Ijina daNzambi diyi Yehova nawa daya mukwila nawu “Wakojejaña Yuma Kwikalaku.” Yehova hiNzambi wañovu jejima nawa waleñeli yuma yejima. Wukweti wuswa wakwila yuma yejima yinafuukuliyi.

MuchiHeberu, ijina daNzambi adisonekeli munsona jiwana. MuLunda, iyi nsona hiYHWH hela JHVH. Ijina daNzambi damwekanaña mapampa 7,000 munsona jachiHeberu jajeni. Antu mukaayi kejima azatishaña ijina daYehova munjila yashiyashana nawa aditenaña kwesekeja nedimi dawu.

▸ Kape. 1, para. 15

Nsoneki yaBayibolu hiNzambi. Chidi neyi nkaaka yawantu nakuleja mwijikulwindi kumusonekela mukanda mudi nsañu yindi. Nzambi wazatishili spiritu yindi yajila kulonda yiyikwashi ansoneki aBayibolu kusoneka yitoñojoka yindi. Spiritu yaNzambi yayikwashili munjila jashiyashana, mpinji yikwawu amweneña yimwenu hela kulota yuma yatela kusonekawu.

▸ Kape. 2, par. 5

Hinsañu yamuBayibolu yatukwashaña kufuukula chachiwahi. Chakutalilahu, chishina chakwila nawu “kudikunda nawantu atama kwakisañanaña yilwilu yayiwahi” chatudizishaña nawu amabwambu anateli kutwisambwisha yilwilu yayiwahi hela yatama. (1 Akorinda 15:33) Chishina chikwawu chahoshaña nawu “chuma chinakukuwayi muntu, dichakamunayi” chatudizishaña nawu kwila tutemuka yuma yafumaña muyuma yitwelaña nehi.—Añalija 6:7.

▸ Kape. 2, para. 12

Iyi hinsañu yafumaña kudi Nzambi. Yinateli kwikala nsañu yinakulumbulula nkeñelu yaNzambi, nshimbi, yuma yinakukeñayi nindi mwili hela wunsompeshi. Yinateli cheñi kwikala nsañu yayuma yikamwekana kumbidi. Kudi wuprofwetu wawuvulu wamuBayibolu wunashikijewi.

▸ Kape. 2, para. 13

Yesu diyi washikijili wuprofwetu wawuvulu wamuBayibolu wahosha hadi Mesiya. Talenu kachikasha kanakwila nawu “ Wuprofwetu Wahosha Hadi Mesiya.”

▸ Kape. 2, para. 17, ftn.

Yehova waleñeli iseki kulonda dikali paradisa mukala mwakushakama antu amukeña. Nkeñelu yindi yahimpa wanyi. Katataka tuhu Nzambi yafumishihu kutama kwejima nawa keña yenki antu wumi wahaya nyaaka.

▸ Kape. 3, para. 1

Satana hikañelu watachikili kudinkaña naNzambi. Amutenaña wawu Satana, chaya mukwila nawu “Mukwakudimbulula,” muloña wamuzuñishaña Yehova. Amutenaña cheñi nawu Diyabolu, chaya mukwila nawu “Mukwakutwamba.” Amutumbili indi ijina muloña wamutwambilaña Nzambi nawa wadimbaña antu.

▸ Kape. 3, para. 4

Yehova waleñeli añelu henohu kanda yaleñi iseki. Ayileñeli kulonda ashakameña mwiwulu. Kwekala añelu amavulu chikupu. (Danyeli 7:10) Akweti majina niyilwilu yashiyashana nawa añelu ashinshika akanaaña antu kudifuukula kudi wena. Akweti yifulu yashiyashana nawa azataña nyidimu yayivulu. Iyi nyidimu yabombelamu kukalakala kwitanda daYehova, kushimuna nsañu, kuhemba nikukiña ambuñindi ahamaseki, kushimuna nsañu yawunsompeshi windi nikukwasha mumudimu wakushimwina. (Masamu 34:7; Chimwekeshu 14:6; 22:8, 9) Kumbidi, akamukwashaku Yesu kulwa hanjita yaAmagedoni.—Chimwekeshu 16:14, 16; 19:14, 15.

