MPANJI 83

Mpwembu yaYerusalema

TALAÑA mudimu wejima wunakuzatewa ahanu. A Isarela adi namudimu weneni wakutuña mpwembu yaYerusalema. Hampinji Mwanta Nebukaneza yakisañeniyi Yerusalema yaaka 152 yinahitihu, wahumwini mpwembu nakwocha niyinsu yamusumba. Hampinji yafuminiwu muBabiloni aIsarela hiyasambilili kutuña mpwembu cheñiku.

Wunatoñojoki neyi antu atiyili ñahi kushakama yaaka yejimiyi mumusumba wawu wakadi mpwembu? Antu atiyileña neyi hiyakiñewaku. Ayilumbu jawu atela kwinza nakuyilukuka chakadi nikukala. Ichi dinu iwu iyala Nehemiya nakuyikwasha antu kutuña mpwembu cheñi. Wunamwiluki Nehemiya?

Nehemiya hikaIsarela wunafumi kumusumba waShushani, kwashakamaña Modekayi naEsita. Nehemiya wazatileña muchipañu chamwanta, dichi watela wadiña ibwambu wamuwahi waModekayi niMwadi Esita. Ilaña Bayibolu hiyahoshahu nawu Nehemiya wazatileña kudi nfumwa Esita, Mwanta Ahasuwerusiku. Wazatileña kudi mwanta walondelelihu, Mwanta Aratasheshe.

Anukaku Aratasheshe himwanta wamuwahi wamwinkeli Ezera mali ejima akutwala kuYerusalema nakuwahisha nachu tembeli yaYehova. Ilaña Ezera hatuñili mpwembu yamusumba yahumokeliku. Tutalenu chichadiña hakwila nawu Nehemiya akoñi iwu mudimu.

Munahiti dehi yaaka 13 kufuma hamwinkeliyi Aratasheshe Ezera mali akuloñesha nachu tembeli. Nehemiya diyi mukulumpi mukwakutwala lupasa kudi Mwanta Aratasheshe. Chinayi mukwila nawu wamwinkaña mwanta vinyu, nawa wamonaña kwila nawu kwosi muntu wukumushilamu mwanta wulembi. Himudimu walema nankashi.

Ifuku dimu mana kwa Nehemiya Hanani niamayala amakwawu afumini kwituña daIsarela nakumuhempula Nehemiya. Hiyakumulejamu kukala kukwetiwu aIsarela, ninochu mpwembu yaYerusalema chiyidi yahumuka. Ichi hichikumuneñesha Nehemiya nankashi, dichi hakulomba kudi Yehova haniyi nsañu.

Ifuku dimu mwanta hakumona neyi Nehemiya naneñi, hakumwihula nindi: ‘Muloñadi chiwunaneñeli?’ Nehemiya hakumuleja nindi muloña Yerusalema hiyidi chiwahiku nimpwembu yahumuka dehi. Mwanta hakumwihula nindi, ‘Wunakukeña chumanyi?’

Nehemiya hakwakula nindi: ‘Ñiteji niyi kuYerusalema kulonda nikatuñululi mpwembu.’ Mwanta Aratasheshe wukweti luwi nankashi. Hakumwiteja Nehemiya nindi ayi, nawa hakumukwashaku kusenda nyitondu yakutuña nachu. Chakubula kuhita mpinji Nehemiya chanenziyi kuYerusalema, hakuyileja antu yitoñojoka yindi. Hiyakutiya kuwaha nayitoñojoka yeniyi, dichi hiyakuhosha nawu: ‘Twayenu tutachiki kutuña.’

Chinamoniwu ayilumbu jawaIsarela nawu mpwembu anakuyituña, hiyakuhosha nawu: ‘Tukukanduka tukayijahi, tukayikañeshi kutuña.’ Ilaña Nehemiya hakuchitiya, hakuyinka akwakukalakala mpoku jatubali nimayoña. Hakuhosha nindi: ‘Bayi muchina ayilumbu jenuku. Lwilenu ana kwenu, nianyanenu, niañodijenu nimatalenu.’

Antu hiyakumika nankashi. Hiyakuhemba yitwa yawu nimwaana niwufuku, nawa hiyakutwalekahu nakutuña. Dichi mumafuku 52 hohu mpwembu hiyikumana. Ichi dinu antu hiyakutulisha nyichima yawu mukachi kamusumba. Nehemiya naEzera hiyakutañisha antu nshimbi jaNzambi, nawa antu adi namuzañalu.

Ilaña yuma hiyidi neyi chiyadiña henohu aIsarela kanda ayisendi muwunkoli kuBabiloniku. Antu anakuyiyula kudi mwanta wawaPeresi nawa atela kumuzatila. Ilaña Yehova hakukana nindi wukatemesha mwanta wamuha, nawa nindi iwu mwanta wukaleta kuwunda kudantu. Indi iwu mwanta hinyi? Wukaleta ñahi kuwunda hamaseki? Himukuhita kwakwihi nayaaka 450 henohu yuma yikwawu kanda yilukewi hadi ichi. Dichi kukwikala kuvwalika kwalema nankashi kwamukeki. Ilaña iyi hinsañu yikwawu.

Nehemiya kapetulu 1 nakushika ku 6.