1. Muloñadi Nzambi chaleñeleliyi antu?

NZAMBI wukweti nkeñelu yayiwahi hadi antu. Waleñeli iyala watachi nimumbanda, Adama naEva kulonda ashakami mwitempa dadiwahi. Wakeñeli nindi avwaleña anyana, kulonda elishi iseki dejima kwikala paradisa nikuhemba tunyama.—Kutachika 1:28; 2:8, 9, 15; talenu Mazu Adi Kunsa 6.

2. (a) Tuneluki ñahi netu Nzambi wakakoña yuma yafuukulayi? (b) Bayibolu yahosha nawudi kutalisha hakushakama haya nyaaka?

² Komana mwatoñojokaña nenu twamba kashakama muparadisa? Yehova watuleja nindi: “Nafuukuli dehi nukuchikoña nawa.” (Isaya 46:9-11; 55:11) Mwamweni, wakakoña yuma yafuukulayi nawa kwosi chuma chikumukañesha. Yehova wahosha nindi waleñeli iseki kulonda hekali yuma. “Wadileñeli dibuli kwikala damukunkulwayi.” (Isaya 45:18) Wakeñaña nindi antu ashakameña heseki dejima. Antu amuchidinyi akeñañayi Nzambi nindi ashakemeña hamaseki nawa hadi yaaka yiñahi? Bayibolu yahoshaña nawu: ‘Akwakuloña [hela amwovu] akaswana ituña, akashakamamu haya nyaaka.’—Masamu 37:29; Chimwekeshu 21:3, 4.

3. Chineli antu akataña nikufwa, munateli kudihula nenudi?

³ Makonu antu anakukata nikufwa. Mumaluña amavulu antu anakuzuña nikudijaha. Ichi dichakeñeleñayi Nzambi wanyi. Hanu dinu, chumanyi chamwekeni nawa muloñadi? Bayibolu hohu diyinateli kwakula.

4, 5. (a) Hinyi wahosheli naEva kuzatisha kapela mwitempa daEdeni? (b) Muntu washinshika nateli kwikala ñahi ikombi?

⁴ Bayibolu yatuleja nawu Nzambi wukweti chilumbu “atenañawu nawu Diyabolu nawa Satana.” Satana wazatishili kapela kulonda yahoshi naEva mwitempa daEdeni. (Chimwekeshu 12:9; Kutachika 3:1) Wamwilishili kapela yamwekani neyi diyi wahosheleña.—Talenu Mazu Adi Kunsa 7.

⁵ Komana Nzambi waleñeli Satana Diyabolu? Inehi! Kañelu wadiña mwiwulu hampinji yaleñeleñayi Nzambi iseki dakushakamamu Adama naEva diyi wabalumukili kwikala Diyabolu. (Yoba 38:4, 7) Wabalumukili ñahi? Muntu washinshika nateli kwikala ñahi ikombi? Hasemukili ikombiku. Ilaña wafwilaña hela kukeña yuma yabula kwikala yindi. Wukutoñojokaña hanochu chuma nawa kufwila kwindi kwatama kwaswejaña. Kuhiñahu, neyi wudi nkawindi, wukwiya. Nadibalumuni yomweni kwikala ikombi.—Tañenu Yakoba 1:13-15; talenu Mazu Adi Kunsa 8.

6. Kañelu wekalili ñahi chilumbu chaNzambi?

⁶ Chumichi dichamwekeni kudi ona kañelu. Chelili Yehova naleñi dehi Adama naEva, wayilejeli kuvwala anyana ‘nakuwanina heseki.’ (Kutachika 1:27, 28) Ona kañelu watela watoñojokeli nindi, ‘Awa antu ejima atela kudifukulaña kudami chatela adifukuleña kudi Yehova!’ Chaswejeliyi kutoñojoka hachumichi, wafwilili yuma yambala yaYehova. Ona kañelu wakeñeli nindi antu adifukuleña kudi yena. Dichi wamudimbili Eva nawa wamuluwañesheli. (Tañenu Kutachika 3:1-5.) Cheliliyi mwenimu wabalumukili kwikala Satana Diyabolu, chilumbu chaNzambi.

7. (a) Chumanyi chaletesheli Adama naEva afwi? (b) Muloñadi chitwashinakajilaña nikufwa?

 ⁷ Adama naEva adikañili naNzambi nawa adiili nyikabu. (Kutachika 2:17; 3:6) Amuvulumwini Yehova nawa chimwahitili mpinji afwili, kwesekeja nachahosheliyi Yehova. (Kutachika 3:17-19) Anyana kaAdama naEva ekalili akwanshidi, dichi niwena afwili. (Tañenu Aroma 5:12.) Hakwila twiluki chaletesheli anyana kaAdama naEva niwena kwikala akwanshidi, tutalenu hanichi chakutalilahu. Fwikijenu munakocha mankendi hapani yafoboka. Mankendi ejima akufumaña mupani akwikala afoboka. Adama chadikañiliyi naNzambi wekalili mukwanshidi. Chineli twekala anyana kaAdama, wejima wetu twekala akwanshidi hela “twafoboka” neyi chadiñayi. Chineli wejima wetu twekala akwanshidi, twashinakajaña nikufwa.—Aroma 3:23; talenu Mazu Adi Kunsa 9.

