1. Kudihi kutwatela kwilukila yuma yakumbidi?

MWATAMBAHU dehi nyuzi ha TV nakudihula nenu, ‘Komana yuma yinakutaminaku?’ Mukaayi mudi yihuñu yayivulu nankashi nilukambu chakwila antu amakwawu anakutoñojoka nawu twatela tunashiki dehi kukukuma kwakaayi. Komana mwalala? Kudihu njila yitwatela kwilukilamu yuma yikamwekana kumbidi? Eña. Hela chakwila antu hiyakutwesha kushimuna yuma yikamwekana kumbidiku, Yehova Nzambi natweshi kushimuna. Watulejaña kuhitila muBayibolu chakekala chihandilu chetu kumbidi nichakekala iseki.—Isaya 46:10; Yakoba 4:14.

2, 3. Yumanyi yakeñeleñawu kwiluka atumbanji twaYesu nawa wayakwili nindidi?

² Neyi tutaña nsañu yakukuma kwakaayi muBayibolu, hichaya mukwila nawu hikukuma Kwesekiku, ilaña hikukuma kwayuma yatama. Yesu walejeli antu nindi Wanta waNzambi wakayuula hamaseki. (Luka 4:43) Atumbanji twindi akeñeleña kwiluka mpinji yakenza Wanta waNzambi, amwihwili Yesu nawu: “Mpinjinyi yakamwekana yumiyi, nawa chinjikijilwinyi chikamwekesha kwikalahu kweyi nikukuma kwanshakaminu yamakonu?” (Matewu 24:3) Yesu wayilejeli wanyi ifuku dadeni, ilaña wayilejeli yuma yikamwekana henohu kukuma kwakanu kaayi kanda kushiki. Yuma yahosheliyi Yesu nindi yikamwekana, yinakumwekana makonu.

³ Mukanu kapetulu tukuhanjeka hawunsahu wunakumwekesha nawu tunakushakama mumafuku akukuminina. Chatachi, twatela kwiluka njita yamwekeni mwiwulu  hakwila nawu twiluki yuma chiyinasweji kutaminaku hanu hamaseki.

4, 5. (a) Yumanyi yamwekeni mwiwulu chelili Yesu yekali Mwanta? (b) Kwesekeja naChimwekeshu 12:12, chumanyi chamwekeni hamaseki chelili Satana amufumishi mwiwulu?

⁴ MuKapetulu 8 twadizili netu Yesu wekalili Mwanta mwiwulu mu 1914. (Danyeli 7:13, 14) Mukanda waChimwekeshu watulejaña yuma yamwekeni: “Mwiwulu mwatachikili njita: Mikeli [dikwila nawu, Yesu] niañelu jindi alwili njita nachanzañombi [Satana], nawa chanzañombi niañelu jindi alwili nawu njita.” * Satana niandemoni jindi ayishindili nawa ayinatilili hamaseki. Añelu atiyili kuwaha chikupu. Indi antu adiña hamaseki atiyili ñahi? Bayibolu yahoshaña nawu yadiña mpinji yakumona antu makabi. Muloñadi? Muloña Diyabolu wudi nandombu yayeni, “chinelukiyi nindi nashali dehi nakapinji kantesha.”—Chimwekeshu 12:7, 9, 12.

⁵ Diyabolu nakuleta yihuñu yashiyashana hamaseki. Nahili chikupu muloña nashali hohu nakapinji kantesha hakwila nawu Nzambi yamujilumuni. Tushinshikenu yuma yashimwiniyi Yesu nindi yikamwekana mumafuku akukuminina.—Talenu Mazu Adi Kunsa 24.

6, 7. Tunateli kuhosha netudi hanjita ninzala yidi mukaayi makonu?

⁶ Njita. Yesu wahosheli nindi: “Muza wakanyamuka nakuzuña namuza wukwawu, wanta niwena wakanyamuka nakuzuña nawanta wukwawu.” (Matewu 24:7) Antu amavulu makonu anayijahi munjita kubadika  chafwileñawu kunyima. Mutayi watalaña nsañu jamuKaayi washimwini nawu kufuma mu 1914, antu akubadika ha 100 miliyoni anafwi munjita. Antu afwili munjita kufuma mu 1900 nakushika mu 2000 avulili nankashi kubadika ajahiliwu kunyima henohu chaaka cha 1900 kanda chishiki. Antu anakabakani nankashi muloña wanjita.

⁷ Nzala. Yesu wahosheli nindi: “Kwakekala nzala yakapwelendendi.” (Matewu 24:7) Hela chakwila yakuda yinavuli nankashi kubadika kunyima, antu amavulu adana yakuda. Muloñadi? Muloña adana mali akulanda yakuda hela iluña hakudima. Hefuku dimu antu akubadika habiliyoni azatishaña mali antesha nankashi akulandamu yakuda. Mutayi wa World Health Organization wahoshaña nawu hachaaka-hachaaka mamiliyoni awanyana anakufwa, muloña wakubula yakuda yayivulu yakuyikwasha kumujimba.

