Nsona Hambañu
MPANJI 78
Nsona Hambañu
CHUMANYI chinakumwekana ahanu? Antu anakudya chawija cheneni. Mwanta wakuBabiloni natambiki ikombakaji dawenyi alema. Anakuzatisha malupasa awuru niasiliva nijimbashila jafumishiliwu mutembeli yaYehova muYerusalema. Ilaña, kukashimuka, nyinu yachikasa chamuntu hiyikumwekana mumpepela nakutachika kusoneka hambañu. Wejima wawu hiyakuchina.
Ichi Beleshaza, mwijukulwa Nebukaneza diyi mwanta. Hakubidika kulonda amutambikili akwamaana enzi. Mwanta hakuhosha nindi, ‘Yowu muntu wukutaña iji nsona nakunleja chijalumbuluka, nukumwinka yawaana yayivulu nawa wukwikala muntu wamuchisatu mukulema muwanta.’ Ilaña kwosi hela mukwamaana niwumu wunatweshi kutaña nsona jidi hambañu, hela kwiluka mujaya.
Mama yamwanta hakutiya ipumba hakwinza mukapeka keneni kakudyila. Hakumuleja mwanta nindi, ‘Bayi wutiya womaku. Muwanta weyi mudi muntu weluka anzambi ajila. Chadiñayi nkaaka yeyi Nebukaneza hawanta wamwilishili kwikala mukulumpi wawakwamaana ejima. Ijina dindi diyi Danyeli. Mutambiki wukukuleja mujalumbulukila jejimiji.’
Hohenohu Danyeli hiyakumuleta. Hanyima yakukana kutambula yawaana, Danyeli hakumuleja muloña wamufumishiliwu nkaaka yaBeleshaza Nebukaneza hawanta kudi Yehova. Danyeli hakuhosha nindi, ‘Wadiña wadivwimba nankashi. Dichi Yehova wamubabesheli.’
Danyeli hakumuleja Beleshaza nindi, ‘Ilaña eyi, weluka jejima jamumwekeneni, ilaña wuchidi wadivwimba neyi chochadiña Nebukaneza. Wunaleti malupasa nijimbashila jamutembeli yaYehova nakunwinamu. Wunahameki anzambi akwila nanyitondu ninamalola, nawa hiwunalemeshi Nleñi yetu Muneniku. Dimuloña waweni wunatemesheliyi Nzambi chikasa nakusoneka awa mazu.’
Danyeli hakuhosha nindi: ‘Ichi dichinasonekiwu, MENE, MENE, TEKELI niUPARISINI.’
‘MENE chayamukwila nawu Nzambi nachindi dehi mafuku awanta weyi nawa nawukumishi dehi. TEKELI chayamukwila nawu anakupezeleshi dehi hapezu nawa hiwunashikili mwoku. UPARISINI chayamukwila nawu wanta weyi anawuhani kudi aMediya nawaPeresi.’
Hela chadiña nakuhoshayi Danyeli, aMediya nawaPeresi adiña atachika dehi kulukuka Babiloni. Hiyakutambula musumba nakumujaha Beleshaza. Nsona jahambañu hijikwikala jalala wufuku wenowu! Indi dinu chumanyi chikuyimwekena aIsarela? Katataka keña twiluki, ilaña tusambilenu kutala chikumumwekena Danyeli.
