Wejima wetu twatela kufuukulahu, kumukalakela Yehova hela Satana niandemoni jindi. Hitwatela kukalakela Yehova niSatanaku. Chikusweja kuwaha neyi tukumukalakela Yehova!

Neyi chitunadizi, andemoni atiyaña kuwaha kukatisha nikudimba antu. Yehova hekala ñanaku. Yehova wakeña muchidi wamuntu neyi tata yawantu chakeñayi anyanindi. Himukwakuhana ‘yuma yayiwahi yejima, niyamukunkulu yalala yejima.’ (Yakoba 1:17) Kwosi nichuma chachiwahi nichimu chominañayi muchidi wamuntu, hela tuhu chamuswejela wuseya.—Aefwesesa 2:4-7.

Toñojokenu yuma yakoñeliyi Yesu Mwana kaNzambi. Watonesheli mesu awamputamesu nikwilisha atumama kuhosha. Wokili akwambumba niayifwayi. Wafumishili andemoni nikuuka nyichidi yejima yayikatu. Yesu wasañwili afu kuhitila muñovu jaNzambi.—Matewu 9:32-35; 15:30, 31; Luka 7:11-15.

Chatela yashimuni makasu kulonda kutudimba, Nzambi wahoshaña walala mpinji  yejima nawa hadimbaña muntu wudi wejimaku.—Kuchinda 23:19.

Yihita yawantu ayikwata chikupu nansañu jakupanda nintwambi neyi chochafwaña njinji muwandanda. Achinaña afu niandemoni. Atiyaña woma mashiñu, nyikalu, mpelu niyijimba. Akasika chikupu kutushidikilu niyisemwa yashindamena hantwambi jaSatana Diyabolu. Ambuña Nzambi hiyafwaña mumuhetu waniyi yuma yejimaku.

Yehova wukweti ñovu chikupu kubadika Satana. Neyi wumukalakela Yehova wukukukiña kudi andemoni. (Yakoba 4:7) Nyikayi hiyinateli kuzatika hadeyuku. Chakutalilahu, muNigeria ayimbuki asatu asweja ñovu akayili Chinsahu chaYehova wakanini kufuma mumbaka kulonda kumujaha. Chelili nyikayi yikañanyi kumujaha, wumu hakachi kawayimbuki watiyili woma nawa wayili kudi Chinsahu nakumulomba nindi yamwanakeni.

Neyi chakwila andemoni akuyandisha, wunateli kumutambika Yehova hejina nawa wukukukwasha. (Yishimu 18:10) Hakwila nawu Nzambi yakukiñi, watela kuleka chikupu yuma yejima yakundama kuwaña nikudifukula kudi andemoni. Akwakudifukula aNzambi amuEfwesesa wakunyaka elili mwenimu. Apompesheli nyikanda yawu yejima yahosha hajakupanda nakuyocha. (Yililu 19: 19, 20) Ambuña aNzambi makonu atela kwila momumu. Tondolwelaku yijimba, nyikalu, nyiya “yakudikiña nachu,” mpelu, nyikanda yahosha hakupanda niyuma yidi yejima yakundama kukupanda.

Neyi wunakukeña kumuzañalesha Nzambi, bayi neyi watela hohu kuleka kudifukula kwakutwamba nakuleka kwila  yuma yatamaku. Watela kudibomba chikupu mukudifukula kwalala. Bayibolu yamwekeshaña yuma yakeñekaña:

Satana niandemoni akweti antu hamaseki atañishaña nikukoña yuma yatama. Ilaña Yehova niyena wukweti antu. Antu wenawa hiyaYinsahu jaYehova. (Isaya 43:10) Kunyeñumuka mwahita iseki dejima, mwekala aYinsahu kubadika hayihita yitanu nachimu. Wejima wawu azataña nañovu kulonda kwila yuma yayiwahi nikutañisha antu chalala. Mumatuña amavulu munateli kuyiwana Hetala daWanta, henaha akuyitambwila namuzañalu chikupu.

Mudimu wawu wakukwasha antu amakwawu kumukalakela Nzambi. Anateli kudiza nanenu Bayibolu mwitala denu, nakuyikwasha kudiza chimwatela kudifukula kudi Yehova munjila yayiwahi. Himwatela kufweta hakudiza kwenikuku. A Yinsahu atiyaña kuwaha kudizisha chalala muloña akeña antu nawa amukeña Yehova Nzambi.