1, 2. Muloñadi chimukuhoshela nenu kulomba hichawaana, nawa twatela kwilukiladi chahosha Bayibolu kutalisha hakulomba?

KWESEKEJA natutumbwa twatuvulu twekala mwiwulu, iseki danyanya nankashi. Yehova chatalayi heseki, antu akunyuza yejima amwekanaña neyi kamusa kamenji kanafumi mumbeketi. (Masamu 115:15; Isaya 40:15) Hela chakwila twamwekanaña kukeha neyi tudesekeja newulu, Masamu 145:18, 19 yahoshaña nawu: ‘Yehova wudi kwakwihi nawantu ejima amutambikaña, nawejima amutambikaña chalala. Wukwila mwakeñawu amwakama, wukutiya nawa chakubilelawu, wukuyamwina.’ Tukweti kukooleka kweneni. Yehova, Nleñi wañovu jejima, nakukeña kuswina kwakwihi nanetu, nawa nakukeña kutiya kulomba kwetu. Kulomba hikukooleka, chawaana chatwinkayi Yehova wonsu wetu.

² Yehova wukututiya hohu neyi tuhosha nindi munjila yetejayi. Tunateli kwila ñahi mwenimu? Tuhanjekenu hachahosha Bayibolu kutalisha hakulomba.

3. Muloñadi chimwatela kulombela kudi Yehova?

³ Yehova nakukeña nindi mulombeña nikuhosha nindi. Tuneluki ñahi? Tañenu Afwilipi 4:6, 7. Toñojokenu haniwu mutambi. Nyuuli wamawulu nimaseki wayikeña nankashi nawa nakukeña nindi mumulejeña chimunakutiya nikukala kumukweti.

4. Kulomba mpinji yejima kudi Yehova kwakoleshaña ñahi wubwambu wenu nayena?

 ⁴ Kulomba kwatukwashaña kwikala nawubwambu wawuwahi naYehova. Amabwambu neyi akuhanjekaña hayuma yinakutoñojokawu, yinakwakamenawu nichinakutiyawu, wubwambu wawu wakolaña nankashi. Dichekala nikulomba kudi Yehova. Wayileja muBayibolu yitoñojoka yindi, chatiyañayi niyuma yakelayi kumbidi. Munateli kumuleja niyuma yejima yimwatoñojokaña kuhitila mukuhoshaña nindi mpinji yejima. Wubwambu wenu naYehova wukukola nankashi neyi mulombaña.—Yakoba 4:8.

5. Tuneluki ñahi netu Yehova hatiyaña kulomba kwejimaku?

⁵ Komana Yehova watiyaña kulomba kwejima? Inehi. Mumafuku akaprofwetu Isaya, Yehova wayilejeli aIsarela nindi: ‘Hela mukuvulisha kulomba, hinukutiyaku; makasenu anenzali mbe namashi.’ (Isaya 1:15) Dichi neyi  kubabala nehi, tukutachika kwila yuma yikutwambula kudi Yehova, nawa wukudiwula kulomba kwetu.

6. Chikuhwelelu chalemenadi? Mukumwekesha ñahi nenu mudi nachikuhwelelu?

⁶ Neyi tunakukeña Yehova yatiyeña kulomba kwetu, twatela kumukuhwelela. (Maku 11:24) Kapostolu Pawulu washimwini nindi: “chakadi chikuhwelelu, hichikutwesheka kumuzañalesha Nzambiku, muloña muntu wejima wukumusolomoka Nzambi, watela kukuhwelela nindi wekala kwoku nawa nindi yena diyi mukwakufweta antu amukeñakeñaña chikupu.” (Aheberu 11:6) Ilaña hitwatela kwikala hohu nachikuhweleluku. Twatela kumwekesha chikuhwelelu chetu kuhitila mukumwovwahila Yehova mafuku ejima.—Tañenu Yakoba 2:26.

7. (a) Twadizozelañadi nikumwekesha kalemesha hakulomba kudi Yehova? (b) Tunateli kumwekesha ñahi netu twashinshika neyi tunakulomba?

