1, 2. Kudihi kutunateli kuwana kukiñewa makonu?

FWIKIJENU munakwenda hefuku dakwila kudi nvula yeneni yampepela. Iwulu diyila nibwi-i, nvula yitachika nikukenashana nikudidima. Nvula yitachika nikunooka. Mukeña nikwakwiyama. Mukutiya kuwaha neyi mwiyama mwiluña dadiwahi mwoma.

² Dichuma chitunakumona makonu. Yuma mukaayi yinakutaminaku. Munateli kudihula nenu, ‘Kudihi kunatela kuswama?’ Ñimbi yamasamu wembili nindi: ‘Nukuhosha kudi Yehova nami: Yeyi chiswamu chami nimpwembu yami, Nzambi yami inakuhwelela.’ (Masamu 91:2) Eña, Yehova watwamwinaña kuyihuñu yitunakumona, nawa watwinkaña muchima wakuchiñeja jakumbidi.

3. Tunateli kumwilisha ñahi Yehova kwikala chiswamu chetu?

³ Yehova nateli kutukiña ñahi? Nateli kutukwasha kwiluka chakwila neyi tudi nakukala, nawa wukweti ñovu nankashi kubadika muntu wejima wunakukeña kutwila chatama. Hela chakwila chuma chatama chinatumwekeni, twatela kukuhwelela netu Yehova wakawahisha yuma kumbidi. Bayibolu yatulejaña nawu: ‘Shakamenu mukukeña kwaNzambi.’ (Yuda 21) Twatela kushakama kwakwihi naYehova kulonda yatukwasheña mumpinji yalukadi. Tunateli kushakama ñahi?

4, 5. Yehova wamwekesha ñahi nindi watukeña?

⁴ Hakwila tushakami kwakwihi naYehova, twatela kwiluka chatukeñayi. Toñojokenu hayuma yejima  yatwililañayi Yehova. Watwinka iseki dadiwahi hadi nyitondu nianyama. Watwinka cheñi yakuda yayiwahi nimenji atooka itwanwaña. Kuzatisha Bayibolu, Yehova watuleja ijina dindi niyilwilu yindi yayiwahi. Nawa, wamwekesheli nindi watukeña hakutemesha Mwanindi wakeñayi Yesu, hamaseki kukoola etu. (Yowanu 3:16) Hamuloña waniwu mulambu, ichi tudi nakuchiñeja kwakuwahi kwakumona yuma yakumbidi.

⁵ Yehova waloñesha Wanta wawuMesiya, nfulumendi yamwiwulu yakamanisha yihuñu yejima. Wanta wakabalumuna iseki kwikala paradisa, mwakashakamañawu antu mukuwunda namuzañalu haya nyaaka. (Masamu 37:29) Yehova wamwekeshaña cheñi nindi watukeña kuhitila mukutuleja chakushakama chiwahi yinu mpinji. Watulejaña cheñi nindi tulombeña kudi yena, nawa wadiloñesha kutiya kukulomba kwetu. Yehova wamwekesha chikupu nindi watukeña wejima wetu.

6. Munateli kwila ñahi chineli Yehova wayikeña?

⁶ Munateli kwila ñahi chineli Yehova wayikeña? Mwekeshenu nenu mwasakililaña hayuma yejima yayililañayi. Oku kuhalwa, antu amavulu asakililaña wanyi. Dichadiñawu antu hampinji yadiñayi Yesu hamaseki. Mpinji yimu, Yesu wokili akwakalepa ikumi, ilaña wumu hohu diyi wamusakilili. (Luka 17:12-17) Twatela kwikala neyi ona iyala wamusakilili Yesu. Twatela kumusakilila Yehova mpinji yejima.

7. Tunateli kumukeñesha ñahi Yehova?

⁷ Ninetu twatela kumwekesha netu twamukeña Yehova. Yesu walejeli atumbanji twindi nindi atela kumukeña Yehova namuchima wawu wejima, wumi wejima,  namaana awu ejima. (Tañenu Matewu 22:37.) Awa mazu atalisha mudihi?

8, 9. Tukumwekesha ñahi netu twamukeña Yehova?

⁸ Komana twatela kuhosha hohu netu twamukeña Yehova? Inehi. Neyi twamukeña Yehova namuchima wetu wejima, wumi nimaana, tukumwekesha netu twamukeña muyilwilu yetu. (Matewu 7:16-20) Bayibolu yashimunaña nawu neyi twamukeña Nzambi, tukwovwahilaña nshimbi jindi. Kwovwahila kwakala? Inehi, muloña ‘nshimbi jaYehova hijakalaku.’—Tañenu 1 Yowanu 5:3.