8, 9. Yumanyi yinakumwekesha nawu wuprofwetu wahosheliyi Yesu hanyitentanshi ninyisoñu walala?

⁸ Nyitentanshi. Yesu waprofweteli nindi: “Kwakekala nyitentanshi yamaneni nankashi.”  (Luka 21:11) Makonu kunakumwekana nyitentanshi yamaneni hachaaka-hachaaka. Kufuma tuhu mu 1900, antu akubadika ha 2 miliyoni anafwi nanyitentanshi. Hela chakwila yuma yinakutuñatuñawu makonu yinakukwasha kwilukila chadimu nyitentanshi, antu amavulu achidi kufwa.

⁹ Nyisoñu. Yesu washimwineñahu dehi nindi, kwakekala “yipupu.” Nyisoñu yafwana yikatanda swayi-swayi nakujaha antu amavulu. (Luka 21:11) Hela chakwila andotolu anadizi chakuuka yikatu yayivulu, kudi yikatu yikwawu yinakukañanyawu kuuka. Chileji chimu chashimwini nawu, hachaaka-hachaaka, antu amavulu afwaña nanyisoñu yidi neyi TB, maleliya nikolera. Bayi neyi iyi diyi nyisoñu yidiku hohuku, ilaña andotolu anawani nyisoñu yikwawu 30 yayiha nawa nyisoñu yikwawu haniyi nyisoñu yidana yitumbu.

10. Nsona ya 2 Timotewu 3:1-5 yinakushikijewa ñahi makonu?

¹⁰ 2 Timotewu 3:1-5, yahosha nawu: “Mumafuku akukuminina mwakekala mpinji jakala.”  Kapostolu Pawulu walumbulwili chakekala yilwilu yawantu mumafuku akukuminina. Wahosheli nindi antu akekala

• akwakudikeña

• asweja kukeña mali

• abulaña kwovwahila anvwali

• abula kushinshika

• abula kukeña antaña jawu

• abulaña kudiyuula

• asweja kuzuwa

• akwakukeña jakuzañalesha chatela akeñi Nzambi

• amwekanaña neyi kwiji amwakama Nzambi, ilaña akaanaña kumwovwahila

11. Chumanyi chakayimwekena antu atama kwesekeja naMasamu 92:7?

¹¹ Antu ekala nayilwilu yamuchidiwu kumwashakamaña? Antu anakumwekesha yilwilu yamuchidiwu mukaayi kejima. Ilaña Nzambi keña yafumishihu yilwilu yamuchidiwu. Washiika nindi: ‘Chelañawu antu atama hiyakumena neyi matahu, niakwakukoña nyidimu yakuluwa  hiyakukula lufuchi, komana analondi kuyijilumuna chahaya nyaaka.’—Masamu 92:7.

12, 13. Yumanyi yinatudizishiyi Yehova munanu mafuku akukuminina?

¹² Bayibolu yashimwineñahu dehi nawu mumafuku akukuminina, mukaayi mwakenzala yihuñu nimakabi. Hela chochu Bayibolu yahosha cheñi nawu kukamwekana yuma yayiwahi.

¹³ Kutiyisha nsañu yekala muBayibolu. Kaprofwetu Danyeli wasonekeli nsañu yahosha hamafuku akukuminina. Wahosheli nindi: “Kwiluka kwalala kwakavula.” (Danyeli 12:4) Nzambi wakayinka antu jindi wuswa wakutiyisha nsañu yekala muBayibolu chikupu kubadika chichadiña kunyima. Yehova nakwila mwenimu sweje-e kufuma tuhu mu 1914. Chakutalilahu, natudizishi ijina dindi chidalema, nkeñelu yindi kutalisha kwiseki, chekala ifutu danyiloña, kutwayaña neyi tunafwi nikusañuka. Tunadizi netu Wanta waNzambi hohu diwatela kumanisha kukala kwetu kwejima. Tunadizi cheñi chakwikala namuzañalu nichitwatela kumuzañalesha Nzambi. Hanu dinu antu jaNzambi elaña ñahi nayuma yinadiziwu? Wuprofwetu wukwawu watulejaña ñakwilu.—Talenu Mazu Adi Kunsa 21 ni 25.

