Dauda wakuSierra Leone wahosheli nindi: “Nakulilili mumukala wanyanya wakukabeta kaluwunda. Hampinji yinadiña kampululu, kwedikili ntaadi yakufwilañena mpata hakachi kachisaka chetu nachisaka chikwawu. Yisaka yejima yiyedi yafwilileña mpata yimu. Hakwila nawu ahakuli muloña, atambikili chimbuki. Chimbuki yeniwu wenkeli muntu wumi chibanjilu, kufumahu wamubutili ihina ditooka. Chakubula nikunata mpinji muntu yabutiluwu mwihina watachikili kuzaala nikusulwila. Chelili nindi yatali muchibanjilu, wabidikili nindi: ‘Namoni kashinakaji weyala nakwinza! Navwali mahina atooka. Wamulehi, nawa hikashinakaji, wukweti invu nawa nakwenda iku nabandami chanti.’

“Wadiña nakulumbulula mmwekenu yaNkaaka weyala. Dichi watiyili woma nankashi nakubidika nindi: ‘Neyi munakuhweleli wanyi jinakuhosha, twayenu mudimweni!’ Ilaña hakachi ketu kwosi wadiña nawulobu wakwila mwenimu. Chimbuki wamuwundishili kuhitila mukumusampwila nsompu yashiliyi munswaha.

“‘Nkaaka Weyala’ wadiña muchibanjilu wahosheli nindi, mpata yeniyi yadiña yachisaka chetu. Wamulejeli nkaaka wamumbanda nindi, watela kuzata muniyi mpata chakubula kwakamena. Chisaka chikwawu chetejeli mwenimu. Dichamanini nsañu.”

 Yakuhumañana yamuchidiwu yavula kuzatika kuWest Africa. Kunidi iluña, hamu tuhu namaluña amakwawu amukaayi, yihita yawantu yakuhwelela nawu afu ayaña mwituña dawaspiritu, nawa nawu atweshaña kushinshika nikuluwañesha chihandilu chawantu hamaseki. Komana iyi yitoñojoka yalala? Komana afu chalala ekala amomi? Neyi hiyekala amomuku, hiyanyi adilishaña kwikala aspiritu awafu? Chalema nankashi kwiluka ñakwilu yalala yanawa malwihu. Hinsañu yimu yalema chikupu.