1. Hinyi watwinka wumi?

YEHOVA ‘hiNzambi wamumi.’ (Yeremiya 10:10) Diyi Nleñi yetu nawa watwinka wumi. Bayibolu yahoshaña nawu: “Waleñeli yuma yejima nawa muloña wankeñelu yeyi, dichiyekalililiku nawa dichiwayileñeleli.” (Chimwekeshu 4:11) Yehova wakeñeleña nindi twikali amomi. Wumi hichawaana chalema chatwinkayi.—Tañenu Masamu 36:9.

2. Tunateli kwikala ñahi namuzañalu?

² Yehova watwinkaña yuma yitwakeñaña yidi neyi yakuda nimenji kulonda tutwalekihu kuhanda. (Yilwilu 17:28) Sweje-e dinu, wakeñaña nindi twikaleña namuzañalu. (Yilwilu 14:15-17) Hakwila twikali namuzañalu, twatela kwovwahila nshimbi jaNzambi.—Isaya 48:17, 18.

3. Yehova wamulejeli nindidi Kena chamujahiliyi Abeli?

³ Bayibolu yatulejaña nawu Yehova walemesha wumi wetu niwumi wawantu amakwawu. Chakutalilahu, chelili Kena, mwana kaAdama naEva yamuhilili mwanyikindi Abeli, Yehova wamulejeli Kena nindi yawundishi ndulu. Ilaña Kena wakaanini, wazuwili nankashi chakwila ‘wamunyamukilili manakwindi Abeli, nakumujaha.’ (Kutachika 4:3-8) Yehova wamubabesheli Kena muloña wamujahili Abeli. (Kutachika 4:9-11) Kuzuwa nikuhelañana hiyuma yafwana muloña yatuleñelaña kwikala azuwa nawa alukambu. Muntu wamuchidiwu hakekala nawumi wahaya nyaakaku. (Tañenu 1 Yowanu 3:15.) Hakwila  tumuzañaleshi Yehova, twatela kukeña antu ejima.—1 Yowanu 3:11, 12.

4. Nshimbi yahaniniyi Nzambi kudi aIsarela yatudizishañadi kutalisha hawumi?

⁴ Chimwahitili yaaka yayivulu, Yehova wamwekesheli nindi walemesha wumi chelili yamwinki Mosi Nshimbi Ikumi. Lushimbi lumu lwahosha nawu: “Kujaha muntu, chinjila.” (Kuhituluka 5:17) Neyi muntu yajaha mukwawu, owu muntu ateleli kumujaha.

5. Nzambi wamonaña ñahi kufumisha ivumu?

⁵ Nzambi wamonaña ñahi kufumisha ivumu? Niwumi wamwana wudi mwivumu walema kudi Yehova. Munshimbi yayinkeliyi Yehova aIsarela, Yehova wayilejeli nindi neyi muntu yakatisha mama yawantu nawa mwana yafwa, owu muntu ateleli kumujaha. (Tañenu Kwidika 21:22, 23; Masamu 127:3.) Chumichi chamwekeshaña nawu kufumisha ivumu kwatama.—Talenu Mazu Adi Kunsa 28.

6, 7. Twamwekeshaña ñahi kudi Yehova netu twalemesha wumi?

⁶ Tunateli kumwekesha ñahi kudi Yehova netu twalemesha wumi wetu niwawantu amakwawu? Kuhitila mukubula kwila yuma yinateli kuleta wubanji kuwumi wetu niwawakwetu. Dichi bayi tunwaña makanya, nsheta hela kuzatisha yitumbu chatamaku muloña yikutukatisha nawa yikutujaha.

⁷ Nzambi watwinkeli wumi ninyijimba yetu, twatela kuyizatisha kwesekeja nachinakukeñayi. Dichi twatela kuhemba nyijimba yetu chiwahi. Neyi tukuyihembaña chatama, tukwikala amajilu kumesu aNzambi. (Aroma 6:19; 12:1; 2 Akorinda 7:1) Neyi tubula kulemesha wumi, hitukutwesha kudifukula kudi Yehova, watwinka wumiku. Hela chakwila chatukalilaña kuleka yilwilu yatama,  Yehova wukutukwasha neyi tunakudishaku muloña wakwila twamonaña wumi netu walema.