▸ Kape. 3, para. 5; Kape. 10, para. 1

Yuma yejima yitwatiyaña, kutoñojoka hela yitwelaña yabulaña kukeñayi Yehova hela yambuka nankeñelu yindi hinshidi. Chineli nshidi yaluwañeshaña wubwambu wetu naNzambi, watwinka nshimbi niyishina yatukwashaña kubula kwila nshidi mumushikila. Hakutachika, yuma yejima yaleñeliyi Yehova yadiña yawanina ilaña Adama naEva chadikañiliwu naYehova akoñeli nshidi nawa hiyadiña awaninaku. Ashinakajili nikufwa nawa chineli twaswana nshidi kudi Adama, ninetu twashinakajaña nikufwa.

▸ Kape. 3, para. 7; Kape. 5, para. 3

Iyi hinjita yaNzambi yakajilumuna kaayi kaSatana niyuma yejima yatama.

▸ Kape. 3, para. 13; Kape. 8, para. 18

Wanta waNzambi hinfulumendi yaYehova yekala mwiwulu. Yesu Kristu nakuyuula neyi Mwanta waniwu Wanta. Kumbidi, Yehova wakazatisha Wanta hakufumishahu yuma yejima yatama. Wanta waNzambi wakayuula hamaseki hejima.

▸ Kape. 3, para. 14

Nzambi wasambilili kumuleña Yesu henohu kanda yaleñi yuma yejima. Yehova wamutumini Yesu hamaseki nakufwila antu ejima. Chamujahiliwu Yesu, Yehova wamusañwili. Ichi Yesu nakuyuula mwiwulu neyi Mwanta waWanta waNzambi.

▸ Kape. 4, para. 2

Bayibolu yaprofweteli hela yashimwineñahu dehi mpinji yakamwekana Mesiya. Chumichi chadi kumwekana kunsa yampinji yatenañawu nawu nyilungu 69, yatachikili mu 455 B.C.E. nawa yamanini mu 29 C.E.

Tuneluki ñahi netu yamanini mu 29 C.E.? Nyilungu 69 yatachikili muchaaka cha 455 B.C.E. hampinji yashikiliyi Nehemiya muYerusalema nakutachika kutuñulula musumba. (Danyeli 9:25; Nehemiya 2:1, 5-8) Neyi tutiya izu dakwila nawu “mulungu,” twatoñojokaña mafuku 7. Nyilungu yashimunawu muniwu wuprofwetu hinyilungu yamafuku 7 wanyi ilaña hinyilungu yayaaka 7, neyi tulondela lushimbi lwawuprofwetu lwakwila nawu ‘ifuku hichaaka.’ (Kuchinda 14:34; Ezekeli 4:6) Dikwila nawu mulungu wumu hiyaaka 7 nawa nyilungu 69 hiyaaka 483 (69 x 7). Neyi tuchinda yaaka 483 kutachika mu 455 B.C.E., yikutushikija muchaaka cha 29 C.E. Ichi dichaaka chapapatisheweliyi Yesu nawa chekaliliyi Mesiya.—Luka 3:1, 2, 21, 22.

 Wuprofwetu wowamu wahosheli cheñi hamulungu mukwawu, dikwila nawu yaaka yikwawu 7. Haniyi mpinji, muchaaka cha 33 C.E., Mesiya akamujaha nawa kutachika muchaaka cha 36 C.E., nsañu yayiwahi yaWanta waNzambi akayishimwañena mwahita matuña ejima bayi kudi aYudeya hohuku.—Danyeli 9:24-27.

▸ Kape. 4, para. 7

Bayibolu yahosha nawu Yehova Nzambi diyi Nleñi nawa wasambilili kumuleña Yesu henohu kanda yaleñi yuma yejima. (Akolosi 1:15, 16) Yesu hidiyi Nzambi Wañovu Jejimaku. Hahoshelihu nindi wesekana naNzambiku. Wahosheli nindi: “Tata wambadika.” (Yowanu 14:28; 1 Akorinda 15:28) Ilaña nsakililu jikwawu jatañishaña nawu Nzambi Wekala Musatu: Tata, Mwana nispiritu yajila. Nhoshelu yakwila nawu “Nzambi Wekala Musatu” yekala muBayibolu wanyi. Hintañishilu yakutwamba.

Spiritu yajila hiñovu yaNzambi yazatikaña, hiñovu yindi yabulaña kumwekana yazatishañayi hakwila nkeñelu yindi. Himuntu wanyi. Chakutalilahu, akwaKristu akusambila “enzeli naspiritu yajila,” nawa Yehova wahosheli nindi: “Nakahuñunwina spiritu yami hadi antu ejima.”—Yilwilu 2:1-4, 17.

