1, 2. Anyi adiña amabwambu jaYehova?

HINYI imunakukeña yekali ibwambu denu? Muntu imwakeña. Muntu imwabulaña kutoboka nindi niwumwatiyañanaña nindi. Wukweti muchima niyilwilu yayiwahi yimwakeña.

² Yehova Nzambi watondaña antu kwikala amabwambu jindi. Chakutalilahu, Abarahama wadiña hakachi kawamabwambu jaYehova. (Isaya 41:8; Yakoba 2:23) Davidi niyena amukeñeli kudi Yehova. Wahosheli nindi Davidi wadiña ‘iyala watiyileñayi kuwaha mumuchima windi.’ (Yilwilu 13:22) Kaprofwetu Danyeli niyena wadiña “wasweja kukeñewa” kudi Yehova.—Danyeli 9:23.

3. Muloñadi Abarahama, Davidi niDanyeli chekaliliwu amabwambu jaYehova?

³ Indi Abarahama, Davidi niDanyeli ekalili ñahi amabwambu jaYehova? Yehova wamwilili Abarahama nindi: ‘Wunovwahili mwizu dami.’ (Kutachika 22:18) Yehova wekalaña ibwambu dawantu amwovwahilaña chikupu. Nimuza wawantu wunateli kwikala ibwambu dindi. Yehova walejeli muza wawaIsarela nindi: ‘Tiyililenu mwizu dami kulonda niikali Nzambi yenu, ninenu mwikali antu jami.’ (Yeremiya 7:23) Ninenu neyi munakukeña kwikala ibwambu daYehova mwatela kumwovwahila.

4, 5. Yehova wakiñaña ñahi amabwambu jindi?

⁴ Bayibolu yatulejaña nawu Yehova nakukeña njila ‘kulonda yakwashi nañovu antu adi nanyichima yalala  chikupu.’ (2 Kushindulula 16:9) HaMasamu 32:8, Yehova wayishiika amabwambu jindi nindi: ‘Nakayinka maana nawa nakayileja njila yimwatela kwenda. Nakayilejaña nadisu dami.’

⁵ Chilumbu muneni nakukeña kuluwañesha wubwambu wetu naNzambi. Ilaña Yehova nakukeña kutukiña. (Tañenu Masamu 55:22.) Chineli tudi amabwambu jaYehova, twamukalakelaña namuchima wumu. Twamwovwahilaña hela tudi mulukadi. Tudi nachikuhwelelu neyi chadiña nañimbi yamasamu. Wasonekeli kutalisha hadi Yehova nindi: ‘Chineli wudi kuchikasa chami chachidiilu, hinakatiya womaku.’ (Masamu 16:8; 63:8) Satana watukañeshaña ñahi tubuli kwikala amabwambu jaNzambi?

6. Satana wahosheli nindidi kutalisha hadi antu?

⁶ MuKapetulu 11, twadizili netu Satana wamujinokeli Yehova nakumwinka muloña nindi hisakutwamba nawa watama chabuliliyi kuyiteja Adama naEvu kwikala nawuswa wakwiluka yayiwahi nayatama. Mukanda waYoba watulejaña nawu Satana wayinkaña nyiloña antu akeñaña kwikala amabwambu jaNzambi. Satana wahoshaña nindi amukalakelaña Nzambi muloña wayuma yayinkañayi bayi hamuloña wakumukeñaku. Satana wahosheli nindi nateli kuletesha ejima adikañi naNzambi. Tutalenu chitukudizila kudi Yoba nichamukiñiliwu kudi Yehova.

7, 8. (a) Yehova wamumweneña ñahi Yoba? (b) Satana wahosheli nindidi kutalisha hadi Yoba?

⁷ Yoba wadiña muntu wamuchidinyi? Wadiña muntu wamuwahi wadiñaku yaaka 3,600 yinahitihu. Yehova wahosheli nindi hayina mpinji kwosi muntu wadiña neyi yena hamaseki. Yoba wamulemesheli Nzambi nankashi  nawa waheleli yuma yatama. (Yoba 1:8) Yoba wadiña ibwambu daYehova chikupu.

⁸ Satana wahosheli nindi Yoba wamukalakeleleña Nzambi muloña wayuma yamwinkeleñawu. Satana wamwilili Yehova nindi: ‘Hiwunamukolekeli yena niitala dindi niyuma yindi yejima ikoli kwi-ndo mbadi jejimaku? Ninyidimu yakumakasindi wunayikiswili nkisu, niyimuna yindi yasemunwina dehi mwituña. Ololaku ntahi chikasa cheyi katataka wukwati hayuma yindi yejima, wutali neyi wukubula kukuhosha chatama kumesu eyi.’—Yoba 1:10, 11.