⁷ Hakulomba kudi Yehova, twatela kudizoza nikwikala nakalemesha. Muloñadi? Neyi atuleja kuhosha namwanta hela nakajiña mpata, tukuhoshaña nakalemesha. Yehova hiNzambi Wañovu jejima, komana hitwatela kudizoza nikumwekesha kalemesha hakuhosha nindiku? (Kutachika 17:1; Masamu 138:6) Twatela kwikala ashinshika nikulomba kudi Yehova chakufuma hamuchima, bayi tuhoshaña mazu wowamu hakulombaku.—Matewu 6:7, 8.

8. Neyi tunakulomba chuma, chumanyi chitwatela kwila?

⁸ Nkumininaku, neyi tunalombi chuma, twatela kudishaku chikupu kulonda twili chuma chitunalombi. Chakutalilahu, neyi tunakulomba kudi Yehova netu yatwinki yakuda hanodu ifuku, twatela kuzata nañovu kulonda Yehova yatwinki yuma yejima yitunakulomba. Twatela kuzata nañovu nikwiteja kuzata mudimu wejima wutunateli kuzata. (Matewu 6:11; 2 Atesalonika 3:10) Hela neyi tulomba kudi Yehova netu tuleki kwila yuma yatama, twatela  kudishaku kulonda tubuli kwila chuma chikutwisha mukweseka. (Akolosi 3:5) Ichi dinu tuhanjekenu hamalwihu ehulañawu antu kutalisha hakulomba.

9. Twatela kulomba kudinyi? Yumanyi yitwadizaña kutalisha hakulomba haYowanu 14:6?

⁹ Twatela kulomba kudinyi? Yesu walejeli atumbanji twindi kulomba kudi “Tata yetu wekala mwiwulu.” (Matewu 6:9) Wahosheli cheñi nindi: “Ami yami njila, yami chalala, yami wumi. Kwosi muntu wunateli kwinza kudi Tata chakadi kuhitila mudi amiku.” (Yowanu 14:6) Dichi twatela kulomba hohu kudi Yehova kuhitila mudi Yesu. Muloñadi chitwatela kulombela kuhitila mudi Yesu? Hakwila Yehova yeteji kulomba kwetu, twatela kulemesha chifulu chalema chamwinkawu Yesu kudi Yehova. Neyi chitwadizili, Yesu wenjili hamaseki nakutuukula kunshidi nikufwa. (Yowanu 3:16; Aroma 5:12) Yehova watonda cheñi Yesu kwikala Kapristu Muneni niNsompeshi.—Yowanu 5:22; Aheberu 6:20.

10. Komana twatela kufukama, kushakama hela kwimana hakulomba? Lumbululenu.

¹⁰ Komana twatela kufukama, kushakama hela kwimana hakulomba? Inehi, Yehova hatuleja nindi tufukameña, kushakama hela kwimana hakulombaku. Ilaña Bayibolu yatulejaña nawu twatela kuhosha naYehova munjila yidi yejima yakalemesha. (1 Kushindulula 17:16; Nehemiya 8:6; Danyeli 6:10; Maku 11:25) Yuma yitwahoshaña nankeñelu yayiwahi diyalemeshañayi Yehova bayi kufukama, kushakama hela kwimana hakulombaku. Tunateli kulomba nañovu hela wumweneni kwejima kutudi nawa mpinji yidi yejima namwaana hela wufuku. Neyi  tunakulomba kudi Yehova, twatela kukuhwelela netu wukututiya hela chakwila kwosi muntu mukwawu watiyaña.—Nehemiya 2:1-6.

