KAPETULU 8
Wanta waNzambi Hichumanyi?
1. Kulombanyi kwaya mpuhu kutukuhanjeka?
ANTU amavulu eluka kulomba kwaya mpuhu kwatenañawu nawu, Tata Yetu hela Kulomba kwaMwanta. Yesu wazatishili iku kulomba kulonda yadizishi atumbanji twindi chakulomba. Yumanyi yalombeleñayi? Nawa iku kulomba kunateli kutukwasha ñahi makonu?
2. Yumanyi yisatu yalema yatulejeliyi Yesu nindi tulombeña?
2 Yesu wahosheli nindi: “Ichi dichimwatela kulomba, nenu: ‘Tata yetu wekala mwiwulu, ijina deyi diikali dajila. Wanta weyi winzi. Nkeñelu yeyi ayili hamaseki neyi chayilañawu mwiwulu.’” (Tañenu Matewu 6:9-13.) Muloñadi Yesu chatulejeleliyi nindi tulombeña haniyi yuma yisatu?—Talenu Mazu Adi Kunsa 20.
3. Yumanyi yitwatela kwiluka haWanta waNzambi?
3 Twadizili netu ijina daNzambi diyi Yehova. Nawa twadizili yuma yafuukwilayi Nzambi antu niiseki. Hanu dinu Yesu watalishili mudihi chahosheliyi nindi: “Wanta weyi winzi”? Tukudiza mwatalisha Wanta waNzambi, yuma yiwukakoña nichiwakajilika ijina daNzambi.
WANTA WANZAMBI HICHUMANYI?
4. Wanta waNzambi hichumanyi nawa hinyi Mwanta waniwu wanta?
4 Yehova waloñesha nfulumendi yamwiwulu nawa watonda Yesu kwikala Mwanta. Bayibolu yatenaña iyi nfulumendi nawu Wanta waNzambi. Yesu diyi “Mwanta wawanyanta nawa diyi Nkaaka yawankaaka.” (1 Timotewu 6:15) Yesu nateli kukoña yuma yayiwahi kubadika nyuuli wamuntu wudi wejima nawa wukweti ñovu kubadika anyuuli awantu ejima.
5. Nfulumendi yaNzambi yayuulilaña kudihi? Yikayuula kudihi?
5 Chimwahitili mafuku 40 kufuma hamusañwiliwu, Yesu wafuntili mwiwulu. Nkumininaku, Yehova wamutondeli kwikala Mwanta waWanta. (Yilwilu 2:33) Nfulumendi yaNzambi yikayuulaña hamaseki mwiwulu. (Chimwekeshu 11:15) Dichawutenenañawu Wanta waNzambi muBayibolu nawu ‘Wanta wamwiwulu.’—2 Timotewu 4:18.
6, 7. Muloñadi Yesu chekalilayi mwanta wamuwahi kubadika anyanta awantu?
6 Bayibolu yahosha nawu Yesu wabadika anyanta ejima muloña yena ‘kankawindi diyi wabulaña kufwa.’ (1 Timotewu 6:16) Anyuuli ejima awantu afwaña, ilaña Yesu wakafwa wanyi. Yuma yejima yayiwahi yakelayi Yesu yakashakama haya nyaaka.
7 Wuprofwetu wamuBayibolu wahosha nawu Yesu wakekala Mwanta wamuwahi nawa wukweti wushona: ‘Spiritu yaYehova yakekala hadi yena, spiritu yamaana niyakashinshi, spiritu yakuleja maana niyañovu, spiritu yakwiluka niyakumutiya Yehova woma; nawa wakazañalala hakumutiya Yehova woma; hakasompesha chinakumwekanayi muntu kumesuku, hela hakazuwila [hela kufumba] kwesekeja nayuma yinatiyiyiku; wakasompesha atuzweñi mwaloña.’ (Isaya 11:2-4) Komana mukukeña muntu wudi nayilwilu yamuchidiwu kwikala mwanta wenu?
