MPANJI 116

Ochitwatela Kushakama Haya Nyaka

WUNAWILUKI mukanda wunakutañayi iwu kansi wamumbanda niamabwambu jindi? Eña, diyoweniwu mukanda yiwunakutaña—Mukanda Wami waMpanji Jamu Bayibolu. Nawa anakutaña yoyeniyi mpanji yiwunakutaña—“Ochitwatela Kushakama Haya Nyaka.”

Wuneluki chuma chinakudizawu? Chatachi, neyi tunakukeña kushakama haya nyaka twatela kumwiluka Yehova niMwanindi Yesu. Bayibolu yahoshaña nawu: ‘Iyi diyi njila yaya kuwumi wahaya nyaka. Dizaku hadi Nzambi walala wumu hohu, niMwanindi watemesheliyi hamaseki, Yesu Kristu.’

Tunatweshi kudiza ñahi hadi Yehova Nzambi niMwanindi Yesu? Njila yimu yowu kutaña Mukanda Wami waMpanji Jamu Bayibolu kufuma kutachi nakushika kunsa. Washimunaña yuma yayivulu hadi Yehova niYesu, netuku? Nawa washimunaña nsañu yayivulu hayuma yineliwu nihayuma yamba kelawu. Ilaña tunakukeña kwila yuma yayivulu kubadika hakutaña hohu iwu mukanda.

Wunawumoni mukanda wukwawu wudi heseki? HiBayibolu. Lejaku muntu wumu yakutañili yinkunku yamuBayibolu hanashindameni mpanji yaniwu mukanda. Bayibolu yatwinkaña nsañu yashikilamu yitwakeñaña hakwila nawu tumukalakeli Yehova munjila yayiwahi nakutambula wumi wahaya nyaka. Dichi twatela kwikala nachaaku chakutañaña Bayibolu mpinji yejima.

Ilaña kudiza hohu hadi Yehova Nzambi niYesu Kristu hichinashikiliku. Tunatweshi kuyiluka nankashi nintañishilu yawu, ilaña kuheta wumi wahaya nyaka nehi. Wuneluki chuma chikwawu chinakukeñeka?

Tunakukeñeka kushakama kwesekeja nayuma yitunakudiza. Wunakumwanuka Yudasi Isakaroti? Wadiña hakachi kanana 12 atondeliyi Yesu kwikala apostolu indi. Yudasi welukili yuma yayivulu hadi Yehova niYesu. Ilaña chumanyi chamumwekeneni? Mukuhita kwampinji yantesha watiyili lwisu, dichi wamufukejeli Yesu kudi ayilumbu jindi namali 30 asiliva. Dichi Yudasi hakekala nawumi wahaya nyakaku.

Wunakumwanuka Gehazi, iyala wutwadizili muMpanji 69? Wakeñeli kwikala nayikovwelu nimali abulili kwikala indi. Dichi washimwini makudi hakutambula iyi yuma. Yehova wamubabesheli. Nawa wukatubabesha ninetu nawa neyi hitukwovwahila nshimbi jindiku.

Ilaña kudi antu amawahi amavulu owu amukalakeleli Yehova nakashinshi mpinji yejima. Tunakukeña kwikala neyi wena, netuku? Kansi Samweli hichakutalilaku chachiwahi chitwatela kwimbujola. Anukaku, neyi chitwadizili muMpanji 55, wadiña hohu nayaaka yiwana hela yitanu yakusemuka hatachikiliyi kumukalakela Yehova hatabanaka yindi. Hichidi namuloña wawansi weyiku, wunatweshi kumuzatila Yehova hela chakwila wuchidi kansi.

Eña, muntu yitunakukeña kwimbujola wejima wetu yowu Yesu Kristu. Hela chadiñayi kansi, neyi chinamwekeshiwu muMpanji 87, wadiña muna mutembeli nakuhosha nawantu amakwawu hadi Tata yindi wamwiwulu. Twimbujolenu chakutalilaku chindi. Twayenu tulejenu antu amavulu nankashi hadi Yehova Nzambi yetu wamuwahi nihadi Mwanindi Yesu Kristu. Neyi tukwila iyi yuma, dikwila nawu tukashakama haya nyaka muparadisa yayiha yaNzambi hamaseki.

Yowanu 17:3; Masamu 145:1-21.