1. Mukutoñojokadi hanyima yakumanisha kudiza chikupu wunu mukanda?

MUNADIZI yuma yayivulu yamuBayibolu hampinji yimunadizeña wunu mukanda, yidi neyi chikaninu chawumi wahaya nyaka, mwekalilawu afu nikuchiñeja kwakusañuka. (Mukwakutañisha 9:5; Luka 23:43; Yowanu 5:28, 29; Chimwekeshu 21:3, 4) Hadaha munatachiki dehi kupompa nawaYinsahu jaYehova nawa munadimweni nenu ekala munsakililu yalala. (Yowanu 13:35) Hadaha munatachiki kwikala nawubwambu chikupu naYehova,  nawa munakukeña kumuzatila. Munateli kudihula nenu, ‘Natela kwiladi kulonda nimuzatileña Nzambi?’

2. Muloñadi iyala wakuEtopiya chakeñeleleñayi kupapatishewa?

² Dichatoñojokeliyi iyala wakuEtopiya wadiñaku mumpinji yaYesu. Chimwahitili mpinji kufuma hamusañwiliwu Yesu, kambanji kindi Fwilipi wamushimwinini iwu iyala. Fwilipi wamulejeli nindi Yesu diyi Mesiya. Iwu kaEtopiya wazañaleli nayuma yatiyiliyi chakwila hohenohu wahosheli nindi: “Talaña! Menji awa; chumanyi chikunkañesha kupapatishewa?”—Yilwilu 8:26-36.”

3. (a) Lushimbinyi lwayinkeliyi Yesu atumbanji twindi? (b) Muntu anateli kumupapatisha ñahi?

³ Bayibolu yashimunaña chiwahi nawu neyi munakukeña kumuzatila Yehova, mwatela kupapatishewa. Yesu wayilejeli atumbanji twindi nindi: “[Kelishenu] antu akunyuza yejima ekali atumbanji, muyipapatisheña.” (Matewu 28:19) Yesu niyena waheni chakutalilahu kuhitila mukupapatishewa. Amujimikili chikupu mumenji, bayi neyi amusansili menji hamutuku. (Matewu 3:16) Nikulelu neyi mukwaKristu anamupapatishi, atela kumujimika chikupu mumenji.

4. Chumanyi chikwilukawu antu neyi mupapatishewa?

⁴ Neyi mupapatishewa, antu akwiluka nawu mwalala munakukeña kwikala ibwambu daNzambi nawa munakukeña kumukalakela. (Masamu 40:7, 8) Dichi mwatela kudihula nenu, ‘Natela kwiladi kulonda nipapatishewi?’

5. (a) Chumanyi chimukusambila kwila henohu kanda mupapatishewi? (b) Kupompa kwawakwaKristu kwalemenadi?

⁵ Henohu kanda mupapatishewi, mwatela kumwiluka Yehova niYesu. Munatachiki dehi kumwiluka chimunakudiza Bayibolu. (Tañenu Yowanu 17:3.) Ilaña,  bayi mukumina hohenahaku. Bayibolu yahoshaña nawu mwatela ‘kwiluka chikupu kwiluka kwalala’ kwankeñelu yaYehova. (Akolosi 1:9) Kupompa kwawaYinsahu jaYehova kukuyikwasha mwikali nawubwambu wawuwahi naYehova. Ichi dichuma chacheni chikuletesha mupompeña mpinji yejima.—Aheberu 10:24, 25.

6. Komana mwatela kwiluka nsañu yayivulu yamuBayibolu henohu kanda mupapatishewi?

⁶ Yehova hanakukeña mwiluki yuma yejima henohu kanda mupapatishewiku. Dichamwililiyi wanyi ona iyala wakuEtiyopiya nindi chiña yeluki jejima henohu kanda yapapatishewi. (Yilwilu 8:30, 31) Tukatwalekahu kumwiluka Nzambi haya nyaaka. (Mukwakutañisha 3:11) Hakwila mupapatishewi, mwatela kwiluka nikwiteja yuma yalema yatañishaña Bayibolu.—Aheberu 5:12.