⁹ Neyi tumwovwahila Yehova, tukwikala namuzañalu nankashi. (Isaya 48:17, 18) Hanu dinu, yumanyi yikutukwasha kushakama kwakwihi naYehova? Tutalenu.

10. Muloñadi chimukutwalekelahu kumwiluka Yehova?

¹⁰ Mwekalili ñahi ibwambu daYehova? Chimunadizeña Bayibolu, munamwiluki Yehova chikupu nawa munekali ibwambu dindi. Iwu wubwambu wudi neyi kesi kimunakukeña nenu katwalekihu nakwambuka. Chochitwasonselaña hakesi, ninenu nawa twalekenuhu kumwiluka Yehova kulonda wubwambu wenu wukoli.—Yishimu 2:1-5.

11. Nsañu yamuBayibolu yikuletesha mwilidi?

¹¹ Chimukutwalekahu kudiza Bayibolu, mukwiluka yuma yikuyishika hamuchima. Talenu chatiyiliwu atumbanji twaYesu ayedi hayilumbulwilileñayi Yesu wuprofwetu wamuBayibolu. Ahosheli nawu: “Komana nyichima yetu hiyatatashanaña chahoshañayi nanetu munjila nichadiña nakutulumbulwilayi chikupu muNsonaku?”—Luka 24:32.

12, 13. (a) Neyi tumukeña Nzambi chumanyi chikumwekana? (b) Tunateli kutwalekahu ñahi nakumukeña Yehova chikupu?

 ¹² Chochazañaleli atumbanji chatiyiliwu nsañu yamuNsona, ninenu nawa mwazañaleli chimwatachikili kwiluka nsañu yamuBayibolu. Chumichi chayikwashili kumwiluka Yehova nikumukeña. Twalekenuhu kumukeña Nzambi.—Matewu 24:12.

¹³ Chimwekala ibwambu daNzambi, mwatela kuzata nañovu kulonda wubwambu wenu wukoli. Mwatela kutwalekahu kumwiluka nikutoñojoka hayuma yimunakudiza nichimwatela kuyizatisha mukuhanda kwenu. (Yowanu 17:3) Neyi mutaña hela kudiza Bayibolu, dihulenu nenu: ‘Iyi nsañu yinakundizishadi hadi Yehova Nzambi? Muloñadi chinatela kumukeñela namuchima niwumi wami wejima?’—1 Timotewu 4:15.

14. Kulomba kwatukwashaña ñahi kumukeña Yehova?

¹⁴ Neyi mukweti ibwambu denu wamuwahi, mukuhoshaña  nindi mpinji yejima, wubwambu wenu wukukola. Munjila yoyimu, neyi tukuhanjikaña naYehova mukulomba mpinji yejima, tukusweja kumukeña. (Tañenu 1 Atesalonika 5:17.) Kulomba hichawaana chachiwahi chatwinkayi Tata yetu wamwiwulu. Twatela kuhosha nindi chakufuma hamuchima. (Masamu 62:8) Bayi tuhoshaña nsañu yoyimu yitunahembeli kumutuku, ilaña twatela kuhosha nsañu yitunakukeña. Neyi tutwaleka kudiza Bayibolu nikulomba chakufuma hamuchima, tukusweja kumukeña Yehova.

15, 16. Mudimu wakushimwina wayitiyishaña ñahi?

¹⁵ Neyi tunakukeña kushakama kwakwihi naYehova, twatela kulejaku antu yuma yitwakuhwelela. Kulejaku antu nsañu yahosha hadi Yehova hikukooka kweneni. (Luka 1:74) Nawa himudimu wayinkeliyi Yesu akwaKristu alala ejima. Wonsu wetu twatela kushimwina nsañu yayiwahi yaWanta waNzambi. Komana mwashimwinaña?—Matewu 24:14; 28:19, 20.

¹⁶ Kapostolu Pawulu wamweneña mudimu wakushimwina nindi walema nankashi; wawuteneneña nindi “iheta.” (2 Akorinda 4:7) Mudimu wakuleja antu kulonda amwiluki Yehova walema nankashi. Diyi njila yakumuzatilamu Yehova, walemesha mudimu wumwazataña. (Aheberu 6:10) Kushimwina kunateli kuyikwasha cheñi enu niantu anakuyitilila muloña mukudikwasha enu aweni niantu kuswina kudi Yehova kulonda akatambwili wumi wahaya nyaaka. (Tañenu 1 Akorinda 15:58.) Kudihu mudimu wukwawu wunateli kuyizañalesha nankashi?