▸ Kape. 4, para. 12; Kape. 15, para. 17

Neyi akwaKristu alala anakudifukula kudi Nzambi, hiyazatishaña kulusuku. Muloñadi?

1. Kulusu anayizatishi munsakililu yakutwamba hadi yaaka yayivulu. Kushankulu, ayizatishileña hakudifukula kuyileñaleña nimuyaaku yawuvumbi yawakwakusekesha. Chimwahitili yaaka 300 kufuma hafwiliyi Yesu, akwaKristu hiyazatishileña kulusu hakudifukulaku. Chimwahitili mpinji, Mwanta waRoma Constantine welishili kulusu kwikala chinjikijilu chawakwaKristu. Ichi chifwikija achizatishileña kulonda akwaKristu atiyakani kwejima. Ilaña kulusu hiyakundamini kudi Yesu Kristuku. New Catholic Encyclopedia yashimuna nawu: “Kulusu yawanikaña muyisemwa yawantu ejima henohu kanda ekali eniKristu nimuyisemwa yawantu abula kwikala eniKristu.”

2.  Yesu hafwilili hakulusuku. Izu dachiGiriki dabalumunawu nawu “kulusu” daya mukwila nawu “mutondu woloka,”  “mbawu,” hela “mutondu.” The Companion Bible yashimuna nawu: “Kwosi nihamu hasonekawu [muChitiyañenu Chachiha] muchiGiriki hela hazatishawu yikunku yiyedi yambawuku.” Yesu wafwilili hamutondu woloka.

3. Yehova hanakukeña nindi tuzatisheña yifwikija hela yinjikijilu hakudifukulaku.—Kwidika 20:4, 5; 1 Akorinda 10:14.

▸ Kape. 5, para. 12

Yesu wayilejeli atumbanji twindi kwanakana Chanukishu chakufwa kwindi. Elaña mwenimu hachaaka-hachaaka haNisani 14, hefuku dodimu danakeneñawu aIsarela Chipandakenu. Dinkendi nivinyu, yemenañaku mujimba nimashi aYesu ayihanaña kudi antu ejima enzaña kuChanukishu. Antu akayuula naYesu mwiwulu adaña kudinkendi nikunwa kuvinyu. Antu akweti chikuhwelelu chakushakama hamaseki amwekeshaña kalemesha hakwinza kuChanukishu ilaña hiyadaña kudinkendi nikunwa kuvinyuku.

▸ Kape. 5, para. 21

MuBayibolu yaEngilishi ya New World Translation, izu dakwila nawu “wumi” adizatishaña hakutena (1) muntu, (2) kanyama hela (3) wumi wukwetiyi muntu hela kanyama. Tutalenu yakutalilahu:

• Muntu. “Mumafuku aNowa, . . . antu antesha, dikwila nawu mawumi 8 abulili kufwa namenji.” (1 Petulu 3:20) Haniyi nsona, izu dakwila nawu “wumi” dinakwimenaku antu, Nowa niñodindi, anyanawu asatu niañodi jawu.

• Kanyama. “Nzambi wahosheli nindi mumenji mukumini dakulumbama yendu yayuma yendaña, yikweti wumi niatujila atuukaña hewulu damaseki hejima hahita luzwizu lwahewulu.” Nzambi wahosheli nindi, “Hamaseki hediki yuma yikweti wumi, hamutundu, hamutundu, niayimuna, niyuma yazalalaña,  nianyama amumpata hamutundu, hamutundu; chila nikwila.”—Kutachika 1:20, 24.

• Wumi wukwetiyi muntu hela kanyama. Yehova wamulejeli Mosi nindi: “Amayala ejima akeñeli kukujaha [“akeñeleña wumi weyi,” tumazu twaheshina,] afwa dehi.” (Kwidika 4:19, NWT) Chadiñayi Yesu hamaseki, wahosheli nindi: “Kabiña wamuwahi wahanaña wumi windi kukoola anyikoku.”—Yowanu 10:11.

  Kubombelahu, neyi muntu yazata chuma ‘nawumi windi wejima,’ dikwila nawu nachili ochu chuma chakufuma hamuchima kwesekeja nahakumina ñovu yindi. (Matewu 22:37; Kuhituluka 6:5) Izu dakwila nawu “wumi” anateli cheñi kudizatisha hakutena mpwila hela kufwila kwachuma chonaña. Muntu wafwa hela mujimba wafwa anateli kuwitena nawu wumi wafwa.—Kuchinda 6:6; Yishimu 23:2; Isaya 56:11; Hagayi 2:13.

