1, 2. Malwihwinyi avula kwihulawu antu?

ANYANA ehulaña malwihu amavulu. Munateli kuyilumbulwila, ilaña akwihula cheñi nawu, ‘Muloñadi?’ Nawa neyi muyakula, ehulaña cheñi nawu, ‘Hanu dinu muloñadi?’

² Hela tudi akulumpi hela atwansi, twehulaña malwihu. Twehulaña malwihu hayuma yitukuda, yitukuvwala niyitukulanda. Twehulaña cheñi malwihu anakundami hawumi wetu nihayuma yakumbidi. Neyi tukañanya kuwana ñakwilu yanawa malwihu, twalekaña kukeña ñakwilu.

3. Muloñadi antu amavulu chakañenyañawu kuwana ñakwilu yamalwihu alema?

³ Komana Bayibolu yakulaña malwihu alema itwehulaña? Antu amakwawu etejaña, ilaña atoñojokaña nawu Bayibolu yakala chikupu kutiya. Atoñojokaña nawu antañishi niatupristu diwu atela kwakula. Amakwawu atiyaña nsonyi kwiteja nawu eluka wanyi ñakwilu. Indenu munakutoñojoka nenudi?

4, 5. Malwihwinyi alema imwehulaña? Muloñadi chimwatelela kutwalekahu kukeñakeña ñakwilu?

⁴ Hadaha mwakeñaña kwiluka ñakwilu yamalwihu adi neyi: Muloñadi chinekalilaku? Chumanyi chikammwekena neyi nifwa? Yilwilwinyi yikwetiyi Nzambi? Yesu, Ntañishi waya mpuhu wahosheli nindi: “Twalekenuhu kulomba, akayinkachu; twalekenuhu kukeñakeña, mwakawana; twalekenuhu kudondomwena, akayenzunwinaku.” (Matewu 7:7) Twalekenuhu kukeñakeña ñakwilu yalala sampu munayiwani.

 ⁵ Neyi ‘mutwalekahu kukeñakeña,’ mukuwana ñakwilu muBayibolu. (Yishimu 2:1-5) Iyi ñakwilu yakala wanyi kutiyisha. Nsañu yimukudizaña yikuyiletesha kwikala namuzañalu makonu nawa mukuchiñejaña yuma yayiwahi yakumbidi. Tuhanjikenu halwihu lwehulañawu antu amavulu.

6. Antu amakwawu atoñojokelañadi nawu Nzambi hayakamenañaku?

⁶ Antu amavulu atoñojokaña nawu Nzambi hatwakamenañaku. Atoñojokaña nawu neyi Nzambi watwakamenaña chikupu, mukaayi mwadi kwikala yuma yatama wanyi. Tunakumona majita, kuhelañana nimakabi kwejima. Antu anakukata, anakukabakana nikufwa. Amakwawu ehulaña nawu, ‘Neyi Nzambi watwakamenaña, muloñadi chinabuliliyi kufumishahu makabi ejima?’

7. (a) Anlomboli amunsakililu akojejaña ñahi antu kutoñojoka nawu Nzambi walukambu? (b) Tukuhosheladi netu Nzambi hidiyi wakojejaña yuma yatama yamwekanañaku?

⁷ Anlomboli amunsakililu mpinji yikwawu akojejaña antu kukuhwelela nawu Nzambi walukambu. Neyi kunamwekani kukala, ahoshaña nawu hikukeña kwaNzambi. Elaña nawu, Nzambi wakeñaña nindi kumwekani. Neyi ahosha mwenimu, amwinkaña Nzambi muloña. Ilaña Bayibolu yatulejaña nawu, Nzambi hakojejaña yuma yatamaku. Yakoba 1:13 yatulejaña nawu Nzambi hesekaña muntu nayuma yatamaku. Yahosha nawu: “Muntu wunakuhita mukweseka, bayi yahosha nindi: ‘Anakuñeseka kudi Nzambiku.’ Muloña Nzambi hiyamwesekaña nayuma yatamaku, hela yena yomweni hesekaña muntu hela wumuku.” Ichi chinayi mukwila  nawu hela chakwila Nzambi hanakukañesha yuma yatama kumwekanaku, hidiyi wayikojejañaku. (Tañenu Yoba 34:10-12.) Tuhani chakutalilahu.

