MPANJI 82

Modekayi naEsita

TUFUNTENU hanyima yayaaka yantesha hohu henohu Ezera kanda ayi kuYerusalema. Modekayi naEsita diwu aIsarela alema nankashi muwanta wawaPeresi. Esita diyi mwadi, musonyindi Modekayi diyi chinlonda chamwanta. Tutalenu chichadiña.

Anvwali jaEsita afwili henohu wuchidi wanyanya, dichi Modekayi hakumukulisha. Mwanta wawaPeresi Ahasuwerusi wukweti chipañu mumusumba waShushani, nawa Modekayi hiwumu hadi añamba jindi. Ifuku dimu Vashitayi iñoda mwanta hamwovwahililiku, dichi mwanta hakutonda mumbanda wamuha kwikala mwadi windi. Wuneluki mumbanda wunatondiyi? Eña, natondi chañadima walubanji Esita.

Wunamumoni iwu iyala wadivwimba wunakufukaminawu antu? Diyi Hamani. Himuntu walema nankashi muPeresi. Hamani nakukeña Modekayi yiwunakumona wunashakami aha, nindi niyena amufukamini. Ilaña Modekayi hakuchilaku. Neluki nindi hichachiwahi kufukamina muntu watama chochichiku. Ichi hichikumuhilisha Hamani nankashi. Dichi hakwila ñane-e.

Hamani hakumuleja mwanta nsañu yamakudi hadi aIsarela. Hakuhosha nindi, ‘Hiyantu atama hiyovwahilaña nshimbi jeyiku. Atela kuyijaha.’ Ahasuwerusi haneluki nindi iñodindi Esita hikaIsarelaku. Dichi hakumutiyilila Hamani, hakusha lushimbi lwakwila nawu ifuku dimu aIsarela ejima akayijahi.

Modekayi chanatiyiyi ilu lushimbi hakuneña nankashi. Hakumutemeshela Esita mazu nindi: ‘Chiña wumulejimu mwanta, nawa wumulombi kulonda atupulwishi.’ Kwesekeja nanshimbi yawaPeresi chaluwa kuya nakudimona namwanta neyi hanakutambikiku. Ilaña Esita hakuya chakubula kumutambika. Mwanta hakumwolwela mbwechi yindi yawuru, chinakumwekesha nawu hiyatela kumujahaku. Esita hakutambika mwanta niHamani kuchawija cheneni. Kwenakuna mwanta hakumwihula Esita wuselewa wanakukeñayi kudi mwanta. Esita hakumwila nindi wukumuleja neyi yena niHamani akenza kuchawija chikwawu kwifuku dekwawu.

Hachina chawija Esita hakumuleja mwanta nindi: ‘Antu jami ninami akatujaha.’ Mwanta hakuzuwa. Hakwihula nindi, ‘Hinyi wabula woma wukwila chuma chamuchidiwu?’

Esita hakuhosha nindi, ‘Iyala chilumbu, yoyeniwu Hamani watamiwu!’

Ichi dinu mwanta nazuwi chikupu. Hakuleja kulonda amujahi Hamani. Hanyima yanichi, mwanta hakumwilisha Modekayi kwikala chinlonda chindi. Modekayi hakumona kwila nawu nshimbi yayiha yinatuñewi yakwiteja aIsarela kudilwila awenawu hefuku datela kuyijahawu. Muloña wakwila Modekayi himuntu walema, antu amavulu hiyakuyikwasha aIsarela, nawa hiyakuyipulwisha kudi ayilumbu jawu.

Mukanda wamuBayibolu waEsita.