▸ Kape. 6, para. 5; Kape. 15, para. 17

Mazu achiHeberu niachiGiriki abalumunawu nawu “spiritu” muBayibolu yaEngilishi yaNew World Translation atalisha kuyuma yashiyashana. Ilaña atenaña chuma chimu chabulaña kumwekana chekala mudi antu, chidi neyi mpepela hela muuya wawantu hela wawatunyama. Awa mazu akundama cheñi kudi antu akuspiritu hela spiritu yajila, dikwila nawu ñovu yaNzambi yazatikaña. Bayibolu hiyatudizishaña nawu chidi chimu chamuntu chatwalekañahu kuhanda neyi nafwiku.—Kwidika 35:21; Masamu 104:29; Matewu 12:43; Luka 11:13.

▸ Kape. 6, para. 5; Kape. 15, para. 17

Gehena hiijina dachinekineki chadiña kwakwihi naYerusalema mwocheleleñawu nswadi. Kwosi wunsahu wamwekeshaña nawu mumafuku aYesu atunyama hela antu  ayikabishileña hela kuyochela munichi chinekinekiku. Dichi Gehena hiyemenañaku iluña dabulaña kumwekana mwakabishilañawu hela kwocha antu afwa dehi haya nyaakaku. Yesu hakutena antu ombilañawu muGehena, wahosheleña hansañu yakujilumuka haya nyaaka.—Matewu 5:22; 10:28.

▸ Kape. 7, para. 20

Iku hikulomba kwalombeliyi Yesu hayidizishileñayi atumbanji twindi chakulomba. Iku kulomba akwitenaña cheñi nawu Tata Yetu hela kulomba kwachitalilu. Chakutalilahu, Yesu watulejeli nindi tulombeña muniyi njila:

• “Ijina deyi diikali dajila”

  Twalombaña kudi Yehova kulonda ijina dindi abuleña kudisawula. Twelaña mwenimu kulonda antu ejima mwiwulu nihamaseki alemesheña ijina daNzambi.

• “Wanta weyi winzi”

  Twalombaña netu nfulumendi yaNzambi yakajilumuni ituña datama daSatana, yakayuuli iseki nawa yakabalumuni iseki kwikala paradisa.

• “Nkeñelu yeyi ayili hamaseki”

  Twalombaña netu nkeñelu yaNzambi yizatiki hamaseki kulonda antu ovwahila, awanina akatweshi kushakama muParadisa haya nyaaka neyi chochakeñeleñayi Yehova hampinji yayileñeliyi.

▸ Kape. 8, para. 2

Yehova waheni ifutu danyiloña kulonda yakuuli nachu antu kunshidi nikufwa. Ifutu hiwufwetu wahaniniwu kulonda afuntishi cheñi wumi wawanina wamuntu wajimbesheliwu kudi muntu wakusambila, Adama, nikuwahisha wubwambu wawantu naYehova. Nzambi wamutemesheli Yesu hamaseki kulonda yafwili akwanshidi ejima. Antu ejima adi nakukooleka  kwakushakama haya nyaaka nikwikala awanina muloña Yesu wayifwilili.

▸ Kape. 8, para. 21; Kape. 9, para. 13

Wuprofwetu wahaDanyeli kapetulu 4 watulejaña nawu Nzambi wakelisha Wanta windi mu 1914.

Wuprofwetu: Yehova wamumwekesheleli Mwanta Nebukaneza chilota chawuprofwetu wamutondu weneni watemeniwu. Muchilota, chishinji chaniwu mutondu achikasili nakankasa kachikuñu niwuneñu kulonda chibuli kumena hadi “mpinji jitanu najiyedi.” Kuhiñahu, iwu mutondu wukamena cheñi.—Danyeli 4:1, 10-16.