11. Yumanyi yitunateli kumuleja Yehova mukulomba?

¹¹ Yumanyi yitunateli kulomba? Tunateli kulomba chuma chejima chetejewa kumesu aYehova. Bayibolu yatulejaña nawu: “Chuma chejima chitunateli kumulomba kwesekeja namwaya nkeñelu yindi, yena watutiyaña.” (1 Yowanu 5:14) Tunateli kulomba yuma yakumujimba? Eña. Kulomba kudi Yehova kwatela kwikala neyi tunakuhanjeka nebwambu detu chikupu. Tunateli kumuleja Yehova yuma yejima yitunakutoñojoka niyidi mumuchima wetu. (Masamu 62:8) Tunateli kulomba kudi yena kulonda yatwinki spiritu yindi yajila yasweja ñovu yitukwasheña kwila mwaloña. (Luka 11:13) Tunateli kumulomba cheñi Yehova maana akutukwashaña kufuukula chiwahi nikulomba ñovu yakuumika kukala kwatumwekenaña. (Yakoba 1:5) Twatela kumulomba Yehova kulonda yatwanakeneña nshidi jetu. (Aefwesesa 1:3, 7) Tunateli kulombelaku cheñi akwetu, kushilahu nichisaka chetu nimanakwetu niahela muchipompelu.—Yilwilu 12:5; Akolosi 4:12.

12. Yumanyi yasweja kulema yitwatela kusha mukulomba?

¹² Yumanyi yasweja kulema yitwatela kusha mukulomba kwetu? Yehova ninkeñelu yindi. Twatela kumusakilila nankashi hayuma yejima yinakutwililayi. (1 Kushindulula 29:10-13) Tuneluki muloña chenjiliyi Yesu hamaseki, wayilejeli atumbanji twindi chakulomba. (Tañenu Matewu 6:9-13.) Wahosheli nindi atela kusambila kulomba nawu ijina daNzambi atela kudijilika hela kudilemesha. Yesu wahosheli cheñi nindi twatela kulomba Wanta waNzambi kwinza kulonda nkeñelu yaYehova yizatiki heseki dejima. Yesu wasambilii kulomba iyi yuma yasweja  kulema kufumahu dinu hakutena yuma yakumujimba yatulejeliyi nindi tulombeña. Neyi tumutwamijaku Yehova ninkeñelu yindi mukulomba kwetu, tukumwekesha yuma yitwalemesha.

13. Kulomba kwetu kwatela kuleha ñahi?

¹³ Kulomba kwetu kwatela kuleha ñahi? Bayibolu yatuleja wanyi. Kulomba kunateli kuleha hela kwihiha, kwesekeja nachidi yuma. Chakutalilahu, kulomba kunateli kwihiha henohu kanda tutachiki kuda nawa kunateli  kuleha neyi tunakumuleja Yehova kukala kutukweti hela neyi tunakumusakilila. (1 Samweli 1:12, 15) Kulomba kwetu bayi kuleheña muloña wakukeña kuzañalesha akwetu neyi chelileñawu antu amakwawu mumafuku aYesuku. (Luka 20:46, 47) Yehova hatiyaña kuwaha nakulomba kwamuchidiwuku. Chuma chabadika kulema kudi Yehova yowu kulomba chakufuma hamuchima.

14. Twatela kulomba kañahi, nawa twatela kwilukadi kutalisha hadi Yehova?

¹⁴ Twatela kulomba kañahi? Yehova nakutuleja nindi tuhosheña nindi mpinji yejima. Bayibolu yatulejaña nawu ‘lombenuña,’ “lombenuña chakadi kuzeya,” ‘nilombenuña mpinji yejima.’ (Matewu 26:41; Aroma 12:12; 1 Atesalonika 5:17) Mpinji yidi yejima Yehova wukutiya mutukulomba. Tunateli kumusakilila hefuku hefuku hakukeña  nihayuma yatwinkañayi. Tunateli cheñi kumulomba kulonda yatulomboli, yatwinki ñovu nikutukundeja. Neyi tukulemeshaña chikupu kukooleka kutukweti kwakulomba kudi Yehova, tukuhoshaña nindi mpinji yejima.