8. Twatela kwiladi kulonda tubuli kusha wumi wetu niwawakwetu muwubanji?

⁸ Tunadizi netu wumi hichawaana chalema. Yehova weluka nindi tukudishañaku kulonda tubuleña kusha wumi wetu niwawakwetu muwubanji. Twalemeshaña wumi kwesekeja nachitwendeshaña motoka yetu, katukutuku, hela yuma yikwawu. Hitwahemaña yisela yafwana nawa yamadombuku. (Masamu 11:5) Twatela kuzata cheñi nañovu kulonda mumatala etu mubuli kwikala yuma yikuleta wubanji. Yehova wayilejeli aIsarela nindi: ‘Neyi wunatuñi itala dadiha, chiña wakahitishiku ikoli [hela mbañu yayihi] kwiwulu, kulonda wukabuli muloña wamashi kwitala deyi neyi kunaholoki muntu.’—Kuhituluka 22:8.

9. Twatela kuhemba ñahi atunyama?

⁹ Ninjila yitwahembelañamu atunyama yalema kudi Yehova. Watwiteja kujaha atunyama kulonda tudeña nikufumishaku yakuvwala, nawa watwiteja kujaha kanyama neyi kanakusha wumi wetu muwubanji. (Kutachika 3:21; 9:3; Kwidika 21:28) Dichi bayi tukabisheña atunyama hela kuyijaha muloña wawusekisekiku.—Yishimu 12:10.

10. Tuneluki ñahi netu mashi emenañaku wumi?

¹⁰ Mashi ajila kudi Yehova muloña emenañaku wumi. Kena chamujahiliyi Abeli, Yehova wamulejeli nindi: ‘Mashi amanakweyi anakulobeli kudami hamaseki.’ (Kutachika 4:10) Mashi Abeli emeneneñaku wumi windi, nawa Yehova wamubabesheli Kena chamujahiliyi Abeli. Chamanini Dibaji damumafuku aNowa, Yehova wahosheli cheñi nindi mashi emenañaku wumi. Yehova wamwitejeli  Nowa nichisaka chindi kuda mbiji yawatunyama. Wahosheli nindi: ‘Yuma yejima yendaña yikweti wumi yakekala yakuda yenu. Neyi chinayinkeli yisakola yituuta, nayinki yejima.’ Hela chochu, kudi chuma chimu chayikaanishiliyi Yehova kuda, wayilejeli nindi: ‘Ilaña mbiji nawumi wayu, mashi ayu, bayi muyidaku.’—Kutachika 1:29; 9:3, 4.

11. Lushimbinyi lwahosha hamashi lwayinkeliwu aIsarela kudi Nzambi?

¹¹ Chimwahitili yaaka 800 kufuma hamukaanishiliwu Nowa kudi Yehova kuda mashi, wayilejeli antu jindi cheñi nindi: ‘Neyi hadi aIsarela hela hadi enyi ashakamawu nawu hakekala muntu wakajaha nawubinda windi hela kanyama hela kajila kadañawu, watela kumwaña mashi indi nakuyibuta nalunkuñu.’ Wahosheli cheñi nindi: ‘Kuda mashi chinjila.’ (Alevi 17:13, 14) Yehova wakeñeleña nindi antu jindi amoneña mashi nawu ajila. Ateleli kuda mbiji bayi mashiku. Neyi anajahi kanyama nawu adii, amwañileña mashi anowu kanyama heseki.

12. AkwaKristu amonaña ñahi mashi?

¹² Chimwahitili yaaka kufuma hafwiliyi Yesu, apostolu niakulumpi muchipompelu chawakwaKristu muYerusalema apompeli kulonda atali haNshimbi jayinkeliwu aIsarela jatela kuzatishawu akwaKristu. (Tañenu Yilwilu 15:28, 29; 21:25.) Yehova wayikwashili kwiluka nawu mashi wayilemesha nawa ateleli kuyimona nawu ajila. AkwaKristu akusambila hiyadiileña hela kunwa mashi hela kuda mbiji yakushotomonaku. Kuda mbiji yamuchidiwu kwadiña tuhu neyi anakupesha ankishi hela kwila wuvumbi. Kufuma haniyi mpinji, akwaKristu alala akaanaña kuda hela kunwa mashi. Indi makonu? Yehova nakukeña nindi tumoneña mashi netu ajila.

13. Muloñadi akwaKristu chakaaninañawu kuyisha mashi mumujimba?

 ¹³ Komana chinayi mukwila nawu akwaKristu atela kukaana kuyisha mashi mumujimba? Eña. Yehova wakaanisha kuda hela kunwa mashi. Neyi ndotolu yayilekesha kunwa walwa, komana mukuwisha mundoñu nakudilemeka hamunjimba? Inehi. Munjila yoyimu, lushimbi lwakubula kuda hela kunwa mashi lunakumwekesha nawu kwila twiteja kutwisha mashi mumujimba nehi.—Talenu Mazu adi Kunsa 29.

