1, 2. (a) Chumanyi chayikwashaña kumona chawaana nenu cheneni? (b) Muloñadi ifutu danyiloña chidekalila chawaana cheneni nankashi chatwinkayi Nzambi?

CHAWAANANYI cheneni chimwatambwilahu dehi? Chawaana cheneni hiyachilandaña hawuseya weneni hohuku. Chakala hohu chinayizañaleshi hela munachikeñeshi, dikwila nawu ochu chawaana cheneni.

² Hayawaana yejima yatwinkayi Nzambi, hadi chawaana chimu chitwafwilaña nankashi kubadika yuma yejima. Hichawaana cheneni nankashi chayinkeliwu antu kudi Nzambi. Mukanu kapetulu, tukudiza netu Yehova watemesheli Mwanindi, Yesu Kristu, kulonda twakahandi haya nyaaka. (Tañenu Matewu 20:28.) Hakututemeshela Mwanindi hamaseki yekali ifutu danyiloña, Yehova wamwekesha nindi watukeña chikupu.

3. Muloñadi antu chafwilañawu?

³ Ifutu danyiloña hinjila yaYehova yakukuulilamu antu kunshidi nikufwa. (Aefwesesa 1:7) Hakwila twiluki chaletesheli ahani ifutu danyiloña, twatela kwiluka chuma chamwekeni kunyima mwitempa daEdeni. Anvwali jetu atachi, Adama naEva, avulumwini. Afwili, muloña avulumwini. Ninetu twafwaña muloña twaswanini nshidi kudi Adama naEva.—Talenu Mazu Adi Kunsa 9.

4. Adama wadiñanyi nawa wadiña nanka?

⁴ Yehova chaleñeliyi iyala watachi, Adama, wamwinkeli  chuma chalema nankashi. Wamwinkeli Adama wumi waloña. Wadiña nayitoñojoka nimujimba wawanina. Hadi kukataña, kushinakaja hela kufwaku. Chineli Yehova diwamuleñeli Adama, wadiña neyi diyi tata yindi. (Luka 3:38) Yehova wahosheleña nindi mpinji yejima. Nzambi wamulejeli Adama yuma yakeñeleñayi nindi yazateña nawa wamwinkeli mudimu wawuwahi.—Kutachika 1:28-30; 2:16, 17.

5. Neyi Bayibolu yihosha nawu Adama amuleñeli ‘muchifwanisha chaNzambi’ yatalishaña mudi?

⁵ Adama amuleñeli ‘muchifwanisha chaNzambi.’ (Kutachika 1:27) Yehova wamwinkeli yilwilu yikwetiyi yomweni yidi neyi kukeña, maana, wuñaji niñovu. Wamwinkeli Adama wuswa wakudifuukwila. Adama hadiña neyi robotiku. Nzambi wamuleñeli nawuswa wakufuukula kulonda yaambuleña yayiwahi nayatama. Neyi Adama wamwovwahilili Nzambi, wadi kushakama haya nyaaka muParadisa.

6. Yumanyi yajimbesheliyi Adama chelili yadikañi naNzambi? Nawa chumichi chinatukundami ñahi?

⁶ Adama chadikañiliyi naNzambi, wafwili muloña wamwovwahilili wanyi. Wubwambu windi wawuwahi naYehova wamanini nawa wajimbesheli wumi windi waloña nimukala windi waParadisa. (Kutachika 3:17-19) Adama naEva atondelihu kudinkaña naNzambi, dichi hiyadiña nakuchiñejaku. Muloña wachuma chakoñeliyi Adama, “nshidi [yeñilili] mukaayi . . . , nikufwa nikwena kwenjili kuhitila munshidi, dichi kufwa kwataandili kudi antu ejima muloña wejima wawu avulumwini.” (Aroma 5:12) Adama chavulumwiniyi, ‘wadilandishili’ yomweni ninetu kumu kuwunduñu wanshidi nikufwa. (Aroma 7:14) Komana twamba kakuulika kuniwu wuduñu? Eña, twakakuulewa.

7, 8. Ifutu danyiloña hichumanyi?

 ⁷ Ifutu danyiloña hichumanyi? Nhoshelu yakwila nawu ifutu danyiloña mwabombela yuma yiyedi. Chatachi, ifutu danyiloña himali afwetañawu hakukuula nachu muntu hela kutambula nachu chuma cheyi. Chamuchiyedi, ifutu danyiloña himali afwetañawu hakulanda chuma.

⁸ Kwosi muntu watela kumanisha kukala kweneni kwaleteliyi Adama chelili yavulumuni nikutuletela kufwa. Ilaña Yehova waloñesheli njila yakutukuulilamu kushindi nikufwa. Tutalenu ifutu danyiloña chidazatikaña nichidatukwashaña.

