1, 2. Bayibolu yekala ñahi chawaana chachiwahi chafuma kudi Nzambi?

MWATIYAÑA ñahi neyi ibwambu denu yayinka chawaana? Mukutiya kuwaha nankashi muloña nenu ibwambu denu wayikeña. Mukumusakilila hachawaana chinayinkiyi.

² Bayibolu hichawaana kufuma kudi Nzambi. Mwekala nsañu yitukubula kuwana kudi kwejima. Chakutalilahu, yatulejaña nawu Nzambi waleñeli mawulu, maseki, iyala watachi nimumbanda. Mwekala nshimbi yatukwashaña neyi tudi mukukala. MuBayibolu dimu twadizaña chakashikijayi Nzambi nkeñelu yindi yakuwahisha iseki. Bayibolu hichawaana chachiwahi chikupu!

3. Mukwilukadi chimukudizaña Bayibolu?

³ Chimukudizaña Bayibolu, mukwiluka nenu Nzambi nakukeña nindi mwiikali ibwambu dindi. Neyi mutwalekahu kumwiluka, wubwambu wenu wukukola chikupu.

4. Chumanyi chayitiyishaña kuwaha haBayibolu?

⁴ Bayibolu anayibalumuni mumadimi akushika ku 2,600, nawa anapulinti makopi amavulu chikupu. Antu amavulu mukaayi atañaña Bayibolu mwidimi dawu. Nawa mulungu nimulungu, antu akubadika hamiliyoni atambulaña Bayibolu. Mwamweni, kwosi mukanda wukwawu wudi neyi Bayibolu.

5. Muloñadi wutukuhoshela netu Bayibolu “ayonena kudi Nzambi”?

⁵ Bayibolu “ayonena kudi Nzambi.” (Tañenu 2 Timotewu 3:16.) Ilaña antu amakwawu ahoshaña nawu,  ‘Bayibolu ayisonekeli kudi antu, hanu dinu yafuma ñahi kudi Nzambi?’ Bayibolu yakula nawu: “Antu ahosheleña jafumineña kudi Nzambi kwesekeja nachayilombweliwu naspiritu yajila.” (2 Petulu 1:21) Chidi neyi nkaaka yawantu wunakuleja mwijikulwindi kumusonekela mukanda. Hinyi mwini mukanda? Nkaaka yindi bayi mwijikuluku. Munjila yoyimu, Nsoneki yaBayibolu hiNzambi, bayi antu asonekeliku. Nzambi wayikwashili asoneki yitoñojoka yindi. Mwamweni Bayibolu ‘hiizu daNzambi.’—1 Atesalonika 2:13; talenu Mazu Adi Kunsa 2.

6, 7. Muloñadi chitukuhoshela netu Bayibolu yanuñañana?

⁶ Mwahitili yaaka kubadika ha 1,600 hakwila amanishi kusoneka Bayibolu. Antu ayisonekeli ashakamini hampinji  yashiyashana. Amakwawu adiña ataña ilaña amakwawu nehi. Chakutalilahu, wumu wadiña ndotolu. Amakwawu adiña andimi, ayibinda ashi, atubiña, atuprofwetu, ansompeshi nianyanta. Hela ansoneki adiña ashiyashana, Bayibolu yanuñañana. Hiyahosha nsañu yimu mukapetulu yambuka nayidi mukapetulu kakwawuku. *

⁷ Tupetulu twatachi twamuBayibolu twashimuna chatachikili makabi nawa twakukumishaku twashimuna chakamanishayi Yehova awa makabi kuhitila mukwilisha iseki kwikala paradisa. MuBayibolu mwekala nsañu yachihandilu chawantu adiñaku kunyima nawa yamwekeshaña nawu nkeñelu yaNzambi yashikijewaña.