8. Tuneluki ñahi netu Yesu hakayuula nkawindiku?
8 Nzambi watonda antu amakwawu kulonda akayuuli hamu naYesu munfulumendi yamwiwulu. Chakutalilahu, kapostolu Pawulu wamulejeli Timotewu nindi: “Neyi tutwalekahu nakuumika, tukayuulila cheñi hamu nindi neyi anyanta.” (2 Timotewu 2:12) Antu añahi akayuula neyi anyanta hamu naYesu?
9. Añahi akayuula naYesu? Mpinjinyi yatachikiliyi Nzambi kuyitonda?
9 Neyi chitwadizili muKapetulu 7, kapostolu Yowanu wamweni Yesu neyi Mwanta mwiwulu muchimwenu wudi nawanyanta amakwawu 144,000. A 144,000 hiyanyi? Yowanu walumbulwili nindi, “akweti ijina [daYesu] niijina daTata yindi akusoneka hamahama awu.” Watwalekelihu nindi: “Awa diwu alondelaña Mwana kaMukoku [dikwila nawu, Yesu] kwejima kwayañayi. Wenawa ayilandili hakachi kawantu.” (Tañenu Chimwekeshu 14:1, 4.) A 144,000 hiyakwaKristu ashinshika atondawu kudi Nzambi kulonda ‘akayuuli neyi anyanta hamaseki’ hamu naYesu. Neyi afwa, ayisañulaña nawumi wamwiwulu. (Chimwekeshu 5:10) Kutachika tuhu mumpinji yawapostolu, Yehova natwalekihu kutonda akwaKristu ashinshika kwikala hanidi izanvu dawanyanta a 144,000.
10. Muloñadi chitukuhoshela netu Yehova watukeña hakutonda Yesu nia 144,000 kulonda ayuuli antu?
10 Yehova watwakamenaña chikupu muloña watonda antu kulonda akayuuli hamu naYesu. Yesu wakekala nyuuli wamuwahi muloña watwiluka. Weluka chekalawu antu nimakabi amonañawu. Pawulu wahosheli nindi Yesu watutiyilaña luwi, ‘watiyishaña kuzeyazeya kwetu,’ nawa ‘anamweseki muyuma yejima neyi chinatwesekiwu ninetu.’ (Aheberu 4:15; 5:8) A 144,000 niwena eluka chekalawu antu. Adiña awanina wanyi nawa akatileña. Dichi, tunakuhweleli chikupu netu Yesu nia 144,000 akeluka chitwatiyaña nimakabi itunakumona.
YUMANYI YAKELA WANTA WANZAMBI?
11. Muloñadi Yesu chalejeleliyi atumbanji twindi kulomba nawu nkeñelu yaNzambi ayili mwiwulu?
11 Yesu walejeli atumbanji twindi kulomba nawu nkeñelu yaNzambi ayili mwiwulu. Muloñadi? Twadizili muKapetulu 3 netu Satana Diyabolu wadikañili naYehova. Chelili Satana nadikañi dehi, Yehova wamwitejeli niañelu abulili kashinshi hela andemoni, kushakama mwiwulu hakampinji kanti. Bayi neyi ejima mwiwulu elileña nkeñelu yaNzambiku. MuKapetulu 10, twakadiza nsañu yayivulu hadi Satana niandemoni.
12. Yumanyi yiyedi yalema yashimunawu haChimwekeshu 12:10?
12 Bayibolu yahosha nawu Yesu chekaliliyi Mwanta waWanta waNzambi, wakasa njita naSatana. (Tañenu Chimwekeshu 12:7-10.) Vasi 10 yashimuna yuma yiyedi yalema chikupu. Wanta waNzambi watachikili kuyuula nawa Yesu Kristu wekalili Mwanta, Satana amunatili hamaseki kufuma mwiwulu. Neyi chitukudiza, iyi yuma yamwekana dehi.
13. Yumanyi yamwekeni mwiwulu chelili Satana amumbili hamaseki?
13 Bayibolu yalumbulula muzañalu watiyiliwu añelu ashinshika hanyima yakwila Satana niandemoni jindi anayumbili hamaseki kufuma mwiwulu. Twatañaña nawu: “Enu mawulu ninenu mwashakamamu zañalalenu!” (Chimwekeshu 12:12) Mwiwulu mudi kuwunda nikunuñañana kwakweni muloña ejima anakwila nkeñelu yaNzambi.