8, 9. Muloñadi chichikutamina kumwinka Nzambi muloña nakukala kutwamonaña? Hanenu chakutalilahu.

⁸ Fwikijenu mukwenzi washakamaña hamu nawanvwali jindi. Atata yindi amukeña nankashi nawa amudizisha chakwila yuma chiwahi. Ilaña, iwu mukwenzi hakudikaña nawatata yindi hakufuma nihamukala. Kwanayiyi hakwila yuma yatama nawa yeñila mukukala. Komana mukuhosha nenu atata yindi atama chamwitejeliwu kufuma hetala? Inehi! (Luka 15:11-13) Kufwana iwu tata yawantu, Nzambi hayilekesheli antu hadikañiliwu nakwila yuma yatamaku. Dichi, neyi kumwekana yuma yatama bayi tuhosha netu Nzambi diyi wunayikojejiku. Chikutama neyi tukumwinka Nzambi muloña.

⁹ Kudi chuma chacheni chinaleteshi Nzambi yabuli kufumishahu yuma yatama yinakumwekana. MuKapetulu 11, mwakadiza Bayibolu chiyahosha haniyi nsañu. Ilaña munateli kukuhwelela chikupu nenu Nzambi watukeña nawa hitwatela kumwinka muloña hakukala kutwamonañaku. Yena hohu Diyi wunateli kumanisha iku kukala.—Isaya 33:2.

10. Muloñadi chitunateli kukuhwelela netu Nzambi wakafumishahu yuma yejima yelañawu antu atama?

¹⁰ Nzambi wajila. (Isaya 6:3) Yuma yejima yelañayi yitooka, yawunyoji nawa yayiwahi. Dichi twatela kumukuhwelela. Antu hiyekala neyi Nzambiku. Mpinji yikwawu elaña yuma yatama. Hela nyuuli washinshika hakweti ñovu yakufumishahu yuma yatama yelañawu antu atamaku. Kwosi muntu wudi nañovu neyi yaNzambiku. Nateli kufumishahu nawa wakafumishahu yuma yejima yelañawu antu atama. Wakafumisha kutama kwejima haya nyaaka.—Tañenu Masamu 37:9-11.

11. Nzambi watiyaña ñahi neyi munakukabakana?

¹¹ Nzambi watiyaña ñahi neyi yamona yuma yatama yinakumwekana mukaayi nikukala kumwamonaña? Bayibolu yahosha nawu, Nzambi “wakeña wuñaji.” (Masamu 37:28) Dichi wamonaña chikupu yuma yayiwahi niyatama. Watiyaña kutama neyi antu anakukabakana. Bayibolu yahosha nawu, ‘muchima windi waneñeli’ chamweniyi kaayi kanenzali nayilwilu yatama kunyima. (Kutachika 6:5, 6) Nzambi hahimpaku. (Malaki 3:6) Bayibolu yahosha nawu, Nzambi wayakamenaña.—Tañenu 1 Petulu 5:7.

12, 13. (a) Muloñadi chitwakeñelaña nikwakamena akwetu, nawa twatiyaña ñahi neyi tumona makabi anakumwekana mukaayi? (b) Muloñadi chitwatelela kukuhwelela chikupu netu Nzambi wakafumishahu makabi ejima nikutama?

¹² Bayibolu yahosha cheñi nawu Nzambi watuleñeli muchifwana chindi. (Kutachika 1:26) Ichi chaya mukwila nawu Nzambi watuleñeli nayilwilu yayiwahi yidiyi nayu. Dichi, neyi mwatiyaña kutama hakumona antu abula muloña anakukabakana, Nzambi watiyaña kutama nankashi neyi yamona anakukabakana. Tuneluki ñahi?

