1. Hinyi watela kutuleja njila yatelela yakudifukwilamu kudi Nzambi?

NSAKILILU yayivulu yahoshaña nawu yadizishaña antu amwiluki Nzambi. Ilaña yatwambaña, muloña nsakililu yatañishaña nsañu yabukaku hachekalayi Nzambi nichitwatela kudifukula kudi yena. Tunateli kwiluka ñahi njila yatelela yakudifukwilamu kudi Nzambi? Yehova hohu diwatela kutuleja chitwatela kudifukula kudi yena.

2. Munateli kwiluka ñahi njila yatelela yakudifukwilamu kudi Nzambi?

² Yehova watwinka Bayibolu kulonda twiluki njila yatelela yakudifukwilamu kudi yena. Dichi dizenuña Bayibolu nawa Yehova wukuyikwasha kulonda mwiluki yuma yinakuyidizishayi muloña wayikeña chikupu.—Isaya 48:17.

3. Yumanyi yakeñañayi Nzambi nindi twileña?

³ Antu amakwawu ahoshaña nawu Nzambi weteja nsakililu yejima, ilaña dichatwilejeliyi Yesu wanyi. Wahosheli nindi: “Antu ejima akuntenatena nawu, Mwanta, Mwanta; hiyakawanina kwiñila muWanta wamwiwuluku, chiña muntu welaña muchima waTata yami wudi mwiwulu.” Dichi twatela kwiluka nikwila nkeñelu yaNzambi. Twatela kushaku muchima nankashi kulonda twiluki nikwila nkeñelu yaNzambi muloña Yesu wesekejeli antu abulaña kumwovwahila Nzambi nawambanji, ‘akoñaña yakuluwa’—Matewu 7:21-23.

4. Yesu wasoñamishili nindidi kutalisha hakwila nkeñelu yaNzambi?

⁴ Yesu watusoñamishili nindi neyi tunakukeña kwila  nkeñelu yaNzambi, tukamona kukala. Wahosheli nindi: ‘Iñililenu kuchisu chanyanya; muloña chisu cheneni, ninjila yabwambwañana yaya kukujilumuka, mweñilaña amavulu. Muloña chisu chanyanya, ninjila yanyanya yaya kuwumi, ayimonaña antesha.’ (Matewu 7:13, 14) Njila yanyanya hela njila yatelela yakudifukwilamu kudi Nzambi, yatwalaña kuwumi wahaya nyaaka. Njila yabwambwañana hela njila yabula kutelela yakudifukwilamu kudi Nzambi, yatwalaña kukufwa. Ilaña Yehova hakeñaña muntu niwumu kufwaku. Wayinka antu ejima kukooleka kwakumwiluka.—2 Petulu 3:9.

5. Munateli kwiluka ñahi antu adifukulaña kudi Nzambi munjila yatelela?

⁵ Yesu wahosheli nindi tunateli kwiluka antu adifukulaña kudi Nzambi munjila yatelela. Tunateli kuyilukila kuyuma yakuhwelelawu niyelañawu. Wahosheli nindi: “Mukuyilukila kunyikabu yawu.” Wahosheli cheñi nindi: “Mutondu wejima wawuwahi wasoñaña nyikabu yayiwahi.” (Matewu 7:16, 17) Ichi hichinayi mukwila nawu antu adifukulaña kudi Nzambi awaniniku. Ilaña ambuña Nzambi afwilaña kwila yuma yayiwahi. Tukushinshika hayuma yinateli kutukwasha kwiluka antu adifukulaña kudi Nzambi munjila yatelela.

6, 7. Muloñadi kudifukula kwalala chikwashindemena haBayibolu? Yumanyi yitwadizilaña kudi Yesu?

⁶ Kudifukula kwawu kwashindamena haBayibolu. Bayibolu yahoshaña nawu: “Nsona yejima ayonena kudi Nzambi nawa yawahila kudizisha nachu, kuzuwila nachu, kwolola nachu, nikubabesha nachu munjila yakuloña, kulonda muntu waNzambi yekali washikilamu chikupu, wadiloñesha chikupu kuzata nyidimu yayiwahi yejima.”  (2 Timotewu 3:16, 17) Kapostolu Pawulu wasonekeleli akwaKristu nindi: ‘Chimwatambwilili mazu aNzambi kudetu, himwayitambwilili neyi mazu akufuma kudi antuku, ilaña neyi mazu aNzambi, neyi chochekalawu.’ (1 Atesalonika 2:13) Kudifukula kwalala kwashindamena Hezu daNzambi, Bayibolu. Kwashindamena wanyi hayitoñojoka yawantu, tushidikilu hela yuma yikwawu.

⁷ Nsañu yejima yadizishileñayi Yesu yashindameneni Hezu daNzambi. (Tañenu Yowanu 17:17.) Kakavulu wazatishileña Nsona. (Matewu 4:4, 7, 10) Ambuña Nzambi ashinshika azatishaña nsona neyi chelileñayi Yesu nawa yuma yejima yadizishañawu yashindamena haBayibolu.