Kufuma tuhu hampinji yamunatiliwu Satana niandemoni jindi, hamaseki hadi makabi amavulu chikupu. Awa makabi katataka tuhu amani
14. Yumanyi yinakumwekana hamaseki chineli Satana amumbila hamaseki?
14 Ilaña antu hamaseki anakumona yihuñu. Antu anakumona yuma yatama “muloña Diyabolu nayisulukili,” nawa “wudi nandombu yayeni, chanelukiyi nindi kunashali dehi mpinji yindi yantesha hohu.” (Chimwekeshu 12:12) Satana wudi nandombu. Anamumbili hamaseki nawa neluki nindi katataka tuhu amujilumuni. Wazataña nañovu jejima kulonda yaleti kukala, yikatu nimakabi hamaseki.
15. Nzambi wukweti nkeñelwinyi kutalisha kwiseki?
15 Ilaña nkeñelu yaNzambi kutalisha kwiseki yahimpika wanyi. Wuchidi kukeña nindi antu awanina akashakami haya nyaaka muParadisa hamaseki. (Masamu 37:29) Hanu dinu Wanta waNzambi wakela ñahi chumichi?
16, 17. Yumanyi yatulejaña Danyeli 2:44 haWanta waNzambi?
16 Wuprofwetu wekala ha Danyeli 2:44 wahosha nawu: ‘Hamafuku amba kekala anyantowu Nzambi wamwiwulu wamba kaloñesha wanta wakabula kukisañanawu. Wantowu hiyamba kawushiyila antu acheñuku. Wakahumona puchi puchi nakuyinoñesha mawanta ejima awa, wena nkawawu wakemana mbe haya nyaaka.’ Iwu wuprofwetu watudizishañadi kutalisha haWanta waNzambi?
17 Chatachi, watulejaña nawu Wanta waNzambi wakatachika kuyuula “hamafuku amba kekala anyantowu.” Dikwila nawu kwakekala nfulumendi jikwawu hamaseki hampinji yakatachika kuyuula iwu Wanta. Chamuchiyedi, watulejaña nawu Wanta waNzambi wakashakama haya nyaaka nawa hiyakawihiña kudi nfulumendi yikwawuku. Chamuchisatu, watulejaña nawu kwakekala njita hakachi kaWanta waNzambi nanfulumendi jamukaayi. Wanta waNzambi wakashinda nawa diyi nfulumendi hohu yakayuulaña hamaseki. Kuhiñahu, antu akekala nanfulumendi yayiwahi chikupu.
18. Njita yakukumishaku yakekala hakachi kaWanta waNzambi nanfulumendi jamukaayi ayitenaña nawudi?
18 Wanta waNzambi wakatachika ñahi kuyuula hamaseki? Henohu njita yaAmagedoni kanda yitachiki, andemoni akadimba “anyanta ahanu hamaseki hejima, nakuyipompeshela kunjita yefuku deneni daNzambi Wañovu Yejima.” Mwamweni, nfulumendi jawantu jikalwa naWanta waNzambi.—Chimwekeshu 16:14, 16; talenu Mazu Adi Kunsa 10.
19, 20. Muloñadi chitunakukeñela Wanta waNzambi kuyuula hamaseki?
19 Tunakukeñeladi Wanta waNzambi? Kudi yuma yisatu yaleñelaña tukeñeña Wanta waNzambi. Chatachi, tudi akwanshidi, twakataña nikufwa. Ilaña Bayibolu yahosha nawu muchiyuulu chaWanta waNzambi, twakashakamaña haya nyaaka. Yowanu 3:16 yahoshaña nawu: “Nzambi wakeñeli nankashi kaayi chakwila watemesheli Mwanindi wumu hohu, kulonda muntu wejima wukumukuhwelela yakabuli kujilumuka, ilaña yakekali nawumi wahaya nyaaka.”
