1, 2. Malwihwinyi ehulaña antu amavulu?

SUNAMI yinajilumuni mukala. Muntu nalozi muchechi, nakatishi nikujaha antu amavulu. Mama yawantu nafwi nakansa, nashiyi anyana 5.

² Neyi wubanji hela yihuñu yamuchidiwu yinamwekani, antu amavulu ehulaña nawu, “Muloñadi?” Amavulu ehulaña nawu muloñadi mukaayi chimunenzeli kuhelañana nimakabi. Ninenu mwadihulahu dehi chamuchidiwu?

3, 4. (a) Malwihwinyi ehwiliyi Habakuki? (b) Yehova wamwakwili ñahi?

³ MuBayibolu, twadizaña nawu niantu amukuhweleli Nzambi chikupu ehwileña malwihu amuchidiwu. Chakutalilahu, kaprofwetu Habakuki wamwihwili Yehova nindi: “Wanmwekeshelañadi kuluwa? Wantalishilañadi kuyuma yakala? Muloña kumesu ami kudi nakumwekana nikukisañana nimadombu, kudi nakunyamuka nikuzuñazuña niyikonkojola.”—Habakuki 1:3.

⁴ HaHabakuki 2:2, 3, twatañañahu chamwakwiliwu Habakuki kudi Nzambi nichamushiikiliwu nawu yuma yakawaha. Yehova wayikeña chikupu antu. Bayibolu yahoshaña nawu: “Wayakamenaña.” (1 Petulu 5:7) Nzambi watiyaña kutama chikupu kubadika chitwatiyaña neyi yamona antu anakukabakana. (Isaya 55:8, 9) Dichi, tuhanjekenu hanilu lwihu, Muloñadi makabi chinaswejeliwu mukaayi?

5. Antañishi jansakililu amavulu ahoshaña nawudi kutalisha hamakabi? Yumanyi yatudizishaña Bayibolu?

⁵ Mapasta, atupristu niakulumpi jansakililu ahoshaña nawu hikukeña kwaNzambi hakwila nawu antu akabakaneña. Amakwawu ahoshaña nawu yuma yejima yamumwekenaña muntu, kushilahu niyihuñu, hikufuukula kwaNzambi nawa hitukutwesha kwiluka chuma chinaleteshiku. Amakwawu ahoshaña nawu antu kushilahu nianyana anyanya afwaña kulonda akashakami naNzambi mwiwulu. Iku hikutwamba. Yehova hakojejaña yuma yatama kumwekanaku. Bayibolu yahoshaña nawu: ‘Nzambi helaña chuma chatamaku, Chinaweji helaña yuma yaheñaku.’—Yoba 34:10.

6. Muloñadi antu amavulu chamutwikilañawu Nzambi nyiloña namakabi anakumwekana mukaayi?

⁶ Antu amavulu amutwikaña Nzambi nyiloña namakabi anakumwekana mukaayi chineli eluka nawu Nzambi diyi wayuulaña kaayi. Ilaña neyi chitwadizili muKapetulu 3, nyuuli wakanu kaayi hiSatana Diyabolu.

7, 8. Muloñadi makabi chinaswejeliwu mukaayi?

⁷ Bayibolu yatulejaña nawu “kaayi kejima kadi mumakasa awatama.” (1 Yowanu 5:19) Nyuuli wakanu kaayi, Satana, wazuwa nawa wukweti lukambu. ‘Nakuluwañesha antu ashakama hamaseki hejima.’ (Chimwekeshu 12:9) Antu amavulu amwimbujolaña. Dichinaleteshi makudi, kuhelañana niwubanji kwinzala mukaayi.

⁸ Kudi yuma yikwawu yinaleteshi mukaayi mwikali nankashi makabi. Chelili Adama naEva adikañi, asambwishili anyanawu nshidi. Hamuloña wanshidi, antu elaña yuma yaleteshaña akwawu antu kukabakana. Akeñaña kwikala alema kubadika akwawu. Azuñaña,  ayaña kunjita nawa akabishaña akwawu. (Mukwakutañisha 4:1; 8:9) Mpinji yikwawu antu akabakanaña muloña ‘wampinji nikululakana kwayilulakenu.’ (Mukwakutañisha 9:11) Neyi adi heluña dabula kutelela hampinji yabula kutelela, maponsu niyuma yikwawu yatama yayimwekenaña.

