1-3. Malwihwinyi ehulañawu antu hansañu yakufwa nawa nsakililu yikwawu yakulaña ñahi awa malwihu?

BAYIBOLU yatushiika nawu ifuku dimu “kufwa hikwakekalaku cheñiku.” (Chimwekeshu 21:4) MuKapetulu 5, twadizili nawu ifutu danyiloña datukwashaña kwikala nawumi wahaya nyaaka. Ilaña antu achidi kufwa. (Mukwakutañisha 9:5) Dichi, twehulaña netu, Twayaña kudihi neyi tunafwi?

² Ñakwilu yanilu lwihu yalema sweje-e neyi muntu itwakeña nafwi. Tunateli kwihula netu: ‘Nayi kudihi? Nakutumona? Nateli kutukwasha? Twakamumona cheñi?’

³ Nsakililu yayivulu yakulaña awa malwihu munjila yashiyashana. Antu amakwawu atañishaña nawu neyi welaña yuma yayiwahi, wukuya mwiwulu nawa neyi welaña yuma yatama wukuya muhelu. Amakwawu ahoshaña nawu neyi wufwa wukwikala spiritu nawa wukushakamaña nawantaña jeyi afwa dehi. Amakwawu niwena ahoshaña nawu neyi wunafwi nawa anakusompeshi dehi, wukuvwalika cheñi hela kusañuka namujimba wacheñi, hadaha wukwikala muntu wacheñi hela kanyama.

4. Yumanyi yatañishaña nsakililu hansañu yakufwa?

⁴ Nsakililu yatañishaña yuma yambukaku chikupu. Ilaña ejima wawu atañishaña yuma yoyimu. Atañishaña nawu neyi muntu nafwi, chuma chimu chatwalekañahu kuhanda. Komana atañishaña mwalala?

5, 6. Chumanyi chatumwekenaña neyi tunafwi?

⁵ Yehova weluka chuma chatumwekenaña neyi tunafwi nawa watulejaña nindi neyi muntu nafwi, hekalaña nawumiku. Kufwa hikubula wumi. Dichi neyi muntu nafwi, chatiyañayi niyitoñojoka yindi hiyatwalekañahu nakushakama kudi kwejimaku. * Neyi tunafwi hitwamonaña, kutiya hela kutoñojokaku.

⁶ Mwanta Solomoni wasonekeli nindi, “afu hiyeluka chumaku.” Muntu neyi nafwi hanateli kukeña hela kuhela muntuku nawa “Mwijamu mukuyayi mwosi mudimu, mwosi kufuukula, mwosi kwiluka, mwosi maana.” (Tañenu Mukwakutañisha 9:5, 6, 10.) Nawa haMasamu 146:4, Bayibolu yatulejaña nawu neyi muntu nafwi, “mwafuukulayi” mwakisikaña.

7. Yumanyi yahosheliyi Yesu hansañu yakufwa?

⁷ Chafwiliyi ibwambu dindi Lazaru wakeñeliyi, Yesu walejeli atumbanji twindi nindi: “Ibwambu detu Lazaru nakaami mutulu.” Ilaña Yesu hatalishili mukwila nindi Lazaru nakunookaku. Yesu wahosheli nindi: “Lazaru nafwi.” (Yowanu 11:11-14) Dichi Yesu wesekejeli kufwa natulu. Hahosheli nindi Lazaru wudi mwiwulu hela nindi wudi nawantaña jindi afwa dehiku. Nawa hahosheli nindi Lazaru nakukabakana muhelu hela nindi navwalikili cheñi mumuntu wacheñi hela kanyamaku. Chadiña neyi Lazaru wakaamini mutulu twatweni. Nsona yikwawu yesekeja kufwa nakukaama mutulu twatweni. Bayibolu yahosha nawu chamujahiliwu Stefwanu “wakaamini tulu twakufwa.” (Yilwilu 7:60) Kapostolu  Pawulu niyena wasonekeli nindi akwaKristu amakwawu “anakaami dehi mutulu twakufwa.”—1 Akorinda 15:6.

8. Tuneluki ñahi netu Nzambi haleñeli antu nindi afweñaku?

⁸ Komana Nzambi wayileñeli Adama naEva nindi mukuhita kwampinji akafwi? Inehi. Yehova wayileñeli nindi akashakameña haya nyaaka chadi kukata. Yehova chaleñeliyi antu, wayileñeli nampwila yakushakama haya nyaaka. (Mukwakutañisha 3:11) Anvwali akeñaña wanyi anyanawu nawu akashinakaji nakufwa nawa Yehova dichatiyañayi hadetu. Hanu dinu neyi Nzambi watuleñeli nindi tushakameña haya nyaaka, muloñadi chitwafwilaña?