8, 9. (a) Satana wakeñeleña nindi Adama naEva eluki yumanyi? (b) Muloñadi Yehova chabuliliyi kushikena kuyijaha akwakudikaña?

⁸ Satana watachikili kudikaña naYehova hampinji yakojejeliyi Adama naEva adikañi naNzambi. Wakeñeleña Adama naEva akuhweleli nawu Yehova watwambaña nyuuli watama wabulili kuyinka yuma yayiwahi. Satana wahosheleña nindi antu atela kwila yuma awenawu chakadi kuyileja kudi Nzambi nawa Adama naEva atela kudifuukwila yuma yayiwahi niyatama. Hanu dinu, Yehova wadi kwiladi? Wadi kuyijaha akwakudikaña kulonda kubuli kwikala akwakudikaña. Komana chumichi chadi kumwekesha nawu Satana watwambaña? Inehi, chaadi kumwekesha wanyi.

⁹ Dichi, Yehova hashikeneni kuyijaha akwakudikañaku. Ilaña, wayinkeli antu mpinji yakudiyuula aweni. Chumichi dichadikumweksha hatooka to-o nawu Satana watwambaña nawa Yehova weluka yuma yayiwahi  yakwinka antu. Twakadiza nsañu yayivulu yahosha hakudikaña muKapetulu 11. Mukuhoshahu nenudi hachuma chafuukwiliwu Adama naEva? Komana chawahili chatiyililiwu mwahosheliyi Satana nichadikañiliwu naNzambi? Yehova wayinkeli Adama naEva yuma yejima yadiñawu nayu. Wayinkeli wumi wakabulaña kufwa, iluña dadiwahi dakushakama nimudimu wazatileñawu.  Ilaña kwosi chuma chachiwahi chayinkeliyi Satanaku. Neyi mwadiñaku haniyi mpinji mwadi kwila ñahi?

10. Yumanyi yalema yitwatela kutonda wejima wetu?

¹⁰ Makonu, wejima wetu tukweti wuswa wakufuukula nawa chihandilu chetu chashindamena hayuma yitwafuukulaña. Tunateli kutondahu kumwovwahila Yehova netu diyi Nyuuli yetu kulonda tumwekeshi netu Satana watwambaña. Hela tunateli kutondahu Satana kwikala nyuuli yetu. (Masamu 73:28; tañenu Yishimu 27:11.) Antu antesha hohu mukanu kaayi diwu amwovwahilaña Nzambi. Kuhosha hohu chalala, diyi wayuulaña kaayi wanyi. Hanu dinu, neyi Nzambi diwayuulaña kaayi wanyi, hinyi wayuulaña kaayi?

11, 12. (a) Twadizilaña kwodi chelili Satana yamwinki Yesu mawanta? (b) Nsonanyi jamwekeshaña nawu Satana diyi wayuulaña kaayi?

¹¹ Yesu welukili muntu wayuulaña kaayi. Mpinji yimu, Satana “wamulejeli mawanta ejima amukaayi nikumuleja kulema kwawu.” Kuhiñahu, Satana wamushiikili Yesu nindi: “Neyi wukudibuka [hela, kufukama] heseki nakudifukula kudi ami kamu hohu, nukukwinka yuma yejimiyi.” (Matewu 4:8, 9; Luka 4:5, 6) Dihulenu nenu, ‘Neyi ana mawanta adiña aSatana wanyi, komana wadi kumwinka Yesu?’ Inehi. Nfulumendi jejima jekala jaSatana.

¹² Munateli kudihula nenu: ‘Satana nateli kwikala ñahi nyuuli wakaayi? Komana Yehova Nzambi Wañovu jejima hidiyi waleñeli yuma yejimaku?’ (Chimwekeshu 4:11) Eña diyi, ilaña Yesu wamuteneni Satana nindi “nyuuli wakanu kaayi.” (Yowanu 12:31; 14:30; 16:11) Kapostolu Pawulu wamuteneni Satana Diyabolu nindi  “nzambi wanshakaminu yamakonu.” (2 Akorinda 4:3, 4) Kapostolu Yowanu niyena wasonekeli nindi “kaayi kejima kadi mumakasa awatama.”—1 Yowanu 5:19.

13. Tunakukeñeladi kaayi kakaha?

¹³ Kanu kaayi kanakutaminaku chikupu. Mukaayi kejima mudi majita, majika kanwa, wunfwikiji nimadombu. Antu hiyanateli kufumishahu iku kukala kwejimaku hela chakwila akuzata chamuchidinyi. Ilaña Nzambi keña yajilumuni kaayi katama hanjita yindi yaAmagedoni nakuleta kaayi kakaha kaloña.—Chimwekeshu 16:14-16; talenu Mazu Adi Kunsa 10.