14, 15. Muloñadi akwaKristu chatela kulemeshelawu wumi nikumwovwahila Yehova?

¹⁴ Tukwila ñahi neyi ndotolu yahosha nindi neyi kutwisha mashi mumujimba nehi tukufwa? Muntu himuntu watela kudifuukwila neyi wukwovwahila lushimbi lwaNzambi lwahosha hamashi hela nehi. AkwaKristu alemesha nankashi chawaana chawumi nawa twakeñaña njila yacheñi yakutuukilamu; ilaña twakaanaña kutwisha mashi mumujimba.

¹⁵ Twazataña nañovu hakwila twikali akola kumujimba, ilaña chineli Nzambi walemesha wumi, twakaanaña kutwisha mashi mumujimba. Twatela kumwovwahila Yehova chatela tuhembi wumi kuhitila mukufumpa nshimbi jindi. Yesu wahosheli nindi: “Muntu wejima wunakukeña kwamwina wumi windi, wakawujimbesha, hakwila muntu wejima wukujimbesha wumi windi kukoola ami, wakekala nawumi cheñi.” (Matewu 16:25) Twakeñaña kumwovwahila Yehova muloña twamukeña. Weluka yuma yitwakeña nawa twamonaña wumi netu walema nawa wajila neyi chawumonañayi Yehova.—Aheberu 11:6.

16. Muloñadi Nzambi chamwovwahilañawu kudi ambuña?

¹⁶ Ambuña aNzambi ashinshika ovwahilaña lushimbi lwahosha hamashi. Adaña wanyi mashi hela kuyinwa,  nawa etejaña wanyi kuyisha mashi hakuyuuka. * Ilaña, etejaña njila jikwawu jakuukilamu kulonda apulwishi wumi wawu. Eluka chikupu nawu Nleñi yawumi nimashi weluka yuma yatela kuyikwasha. Komana ninenu mweluka nenu weluka yuma yatela kuyikwasha?

17. Njilanyi yimu hohu Yehova yayitejeliyi aIsarela nindi azatishileñamu mashi?

¹⁷ MuLushimbi lwamwinkeluwu Mosi kudi Nzambi, Yehova wayilejeli aIsarela nindi: ‘Wumi wamujimba wekala mumashi, nayinkeliwu hakameña ekaleña akudibuta nachu [hela, kulomba nachu kwanakena], muloña mashi diwu abutañawu nachu.’ (Alevi 17:11) Neyi aIsarela anavulumuni, alombeleña kudi Yehova nawu ayanakeni kuhitila mukulambula kanyama nikumwila kapristu nawu yechili mashi amakwawu hakameña mutembeli. Iyi diyi njila yimu hohu yayitejeliyi Yehova aIsarela nawu azatishileñamu mashi.

18. Mulambu waYesu watukwashaña munjilanyi?

¹⁸ Yesu chenjiliyi hamaseki, waheni wumi windi hela mashi asinsili halushimbi lwamulambu watunyama, kulonda atwanakeni nshidi. (Matewu 20:28; Aheberu 10:1) Wumi waYesu wadiña walema chakwila Yehova wamusañwili nakuya mwiwulu, Nzambi wayinkeli antu ejima kukooleka kwakushakama haya nyaaka hamaseki.—Yowanu 3:16; Aheberu 9:11, 12; 1 Petulu 1:18, 19.

19. Twatela kwiladi kulonda tubuli “muloña wamashi awantu ejima”?

¹⁹ Twatela kumusakilila Yehova hakutwinka chawaana  chachiwahi chawumi. Twatela kuleja antu netu neyi akumukuhwelela Yesu, akashakama haya nyaaka. Twakeña antu nawa tukuzata nañovu kulonda tuyileji chatela kwikalawu nawumi. (Ezekeli 3:17-21) Kufwana kapostolu Pawulu, tukuhosha netu: “Hinikweti muloña wamashi awantu ejimaku, muloña hinnaleki kuyileja enu nkeñelu yejima yaNzambiku.” (Yilwilu 20:26, 27) Twamwekeshaña netu twalemesha nankashi wumi nimashi neyi tuleja antu kulonda amwiluki Yehova nichalemeshayi wumi.