8. Shimunenu yakutalilahu yinakumwekesha nawu Bayibolu yahosha mwalala hansañu jasayansi.

⁸ Bayibolu hiyayisonekeli nawu yidizisheña antu sayansi hela kwikala mukanda wakushikolaku, ilaña yahosha mwalala hansañu yasayansi. Dichatela kwikala mukanda wafuma kudi Nzambi. Chakutalilahu, mumukanda waAlevi mwekala nshimbi jaNzambi jayilejeliwu aIsarela chatela kubula kutandishawu yikatu. Iyi nsañu ayisonekeli henohu antu kanda eluki tububu chitwaletaña yikatu. Bayibolu yahosha cheñi nawu iseki adikudika hamukunkulwayi. (Yoba 26:7) Nawa hampinji yelukiliwu antu amavulu nawu iseki dekala desekana, Bayibolu yahosheli nawu danjiñumuki.—Isaya 40:22.

9. Kashinshi kawansoneki aBayibolu katukwashaña kwilukadi?

⁹ Neyi Bayibolu yishimuna nsañu yakunyaaka, yahoshaña mwalala. Ilaña nyikanda yayivulu yashimuna nsañu yakunyaaka yalala wanyi muloña ansoneki  adiña ashinshika wanyi. Chakutalilahu, hiyasonekeleña chayishindileñawu kunjitaku. Kwambukaku, ansoneki aBayibolu adiña ashinshika, ashimuna nichayishindiliwu aIsarela. Asonekeli cheñi nihayiluwa yawu. Chakutalilahu, mumukanda waKuchinda, Mosi washimuna chiluwa chakoñeliyi nawa Nzambi wamubabesheli hachuma chakoñeliyi. (Kuchinda 20:2-12) Kashinshi kawansoneki aBayibolu kamwekeshaña nawu Bayibolu yafuma kudi Nzambi. Dikwila nawu twatela kukuhwelela Bayibolu.

10. Muloñadi kufumba kwamuBayibolu chikunakutukwasha makonu?

¹⁰ Bayibolu “ayonena kudi Nzambi nawa yawahila kudizisha nachu, kuzuwila nachu, kwolola nachu, nikubabesha nachu munjila yakuloña.” (2 Timotewu 3:16) Mwamweni, kufumba kwamuBayibolu kunakutukwasha makonu. Yehova diwatuleñeli, dichi weluka chitwatoñojokaña nichitwatiyaña. Watwiluka chiwahi kubadika chitwadiluka etwaweni nawa nakukeña twikaleña namuzañalu. Weluka yuma yikutukwasha niyikubula kutukwasha.

11, 12. (a) Kufumbanyi kwakuwahi kwahaniniyi Yesu muMatewu kapetulu 5 kushika ku 7? (b) Nsañwinyi yikwawu yitwadizaña muBayibolu?

¹¹ Mumukanda waMatewu kapetulu 5 kushika ku 7, twatañañamu kufumba kwaYesu kwakuwahi kwakwikala namuzañalu, chakushakama nawantu, chakulomba nichakuzatisha mali. Hela munahiti yaaka 2,000 kufuma hahaniniyi iku kufumba, kuchidi kuzatika nawa kunakutukwasha makonu.

¹² MuBayibolu, Yehova watwinka cheñi nshimbi jatukwashaña kwikala namuzañalu muchisaka, akwakukalakala  amawahi nikushakama nawantu mukuwunda. Hichikweti muloña nachitwekala, kutwashakamaña hela kukala kutukwetuku, nshimbi jamuBayibolu jinateli kutukwasha.—Tañenu Isaya 48:17; talenu Mazu Adi Kunsa 3.

13. Isaya wahosheli nindidi kutalisha kumusumba waBabiloni?

¹³ Wuprofwetu wamuBayibolu wawuvulu washikijewa dehi. Chakutalilahu, Isaya waprofweteli nindi Babiloni akamujilumuna. (Isaya 13:19) Walumbulwili chiwahi chakawujilumunawu iwu musumba. Iwu musumba wadiña nampwembu jamaneni nawa kwanyeñumukili kaloña. Ilaña Isaya washimwineñahu dehi nindi kaloña akakumisha nawa yinsu yikekala yawashi. Ayilumbu akalukuka musumba chakadi kulwa. Isaya waprofweteli nindi iyala wejina daKirusi diyi wakashinda Babiloni.—Tañenu Isaya 44:27–45:2; talenu Mazu Adi Kunsa 4.

14, 15. Wuprofwetu waIsaya washikijeweli ñahi?