17. Muloñadi chitwatela kushimwina swayi-swayi?

¹⁷ Twatela kushimwina swayi-swayi. Twatela  “kushimuna mazu,” nawa kushimuna “swayi-swayi.” (2 Timotewu 4:2) Antu atela kutiya nsañu yaWanta waNzambi. Bayibolu yahoshaña nawu: “Ifuku daYehova deneni didi kwakwihi, didi kwakwihi, didi nakunyakala nankashi!” Kukuma ‘kwakalaba wanyi!’ (Zefwaniya 1:14; Habakuki 2:3) Katataka Yehova yajilumuni kaayi katama daSatana. Henohu kanda akijilumuni, twatela kuyisoñamisha antu kulonda atachiki kumukalakela Yehova.

18. Muloñadi chitwatela kudifukwila kudi Yehova hamu nawakwaKristu alala?

¹⁸ Yehova nakukeña nindi tudifukuleña kudi yena nawakwetu akwaKristu alala. Bayibolu yahoshaña nawu: “Tudakameneña wumu namukwawu kulonda tudisañumuni wumu namukwawu kumwekesha kukeña nikukoña nyidimu yayiwahi, bayi tujiñaña kukupompa kwetu neyi chelañawu antu amakwawuku, ilaña tudikolesheña wumu namukwawu, sweje-e dinu nanochu chimunamoni nenu ifuku odu dinakuswina kwakwihi.” (Aheberu 10:24, 25) Twatela kudishaku kulonda tupompeña mpinji yejima. Kupompa kwatwinkaña mpinji yakudikolesha nikudikwasha wumu namukwawu.

19. Chumanyi chikutukwasha kukeña amanakwetu niahela akwaKristu?

¹⁹ Neyi muya nakupompa, mukuwana amabwambu amawahi akuyikwasha kudifukula kudi Yehova. Mukuwana amanakwenu niahela ashiyashana adi neyi enu, azataña nañovu kulonda adifukuleña kudi Yehova. Neyi chochimudi, niwena awanina wanyi, aluwañeshaña. Neyi analuwañeshi, nyakalenu kuyanakena. (Tañenu Akolosi 3:13.) Talenuña hayilwilu yayiwahi yawamanakwenu niahela akwaKristu, chumichi chikuyikwasha kuyikeña nikuswina kwakwihi naYehova.

20, 21. “Wumi walala” hichumanyi?

²⁰ Yehova nakukeña amabwambu jindi ejima kwikala nawumi wawuwahi. Bayibolu yashimunaña nawu wumi wetu wakumbidi wakaambuka chikupu nawumi wamakonu.

²¹ Kumbidi, twakashakamaña haya nyaaka, bayi yaaka 70 hela 80. Twakekala ‘nawumi wahaya nyaaka’ nanyijimba yakola, mukuwunda ninamuzañalu muparadisa yayiwahi. Chihandilu chamuchidiwu dichatenaña Bayibolu nawu “wumi walala.” Yehova watushiika kutwinka wumi walala, ilaña twatela kudishaku kulonda ‘tukwatishi’ kuwumi wahaya nyaaka.—1 Timotewu 6:12, 19.

22. (a) Tunateli ‘kukwatisha ñahi kuwumi walala’? (b) Muloñadi wutukubulila kwikala nawumi wahaya nyaaka nañovu jetu?

²² Tunateli ‘kukwatisha ñahi kuwumi walala’? Twatela ‘kukoña yuma yayiwahi’ ‘nikwikala aheta munyidimu yayiwahi.’ (1 Timotewu 6:18) Dikwila nawu twatela kuzatisha yuma yitwadizaña muBayibolu. Hela chochu, wumi walala hiwashindamena hañovu yetu etu aweniku. Kwila twikala nawumi wahaya nyaaka nañovu jetu nehi. Hichawaana chayinkayi Yehova antu jindi ashinshika muloña ‘waluwi lwindi lwasweja.’ (Aroma 5:15) Tata yetu wamwiwulu nakukeña kuyinka ambuñindi ashinshika ichi chawaana.

23. Muloñadi chimwatela kufuukwila chiwahi yinu mpinji?

²³ Dihulenu nenu, ‘Komana inakudifukula kudi Nzambi munjila yetejayi?’ Neyi mumona nenu mwatela kuhimpa, nyakalenu kuhimpa. Neyi tushindamena hadi Yehova nikuzata nañovu kulonda tumwovwahili, Yehova wukekala chiswamu chetu. Wakayikiña  antu jindi ashinshika mumafuku akukuminina akaayi katama kaSatana. Yehova wakatukwasha kushakama muParadisa haya nyaaka, neyi chashiikayi. Eña, munateli kwikala nawumi walala neyi mufuukula chiwahi yinu mpinji.