8. Yumanyi yahosheliyi Yesu kutalisha hakudifukula kudi Yehova?

⁸ Adifukulaña hohu kudi Yehova. Masamu 83:18 yahosha nawu: ‘Yeyi wukweti ijina deyi daYehova, yeyi Mukwakubadika heseki dejima.’ Yesu wakeñeleña antu amwiluki Nzambi walala, wayilejeli antu ijina daNzambi. (Tañenu Yowanu 17:6.) Yesu wahosheli nindi: “Watela kudifukula kudi Yehova Nzambi yeyi, nawa yena hohu diyi iwatela kukalakela mudimu wajila.” (Matewu 4:10) Dichi ambuña Nzambi elaña neyi cheliliyi Yesu. Adifukulaña hohu kudi Yehova, azatishaña ijina dindi nawa alejaña antu ijina daNzambi niyuma yakatwililayi.

9, 10. Twamwekeshaña ñahi netu twadikeña wumu namukwawu?

⁹ Akeña antu nankashi. Yesu walejeli atumbanji twindi kudikeña wumu namukwawu, ninetu dichi twelaña. (Tañenu Yowanu 13:35.) Hichidi namuloña nakutwafuma, chekala chisemwa chetu, hela twaheta hela tudi atuzweñiku. Kukeña kutwadikeña wumu namukwawu kwatunuñaña hamu neyi amanakwetu niahela. (Akolosi 3:14) Dichi hitwazuñaña njita nakujaha antuku. Bayibolu yahoshaña nawu: “Tunateli kwiluka anyana kaNzambi nianyana kaDiyabolu kuhitila muchumichi: Muntu wudi wejima  wabulaña kwila mwaloña nimuntu wabulaña kukeña manakwindi, hiyadi akukabadi kaNzambiku.” Nawa yabombelahu nawu: “Twatela kudikeña wumu namukwawu; bayi kufwana Kenaku, wadiña wakukabadi kanowu watama nawa wajahili manakwindi.”—1 Yowanu 3:10-12; 4:20, 21.

¹⁰ Twatela kuzatisha mpinji, ñovu niyuma yetu yakumujimba kulonda tudikwashi nikudikolesha wumu namukwawu. (Aheberu 10:24, 25) ‘Twelilaña antu ejima yuma yayiwahi.’—Añalija 6:10.

11. Muloñadi chitwamwitejela Yesu netu hinjila yaya kudi Nzambi?

¹¹ Twatela kumwovwahila Yesu muloña diyi njila yaya kudi Nzambi. Bayibolu yahoshaña nawu: “Wamwinu hiwudi mudi muntu wacheñiku, muloña kwosi ijina dikwawu hanu hamaseki datondayi Nzambi mukachi kawantu mutunateli kuwana wamwinuku.” (Yilwilu 4:12) MuKapetulu 5 kawunu mukanda, twadizili nawu Yehova watemesheli Yesu kulonda yahani wumi windi wikali ifutu danyiloña kudi antu ovwahila. (Matewu 20:28) Nawa Yehova wamutonda Yesu kuyuula iseki dejima neyi Mwanta. Dichatulejelaña Bayibolu nawu twatela kumwovwahila Yesu neyi tunakukeña netu tukahandi haya nyaaka.—Tañenu Yowanu 3:36.

12. Twabulilañadi kudiñija mumapolitiki?

¹² Hiyadiñijaña mumapolitikiku. Yesu wadiñijili wanyi mumapolitiki. Hamusompesheleñawu, wamulejeli nyuuli wawaRoma Pilatu nindi: “Wanta wami hiwudi wamukanu kaayiku.” (Tañenu Yowanu 18:36.) Twovwahilaña Wanta waNzambi wamwiwulu neyi cheliliyi Yesu nawa dichaleteshaña tubuleña kudiñija mumapolitiki, kudi kwejima kutwashakamaña. Hela chochu, Bayibolu yatulejaña nawu twatela kwovwahila “akweti wuswa wabadika,” dikwila nawu jinfulumendi.  (Aroma 13:1) Twovwahilaña nshimbi jekala mwituña mutwashakamaña. Hela chochu neyi nshimbi jinakuzuñesha nshimbi jaNzambi twembujolaña apostolu ahosheli nawu: “Nzambi diyi nyuuli wutwatela kwovwahila bayi antuku.”—Yilwilu 5:29; Maku 12:17.

13. Yumanyi yitwashimwinaña kutalisha haWanta waNzambi?

¹³ Wanta waNzambi diwu hohu wakamanisha kukala kwejima kudi mukaayi. Yesu wahosheli nindi ‘nsañu yayiwahi yaWanta’ akayishimwina mukaayi kejima. (Tañenu Matewu 24:14.) Kwosi nfulumendi yawantu yinateli kutwilila yuma yikatwilila Wanta waNzambiku. (Masamu 146:3) Yesu watulejeli chakulomba Wanta Nzambi nindi: “Wanta weyi winzi. Nkeñelu yeyi ayili hamaseki neyi chayilañawu mwiwulu.” (Matewu 6:10) Bayibolu yaprofweta nawu Wanta waNzambi wakajilumuna nfulumendi jejima jawantu nawa ‘wena nkawawu wakemana mbe haya nyaaka.’—Danyeli 2:44.