¹⁴ Chimwahitili yaaka 200 kufuma hasonekeliwu iwu wuprofwetu, amashidika enjili nakulukuka Babiloni. Hinyi walombweleña amashidika? Neyi nachahosheliyi kaprofwetu, ayitwaminini kudi Kirusi mwanta wa Peresi. Yuma yejima yamwekeneña yashikijileña wuprofwetu.

¹⁵ Hawufuku wayilukukiliwu, eniBabiloni adiña nakuda chawija. Atoñojokeleña neyi akiñewa muloña adiña nampwembu yakola nikaloña. Kirusi niamashidika indi embili kapila hanji yamusumba kulonda akeheshi menji. Menji akeheli chikupu chakwila amashidika awaPeresi azambukili chiwahi. Hanu dinu amashidika akuhanuka ñahi mpwembu yaBabiloni? Neyi chahosheliyi  kaprofwetu, yinsu yamusumba yadiña yawashi, dichi amashidika alukukili musumba chakadi kulwa.

16. (a) Isaya waprofweteli nindidi kutalisha hadi Babiloni? (b) Tuneluki ñahi netu wuprofwetu waIsaya washikijeweli?

¹⁶ Isaya waprofweteli nindi kwosi muntu wakashakama muBabiloni. Wasonekeli nindi: “Hiyamba katuñamu  nawa cheñuku hiyamba kashakamamu nawa cheñuku mwamba kavwalikilañawu antu.” (Isaya 13:20) Komana waprofweteli mwalala? Iluña kwadiña Babiloni hekala chintampu chamakilomita 80 kuya kukabeta kambwela kaBaghdad, Iraq, dashala kwamahembi hohu. Nikulelu, kwosi washakamañamu. Yehova wakombeli Babiloni ‘nakakombu kakujilumuna.’—Isaya 14:22, 23. *

17. Muloñadi wutwatela kukuhwelela yuma yashiikayi Nzambi yejima?

¹⁷ Chineli wuprofwetu wawuvulu wamuBayibolu washikijewa dehi, twatela kukuhwelela yuma yahosha Bayibolu yakamwekana kumbidi. Twatela kukuhwelela chikupu netu Yehova wakashikija chikaninu chindi chakwilisha iseki kwikala paradisa. (Tañenu  Kuchinda 23:19.) Mwamweni, twachiñejaña “wumi wahaya nyaaka wakaniniwu kushankulu kudi Nzambi wabulaña kutwamba.”—Titusa 1:2. *

18. Pawulu wahosheli nindidi kutalisha ‘hamazu aNzambi’?

¹⁸ Tunadizi netu kwosi mukanda wudi neyi Bayibolu. Yanuñañana nawa neyi hiyikushimuna nsañu yasayansi hela nsañu yanyaaka yahoshaña mwalala. Mwekala kufumba kwakuwahi nawa mudi wuprofwetu wawuvulu washikijewa dehi. MuBayibolu mwekala nsañu yayivulu kubadika niniyi. Kapostolu Pawulu wasonekeli nindi: “Mazu aNzambi amomi nawa akweti ñovu chikupu.” Awa mazu atalisha mudihi?—Tañenu Aheberu 4:12.

19, 20. (a) Bayibolu yikuyikwasha ñahi kwiluka chimwekala? (b) Munateli kumwekesha ñahi nenu munakusakilila hachawaana chaBayibolu?

¹⁹ Bayibolu yinateli kuhimpa chihandilu chenu. Yikuyikwasha kwiluka chimwekala. Yinateli kuyikwasha kwiluka chikupu yitoñojoka yenu nichimwatiyaña. Chakutalilahu, tunateli kutoñojoka netu twamukeña Nzambi. Ilaña hakwila tumwekeshi netu twamukeña, twatela kuzatisha yuma yekala muBayibolu.

²⁰ Mwalala Bayibolu himukanda wafuma kudi Nzambi. Nakukeña nindi muyitañeña, muyidizeña nawa muyikeñi. Sakililenuña hanichi chawaana nawa twalekenuhu kuyidiza. Kuhiñahu mukwiluka nkeñelu yaNzambi kutalisha hadi antu. Mukapetulu kanalondelihu twakadiza jajivulu haniyi nkeñelu.