Chiwatukwashaña iwu wuprofwetu: Iwu mutondu wemenañaku chiyuulu chaNzambi. Hadi yaaka yayivulu, Yehova wazatishileña anyanta muYerusalema kuyuula ituña dejima daIsarela. (1 Kushindulula 29:23) Ilaña awa anyanta amufutaleleli nawa chiyuulu chawu chamanini. Yerusalema amujilumwini muchaaka cha 607 B.C.E. Munichi chaaka dimwatachikili “mpinji jitanu najiyedi.” (2 Anyanta 25:1, 8-10; Ezekeli 21:25-27) Yesu hakuhosha nindi, “Yerusalema akamudatola kudi akwanyuza sampu mpinji yatoñolawu yawakwanyuza yinashikijewi dehi,” wateneneña “mpinji jitanu najiyedi.” (Luka 21:24) Dichi “mpinji jitanu najiyedi” hijamanini hampinji yadiñayi Yesu hamasekiku. Yehova washiikili nindi wakatonda Mwanta neyi “mpinji jitanu najiyedi” jinamani dehi. Chiyuulu chaniwu Mwanta wamuha, Yesu, chakaletela antu jaNzambi adi hamaseki yuma yayiwahi haya nyaaka.—Luka 1:30-33.

Kuleha ‘kwampinji jitanu najiyedi’: “Mpinji jitanu najiyedi” jasendeli yaaka 2,520. Neyi tuchinda yaaka 2,520 kufuma muchaaka cha 607 B.C.E., tukushika muchaaka cha 1914. Iyi diyi mpinji yamwilishiwu Yesu kudi Yehova kwikala Mesiya, Mwanta waWanta waNzambi mwiwulu.

 Twayiwanaña ñahi yaaka 2,520? Bayibolu yahoshaña nawu mpinji yisatu nachikunku himafuku 1,260. (Chimwekeshu 12:6, 14) Dichi “mpinji jitanu najiyedi” dikwila nawu iyi naamba yikwiñilamu kayedi hela netu himafuku 2,520. Mafuku 2,520 anesekani nayaaka 2,520 muloña waluna lushimbi lwawuprofwetu lwahosha nawu ‘ifuku dimu hichaaka.’—Kuchinda 14:34; Ezekeli 4:6.

▸ Kape. 8, para. 23

Izu dakwila nawu “mukulumpi wawañelu” daya mukwila nawu “mwanta wawañelu.” Bayibolu yatena hohu mukulumpi wawañelu wumu, nawa ijina dindi diyi Mikeli.—Danyeli 12:1; Yuda 9.

Mikeli diyi Nlomboli waMashidika aNzambi awañelu ashinshika. Chimwekeshu 12:7 yahoshaña nawu: “Mikeli niañelu jindi alwili njita nachanzañombi . . . niañelu jindi.” Mukanda waChimwekeshu wahoshaña cheñi nawu Nlomboli wamashidika aNzambi diyi Yesu, dichi Mikeli hiijina dikwawu damwinkawu Yesu.—Chimwekeshu 19:14-16.

▸ Kape. 9, para. 4

Awa mazu atalisha kumpinji yakamwekanaña yuma yamaneni hamaseki henohu Wanta waNzambi kanda wujilumuni kaayi kaSatana. Mazu akwila nawu “kukuma kwanshakaminu yamakonu” “nimpinji yakwikalahu kwaMwana kamuntu,” ayizatisha muwuprofwetu wamuBayibolu kutalisha kuyoyeniyi mpinji. (Matewu 24:3, 27, 37) “Mafuku akukuminina” atachikili hampinji yatachikili kuyuula Wanta waNzambi mwiwulu mu 1914 nawa akamana hakajilumunawu kaayi kaSatana haAmagedoni.—2 Timotewu 3:1; 2 Petulu 3:3.

▸ Kape. 9, para. 5

Neyi Nzambi yaleta cheñi muntu wafwa kuwumi, chumichi dichatenañawu nawu kusañuka. MuBayibolu ashimunamu nsañu 9 yakusañuka. Elija, Elisha, Yesu, Petulu niPawulu asañwili antu. Iyi yihayamisha ayikoñeli muloña wañovu jaNzambi. Yehova washiika nindi wakasañula ‘antu aloña niabula kuloña’ nawumi wakushakama hamaseki. (Yilwilu 24:15) Bayibolu yahosha cheñi hakusañuka kwawantu akaya mwiwulu. Iku kusañuka kwekalañaku neyi antu atondawu hela awayishawu kudi Nzambi anayisañuli kulonda ayi nakushakama mwiwulu hamu naYesu.—Yowanu 5:28, 29; 11:25; Afwilipi 3:11; Chimwekeshu 20:5, 6.