7. Kudiza Bayibolu kunayikwashi ñahi?

⁷ Bayibolu yahoshaña nawu: “Chakadi chikuhwelelu, hichikutwesheka kumuzañalesha Nzambiku.” (Aheberu 11:6) Mwatela kwikala nachikuhwelelu henohu kanda mupapatishewi. Bayibolu yatulejaña nawu antu amakwawu amumusumba wakuKorinda wakushankulu atiyili yuma yadizishileñawu atumbanji twaYesu nawa “atachikili kwitiya nikupapatishewa.” (Yilwilu 18:8) Munjila yoyimu, Bayibolu yimunadizi yinayikwashi kukuhwelela muyikaninu yaNzambi nimuñovu yamulambu waYesu yakutukuula kunshidi nikufwa.—Yoshuwa 23:14; Yilwilu 4:12; 2 Timotewu 3:16, 17.

8. Chumanyi chikuletesha mulejeñaku akwenu yuma yimunakudiza?

⁸ Chimukusweja kudiza muBayibolu nikumona chiyinayikwashi mukuhanda kwenu, chikuhwelelu chenu chikukola nankashi. Mukukeñaña kulejaku akwenu  yuma yimunakudiza. (Yeremiya 20:9; 2 Akorinda 4:13) Hanu dinu, anyi imwatela kulejaku?

9, 10. (a) Anyi imukutachika kulejaku yuma yimunakudiza? (b) Mwatela kwila ñahi neyi munakukeña kushimwina hamu nachipompelu?

⁹ Mwatela kulejaku chisaka chenu, amabwambu, antuñi nenu hela akwenu mumwazatilaña yuma yimunakudiza. Mukuwahisha, ilaña mwatela kuyileja munjila yayiwahi nawa yakukeña. Mukuhita kwampinji, mukatachika kushimwina hamu nachipompelu. Neyi himukukeña kushimwina, mulejenu Chinsahu wunakuyidizisha Bayibolu nenu munakukeña kutachika kushimwina hamu nachipompelu. Neyi yamona nindi munadiloñeshi nawa nshakaminu yenu yinesekani nachahosha Bayibolu, yena ninenu mukudimona nawaeluda ayedi amuchipompelu.

¹⁰ Yumanyi yimukahanjeka nawaeluda? Awa aeluda akahanjeka nenu kulonda amoni neyi muneluki nawa muneteji ntañishilu yalema yamuBayibolu, neyi mwovwahilaña chahosha Bayibolu mukuhanda kwenu nawa neyi munakufwila kwikala Chinsahu chaYehova. Mwatela kwanuka nenu aeluda diwu ahembaña antu ejima muchipompelu, kushilahu nenu, dichi bayi mutiya woma kuhanjeka nawuku. (Yilwilu 20:28; 1 Petulu 5:2, 3) Hanyima yaniku kubulakana, aeluda akuyileja neyi munashikilimu kutachika kushimwina hamu nachipompelu.

11. Muloñadi chimwatela kuhimpila henohu kanda mutachiki kushimwina hamu nachipompelu?

¹¹ Hadaha aeluda anateli kuyileja kuhimpa chikupu yilwilu yenu henohu kanda mutachiki kushimwina hamu nachipompelu. Muloñadi chimwatela kuhimpila  yilwilu? Muloña neyi tunakuleja antu nsañu yaNzambi, twamwimenañaku Yehova, dichi twatela kwikala nayilwilu yamuzañaleshaña.—1 Akorinda 6:9, 10; Añalija 5:19-21.

12. Muloñadi antu ejima chatela kubalumukilawu mumuchima?

¹² Kudi chuma chikwawu chimwatela kwila henohu kanda mupapatishewi. Kapostolu Petulu wahosheli nindi: “Balumukenu munyichima yenu, mufunti kulonda nshidi jenu ajijimañeshi.” (Yilwilu 3:19) Kubalumuka mumuchima kwatalisha mudihi? Kwatalisha mukutiya kutama nankashi hachuma chatama chituneli. Chakutalilahu, neyi mwelileña wuvumbi, mwatela kubalumuka mumuchima. Hela mwelileña yuma yatama wanyi mukuhanda kwenu, mwatela kubalumuka mumuchima, muloña wonsu wetu twavulumunaña nawa twakeñaña netu Nzambi yatwanakeni.—Aroma 3:23; 5:12.