9. Muloñadi chitukuhoshela netu kudi chuma chaletesha Yehova yeteji makabi kutwalekahu?

⁹ Yehova hidiyi wakojejaña yuma yatamaku. Dichi bayi tumwinka muloña wanjita, wubanji nimakabi anakumwekanaku. Nzambi haletaña kukalala kudi neyi nyitentashi maherikani nimabajiku. Ilaña munateli kudihula nenu, ‘Neyi Yehova diyi wabadika ñovu mukuleña kwejima, muloñadi chinakubulilayi kufumishahu yuma yatama yinakumwekana?’ Tweluka netu Nzambi watwakamenaña chikupu, kudi chuma chimu chinakuletesha makabi atwalekihu.—1 Yowanu 4:8.

10. Satana wamuzuñishili ñahi Yehova?

¹⁰ Diyabolu wayidimbili Adama naEva mwitempa daEdeni. Satana wahosheli nindi Nzambi hiNyuuli watama. Wahosheli nindi Nzambi hayinkaña Adama naEva yuma yayiwahiku. Satana wakeñeleña atoñojokeña nawu yena wukwikala nyuuli wamuwahi kubadika Yehova nawa Nzambi hatela kuyiyuulaku.—Kutachika 3:2-5; talenu Mazu Adi Kunsa 27.

11. Lwihwinyi lutwatela kwakula?

¹¹ Adama naEva adikañili naYehova nawa alekeli kumwovwahila. Atoñojokeli nawu atela kudifuukwila aweni yuma yayiwahi niyatama. Yehova wadi kumwekesha ñahi nindi awa akwakudikaña atoñojokeleña mwaluwa nawa nindi yena weluka yuma yinateli kutukwasha?

12, 13. (a) Muloñadi Yehova chabuliliyi kuyikisañana akwakudikaña hayoyina mpinji? (b) Muloñadi Yehova chamwitejelayi Satana kwikala nyuuli wakanu kaayi niantu kudiyuula aweni?

 ¹² Yehova hashikeneni dakuyikisañana Adama naEvaku. Ilaña wayitejeli kuvwala anyana. Yehova wayinkeli anyana kaAdama naEva kukooleka kwakutonda muntu watela kwikala nyuuli yawu. Yehova wakeñeli nindi heseki henzali antu awanina nawa iyi nkeñelu yadi kuzatika hela chakwila Diyabolu wadi kukañesha ñahi.—Kutachika 1:28; Isaya 55:10, 11.

¹³ Satana wamuzuñishili Yehova hamesu awañelu amavulu. (Yoba 38:7; Danyeli 7:10) Yehova wamwinkeli Satana mpinji kulonda yamwekeshi neyi mwahosheliyi Satana mwalala. Wayinkeli cheñi antu mpinji yakutuña jinfulumendi jawu muchiyuulu chaSatana kulonda amwekeshi neyi anateli kudiyuula chiwahi chakadi Yehova.

14. Chiyuulu chawantu chinamwekeshidi?

¹⁴ Hadi yaaka yayivulu yinahituhu, antu aneseki kudiyuula aweni ilaña anakañanyi. Satana amwiluka nawu hisakutwamba. Antu anakukeña Nzambi yayikwashi. Kaprofwetu Yeremiya watwambili wanyi chahosheliyi nindi: ‘Eyi Yehova, neluki nami njila yamuntu hiyekala mudi yomweniku, mudi muntu wendaña himwekala yakuyuula nyendu yindiku.’—Yeremiya 10:23.

15, 16. (a) Muloñadi Yehova chetejelayi makabi kutwalekahu? (b) Yehova wabuliladi kufumishahu makabi aletayi Satana?

