1, 2. (a) Neyi mweluka ijina damuntu waya mpuhu, komana mwamwiluka chikupu? Lumbululenu. (b) Antu eluka nawu Yesu himuntu wamuchidinyi?

MUKAAYI mwekala antu amavulu ayampuhu. Hadaha mwelukahu muntu wumu wayampuhu. Ilaña chimwamwiluka hohu ijina hichinayi mukwila nawu mwamwiluka chikupuku. Hichinayi mukwila nawu mweluka nsañu yejima yachihandilu chindi nichekalayiku.

² Hadaha mwatiyahu dehi nsañu yaYesu Kristu, hela munahiti yaaka 2,000 kufuma hadiñayi hamaseki. Antu amavulu eluka wanyi Yesu chadiñayi. Amakwawu ahoshaña nawu wadiña muntu wamuwahi, amakwawu nawu wadiña kaprofwetu nawa amakwawu akuhwelela nawu hiNzambi. Indenu mwatoñojokaña nenudi?—Talenu Mazu Adi Kunsa 12.

3. Muloñadi chichawahila kumwiluka Yehova Nzambi niYesu Kristu?

³ Chikuwaha neyi mukwiluka chekalayi Yesu. Muloñadi? Bayibolu yatulejaña nawu: “Iwu diwumi wahaya nyaaka, wakukwiluka eyi Nzambi walala wumu hohu, ninowu iwatemesheli Yesu Kristu.” (Yowanu 17:3) Mwamweni, neyi mukumwiluka Yehova niYesu mwakashakama haya nyaaka muparadisa hamaseki. (Yowanu 14:6) Cheñi, neyi mumwiluka Yesu chikuyikwasha muloña welukili chakushakama nawantu. (Yowanu 13:34, 35) MuKapetulu 1, twadizili chekalayi Nzambi. Ichi dinu tukudiza chatañishaña Bayibolu hadi Yesu.

4. Indi nkumbu jakwila nawu “Mesiya” ‘niKristu’ jatalisha mudi?

⁴ Henohu kunashali yaaka yayivulu nakuvwalika kwaYesu, Yehova washimwini muBayibolu nindi, wakatemesha Mesiya hela netu Kristu. Izu dakwila nawu “Mesiya” dafuma kuchiHeberu nawa izu dakwila nawu “Kristu” dafuma kuchiGiriki. Iji nkumbu jejima jalumbulula nawu Nzambi wakatonda Mesiya nakumwinka chifulu chabadika. Mesiya wakashikija yuma yejima yashiikayi yaNzambi. Yesu nateli kuyikwasha cheñi nimakonu. Henohu Yesu kanda yavwaliki antu amavulu ajinookeleña nawu, ‘Hinyi wakekala Mesiya?’

5. Komana atumbanji twaYesu elukili nawu diyi Mesiya?

⁵ Atumbanji twaYesu elukili chikupu nawu diyi Mesiya wakaniniwu. (Yowanu 1:41) Chakutalilahu, Shimona Petulu wamulejeli Yesu nindi: “Yeyi Kristu.” (Matewu 16:16) Tunateli kwiluka ñahi chikupu netu Yesu diyi Mesiya?

6. Yehova wakwashaña ñahi antu ashinshika kumwiluka Mesiya?

⁶ Henohu kunashali yaaka yayivulu nakuvwalika kwaYesu, atuprofwetu aNzambi asonekeli nsañu jajivulu jatela kukwasha antu kumwiluka Mesiya. Iyi nsañu yinateli kutukwasha ñahi? Fwikijenu anayili nawu muyi nakusenda muntu imwabula kwiluka kusitesheni yabasi kudi antu amavulu. Neyi ayileja chiwahi chamwekanañayi munateli kumuwana. Munjila yoyimu, Yehova wazatishili atuprofwetu kulonda atuleji yuma yakelayi Mesiya niyuma yikamumwekena. Kushikijewa kwawuprofwetu wejimiwu kwakwashaña antu ashinshika kwiluka nawu Yesu diyi Mesiya.