14. Nsañu yayiwahi yaWanta ayishimwinaña kudihi nawa anyi ashimwinaña?

¹⁴ Mudimu wakushimwina mukaayi kejima. Kutalisha hamafuku akukuminina, Yesu wahosheli nindi: ‘Nsañu iyi yayiwahi yaWanta akayishimwina mwahita iseki dejima mwashakamawu antu.’ (Matewu 24:3, 14) Nsañu yayiwahi yaWanta anakuyishimwina mumatuña akubadika ha 230 nawa mumadimi akubadika ha 700.  Eñañi, mukaayi kejima, aYinsahu jaYehova kufuma “kunyuza ninyichidi yejima” anakukwasha antu kwiluka Wanta waNzambi niyuma yiwukelila antu. (Chimwekeshu 7:9) Akwashaña antu chakadi kufwetesha. Hela chakwila ayihela nawa ayikabishaña kudi antu amavulu, kwosi chuma chidi chejima chinateli kukañesha mudimu wakushimwina, neyi chochaprofweteliyi Yesu.—Luka 21:17.

15. (a) Muneteji nenu tunakushakama mumafuku akukuminina nawa muloñadi? (b) Chumanyi chikayimwekena antu amwovwahilaña Yehova niabulaña kumwovwahila?

¹⁵ Muneteji nenu tunakushakama mumafuku akukuminina? Wuprofwetu wawuvulu wamuBayibolu wahosha hamafuku akukuminina wunakushikijewa. Katataka tuhu Yehova yalekeshi mudimu wakushimwina nsañu yayiwahi nawa “kukuma” kwakenza. (Matewu 24:14) Kukuma hichumanyi? HiAmagedoni, mpinji yikafumishahu Nzambi yuma yejima yatama. Yehova wakazatisha Yesu niañelu jindi añovu kujilumuna antu ejima akaanaña kumwovwahila Nzambi niMwanindi. (2 Atesalonika 1:6-9) Kuhiñahu, Satana niandemoni jindi akadimba cheñi antu wanyi. Nawa antu ejima amwovwahilaña nikwiteja Wanta windi akamona chakashikijewa yuma yejima yashiikayi Nzambi.—Chimwekeshu 20:1-3; 21:3-5.

16. Chineli kukuma kudi kwakwihi, yumanyi yimwatela kwila?

¹⁶ Kanu kaayi kanakuyuulawu kudi Satana keña kakumi. Dichi, twatela kudihula netu, ‘Chumanyi chinatela kwila?’ Yehova nakukeña nindi tudizi yuma yayivulu muBayibolu. Mwatela kushaku muchima kuyuma yimunakudiza. (Yowanu 17:3) A Yinsahu jaYehova ekalaña nakupompa mulungu nimulungu kwakwashaña antu kutiyisha nsañu yamuBayibolu. Pompenuña nawu mpinji yejima. (Tañenu Aheberu 10:24, 25.) Neyi mwiluka nenu  kudi yuma yimunakukeña kuhimpa, himpenu chakadi kutiya woma. Chimwahimpa, wubwambu wenu naYehova wukukola chikupu.—Yakoba 4:8.

17. Muloñadi antu amavulu chakayishintakeshelawu chakenza kukuma?

¹⁷ Kapostolu Pawulu walumbulwili nindi mpinji yakujilumuna antu atama yakenza hampinji yinabuli kwilukawu, “neyi chenzañayi ikombi nawufuku.” (1 Atesalonika 5:2) Yesu washimwini nindi antu amavulu akadiwula chinjikijilu chakwiluka nachu nawu tunakushakama mumafuku akukuminina. Wahosheli nindi: “Neyi chochichadiña mumafuku aNowa, dichichakekala nihakwikalahu kwaMwana kamuntu [hela mafuku akukuminina]. Muloña mumafuku wenowu chelili Dibaji kanda dinzi, antu adiileña nikunwa, amayala asumbwileña, ambanda asumbukileña kushika nihanodu ifuku deñililiyi Nowa muwatu, wena hiyashiliku maanaku, nichenjili Dibaji nakuyijilumuna wejima wawu. Nimpinji yakwikalahu kwaMwana kamuntu dichiyikekala.”—Matewu 24:37-39.

18. Yesu watusoñamishli nindidi?

¹⁸ Yesu watusoñamishili nindi bayi tuluwankana ‘muloña wakusweja kuda, kusweja kunwa nikwakama kwamuwumiku.’ Wahosheli nindi kukuma kwakenza chakukashimwisha, “neyi muhetu.” Wahosheli cheñi nindi, “dakashikena antu ejima ashakama hamaseki hejima.” Kuhiñahu wabombelilihu nindi: “Tonenuña, lombenuña nakulembelela mpinji yejima kulonda mwakatweshi kupuluka kuyuma yejimiyi yakamwekana nikutwesha kwimana kumesu aMwana kamuntu.” (Luka 21:34-36) Muloñadi chitwatela kutiyilila kusoñamisha kwaYesu? Muloña katataka tuhu kaayi kaSatana akijilumuni. Antu etejawu kudi Yehova niYesu diwu hohu akapuluka neyi kukuma kunashiki nawa diwu akashakama haya nyaaka mwituña dadiha.—Yowanu 3:16; 2 Petulu 3:13.