¹⁵ Muloñadi Yehova chinetejeliyi makabi kutwalekahu mpinji yeneni? Muloñadi chinakubulilayi kukañesha yuma yatama yinakumwekana? Hanahiti mpinji hakwila yamwekeshi nindi chiyuulu chaSatana  chinakañanyi kuyuula. Antu aneseki nfulumendi jajivulu ilaña anakañanyi. Hela chakwila anayiliku hambidi mujasayansi nijakutuñatuña, ilaña kutama, wuzweñi, wubanji, nimajita anaswejeliku. Hitukutwesha kudiyuula etu aweni chakadi Nzambiku.

¹⁶ Hela chochu, Yehova hanafumishihu makabi aletayi Satanaku. Neyi yafumishahu, chikumwekana neyi Nzambi nakukwasha chiyuulu chaSatana nawa hatela kwila mwenimuku. Cheñi, antu adi kukuhwelela nawu anateli kudiyuula aweni chiwahi. Iku hikutwamba, nawa Yehova kwila yela chuma chamuchidiwu nehi. Hatwambañaku.—Aheberu 6:18.

17, 18. Yumanyi yakelayi Yehova kutalisha kuyuma yinakisañaniyi Satana?

¹⁷ Komana Yehova nateli kufumishahu yuma yejima yatama yinakumwekana muloña wakudikaña kwaSatana niantu? Eña. Nzambi nateli kwila yuma yejima. Yehova weluka mpinji yakafumishayi makabi ejima aletayi Satana. Kuhiñahu wakelisha iseki kwikala paradisa neyi chakeñeleñayi. Ejima adi “mumajamu achanukishu” akayisañula. (Yowanu 5:28, 29) Antu hiyakakataña hela kufwaku. Yesu wakawahisha yuma yejima yakisañanayi Satana. Yehova wakamuzatisha Yesu ‘kulonda yakakisañani nyidimu yaDiyabolu.’ (1 Yowanu 3:8) Tunazañalali muloña chayinu mpinji Yehova nadiwunjiki kulonda tumwiluki nikumwilisha yena kwikala Nyuuli yetu. (Tañenu 2 Petulu 3:9, 10.) Hela tunakukabakana, watukwashaña kuumika.—Yowanu 4:23; tañenu 1 Akorinda 10:13.

¹⁸ Yehova watukanjikijaña wanyi nindi tumwilishi yekali Nyuuli yetu. Wayinka antu chawaana chakudifuukwila.  Tuhanjekenu hanichi chawaana chichatukwashaña.

19. Chawaananyi chachiwahi chatwinkayi Yehova? Muloñadi chitwatela kuhamekela ichi chawaana?

¹⁹ Chawaana chatwinkayi Yehova chakudifuukwila chatuleñela twikali ambuka nawatunyama. Atunyama atoñojokaña wanyi ilaña etu twatoñojokaña nawa twelukaña neyi tunakukeña kumuzañalesha Yehova hela nehi. (Yishimu 30:24) Cheñi, twekala wanyi neyi makina azataña hohu kwesekeja nachayituñilawu. Tukweti wuswa wakufuukula chitunakukeña kwikala, antu itunakukeña ekali amabwambu jetu nichitunakukeña kwila muchihandilu chetu. Yehova wakeñaña nindi twikali namuzañalu muchihandilu.

20, 21. Yumanyi yayiwahi yimwatela kwila chayinu mpinji?

²⁰ Yehova wakeñaña nindi tumukeñi. (Matewu 22:37, 38) Wudi neyi tata yawantu wazañalalaña neyi mwanindi nakuhosha nindi “nayikeña,” nawa neyi yahosha chakufuma hamuchima bayi chakumukanjikijaku. Yehova watwinka wuswa wakufukulahu kumukalakela hela nehi. Satana, Adama, niEvu afuukwilihu kudikaña naYehova. Mukuzatisha ñahi wuswa wumukweti wakufuukula?

²¹ Zatishenu wuswa wenu wakufuukula kumukalakela Yehova. Kudi antu amavulu anafuukuli kumuzañalesha Nzambi nikukana Satana. (Yishimu 27:11) Yumanyi yimukwila chayinu mpinji kulonda mwakekali mwituña daNzambi dadiha neyi nafumishimu dehi makabi ejima? Kapetulu kanalondelihu kakwakula ilu lwihu.