9. Muloñadi lushimbi lwayinkeliyi Yehova Adama naEva chilwapeleleli?

⁹ Mwitempa daEdeni, Yehova wamulejeli Adama nindi: ‘Nyitondu yamwitempa yejima wukuda tuhu; ilaña mutondu wakwiluka nachu niyayiwahi niyatama eyi bayi wakawidaku; muloña ifuku diwakada chalala wakafwa.’ (Kutachika 2:9, 16, 17) Ilu lushimbi hilwadiña lwakala kwovwahilaku,Yehova wadiña nawuswa wakuyileja Adama naEva yuma yayiwahi niyatama. Neyi amwovwahilili Yehova, adi kumwekesha nawa alemesha chiyuulu chindi. Adi kumwekesha cheñi nawu ahamekaña hayuma yejima yayinkeliyi

10, 11. (a) Satana wayidimbili ñahi Adama naEva? (b) Muloñadi Adama naEva chiyatela kubula kuleyela hachuma cheliliwu?

¹⁰ Chawushona, Adama naEva atondelihu kudikaña naYehova. Satana wamwihwili Eva nindi: ‘Chalala Nzambi nahoshi nindi, nyitondu yejima yamwitempa bayi mwakayidaku?’ Eva wakwili nindi: ‘Nyikabu yanyitondu yamwitempa tukutwesha kuda tuhu, hakwinza nyikabu yamutondu wekala mukachi ketempa, Nzambi nahoshi nindi, Bayi mwakayidaku, hela kukwataku nehi, mwakenda kafwa.’—Kutachika 3:1-3.

¹¹ Kuhiñahu Satana wahosheli nindi: ‘Chalala, himwakafwaku; muloña Nzambi neluki nindi ifuku dimwakada, mesu enu akatona, mwakekala neyi chadiyi Nzambi, mwakeluka yayiwahi niyatama.’ (Kutachika 3:4-6) Satana wakeñeleña Eva yatoñojoki nindi watela kudifuukwila yuma yayiwahi niyatama. Hampinji yoyimu, watwambili hachuma chadi kumwekana neyi Eva yadikaña. Satana wahosheli nindi Eva wukufwa wanyi, dichi Eva wadiili nyikabu kuhiñahu wamwinkelihu nfumwindi. Adama naEva elukili nawu Yehova wayilejeli  nindi bayi ada kumukabuku. Chadiiliwu, adikañili nalushimbi lwapela nawa lwaluwahi. Chadiiliwu, amwekesheli nawu alemesheli wanyi kukeña kwaTata yawu wamwiwulu. Kwosi mwakuleyela nachuma cheliliwu.

12. Tukuhosheladi netu kudikaña kwaAdama naEva kwamuneñesheli Yehova?

¹² Anvwali jetu atachi amuneñesheli Nleñi yawu chabuliliwu kumulemesha. Mukutiya ñahi neyi mwazatili nañovu kukulishi mwanenu weyala niwamumbanda ilaña adikaña nawa hiyakwila yuma yimunabuli kuyileja? Komana chikuyikata wanyi kumuchima?

13. Yehova watwalili mudihi chahosheliyi nindi “wakafunta cheñi mwomulunkuñu”?

¹³ Chadikañiliwu, Adama naEva hiyadiña nakukooleka cheñi kwakushakama haya nyaakaku. Yehova wamulejeli Adama nindi: “Muloña eyi wulunkuñu, nochu wakafunta cheñi mwomulunkuñu.” (Tañenu Kutachika 3:19.) Dikwila nawu Adama wadi kwikala lunkuñu cheñi, neyi kwiji hiyamuleñeliku. (Kutachika 2:7) Chelili Adama navulumuni dehi, wafwili hekaliliku nawa cheñiku.

14. Muloñadi chitwafwilaña?

¹⁴ Neyi Adama naEva amwovwahilili Nzambi, adi kwikala amomi niyinu mpinji. Ilaña chadikañiliwu nindi, avulumwini, nkumininaku afwili. Nshidi yidi neyi musoñu watama wutwaswana kudi anvwali jetu atachi. Ejima wetu twavwalikaña nanshidi, dichitwafwilaña.  (Aroma 5:12) Ilaña Nzambi hakeñeleña nindi antu afweñaku. Nzambi haleñeli antu nindi afweñaku nawa Bayibolu yatenaña kufwa nawu “chilumbu.”—1 Akorinda 15:26.