9. Yehova wamwitejeli Satana kwiladi?

⁹ Satana wamujinokeli Yoba nindi wamukalakelaña Yehova muloña wayuma yamwinkayi. Satana wahosheli cheñi nindi nateli kumulekesha Yoba kumukalakela Yehova. Yehova hetejeli mwahosheliyi Satanaku, ilaña wamwitejeli yamweseki Yoba kulonda yamoni neyi wadiña ibwambu daYehova nawa wamukalakeleleña muloña wamukeñeli.

10. Satana wamulukukili ñahi Yoba, nawa welili ñahi?

¹⁰ Chatachi, Satana wajahili yimuna yaYoba yejima. Kuhiñahu, Satana wajahili añamba jaYoba amavulu. Yoba washalili makasakasa. Nkumininaku, Satana wajahili anyana kaYoba ikumi nampepela. Ilaña Yoba watwalekelihu kwikala washinshika kudi Yehova. ‘Mwejimimu Yoba havulumwiniku, hamusupishili Nzambiku.’—Yoba 1:12-19, 22.

11. (a) Satana wamwililidi cheñi Yoba? (b) Yoba welili ñahi?

¹¹ Satana watwalekelihu. Wamuzuñishili Nzambi nindi: ‘Mukwati hamujimba windi, wutali neyi wukubula kukuhosha chatama kumesu eyi.’ Satana wamuleteleli musoñu wakata nankashi. (Yoba 2:5, 7) Cheñi, Yoba wadiña  washinshika kudi Yehova. Wahosheli nindi: “Hinamba kafumisha kashinshi kamiku [hela kuzeya], nichinamba kafwa.”—Yoba 27:5.

12. Yoba wamwekesheli ñahi nindi Satana hisakutwamba?

¹² Yoba helukili nindi Satana nakumwinka nyiloñaku nawa helukili chaletesheli yakabakaneñaku. Watoñojokeleña nindi Yehova diyi wamukabishileña. (Yoba 6:4; 16:11-14) Ilaña, Yoba wadiña washinshika kudi Yehova. Hazeyeliku. Yoba hadiña nalwisuku. Wadiña ibwambu daNzambi muloña wamukeñeli. Yuma yejima yahosheliyi Satana yadiña yakutwamba.

13. Wulokwinyi watambwililiyi Yoba muloña wakashinshi kindi?

¹³ Hela chakwila Yoba helukili yuma yamwekeneña mwiwuluku, wadiña washinshika kudi Nzambi nawa wamwekesheli nindi Satana watama. Yehova wamukiswilili Yoba muloña wadiña ibwambu dindi washinshika.—Yoba 42:12-17.

14, 15. Satana wahoshaña nindidi kutalisha hadi amayala niambanda ejima?

¹⁴ Kudi yuma yayivulu yimukudizila kuyuma yamumwekeneni Yoba. Makonu, Satana watutwambilaña nindi twamukalakelaña Yehova muloña wayuma yatwinkañayi Nzambi. HaYoba 2:4, Satana wahosheli nindi: “Muntu wukuhana yuma yakwetiyi yejima nawumi windi.” Satana wahoshaña nindi amayala niambanda ejima hiyakwalwisu neyi Yoba. Chimwahitili yaaka yayivulu kufuma hafwiliyi Yoba, Satana watwalekelihu nakumuhoshola Yehova nikuyitwambila ambuñindi. Chakutalilahu, haYishimu 27:11, twatañañahu netu: “Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula [hela wukunhoshola].”

 ¹⁵ Munateli kumwovwahila Yehova kulonda mwiikali ibwambu Dindi washinshika nakumwekesha nenu Satana hisakutwamba. Neyi munakukeña kuhimpa chihandilu chenu chikupu kulonda mwikali ibwambu daNzambi, dikwila nawu munafuukuli chiwahi. Kufuukula kwamuchidiwu kwakuwahi nankashi. Satana wahoshaña nindi mukumufutalela Nzambi neyi muholokela mukukala. Watudimbaña kulonda tumufutaleli Nzambi. Watudimbaña ñahi?

16. (a) Njilanyi yazatishañayi Satana kulonda yatukañeshi kumukalakela Yehova? (b) Diyabolu nateli kuyikañesha ñahi kumukalakela Yehova?

¹⁶ Satana wazatishaña njila jajivulu kulonda yakutukañeshi kwikala ibwambu daNzambi. Walukukaña “neyi mutupa wunakubuluma, wunakukeñakeña watela kudayi.” (1 Petulu 5:8) Bayi muhayama neyi ibwambu denu, ntaña yenu hela akwenu anakukeña kuyikañesha kudiza Bayibolu hela kwila yuma yayiwahiku. Mukutoñojoka nenu anakuyitesha. * (Yowanu 15:19, 20) Satana wadifwikijaña cheñi “neyi kañelu kachejeji.” Nateli kutuluwañesha kulonda tudikañi naYehova. (2 Akorinda 11:14) Cheñi, Satana watukañeshaña kumukalakela Yehova kuhitila mukutwilisha tutoñojokeña netu twashikilamu wanyi kumukalakela Nzambi.—Yishimu 24:10.