9. Ifutu danyiloña ateleleli kudihana ñahi?

⁹ Kwosi muntu wunateli kuhana ifutu danyiloña dikwesekana nawumi waloña wajimbesheliyi Adama. Muloñadi? Muloña wejima wetu hitwawaninaku. (Masamu 49:7, 8) Ifutu danyiloña dakeñekeleña hiwumi waloña wamuntu mukwawu. Dichaditenenañawu nawu ‘ifutu danyiloña desekana dakukuula nachu.’ (1 Timotewu 2:6) Ifutu danyiloña dateleli kwikala desekana kulema nawumi wajimbesheliyi Adama.

10. Yehova wahanini ñahi ifutu danyiloña?

¹⁰ Yehova wahanini ñahi ifutu danyiloña? Yehova watemesheli Mwanindi wabadika kulema hamaseki. Iwu Mwana, Yesu, diyi wadiña watachi kuleña. (1 Yowanu 4:9, 10) Yesu wadihanini kushiya Tata yindi nimukala windi mwiwulu. (Afwilipi 2:7) Yehova wamutuntulwili Yesu kufuma mwiwulu nakwinza hamaseki nawa Yesu wavwalikili neyi muntu wawanina, wakadi nshidi.—Luka 1:35.

11. Muntu wumu nateli kukuula ñahi antu ejima?

 ¹¹ Iyala watachi, Adama, wajimbesheli wumi waloña wawantu ejima chelili yadikañi naYehova. Komana muntu wacheñi nateli kufumishahu kufwa hadi anyana kaAdama ejima? Eña. (Tañenu Aroma 5:19.) Yesu, wabulili kukoñahu nshidi, wahanini wumi windi wikali ifutu danyiloña. (1 Akorinda 15:45) Wumi windi waloña anateli kuwuzatisha kufumishahu kufwa hadi anyana kaAdama ejima.—1 Akorinda 15:21, 22

12. Muloñadi Yesu chakabakeneniyi nankashi?

¹² Bayibolu yalumbulula Yesu chakabakeniyi henohu kanda yafwi. Amweteli chatama, amupopeli hamutondu wakuyandishila nawa womikili makabi nakufwa kufwa kwatama. (Yowanu 19:1, 16-18, 30) Muloñadi Yesu chakabakeneniyi nankashi? Muloña Satana wahosheli nindi kwosi muntu wunateli kwikala washinshika kudi Nzambi neyi amweseka chikupu. Yesu wamwekesheli nindi muntu wawanina nateli kwikala washinshika kudi Nzambi hela chakwila nakabakani nankashi. Yesu wamuzañalesheli Yehova chikupu.—Yishimu 27:11; talenu Mazu Adi Kunsa 15.

13. Ifutu danyiloña adihanini ñahi?

¹³ Ifutu danyiloña adihanini ñahi? Yesu wamwinkeli Tata yindi wumi windi walema. Mu 33 C.E, haNisani 14 yakalenda yawaYudeya, Yehova wetejeli Yesu kumujaha kudi ayilumbu jindi. (Aheberu 10:10) Chimwahitili mafuku asatu, Yehova wamusañwili Yesu, bayi namujimba wawuntuku, ilaña namujimba wakuspiritu. Kuhiñahu, chelili Yesu yafunti kudi Tata yindi mwiwulu, wahanini wumi windi walema wawanina kudi Yehova kwikala ifutu danyiloña. (Aheberu 9:24) Chineli anahani dehi ifutu danyiloña, tudi nakukooleka kwakufuma muwuduñu wanshidi nikufwa.—Tañenu Aroma 3:23, 24.

14, 15. Yumanyi yitwatela kwila kulonda nshidi yetu ayanakeni?

¹⁴ Tunakutambwila nkisu yafumaña muchawaana chabadika kulema chatwinkayi Nzambi. Tutalenu hankisu yitunakutambwila makonu niyitukatambwila kumbidi.

¹⁵ Nshidi yetu anayanakeni. Mpinji yikwawu chatukalilaña kwila yuma yayiwahi. Twaluwañeshaña nawa mpinji yikwawu twahoshaña nikukoña yuma yatama. (Akolosi 1:13, 14) Anateli kutwanakena ñahi? Twatela kutiya kutama hachuma chatama chituneli nawa twatela kudizoza nakulomba kudi Yehova netu yatwanakeni. Neyi twila mwenimu tukukuhwelela netu nshidi yetu anayanakeni.—1 Yowanu 1:8, 9.