15. Kwiluka chalala kutalisha hansañu yakufwa kwatufumishaña ñahi muwuduñu?

¹⁵ Neyi twiluka chalala kutalisha hansañu yakufwa, tukufuma muwuduñu wansañu yayivulu yakutwamba. Bayibolu yatulejaña nawu afu hiyatiyaña kukata hela chineñiku. Kwila tuhosha nawu nehi nawa kwila ahosha nanetu nehi. Kwila tuyikwasha afu nehi nawa afu kwila atukwasha nehi. Kwila atukatisha nehi, dichi hitwatela kuyichinaku. Hela chochu, nsakililu yayivulu yahoshaña nawu afu ashakamaña kwacheñi nawa ahoshaña nawu tunateli kuyikwasha neyi tuhana mali kudi atupristu hela antu amonañawu nawu ajila. Ilaña neyi twiluka chalala kutalisha hansañu yakufwa, kwila atudimba nehi.

16. Nsañwinyi yakutwamba yahoshaña nsakililu yayivulu kutalisha hadi afu?

¹⁶ Satana wazatishaña nsakililu yakutwamba kulonda yatudimbi nawa tutoñojokeña netu afu achidi amomi. Chakutalilahu, nsakililu yikwawu yalejaña antu nawu neyi tunafwi, kudi chuma chafumaña mudetu chatwalekañahu kuhanda kwacheñi. Komana nsakililu yenu yalejaña antu nsañu yamuchidiwu tahindi yashimunaña yuma yahosha Bayibolu hadi afu? Satana wadimbaña antu kulonda abuli kumwiluka Yehova.

17. Muloñadi nsañu yakwocha antu muhelu chiyekalila yakumusupisha Yehova?

¹⁷ Yuma yatañishaña nsakililu yayivulu yakuhayamisha. Chakutalilahu, amakwawu atañishaña nawu antu  atama akayocha muhelu haya nyaaka. Kutwamba kwamuchidiwu hikumusupisha Yehova. Nzambi kwila yakabisha antu nehi. (Tañenu 1 Yowanu 4:8) Mukutiya ñahi neyi mumona muntu nakubabesha mwanindi kuhitila mukwocha chikasa chamwanindi mukesi? Mukuhosha nenu muntu wamuchidiwu himbanji. Mukukeña nikumwiluka wanyi. Satana niyena wakeñaña nindi tumumoneña Yehova netu watama.

18. Muloñadi chitukubulila kuchina afu?

¹⁸ Nsakililu yikwawu yahoshaña nawu neyi antu anafwi, abalumukaña nakwikala aspiritu. Nsakililu yamuchidiwu yalejaña antu nawu twatela kulemesha nikuchina awa aspiritu muloña anateli kwikala amabwambu jetu añovu hela ayilumbu jetu atama chikupu. Antu amavulu etejaña iyi nsañu yakutwamba. Achinaña afu, dichi adifukulaña kudi afu chatela adifukuleña kudi Yehova. Anukenu nenu afu hiyatiyaña hela kumona chuma chidi chejimaku, dichi hitwatela kuyichinaku. Yehova diyi Nleñi yetu. HiNzambi walala nawa twatela kudifukula hohu kudi yena.—Chimwekeshu 4:11.

19. Kwiluka chalala kutalisha hansañu yakufwa kwatukwashaña ñahi?

¹⁹ Neyi twiluka chalala kutalisha hansañu yakufwa, akwansakililu akutudimbaña wanyi. Ichi chalala chatukwashaña kwiluka yuma yashiikayi Yehova kutalisha hachihandilu chetu niyuma yakumbidi.

20. Yumanyi yitwakadiza mukapetulu kanalondelihu?

²⁰ Kunyima, kambuña Nzambi Yoba wehwili nindi: ‘Neyi muntu nafwi, wakahanda cheñi?’ (Yoba 14:14) Komana muntu wunafwi nateli kuhanda cheñi? Ñakwilu yatulejañayi Nzambi yekala muBayibolu yayiwahi chikupu. Tukahanjeka haniyi ñakwilu mukapetulu kanalondelihu.