20 Chuma chamuchiyedi chitunakukeñela Wanta waNzambi chidi chakwila nawu twashakamaña nawantu atama. Antu amavulu atwambaña nawa hiyayivumbi. Tunateli kuyifumishahu wanyi, ilaña Nzambi diyi watela kuyifumishahu. Antu atwalekañahu kwila yuma yatama akayijilumuna haAmagedoni. (Tañenu Masamu 37:10.) Chuma chamuchisatu chitunakukeñela Wanta waNzambi chidi chakwila nawu nfulumendi jawantu jazeya, jalukambu hela jamajika kanwa. Akwashaña antu kulonda amwovwahileña Nzambi wanyi. Bayibolu yahosha nawu “muntu wayuulaña mukwawu muntu kulonda yamukatishi.”—Mukwakutañisha 8:9 [NWT].
21. Wanta wakelisha ñahi nkeñelu yaNzambi kuzatika hamaseki?
21 Hanyima yaAmagedoni, Wanta waNzambi wakelisha nkeñelu yaNzambi kuzatika hamaseki. Chakutalilahu, wakafumishahu Satana niandemoni jindi. (Chimwekeshu 20:1-3) Nkumininaku, kwosi muntu wakakataña hela kufwa. Muloña wefutu danyiloña, antu ejima ashinshika akashakama haya nyaaka muParadisa. (Chimwekeshu 22:1-3) Wanta wakajilika ijina daNzambi. Chumanyi chikafumamu? Neyi nfulumendi yaNzambi yinatachiki dehi kuyuula hamaseki, antu ejima akalemesha ijina daYehova.—Talenu Mazu Adi Kunsa 21.
YESU WEKALILI MWANTA MPINJINYI?
22. Tweluka ñahi netu Yesu hekalili Mwanta hampinji yadiñayi hamaseki hela hashikeneni kwikala mwanta hanyima yakumusañulaku?
22 Yesu walejeli atumbanji twindi kulomba nawu: “Wanta weyi winzi.” Dikwila nawu nfulumendi yaNzambi yakenza kumbidi. Yehova wasambilili kushaku nfulumendi yindi nikumwilisha Yesu kwikala Mwanta. Komana Yesu washikeneni dakwikala Mwanta hampinji yafuntiliyi mwiwulu? Inehi, wahembeleli. Hanyima yakwila Yesu anamusañuli dehi, aPetulu niPawulu mwayedi wawu alumbulwili mwatalisha iyi nsañu hakukundamisha wuprofwetu wekala haMasamu 110:1 kudi Yesu. Muwuprofwetu, Yehova wahosheli nindi: “Shakamaku kuchikasa chami chachidiilu sampu nabalumuni ayilumbu jeyi kwikala chitwamu hakudata nyendu yeyi.” (Yilwilu 2:32-35; Aheberu 10:12, 13) Yesu wahembeleli nakushika mpinjinyi hakwila nawu Yehova yamwilishi kwikala Mwanta?
Wanta waNzambi wakelisha nkeñelu yaNzambi kuzatika hamaseki
23. (a) Yesu watachikili kuyuula mpinjinyi neyi Mwanta wanfulumendi yaNzambi? (b) Yumanyi yitwakadiza mukapetulu kanalondelihu?
23 Hadi yaaka yayivulu henohu chaaka cha 1914 kanda chishiki, izanvu dawakwaKristu ashinshika delukili nawu ichi chaaka chikekala chalema muwuprofwetu wamuBayibolu. Kufuma tuhu mu 1914 yuma yinakumwekana mukaayi yinakumwekesha nawu ahosheli mwalala. Yesu watachikili kuyuula neyi Mwanta mu 1914. (Masamu 110:2) Chelili naswani dehi, Satana amumbilili hamaseki, nawa “nashali dehi nakapinji kantesha hohu.” (Chimwekeshu 12:12) Mukapetulu kanalondelihu, twakadiza yuma yayivulu yinakumwekesha nawu tunakushakama muniyi mpinji. Twakadiza cheñi nawu katataka tuhu Wanta waNzambi wilishi nkeñelu yaNzambi kuzatika hamaseki.—Talenu Mazu Adi Kunsa 22.