17. Muloñadi chitwamwovwahilaña Yehova?

¹⁷ Neyi tukumwovwahila Yehova, tukumwekesha netu Satana hisakutwamba. Chumanyi chikutukwasha kwovwahila? Bayibolu yahoshaña nawu: “Wakakeñi  Yehova Nzambi yeyi namuchima weyi wejima, nawumi weyi wejima, nañovu jeyi jejima.” (Kuhituluka 6:5) Twamwovwahilaña Yehova muloña twamukeña. Chitwasweja kumukeña Yehova, tukwilaña yuma yejima yikutulejañayi. Kapostolu Yowanu wasonekeli nindi: “Kumukeña Nzambi kwatalisha mukwila nawu tuhembeña nshimbi jindi; nawa nshimbi jindi hijakalaku.”—1 Yowanu 5:3.

18, 19. (a) Yumanyi yashimunayi Yehova nindi yatama? (b) Tuneluki ñahi netu Yehova hanakutwila nindi twileña yuma yakalaku?

¹⁸ Yumanyi yatulejañayi Yehova nindi yatama? Muchikasha chinakuhosha nawu “ Helenu Yuma Yahelayi Yehova” mudi yuma yitwatela kutondolwela. Mpinji yikwawu mukutoñojoka nenu iyi yuma yatama nankashi wanyi. Ilaña chimwataña mavasi amuBayibolu nikutoñojokahu chiwahi, mukwiluka chichawahila kwovwahila nshimbi jaYehova. Hadaha kudi yuma yimunakutoñojoka nenu  mwatela kuhimpa. Hela chakwila chikuyikalila, ilaña neyi muhimpa, mukwikala mukuwunda ninamuzañalu wekalaña nawamabwambu jaNzambi ashinshika. (Isaya 48:17, 18) Tuneluki ñahi netu tunateli kuhimpa yilwilu yetu?

¹⁹ Yehova hatulejaña nindi twileña yuma yitukukañanya kwilaku. (Kuhituluka 30:11-14) Watwiluka chiwahi muloña Hibwambu detu nankashi. Weluka ñovu jetu nikuzeyazeya kwetu. (Masamu 103:14) Kapostolu Pawulu watukoleshaña nindi: “Nzambi washinshika, hakayileka enu kuhita mukweseka kwabadika kweseka kumunateli kuumikaku, ilaña kweseka kwejima kumukahitamu, wakayiloñeshela njila yakuumikilamu oku kweseka.” (1 Akorinda 10:13) Twatela kukuhwelela netu Yehova wukutwinkaña ñovu yakwila mwaloña. Wukuyinka “ñovu yabadika” kulonda muumikeña kukala  kukuyimwekenaña. (2 Akorinda 4:7) Chelili anamukwashi dehi kudi Yehova mulukadi, Pawulu wahosheli nindi: “Nikweti ñovu yakuhita muyuma yejima muloña wanowu wanyinkaña ñovu.”—Afwilipi 4:13.

20. Yilwilwinyi yimwatela kwimbujola, nawa muloñadi?

²⁰ Neyi tunakukeña kwikala amabwambu jaYehova, twatela kuleka yuma yatulejañayi Yehova nindi yatama, twatela kuzata nañovu. (Aroma 12:9) Amabwambu jaNzambi akeña yuma yakeñayi. Ayishimuna haMasamu 15:1-5. (Tañenu.) Amabwambu jaYehova embujolaña yilwilu yindi nawa amwekeshaña “kukeña, muzañalu, kuwunda, kudiwunjika, luwi, kuwaha, chikuhwelelu, kwovwaha, kudihemba.”—Añalija 5:22, 23.

21. Munateli kumwekesha ñahi yilwilu yakeñayi Nzambi?

²¹ Munateli kumwekesha ñahi iyi yilwilu yayiwahi? Mwatela kwiluka yuma yakeñayi Yehova kuhitila mukutaña nikudiza Bayibolu mpinji yejima. (Isaya 30:20, 21) Neyi mwila mwenimu, mukumukeña Yehova chikupu nawa chimwamukeña, mukumwovwahilaña.

22. Yumanyi yikufumamu neyi mumwovwahila Yehova?

²² Yuma yimukuhimpa muchihandilu chenu tunateli kuyesekeja nakuvuula yuma yayikulu nakuvwala yayiha. Bayibolu yahoshaña nawu “vuulenu wuntu wenu wawukulu” nakuvwala “wuntu wawuha.” (Akolosi 3:9, 10) Hela chakwila kuvwala wuntu wawuha kwakala, neyi tuhimpa yilwilu yetu nikumwovwahila Yehova, watushiika kutwinka “wuloku weneni.” (Masamu 19:11) Fwilenu kumwovwahila Yehova kulonda mumwekeshi nenu Satana hisakutwamba. Mukalakelenu Yehova muloña wakukeña bayi hamuloña wayuma yimwakatambwila kumbidiku. Neyi mwila mwenimu, mukwikala ibwambu daNzambi chikupu.