13. “Kufunta” kwatalisha mudihi?

¹³ Komana mukukumina dakutiya kutama hayuma yimuneli? Inehi. Petulu wahosheli nindi mwatela cheñi “kufunta.” Dikwila nawu mwatela kuleka kwila yuma yatama yimwelileña nakutachika kwila yuma yayiwahi. Chakutalilahu, fwikijenu munakuya kwiluña dimwabula kwiluka. Chimwendaku chanti, mumona nenu munajimbelimu. Mukwiladi? Mukutachika kwenda chovu, mukwimana, mukufunta nakuya kumunakuya. Munjila yoyimu, chimukudizaña Bayibolu, mukwiluka nenu kudi yilwilu yimu yimwelileña yimwatela kuhimpa. Fwilenu “kufunta,” himpenu yilwilu yenu nawa ilenuña yuma yayiwahi.

14. Munateli kudihana ñahi kudi Nzambi?

¹⁴ Chuma chikwawu chalema chimwatela kwila henohu kanda mupapatishewi hikudihana kudi Yehova. Neyi mudihana kudi Yehova, mukuhosha mukulomba nakumushiika Nzambi nenu mukudifukulaña kudi yena hohu nikutwamijaku nankashi nkeñelu yindi mukuhanda kwenu.—Kuhituluka 6:15.

15, 16. Chumanyi chaleteshaña muntu yadihani kudi Nzambi?

¹⁵ Kuhosha nenu mukumukalakelaña hohu Yehova chidi neyi munakushiika muntu imwakeña nenu mukushakamaña nindi mukuhanda kwenu kwejima. Fwikijenu eyala namumbanda anakudiluka kulonda akadisumbuli. Iyala chamwilukayi chiwahi mumbanda, wamukeñaña nankashi chakwila wakeñaña nikumusumbula. Hela chakwila chuma chinakukeña kwilayi cheneni nankashi, iwu iyala wukwiteja jejima jakafumamu muloña wamukeña.

¹⁶ Chimukudizaña hadi Yehova, mukumukeña nankashi nawa mukufwilaña kumuzatila chikupu. Chumichi chikuyisañumuna kumushiika Yehova mukulomba nenu mukumuzatilaña. Bayibolu yahoshaña nawu muntu wunakukeña kumulondela Yesu watela ‘kudibonda.’ (Maku 8:34) Chumichi chinatalishi mudihi? Chinayi mukwila nawu mukumwovwahilaña Yehova chikupu muchihandilu chenu. Yuma yakeñañayi Yehova yalema kubadika yuma yimwafwilaña kwila.—Tañenu 1 Petulu 4:2.

17. Muloñadi antu amakwawu chabulilañawu kudihana kudi Yehova?

¹⁷ Antu amakwawu adihanaña wanyi kudi Yehova muloña achinaña nawu akakañanya kwila mwashiikiliwu.  Hiyakeñaña kumuneñesha Yehovaku, hela nawu neyi abula kudihana, Yehova hakayinka muloña nayuma yelañawuku.

18. Chumanyi chikuyikwasha kubula kutiya woma wakumuneñesha Yehova?

¹⁸ Hamuloña wakumukeña Yehova chikuyikwashaku kubula kumuneñesha. Muloña mwamukeña, mukudishaku kulonda mwileña yuma yimwashiikili. (Mukwakutañisha 5:4; Akolosi 1:10) Mukutoñojokaña wanyi nenu kwila nkeñelu yaYehova kwakala. Kapostolu Yowanu wasonekeli nindi: “kumukeña Nzambi kwatalisha mukwila nawu tuhembeña nshimbi jindi; nawa nshimbi jindi hijakalaku.”—1 Yowanu 5:3.