¹³ Bayibolu yatulejaña nawu, “Nzambi hikukeña.” (1 Yowanu 4:8) Yuma yejima yelañayi Nzambi wayilaña muloña wakukeña. Dichi twekala nakukeña muloña Nzambi hikukeña. Toñojokenu hachumichi: Neyi mwadiña nañovu, mwadi kufumishahu makabi nikutama kwejima? Mwadi kuyifumishahu, muloña mwakeña antu. Indi Nzambi? Wukweti ñovu nawa chineli watukeña, wakafumishahu makabi ejima nikutama. Munateli kukuhwelela nenu, yuma yejima yashiikayi Nzambi yashimunawu kumatachikilu awunu mukanda  yikashikijewa. Hakwila mukuhweleli muniku kushiika, mwatela kumwiluka chikupu Nzambi.

14. Nzambi ijina dindi hinyi, nawa tuneluki ñahi netu twatela kudizatisha?

¹⁴ Neyi munakukeña kukwata wubwambu namuntu, chumanyi chatachi chimukumuleja? Ijina denu. Nzambi wukweti ijina? Nsakililu yayivulu yahoshaña nawu, ijina dindi diyi Nzambi hela Mwanta, ilaña awa majina wanyi. Hinkumbu hohu, chidi neyi “mwanta” hela “kajiña mpata.” Nzambi watuleja nindi ijina dindi diyi Yehova. Masamu 83:18 yahosha nawu ‘Kulonda antu akeluki nawu yeyi hohu, yeyi wukweti ijina deyi daYehova, yeyi Mukwakubadika heseki dejima.’ Ansoneki aBayibolu azatishili ijina daNzambi kakavulu. Yehova nakukeña nindi mwiluki ijina dindi nawa mudizatisheña. Nayileji ijina dindi kulonda mwikali ibwambu dindi.

15. Indi ijina dakwila nawu Yehova datalisha mudihi?

¹⁵ Ijina daNzambi, daYehova dikweti mudatalisha. Datalisha mukwila nawu, Nzambi nateli kushikija mwejima munashiikiyi nawa nateli kushikija  nkeñelu yindi. Kwosi chuma chikumukañesha. Yehova hohu diyi wunateli kwikala nanidi ijina. *

16, 17. Iyi nkumbu yatalisha mudihi yakwila nawu (a) “Wañovu Jejima”? (b) “Mwanta wahaya nyaaka nanyaaka”? (c) “Nleñi”?

¹⁶ Neyi chitwataña hakusambila, Masamu 83:18 yahosha hadi Yehova nawu: “Yeyi hohu Mukwakubadika.” Cheñi, mukanda waChimwekeshu 15:3 wahosha nawu:  “Yehova Nzambi, Wañovu Jejima, nyidimu yeyi yabadika chikupu nawa yakuhayamisha. Mwanta wahaya nyaaka nanyaaka, njila jeyi jaloña nawa jalala.” Indi nkumbu yakwila nawu “Wañovu Jejima” yatalisha mudihi? Yatalisha mukwila nawu Yehova wukweti ñovu nankashi kubadika yuma yejima. Nawa nkumbu yakwila nawu “Mwanta wahaya nyaaka nanyaaka” yatalisha mukwila nawu wekalaku mpinji yejima. Masamu 90:2 yalumbulula nawu wekalaku kufuma kumashiita nakutwala kunyaka yahaya nyaaka. Chumichi chakuhayamisha chikupu!

¹⁷ Yehova hohu diyi Nleñi. Chimwekeshu 4:11 yahosha nawu: “Yehova Nzambi yetu, watelela kutambwila kulema, kalemesha niñovu, muloña yeyi waleñeli yuma yejima nawa muloña wankeñelu yeyi, dichiyekalililiku nawa dichiwayileñeleli.” Mwamweni, kufuma kudi  añelu amwiwulu kushika nikututumbwa twamuluzwizu ndo-o nikunyikabu yakunyitondu ninshi jamumenji, Yehova diyi waleñeli yuma yejima.

18. Antu amakwawu atoñojokelañadi nawu hiyanateli kwikala amabwambu jaNzambiku? Indi Bayibolu yahosha nawudi?

¹⁸ Antu atiyaña woma neyi ataña hayilwilu yaYehova yakuhayamisha, nawa ahoshaña nawu, ‘Nzambi wukweti ñovu chikupu, walema nankashi nawa wekala kwakulehi, muloñadi chikuñakamenayi ami?’ Nzambi wakeñaña nindi tutiyeña woma wamuchidiwu? Inehi mwani. Yehova wakeñaña kuswina kudi etu. Bayibolu yahosha nawu Nzambi “hekala kwakulehi nanetu ejimaku.” (Yilwilu 17:27) Nzambi nakukeña nindi muswini kudi yena nawa washiika nindi, “niyena wukuswina kwakwihi nanenu.”—Yakoba 4:8.