15. Muloñadi chitwatela kuhoshela netu “ameni” hakumanisha kulomba?

¹⁵ Muloñadi chitwatela kuhoshela netu “ameni” hanyima yakulomba? Izu “ameni” datalisha mukwila nawu “mwamweni” hela “chikali chochenochu.” Hinjila mutwamwekeshelaña netu yuma yitunahoshi mukulomba yalala, hela netu yakutwamba wanyi. (Masamu 41:13) Bayibolu yatulejaña kuhosha netu “ameni” wumweneni hela nañovu, kumakumishilu akulomba hadi antu amavulu kulonda tumwekeshi netu tuneteji munahoshiwu.—1 Kushindulula 16:36; 1 Akorinda 14:16.

16. Komana Yehova wakulaña chikupu kulomba kwetu? Lumbululenu.

¹⁶ Komana Yehova wakulaña chikupu kulomba kwetu? Eña. Bayibolu yamutenaña nawu ‘Mukwakutiya kulomba.’ (Masamu 65:2) Yehova watiyaña nawa wakulaña kulomba kwawantu ashinshika amavulu, nawa wakwilaña munjila jashiyashana.

17. Yehova wakulaña ñahi kulomba kwetu kuzatisha añelu niambuñindi ahamaseki?

¹⁷ Yehova wakulaña kulomba kwetu kuzatisha añelu niambuñindi ahamaseki. (Aheberu 1:13, 14) Kudi antu amavulu alombeli wukwashu kulonda eluki chahosha Bayibolu nawa mukampinji kantesha Chinsahu chaYehova yayendela nikuyendela. Bayibolu yashimunaña nawu añelu niwena ashimunaña “nsañu yayiwahi” mwahita iseki dejima. (Tañenu Chimwekeshu 14:6.) Cheñi, etu amavulu twalombahu dehi kudi  Yehova kutalisha hakukala kumu nawa manakwetu hela muhela mukwaKristu wenjili nakutukwasha.—Yishimu 12:25; Yakoba 2:16.

18. Indi Yehova wazatishaña ñahi spiritu yindi yajila niBayibolu kwakula kulomba kwetu?

¹⁸ Yehova wazatishaña spiritu yindi yajila kulonda yakuleña kulomba kwetu. Neyi tulomba netu yatukwashi kuumika kukala kutukweti, nateli kuzatisha spiritu yindi yajila kulonda yatulomboli nikutwinka ñovu. (2 Akorinda 4:7) Yehova wazatishaña cheñi Bayibolu kwakwilamu kulomba kwetu nikutukwasha kufuukula chiwahi. Neyi tukutañaña Bayibolu, tukuwana nsona jikutukwasha. Yehova nateli cheñi kusañumuna muntu wukwakula hakupompa kuhosha nsañu yitunakufwila kutiya chili eluda muchipompelu kuhosha chikuma chamuBayibolu chikutukwasha.—Añalija 6:1.

19. Chumanyi chikuletesha tuhoshi netu Yehova nakuli kulomba kwetu wanyi?

¹⁹ Mpinji yikwawu tunateli kudihula netu, ‘Muloñadi Yehova chinabuliliyi kwakula kulomba kwami niyinu mpinji?’ Anukenu nenu, weluka mpinji nichatela kwakulayi kulomba kwetu. Weluka yuma yitunakaankili. Dichi, tutwalekuhu nakulomba kulonda tumwekeshi netu mwalala chuma chitunakulomba tunakuchikeñesha nawa netu twamukuhwelela chikupu. (Luka 11:5-10) Mpinji yikwawu Yehova wakulaña kulomba kwetu munjila yakuhayamisha. Chakutalilahu, tukutachika kulomba hakukala kutukweti, chatela yamanishi iku kukala, nateli kutwinka ñovu yakuumika.—Tañenu Afwilipi 4:13.

20. Muloñadi chitwatela kulombela kudi Yehova mpinji yejima?

²⁰ Kwenoku kukooleka kutukweti kwakulomba kudi Yehova! Tunakuhweleli chikupu netu wukututiya neyi tulomba. (Masamu 145:18) Neyi tukulombaña kudi Yehova chakufuma hamuchima, wubwambu wetu wukukola.