7. Wuprofwetwinyi wuyedi wamwekeshaña nawu Yesu diyi Mesiya?

⁷ Tutalenu hawuprofwetu wuyedi. Chatachi, chikwashalili yaaka 700 nakuvwalika kwaYesu, Mika  waprofweteli nindi Mesiya wakavwalikila mumusumba wanyanya waBetelemi. (Mika 5:2) Nawa Yesu wavwalikilili muniwu musumba. (Matewu 2:1, 3-9) Chamuchiyedi, Danyeli waprofweteli nindi Mesiya wakamwekana muchaaka cha 29 C.E. (Danyeli 9:25) Iwu diwu wuprofwetu wuyedi wekala hakachi kawuprofwetu wawuvulu wamwekesha nawu Yesu diyi Mesiya wakaniniwu.—Talenu Mazu Adi Kunsa 13.

8, 9. Yumanyi yamwekeni hamupapatishileñawu Yesu yamwekeshaña nawu diyi Mesiya?

⁸ Yehova namwekeshi chikupu nindi Yesu diyi Mesiya. Nzambi wamushiikili Yowanu Mpapatishu kumwinka chinjikijilu chakumwiluka nachu Mesiya. Yesu chayiliyi kudi Yowanu kulonda amupapatishi muKaloña Yodana muchaaka cha 29 C.E., Yowanu wamweni ichi chinjikijilu. Bayibolu yatuleja yuma yamwekeni: “Chamupapatishiliwu, hohenohu Yesu wafumini mumenji; mwiwulu mwenzunukili nawa wamweni spiritu yaNzambi yamwekeneña neyi kapompa yenjileña nakuwila hadi yena. Cheñi nawa, mwiwulu mwafumini izu nadu: ‘Iwu diyi Mwanami, inakeña, inatiyaña kuwaha.’” (Matewu 3:16, 17) Yowanu chamweniyi nikutiya ichi chinjikijilu, welukili nindi Yesu diyi Mesiya. (Yowanu 1:32-34) Hanidi ifuku chelili Yehova yahuñununi spiritu hadi mwanindi, Yesu wekalili Mesiya. Diyi muntu atondeliyi Nzambi kwikala Nlomboli nawa Mwanta.—Isaya 55:4.

 ⁹ Wuprofwetu wamuBayibolu, mazu aYehova nichinjikijilu chamwekeni hamupapatishileñawu Yesu jamwekesheli nawu Yesu diyi Mesiya. Hanu dinu Yesu wafumini kudihi nawa wadiña muntu wamuchidinyi? Tushinshikenu yuma yahosha Bayibolu.

10. Yumanyi yatañishaña Bayibolu kutalisha kuchihandilu chaYesu henohu kanda yenzi hamaseki?

¹⁰ Bayibolu yahosha nawu Yesu washakamineña mwiwulu hadi yaaka yayivulu henohu kanda yenzi hamaseki. Mika wahosheli nindi Mesiya wafuma “kushankulu.” (Mika 5:2) Yesu yomweni wahosheli kakavulu nindi washakamineña mwiwulu henohu kanda yavwaliki neyi muntu. (Tañenu Yowanu 3:13; 6:38, 62; 17:4, 5.) Yesu wadiña nawubwambu wawuwahi naNzambi nihampinji yelili kanda yenzi hamaseki.

11. Muloñadi Yesu chamukeñelawu chikupu kudi Yehova?

¹¹ Yesu amukeña chikupu kudi Yehova. Muloñadi? Muloña diyi wadiña watachi kuleña henohu Nzambi kanda yaleñi yuma yejima. Dichamutenenañawu Yesu nawu “wedi wayileñaleña yejima.” * (Akolosi 1:15) Yesu amukeña cheñi kudi Yehova muloña diyi aleñeliwu kudi Yehova yomweni. Dichamutenenañawu nawu “Mwanindi wumu hohu.” (Yowanu 3:16) Yesu cheñi diyi wazatishiliwu kudi Yehova hakuleña yuma yejima. (Akolosi 1:16) Nawa Yesu diyi atenañawu nawu “Izu,” muloña amuzatishili kudi Yehova kulonda yashimuni nsañu ninshimbi kudi añelu niantu.—Yowanu 1:14.

12. Tweluka ñahi netu Yesu naNzambi esekana wanyi?

¹² Antu amakwawu eluka nawu Yesu naNzambi esekana. Ilaña ichi dichahosha Bayibolu wanyi. Bayibolu yahosha nawu Yesu amuleñeli, dikwila nawu Yesu wukweti ntachikilu. Ilaña Yehova waleñeli yuma yejima hekala nantachikiluku. (Masamu 90:2) Chineli hiMwana kaNzambi,  Yesu hatoñojokeleñahu kwikala Nzambiku. Bayibolu yalumbulula chikupu nawu Tata wabadika Mwana. (Tañenu Yowanu 14:28; 1 Akorinda 11:3.) Yehova hohu diyi ‘Nzambi Wañovu Jejima.’ (Kutachika 17:1) Diyi wabadika nawa wukweti ñovu mukuleña kwejima.—Talenu Mazu Adi Kunsa 14.