19. (a) Munateli kwikala ñahi ibwambu daNzambi? (b) Yilwilwinyi yaYehova yimunakeñi nankashi?

¹⁹ Munateli kwikala ñahi ibwambu daNzambi? Yesu wahosheli nindi “Iwu diwumi wahaya nyaaka, wakukwiluka eyi Nzambi walala wumu hohu, ninowu iwatemesheli Yesu Kristu.” (Yowanu 17:3) Twalekenuhu kudiza kulonda mumwiluki Yehova niYesu. Kuhiñahu, munateli kwikala nawumi wahaya nyaaka. Chakutalilahu, twadiza netu “Nzambi hikukeña.” (1 Yowanu 4:16) Ilaña wukweti cheñi yilwilu yikwawu yayiwahi. Bayibolu yatulejaña nawu, Yehova “wenzala nawushona, watoñaña antu, hazuwaña swayiku, wasweja niluwi, wavulisha ninsañu yalala.” (Kwidika 34:6) Yehova ‘wamuwahi nawa waanakenaña.’ (Masamu 86:5) Yehova wadiwunjika nawa washinshika. (2 Petulu 3:9; Chimwekeshu 15:4) Mukudiza jajivulu hayilwilu yindi yayiwahi chimukutañaña hadi yena muBayibolu.

20-22. (a) Munateli kuswina ñahi kwakwihi naNzambi neyi himunateli kumumonaku? (b) Mwatela kwiladi neyi antu anakukeña nawu muleki kudiza Bayibolu?

 ²⁰ Munateli kuswina ñahi kwakwihi naNzambi neyi himunateli kumumonaku? (Yowanu 1:18; 4:24; 1 Timotewu 1:17) Neyi mudiza hadi Yehova muBayibolu, mukwiluka nenu Wekala kwoku. (Masamu 27:4; Aroma 1:20) Chimukudizaña nsañu yayivulu hadi Yehova, mukumukeña chikupu nawa mukuswina kwakwihi nayena.

²¹ Mukwiluka nenu Yehova hiTata yetu. (Matewu 6:9) Watwinka wumi nawa nakukeña nindi twikali nachihandilu chachiwahi. Dichelañayi ninvwali wukweti kukeña kudi anyanindi. (Masamu 36:9) Bayibolu yatuleja nawu tunateli kwikala ibwambu daYehova. (Yakoba 2:23) Toñojokenu chumichi. Yehova, Nleñi wayuma yejima nakukeña nindi mwikali ibwambu dindi.

²² Antu amakwawu anateli kukeña nawu muleki kudiza Bayibolu. Anateli kuchina nawu mukuhimpa nsakililu yenu. Ilaña bayi mwiteja muntu kuyikañesha mwikali ibwambu daYehovaku. Hibwambu wamuwahi wabadika.

23, 24. (a) Muloñadi chimukutwalekelahu kwihula malwihu? (b) Yumanyi yitwakadiza mukapetulu kanalondelihu?

²³ Chimukudizaña Bayibolu, kukwikala yuma yimukubulaña kutiyisha. Bayi mutiya nsonyi kwihula malwihu hela kulomba wukwashuku. Yesu wahosheli nindi twatela kwikala adizoza neyi anyana anyanya. (Matewu 18:2-4) Nawa anyana ehulaña malwihu amavulu nankashi. Nzambi nakukeña nindi muwani ñakwilu. Dichi dizenuña Bayibolu nakashinshi hakwila mwiluki nenu yuma yimunakudiza dichalala.—Tañenu Yilwilu 17:11.

²⁴ Njila yimu yayiwahi yakwilukilamu Yehova hikudiza Bayibolu. Mukapetulu kanalondelihu, tukadiza Bayibolu chiyambuka nanyikanda yikwawu.