Bayibolu yahosha nawu Satana “wadimbaña antu ampata yamunu mwishina ejima.” (Chimwekeshu 12:9) Satana niandemoni jindi hiyakeñaña nawu tukuhweleli Izu daNzambi Bayiboluku. Afwilaña kwilisha antu kukuhwelela nawu afu ekala amomi kwiluña dimu muwanta wawaspiritu. Tutalenu chiyelañawu mwenimu.

Nsakililu yayivulu yatañishaña nawu antu ejima akweti wumi wayaña muwanta wawaspiritu hanyima yakufwa kwamujimba. Ahoshaña nawu mujimba wafwaña hakwila wumi hiwafwañaku. Cheñi ahoshaña chikupu nawu, wumi hiwunateli kufwaku.

Ilaña Izu daNzambi hidatañishaña mwenimuku. Bayibolu yashimunaña nawu wumi himuntu, bayi neyi hichuma chekala mukachi kamuntuku. Chakutalilahu, hakulumbulula chamuleñeluwu Adama, Bayibolu yahosha nawu: ‘Yehova Nzambi wawumbili muntu nalunkuñu lwamaseki, woneneni mumazulu indi muuya wawumi muntu hakwikala mumi.’ (Kutachika 2:7) Dichi Adama hiyamwinkeli wumiku; muloña wadiña wumi.

 Atunyama niwena ayitenaña nawu hiwumi.—Kutachika 1:20, 21, 24, 30.

Chineli izu dazatishawu muBayibolu nawu “wumi” dalumbulula muntu yomweni, hichinateli kutuhayamishaku hakwiluka nawu wumi wafwaña. Nsona jahosha nawu:

• ‘Kukuula wumi wambanji wudi nachitela chakufwa nehi, chiña kumujaha hohu.’—Kuchinda 35:31.

• ‘Kulonda kupulwisha wumi wawu mukufwa, kulonda kuyihandisha hamwaka wanzala.’—Masamu 33:19.

• ‘Muloña wunapulwishi wumi wami mukufwa; hiwunahembi nyendu yami yibuli kudimbukaku? Kulonda nendi kumesu aNzambi muchejeji chawakwakuhanda.’—Masamu 56:13.

Nsona jikwawu jamwekesha nawu wumi anateli kuwijaha (Ezekeli 22:27), kuwijaha nampoku yakabali (Masamu 22:20a), kuwikudika (Yoba 7:15), nikujiya mumenji (Yona 2:5). Dikwila nawu wumi wafwaña.

Neyi mutaña Bayibolu kufuma kumatachikilu nakushika nikunsa, himwamba kawana mazu akwila nawu “wumi wakafwañaku.”  Wumi wamuntu bayi neyi hispirituku. Ntañishilu yawumi wakafwaña hintañishilu yamuBayiboluku. Hintañishilu yaSatana niandemoni jindi. Yehova wahela makudi ejima ansakililu.—Yishimu 6:16-19; 1 Timotewu 4:1, 2.

Njila yikwawu yadimbilañamu Satana antu yekala yakuhitila mudi antu azakukaña akishi. Muntu wazakukaña akishi watambulaña nsañu kufuma kwituña dawaspiritu. Antu amavulu ninowu azakukaña akishi akuhwelela nawu nsañu jeniji jafumaña kudi aspiritu awafu. Ilaña neyi chitunamoni muBayibolu, chumichi hichinateli kutweshekaku.—Mukwakutaŋisha 9:5, 6, 10.

Indi nsañu jeniji jafumaña kudanyi? Jafumaña kudi andemoni! Andemoni anatweshi kushinshika muntu hampinji yachidiyi wamumi, eluka chahosheleñayi, chamwekeneñayi, yuma yakoñeleñayi niyuma yelukiliyi. Dichi chayipelelaña kwimbujola afu.—1 Samweli 28:3-19.

Njila yikwawu Satana yanyamwinañamu kutwamba kutalisha hadi afu hikuhitila munsañu yakutwamba. Kakavulu nsañu yamuchidiwu yafumishaña antu munsañu yalala yamuBayibolu.—2 Timotewu 4:4.