19. Muloñadi chimwatela kubulila kutiya woma wakudihana kudi Yehova?

¹⁹ Hichinayi mukwila nawu chiña twikala awanina mwaka tudihani kudi Yehovaku. Hakeñaña nindi twileña yuma yabadika muñovu yetuku. (Masamu 103:14) Wakayikwasha kwila mwaloña. (Isaya 41:10) Mukuhwelelenu Yehova namuchima wenu wejima, ‘niyena wakayolwela njila jenu.’—Yishimu 3:5, 6.

20. Neyi munadihani dehi kudi Nzambi, chumanyi chimwatela kwila?

²⁰ Munatoñojoki nenu munashikilimu kudihana kudi Yehova? Neyi munadihani dehi kudi Yehova, dikwila nawu munadiloñeshi kwila chuma chinalondeluhu. Mwatela kupapatishewa.

21, 22. Munateli ñahi ‘kushimuna hatooka’ chikuhwelelu chenu?

²¹ Mulejenu nloñeshi wezanvu dawaeluda muchipompelu chenu nenu munadihani kudi Yehova nawa munakukeña kupapatishewa. Yena wukuleja aeluda akuhituluka nenu muntañishilu yalema yamuBayibolu.  Neyi eteja nawu munashikilimu, akuyileja nawu mukapapatishewa hakupompa kwanyanya hela kweneni kwawaYinsahu jaYehova. Hakupompa, kwakekala mpanji yikalumbulula mwatalisha chipapatishu. Nhoshi wukahanaña mpanji wakehula anakuya kuchipapatishu malwihu ayedi apela. Chimwakula awa malwihu, ‘mwakashimuna hatooka’ chikuhwelelu chenu.—Aroma 10:10.

 ²² Kuhiñahu, akuyipapatisha. Akuyijimika chikupu mumenji. Chipapatishu chamwekeshaña kudi antu nawu munadihani kudi Yehova nawa munekali Chinsahu chaYehova.

23. Indi kupapatishewa “mwijina daTata nidaMwana nidaspiritu yajila” kwatalisha mudihi?

²³ Yesu wahosheli nindi atumbanji twindi akayipapatisha “mwijina daTata nidaMwana nidaspiritu yajila.” (Tañenu Matewu 28:19.) Iyi nhoshelu yatalisha mudihi? Yatalisha mukwila nawu muneluki chifulu chikwetiyi Yehova nichikwetiyi Yesu mukushikija nkeñelu yaNzambi, nichazatishañayi Nzambi spiritu yajila kwila nkeñelu yindi.—Masamu 83:18; Matewu 28:18; Añalija 5:22, 23; 2 Petulu 1:21.

24, 25. (a) Chipapatishu chemenañaku kwodi? (b) Tukahajekadi mukapetulu kakumishaku?

²⁴ Chipapatishu chemenañaku chuma chalema nankashi. Chayijimikawu mumenji, dikwila nawu munafwi hela munaleki yilwilu yakunyima. Chayifumpulawu, dikwila nawu munatachiki chihandilu chachiha chakwila nkeñelu yaNzambi. Chumichi chikumwekesha nawu ichi dinu mukumuzatilaña Yehova. Anukenu nenu himunadihani kudi antu, izanvu hela kumudimuku. Munadihani kudi Yehova.

²⁵ Kudihana kwenu kukuyikwasha kwikala nawubwambu wawuwahi naNzambi. (Masamu 25:14) Bayi neyi chinayi mukwila nawu muntu wukapuluka muloña wakupapatishewaku. Kapostolu Pawulu wasonekeli nindi: “Ikalenuña nawoma nikuzaala hampinji yimunakufwila kutambwila wamwinu.” (Afwilipi 2:12) Chipapatishu hintachikilu hohu. Hanu dinu munateli kuswina ñahi kwakwihi naYehova? Kapetulu kakumishaku kawunu mukanda kakwakula ilu lwihu.