13. Muloñadi Bayibolu chiyahoshela nawu Yesu diyi “chifwanisha chaNzambi abulaña kumonawu”?

¹³ Yehova naMwanindi Yesu, azatilili hamu hadi yaaka yayivulu henohu kanda aleñi mawulu nimaseki. Atela adikeñeli chikupu! (Yowanu 3:35; 14:31) Yesu wembujoleli chikupu yilwilu yatata yindi chakwila Bayibolu yamutenaña nawu “chifwanisha chaNzambi abulaña kumonawu.”—Akolosi 1:15.

14. Mwana kaYehova wakeñayi wavwalikili ñahi neyi muntu?

¹⁴ Mwana kaYehova wakeñayi wadihanini kufuma mwiwulu nakwinza nakuvwalika hamaseki neyi muntu. Wavwalikili ñahi? Yehova watuntulwili wumi waMwanindi muchihayamisha kufuma mwiwulu nakuwisha mwivumu damujiki wejina daMariya. Dikwila nawu, Yesu hadiña natata yindi wamuntuku. Dichi Mariya wavwalili mwana wawanina nawa wamutumbili nindi Yesu.—Luka 1:30-35.

15. Munateli kumwiluka ñahi Yehova chiwahi?

¹⁵ Neyi mutaña mumukanda waMatewu, Maku, Luka niYowanu mukwiluka nsañu jajivulu jahosha hadi Yesu, chihandilu niyilwilu yindi. Iyi nyikanda ayitenaña nawu Nsañu Yayiwahi. Chineli Yesu wadifwana naTata yindi, yuma yimukutaña yikuyikwasha kumwiluka Yehova chiwahi. Dichaletesheli Yesu yahoshi nindi: “Muntu wejima wunamoni ami, dikwila nawu namoni niTata.”—Yowanu 14:9.

16. Yumanyi yalejeleñayi Yesu antu? Yuma yatañishileñayi Yesu yafumineña kudihi?

 ¹⁶ Antu amavulu amuteneneña Yesu nawu “Ntañishi.” (Yowanu 1:38; 13:13) Nsañu yalema yalejeleñayi antu yadiña “nsañu yayiwahi yaWanta.” HiWantanyi weniwu? Hinfulumendi yaNzambi yamwiwulu yakayuula iseki dejima nakuleta nkisu kudi antu amwovwahilaña Nzambi. (Matewu 4:23) Yuma yejima yatañishileñayi Yesu yafumineña kudi Yehova. Yesu wahosheli nindi: “Yuma yinatañishaña yami wanyi, ilaña yanowu wantemesheli.” (Yowanu 7:16) Yesu welukili nindi Yehova nakukeña antu atiyi nsañu yayiwahi yakwila nawu Wanta waNzambi wakayuula iseki dejima.

17. Kudihi kwadizishilileñayi Yesu? Muloñadi chazatililiyi nañovu kulonda yadizishi antu?

¹⁷ Kudihi kwadizishilileñayi Yesu? Kwejima kwawanineñayi antu. Wadizishilileña munyikala yakwakulehi kushilahu nimunyisumba, munyikala, kuyisankanu, mumaluña akudifukwila nikumatala awantu. Hadiña nakuhembelela antu kwinza kudi yenaku. Wayileña kudi antu. (Maku 6:56; Luka 19:5, 6) Yesu wazatileña nañovu nawa wazatishileña mpinji yeneni hakudizisha antu. Muloñadi? Welukili nindi Nzambi wakeñeleña kuzata iwu mudimu nawa muloña wamwovwahilileña Tata yindi. (Yowanu 8:28, 29) Yesu wadiña nakushimwina muloña wadiña nakutiyila antu luwi. (Tañenu Matewu 9:35, 36.) Wamweni nindi anlomboli amunsakililu yakutwamba alejeleña antu nsañu yakutwamba hadi Nzambi niWanta windi. Dichi wakeñeleña kukwasha antu amavulu kulonda atiyi nsañu yayiwahi.