 MuAfrica mwekala twanu twatuvulu twawantu yamwenuwu amomi hanyima yakufwa kwawu. Kakavulu nsañu yamuchidiwu ayishimwinaña kwakulehi nakwashakamineñayi muntu. Ilaña dihuli neyi: ‘Komana chekala chamaana kwila nawu, neyi muntu wadiña nawuswa wakusañuka, wadi kufuntila kwiluña dadilehi nakwashakaminaña chisaka niamabwambu jindi?’

Cheñi nawa, hichinateli kwikala nawu muntu yamwenuwu wakumina dakudifwana namuntu wafwiluku? Chakutalilahu, eniKrisitu ayedi adiña nakushimwina mumukala wumu amweni kashinakaji weyala wadiña nakuyilondela hampinji yayilehi. Chamwihwiluwu elukili nawu, muntu yeniwu watoñojokeleña nindi wumu hakachi kawu wadiñi manakwindi wafwili dehi hanyaka. Kafwampi watoñojokeli mwakutwamba, ilaña wakanini kukuhwelela nindi watwambileña. Toñojokenu nsañu yalejeliyi amabwambu niatuñi nindi ona kashinakaji weyala!

Chakubula nikujinooka, mweluka nsañu yakala kutiyishisha yamonawu dehi antu, yatiyawu dehi hela yalotawu dehi. Yakuhumañana  yamuchidiwu kakavulu yatiyishaña woma antu ayimonaña. Marein, wakuWest Africa, mpinji yejima wadiña nakutiya izu dankaaka yindi wamumbanda wafwili dehi dadiñi nakumutambeka nampinji yawufuku. Marein watiyileña woma, wadiña nakubilela, nakuhindwisha antu amwitala ejima. Nkumininaku, wazalukili.

Dichi neyi afu ekala amomi, komana chikwikala chachiwahi kuchinisha antu yakeñawu? Kwakulehi. Nsañu yakukabisha yamuchidiwu yafumaña kudi andemoni.

Ndochu nsañu yamwekanaña neyi yinateli kutukwasha? Chakutalilahu, Gbassay wakuSierra Leone wadiñi wakata. Mumbanda yeniwu waloteli tata yindi wafwili dehi. Tata yindi wamulejeli kwanda ifu damutondu wumu nakudinka mumenji nakunwa. Hateleleli kulejaku muntu wudi wejima sampu nakoñi mwenimuku. Wakoñeli mwenimu nawa wakoleli.

Mumbanda mukwawu wahosheli nindi wamumweni nfumwindi nawufuku henohu wafwili dehi. Wahosheli nindi wamwekeni chiwahi nankashi nawa wavwalili yikowelu yayiwahi.

Nsañu yamuchidiwu niyimwenu yamwekanaña neyi yayiwahi nawa neyi yakwashanaña. Komana yafumaña kudi Nzambi?  Inehi. Yehova ‘hiNzambi wansañu yalala.’ (Masamu 31:5) Hamba keteja kutwila kafuta hela kutudimbaku. Andemoni hohu diwu elaña mwenimu.

Komana kwekalaku andemoni amawahi? Inehi. Hela chakwila amwekanaña neyi akwashanaña hampinji jikwawu, wejima wawu atama. Hampinji yahosheliyi Diyabolu naEvu, wamwekeni neyi himuntu wamuwahi. (Kutachika 3:1) Hanu dinu, chumanyi chafuminumu hanyima yakwila Evu namutiyilili nakwila yuma yamulejeliyi? Evu wafwili.

Mweluka nenu hichavula kudi muntu watama kwikala chiwahi nanana yanakukeña kuluwañesha nikuyidimbaku. Chishimu chaLunda chahosha nawu, “Wubwambu kumesu komana kumuchima kwekala kafunda.” Izu daNzambi dahosha nawu: “Yomweni Satana wadifwikijaña neyi kañelu kachejeji.”—2 Akorinda 11:14.

Nzambi hahoshaña nawantu hamaseki kuhitila muyilota, yimwenu, hela mazu akufuma mwituña dawaspirituku. Wayilombolaña nakuyileja kuhitila muBayibolu, yinateli kuletesha muntu “awanini chikupu, awahili nyidimu yayiwahi yejima.”—2 Timotewu 3:17.

Dichi neyi Yehova yatusoñamisha hatufuta twaDiyabolu, welaña mwenimu muloña watwikeña. Weluka nindi andemoni hiyayilumbu afwana.