MPANJI 115

Paradisa Yayiha Hamaseki

TALAÑA ayina nyitondu yayilehi, ninkenu yayiwahi nimpidi jajilehi. Komana ahanu hihanakumwekana chiwahiku? Talaña mbaala chinakudyilayi muchikasa chakansi weyala. Nawa talaña anyitupa niatuwalu chanemaniwu kuna kumatahu. Komana hiwunakukeña kushakama mwitala didi mwiluña damuchidiwuku?

Nzambi nakukeña eyi wukashakami haya nyaka muparadisa hamaseki. Nawa hanakukeña eyi kwikala nayikatu neyi yinakwabawu antu makonuku. Iku dikushiika kwaBayibolu kudi ana akashakama muparadisa yayiha: ‘Nzambi wukekala nawu. Hikwakekala cheñi kufwaku hela kudila hela kukataku. Yuma yakusambila yinahiti.’

Yesu wukamona kwila nindi iku kuhimpika kwakuwahi kunamwekani. Wunayiluki oyu mpinji? Eña, hanyima yakufumishahu kutama kwejima hamaseki niantu atama. Anukaku, chadiñayi Yesu hanu hamaseki wokili antu adiña nanyisoñu yejima, wasañwili niantu kufuma kudi afu. Yesu welili mwenimu kulonda kumwekesha chuma chakelayi hamaseki neyi nekali dehi Mwanta wawanta waNzambi.

Toñojokaku okuwaha kwakekala muparadisa yayiha hamaseki! Yesu hamu nanowu atondayi, akayulilaña mwiwulu. Awa anlomboli akahembaña antu ejima hamaseki nakumona kwila nawu antu ejima adi namuzañalu. Tutalenu chuma chitunateli kwila hakwila nawu Nzambi akatwinki wumi wahaya nyaka muparadisa yayiha.

Chimwekeshu 21:3, 4; 5:9, 10; 14:1-3.