18. Yilwilwinyi yadiña naYesu yimunakeñi nankashi?

¹⁸ Yesu wayikeñeli antu nawa wayakameneneña. Wadiña naluwi nawa waswayi kuhosha nindi. Anyana niwena  atiyileña kuwaha kushakama nindi. (Maku 10:13-16) Yesu wadiña nachaambu wanyi. Waheleli majika kanwa niwuñanji waloña. (Matewu 21:12, 13) Wadiñaku hampinji yadiñawu ambanda nawuswa wantesha nawa yabulileñawu kuyilemesha. Ilaña Yesu wayilemesheleña ambanda chikupu. (Yowanu 4:9, 27) Yesu wadiña wadizoza chikupu. Chakutalilahu, ifuku dimu namelela wawelesheli nyendu yawatumbanji twindi, mudimu wazatileñawu añamba.—Yowanu 13:2-5, 12-17.

19. Chakutalilahwinyi chinakumwekesha nawu Yesu welukili yuma yakeñeleñawu antu nawa wakeñeleña kuyikwasha?

¹⁹ Yesu welukili yuma yakeñeleñawu antu nawa wakeñeleña kuyikwasha. Chumichi chamwekeni hampinji yazatishiliyi ñovu yaNzambi hakuuka antu muchihayamisha. (Matewu 14:14) Chakutalilahu, muntu wadiña nambumba wenjili kudi Yesu nakuhosha nindi: “Neyi wunakeñi, wunateli kuntookesha.” Yesu watiyili wushona chamweniyi ona iyala nakukabakana. Wamutiyilili luwi nawa wakeñeli kumukwasha. Dichi Yesu wolweli chikasa chindi nakumukunka hakumwila nindi: “Nakeñi! Tookaku.” Iwu iyala amuukili! (Maku 1:40-42) Iwu iyala watiyili ñahi chamuukiliwu?

20, 21. Yesu watwinka ñahi chakutalilahu chachiwahi chakwovwahila Nzambi?

²⁰ Yesu watwinka chakutalilahu chachiwahi chakumwovwahila Nzambi. Hichidi namuloña nayuma yamwekeni hela chamwililiwu kudi ayilumbu jindiku, watwalekelihu kwikala washinshika kudi Tata yindi. Chakutalilahu, Yesu wavulumwini wanyi chamwesekeliwu kudi Satana. (Matewu 4:1-11) Antaña jaYesu amakwawu akuhweleleli wanyi nawu wadiña Mesiya  nawa ahosheleña nawu “nazaluki,” ilaña Yesu watwalekelihu kuzata mudimu waNzambi. (Maku 3:21) Yesu chamukabishiliwu kudi ayilumbu jindi, watwalekelihu kwikala washinshika kudi Nzambi nawa hayilili chatamaku.—1 Petulu 2:21-23.

²¹ Hela Yesu wakabakeni nikufwa munjila yatama, watwalekelihu kwikala washinshika kudi Yehova. (Tañenu Afwilipi 2:8.) Fwikijenu chomikiliyi hefuku dafwiliyi. Amukasili, amwinkeli muloña wakuhosha kasawuntu kudi ayinsahu akutwamba, amwinkeli muloña kudi añanji atama, antu amuseheli nawa amashidika amuyandishili nakumupopela hamutondu. Hafwileñayi wabidikili nindi: “Yuma yejima yinazatikewi!” (Yowanu 19:30) Chimwahitili mafuku asatu kufuma  hafwiliyi, Yehova wamusañwili nakumwinka mujimba wakuspiritu. (1 Petulu 3:18) Chimwahitili nyilungu yantesha, Yesu wafuntili mwiwulu, “washakamini kuchikasa chaNzambi chachidiilu,” nakuhembelela kulonda amwilishi kudi Nzambi yekali Mwanta.—Aheberu 10:12, 13.

22. Kukoolekanyi kutukweti chineli Yesu watwalekelihu kwikala washinshika kudi Tata yindi?

²² Tukweti kukooleka kwakushakama haya nyaaka muparadisa hamaseki neyi chafuukwiliyi Nzambi muloña Yesu watwalekelihu kwikala washinshika kudi Tata yindi. Mukapetulu kanalondelihu, twakahanjeka kufwa kwaYesu chikwatukwashaña kulonda twakashakami haya nyaaka.