14. Munakutoñojoka nenu anyi adifukulaña kudi Nzambi munjila yatelela?

¹⁴ Hanyima yakuhanjeka haniyi yikuma dihulenu nenu: ‘Anyi adizishaña nsañu yashindamena haBayibolu? Anyi alejaña antu ijina daNzambi? Anyi adikeña wumu namukwawu nawa akuhwelela nawu Nzambi watemesheli Yesu kwinza nakutukuula? Anyi abulaña kudiñija mumapolitiki? Anyi alejaña antu nawu Wanta waNzambi diwakamanisha kukala kwejima?’ A Yinsahu jaYehova hohu diwu elaña mwenimu.—Isaya 43:10-12.

15. Yumanyi yitwatela kwila hakwila Nzambi yeteji kudifukula kwetu?

¹⁵ Hitwatela kumwiluka hohu Nzambiku. Muloña niandemoni niwena amwiluka Nzambi, ilaña amwovwahilaña  wanyi. (Yakoba 2:19) Neyi tunakukeña netu Nzambi yeteji kudifukula kwetu, hitwatela kumwiluka hohu Nzambiku ilaña twatela kwila cheñi yuma yinakutulejayi.

16. Muloñadi wutwatelela kukaana nsakililu yakutwamba?

¹⁶ Hakwila nawu Nzambi yeteji kudifukula kwetu twatela kufuma munsakililu yakutwamba. Kaprofwetu Isaya wasonekeli nindi: “Fumenu mukachi kawu. Ikalenu atooka.” (Isaya 52:11; 2 Akorinda 6:17) Dichitwatelela kutondolwela yuma yejima yakundama kukudifukula kwakutwamba.

17, 18. Indi “Babiloni muneni,”hichumanyi nawa muloñadi wutwatela kufumamu swayi-swayi?

¹⁷ Nsakililu yakutwamba hinsakililu yamuchidinyi? Hinsakililu yejima yatulejaña kudifukula kudi Nzambi munjila yabukaku nachahosha Izu dindi. Bayibolu yatenaña nsakililu yakutwamba yejima nawu “Babiloni Muneni.” (Chimwekeshu 17:5) Muloñadi? Chamanini Dibaji damumafuku aNowa, ntañishilu yayivulu yansakililu yakutwamba yatachikili mumusumba waBabiloni. Iyi ntañishilu yakutwamba yatandili heseki dejima. Chakutalilahu, antu ashakamineña muBabiloni adifukwileña kudi anzambi asatu. Makonu, nsakililu yayivulu yatañishaña nawu Nzambi wekala Musatu, ilaña Bayibolu yashimuna nawu kwekala Nzambi walala wumu hohu, Yehova nawa Yesu diyi Mwanindi. (Yowanu 17:3) EniBabiloni akuhweleleli cheñi nawu chuma chimu mudi muntu chatwalekañahu kuhanda neyi nafwi nawa chakabakanaña mukesi kahelu. Iku hikutwamba.—Talenu Mazu Adi Kunsa 14, 17, ni 18.

¹⁸ Nzambi washimuna nindi katataka nsakililu yejima yakutwamba ayijilumuni. (Chimwekeshu 18:8) Muneluki chimwatela kufumina munsakililu yakutwamba swayi-swayi? Yehova Nzambi nakukeña nindi mufumimu henohu kuchidi mpinji.—Chimwekeshu 18:4.

19. Yehova wukuyakamena ñahi neyi mufuukulahu kumukalakela?

 ¹⁹ Neyi mufuma munsakililu yakutwamba kulonda mumukalakeli Yehova, amabwambu jenu amakwawu hela antaña akuneña nawa anateli nikuyikabisha. Ilaña Yehova hakayishiyaku. Mukwikala muchisaka chamukaayi kejima chawantu amavulu adikeña wumu namukwawu nawa mukwikala nakuchiñeja kwakushakama haya nyaaka mwiituña daNzambi dadiha. (Maku 10:28-30) Hadaha amabwambu jenu amu nichisaka akaanineña kufuukula kwenu kwakumukalakela Yehova anateli kufuukula kudiza Bayibolu mukuhita kwampinji.

20. Muloñadi chichawahila kudifukula kudi Nzambi munjila yatelela?

²⁰ Katataka tuhu Nzambi yafumishihu yuma yatama yejima nawa Wanta windi wakayuula iseki dejima. (2 Petulu 3:9, 13) Yikekala mpinji yayiwahi chikupu! Antu ejima akadifukula kudi Yehova neyi chakeñañayi. Dichi mwatela kufuukulahu yoyinu mpinji kulonda mudifukuleña kudi Nzambi munjila yatelela.