu wakutuña tembeli. A Isarela hiyakumuleja nawu chadiñawu muBabiloni Mwanta Kirusi wayilejeli nindi: ‘Yenu dinu kuYerusalema mukatuñi tembeli yaYehova Nzambi yenu.’

Tatenayi hakutemesha mukanda kuBabiloni nakwihula neyi chalala Kirusi, wafwa dehi neyi diyi wahosheli. Chakubula nikuhita mpinji mukanda wafumini kudi mwanta wamuha wawaPeresi. Mukanda hiwukulumbulula nawu chalala Kirusi wachihosheli. Dichi mwanta hakusoneka nindi: ‘Yilekenu aIsarela atuñi tembeli yaNzambi yawu. Nawa nayileji kulonda muyikwashiku.’ Kwakwihi nayaaka yiwana amanishili kutuña tembeli, dichi aIsarela hiyakutiya muzañalu nankashi.

Yaaka yayivulu chiyihita. Munahiti dehi kwakwihi nayaaka 48 nahiyakumishiliwu kutuña tembeli. Antu amuYerusalema hiyatuzweñi, musumba nitembeli yaNzambi hiyinakumwekana chiwahiku. Kwenakuna kuBabiloni, kaIsarela Ezera hakwiluka nindi tembeli yaNzambi yatela kuyiloñesha. Dichi wuneluki chuma chinakoñiyi?

Ezera hakuya kudi Aratasheshe mwanta wawaPeresi dichi iwu mwanta wamuwahi hakumwinka Ezera yawaana yayivulu yakutwala kuYerusalema. Ezera hakulomba aIsarela adi muBabiloni amukwashiku kusenda iyi yawaana kuyitwala kuYerusalema. Kwakwihi nawantu 6,000 hiyakwiteja nawu akuya. Akweti siliva niwuru wawuvulu nankashi niyuma yikwawu yawuseya yakusenda.

Ezera hakwakamena muloña mudi antu atama munjila. Awantu atela kuyitambula siliva niwuru wawu nakuyijaha. Dichi Ezera hakutambika antu ejima hamu neyi chiwunakumona hamwevulu. Dichi hiyakulomba kudi Yehova kulonda ayikiñi halwendu lwawu lwakufunta kuYerusalema.

Yehova hakuyikiña. Hanyima yakwenda tukweji tuwana, hiyakushika chiwahi kuYerusalema. Ichi komana hichinakumwekesha nawu Yehova watela kukiña antu akumukuhwelela nakukeña wukwashuku?

Ezera kapetulu 2 nakushika ku 8.