▸ Kape. 9, para. 13

Kuhanjeka nawandemoni hela kupesha hinjila yatama yakuhanjekelamu nawaspiritu hela kuhosha nawu enu aweni hela kuzatisha muntu wacheñi wudi neyi ñaña nimukwatukumbukumbu. Antu apeshaña elaña mwenimu muloña akuhwelela muntañishilu yakutwamba yakwila nawu spiritu yawantu yahandaña neyi muntu nafwi nawa yekalaña musalu wukweti ñovu. Andemoni afwilaña cheñi kuluwañesha antu kulonda adikañeña naNzambi. Akwakuhoña natutumbwa, kuhoña, majiki, waña, kulowana, kukaya niyuma yikwawu nikwena hikuhanjeka nawandemoni. Nyikanda yayivulu, magazini, mafilimu, tumina niyisela yamwekeshaña nawu kuhoña, andemoni hela nyijimu yayiwahi. Tushidikilu twatuvulu twahayipenji tudi neyi kuhana yuma kudi afu, yidika yahayipenji, kwanakana mpinji yafwiliyi muntu, yidika yawantuluwa hela kuchisha hachipenji, mwabombela kuhanjeka nawandemoni. Antu azatishaña yitumbu neyi anakukeña kuzatisha ñovu yawandemoni.—Añalija 5:20; Chimwekeshu 21:8.

▸ Kape. 10, para. 10; Kape. 16, para. 4

Yehova hiNzambi Wañovu Jejima, nawa diyi waleñeli yuma yejima. (Chimwekeshu 15:3) Dichekalilayi Mwini yuma yejima nawa wukweti chiyuulu hela ñovu chikupu yakuyuula yileñaleña yindi. (Masamu 24:1; Isaya 40:21-23; Chimwekeshu 4:11) Watuña nshimbi yakuyuula yuma yejima yaleñayi. Yehova wukweti cheñi ñovu yakutonda antu amakwawu kwikala anyuuli. Twakwashaña chiyuulu chaNzambi neyi tumukeña nikumwovwahila.—1 Kushindulula 29:11.

▸ Kape. 11, para. 10

Muntu wunafumishi ivumu welilañamu mumushikila kulonda yajahi mwana wudi mwivumu. Hiyekalaña mapusu hela kuhimpika kwamujimba wamuntu chakwila ivumu difumiku. Neyi mwana natachiki kutuñika mwivumu, mwana hekalaña chiidi chikwawu chamujimba wamama yindiku. Iwu mwana himuntu wacheñi.

▸ Kape. 13, para. 5

Iyi hinjila yakuukilamu kuchipatela yazatishañawu mashi ejima hela chibalu chimu chahayuma yiwana yekala mumashi yatuntulwilañawu mumujimba wamuntu kufuma mumujimba wamuntu wacheñi hela mumashi atulawu. Yibalu yiwana yamaneni yekala mumashi hiplasma, red blood cells, white blood cells, niplatelets.

▸ Kape. 13, para. 13

MuBayibolu, izu dakwila nawu “kufumba” hidinayi mukwila nawu hiizu dikwawu dakubabeshaku. Neyi anatufumbi, dikwila nawu anatuleji, anatudizishi nawa anatololi. Yehova hazatishaña ñovu yindi chatamaku nawa hekala walukambu kudi antu afumbañayiku. (Yishimu 4:1, 2) Yehova wayileja anvwali chuma chachiwahi chatela kwilawu. Kufumba kwahanañayi kwazatikaña chiwahi chakwila owu muntu anafumbiwu wekalaña namuchima wakukeña kufumbewa. (Yishimu 12:1) Yehova wakeña antu jindi nawa wayifumbaña. Wayinkaña nshimbi jayikwashaña kutoñojoka chiwahi, chumichi chayikwashaña kwiluka, kutoñojoka chiwahi nikwila yuma yamuzañaleshaña. Anvwali anateli kufumba anyanawu kulonda eluki chatela kwikalilawu ovwahila. Atela cheñi kuyifumba kulonda amukeñi Yehova, nikukeña Izu dindi, Bayibolu nikwiluka yishina yekalamu.

▸ Kape. 14, para. 13

Andemoni hiyileñaleña yatama yabulaña kumwekana yikweti ñovu chikupu kubadika antu. Andemoni hiyañelu atama. Ekalili atama chadibalumwiniwu awenawu kwikala ayilumbu jaNzambi kuhitila mukudikaña nindi. (Kutachika 6:2; Yuda 6) Adikañili neyi chadikañiliyi Satana naYehova.—Kuhituluka 32:17; Luka 8:30; Yilwilu 16:16; Yakoba 2:19.

▸ Kape. 16, para. 4