16. Yumanyi yitwatela kwila kulonda twikali nachinleji chitooka?

¹⁶ Tunateli kwikala nachinleji chitooka. Neyi chinleji chetu chituleja nawu tunavulumuni, twadinkaña nyiloña, hadaha twaneñaña nikudimona netu tudi amukunkulwayi. Ilaña bayi tuzeyaku. Neyi tulomba kudi Yehova netu yatwanakeni, twatela kukuhwelela netu wukutiya mutunalombi nawa wukutwanakena. (Aheberu 9:13, 14) Yehova wakeñaña nindi tumulejeña kukala nikuzeya zeya kwetu kwejima. (Aheberu 4:14-16) Chikufumamu, tukwikala mukuwunda naNzambi.

17. Chineli Yesu watufwilili nkiswinyi yitwatela kutambwila?

¹⁷ Tukwikala nakuchiñeja kwakushakama haya nyaaka. “Wufwetu wanshidi, hikufwa, ilaña chawaana chahanañayi Nzambi, hiwumi wahaya nyaaka mudi Kristu Yesu Mwanta wetu.” (Aroma 6:23) Chineli Yesu watufwilili, tunateli kushakama haya nyaaka nikwikala nanyijimba yakola. (Chimwekeshu 21:3, 4) Hanu dinu chumanyi chitwatela kwila kulonda tukatambwili iyi nkisu?

18. Tweluka ñahi netu Yehova watukeña?

¹⁸ Toñojokenu chimwatiyaña kuwaha neyi ayinka chawaana chachiwahi kudi muntu. Ifutu danyiloña hichawaana chachiwahi chabadika yawaana yejima nawa twatela kumusakilila Yehova chikupu hanichi chawaana. Yowanu 3:16 yahosha nawu, “Nzambi wakeñeli nankashi kaayi chakwila watemesheli Mwanindi wumu hohu.” Eñañi, Yehova watukeña chikupu chakwila watwinkeli niMwanindi wabadika kulema,Yesu. Nawa tweluka netu Yesu niyena watukeña, muloña wadihanini kulonda yatufwili. (Yowanu 15:13) Chawaana chefutu danyiloña chikuyikwasha kwiluka nenu mwamweni Yehova niYesu ayikeña chikupu.—Añalija 2:20.

19, 20. (a) Munateli kwikala ñahi ibwambu daYehova? (b) Munateli kumwekesha ñahi nenu muneteji ifutu danyiloña damulambu waYesu?

¹⁹ Chineli muneluki dehi kukeña kwaNzambi kwabadika, munateli kwikala ñahi ibwambu dindi? Chakala hakwila nawu mukeñi muntu imwabula kwiluka. Yowanu 17:3 yahosha nawu tunateli kumwiluka Yehova. Neyi mumwiluka, mukumukeña chikupu, mukukeñaña kumuzañalesha nawa mukwikala ibwambu dindi. Dichi twalekenuhu kumwiluka Yehova kuhitila mukudiza Bayibolu.—1 Yowanu 5:3.

²⁰ Itejenu ifutu danyiloña damulambu waYesu. Bayibolu yahosha nawu “muntu wamukuhwelelaña Mwana wakekala nawumi wahaya nyaaka.” (Yowanu 3:36) Kwikala nachikuhwelelu kwaya mukwila nawudi? Kwaya mukwila nawu twatela kwila yuma yejima yatulejeliyi Yesu nindi twili. (Yowanu 13:15) Bayi tuhoshaña hohu netu twamukuhwelela Yesuku. Hakwila twiteji ifutu danyiloña, twatela kwilahu chuma chimu hachikuhwelelu  chetu. HaYakoba 2:26, twatañañahu nawu: “Chikuhwelelu chakadi nyidimu chafwa.”

21, 22. (a) Muloñadi chitwatela kuya kuChanukishu chakufwa kwaKristu hachaaka hachaaka? (b) Yumanyi yitukadiza muTupetulu 6 ni 7?

²¹ Yenu kuChanukishu chaKufwa kwaKristu. Melela henohu Yesu kanda yafwi, watulejeli nindi twatela kwanakanaña kufwa kwindi. Twanakanaña kufwa kwindi hachaaka hachaaka nawa akwitenaña nawu Chanukishu hela “Kuda kwaMwanta kwaMelela.” (1 Akorinda 11:20; Matewu 26:26-28) Yesu wakeñaña twiluki netu watwinkeli wumi windi waloña kulonda wikali ifutu danyiloña. Wahosheli nindi: “Mwileña mwenimu hakuñanakana.” (Tañenu Luka 22:19.) Neyi muya kuChanukishu, mukumwekesha nenu munakwanuka ifutu danyiloña nikukeña kwabadika kwatukañawu kudi Yehova niYesu.—Talenu Mazu Adi Kunsa 16.

²² Ifutu danyiloña hichawaana cheneni nankashi chatwinkawu. (2 Akorinda 9:14, 15) Ichi chawaana chalema chikakwasha antu amavulu afwa dehi. Tupetulu 6 ni 7 twakahosha chiyakayikwashawu antu amavulu afwa dehi.