14. Nzambi watondanyi kwikala Mwanta waWanta Windi? Yumanyi yashimwineñahu dehi Bayibolu kutalisha hadi Yesu?

¹⁴ Yehova watonda Yesu Kristu kwikala Mwanta wanfulumendi Yindi yamwiwulu hela netu Wanta. Munahiti yaaka yayivulu kufuma hashimwini Bayibolu nawu Yesu wakekala ‘Kalamba waKuwunda’ nawa nfulumendi yindi yakakuma wanyi. (Isaya 9:6, 7) Yesu walejeli atumbanji twindi kulomba haniyi nfulumendi chahosheliyi nindi: “Wanta weyi winzi. Nkeñelu yeyi ayili hamaseki neyi chayilañawu mwiwulu.” (Matewu 6:10) MuKapetulu 8, twakadiza Wanta waNzambi chiwakafumishahu nfulumendi jawantu. (Tañenu Danyeli 2:44.) Kuhiñahu Wanta waNzambi wakelisha iseki kwikala paradisa yayiwahi.—Talenu Mazu Adi Kunsa 11.

15. “Iseki dadiha” hichumanyi?

¹⁵ Bayibolu yatushiika nawu: “Kudi mawulu amaha niiseki dadiha jitwatalilaña,” nawa “mwenimu dimu mwakekalaña kuloña.” (2 Petulu 3:13; Isaya 65:17) Mpinji yikwawu neyi Bayibolu yinakuhosha ‘heseki,’  yatenaña antu ashakama heseki. (Kutachika 11:1) Dichi, “iseki dadiha” daloña datalisha kudi antu ejima amwovwahilaña Nzambi nawa akiswilayi

16. Chawaananyi chachiwahi chakenkayi Nzambi antu mwituña dadiha nawa twatela kwiladi hakwila twakatambwili ichi chawaana?

¹⁶ Yesu washiikili nindi antu akashakamaña mukaayi kaNzambi kakaha akayinka “wumi wahaya nyaaka.” (Maku 10:30) Chumanyi chitwatela kwila hakwila twakatambwili ichi chawaana? Mwani tañenu Yowanu 3:16 ni 17:3 kulonda muwani ñakwilu. Tushinshikenu yuma yahosha Bayibolu kutalisha hachakekala chihandilu muParadisa.

17, 18. Tuneluki ñahi netu kwakekala kuwunda kwejima nawa netu twakakiñewa?

¹⁷ Kutama, njita, wubanji nimadombu jikamana. Hikwakekala antu atama akashala hesekiku. (Masamu 37:10, 11) Nzambi wakakumisha “majita mwakumina iseki dejima.” (Masamu 46:9; Isaya 2:4) Iseki dakenzala nawantu amukeña Nzambi nawa amwovwahilaña. Kwakekala kuwunda haya nyaaka.—Masamu 72:7.

¹⁸ Antu jaYehova akakiñewa. Mpinji yakunyima, aIsarela ayikiñileña neyi amwovwahila Nzambi nawa ashakamineña chiwahi. (Alevi 25:18, 19) MuParadisa, hitwakatiyaña woma chuma hela muntuku. Twakekala akiñewa mpinji yejima!—Tañenu Isaya 32:18; Mika 4:4

19. Muloñadi chitunateli kukuhwelela chikupu netu mwakekala yakuda yayivulu mwituña dadiha daNzambi?

¹⁹ Kwakekala yakuda yayivulu. “Hanu hamaseki hansa jampidi jamaneni hakavula kabaka.” (Masamu 72:16) Yehova, “Nzambi yetu, wakatukiswila nkisu” nawa ‘maseki akasoña nyikabu yawu.’—Masamu 67:6.

20. Tuneluki ñahi netu iseki dikekala paradisa?

²⁰ Iseki dejima dakekala paradisa. Antu akekala  namatala amawahi nimatempa. (Tañenu Isaya 65:21-24; Chimwekeshu 11:18.) Iseki dejima dikawaha chikupu neyi chochadiña itempa daEdeni. Yehova wakatwinka yuma yejima yitwakeñaña. Bayibolu yahosha kutalisha hadi Nzambi nawu: “Wakamununaña muchikasa cheyi, yuma yejima yikweti wumi wayiikutishaña.”—Masamu 145:16.

21. Tuneluki ñahi netu hakekala kuwunda hakachi kawantu nawatunyama?

²¹ Hakekala kuwunda hakachi kawantu nawatunyama. Atunyama hiyakakatishaña antu cheñiku. Mwana wanyanya hakatiya womaku hela chakwila wudi nawatunyama azuwa makonu.—Tañenu Isaya 11:6-9; 65:25.

22. Chumanyi chakelayi Yesu kudi antu akata?

²² Kwosi muntu wakakataña. Yesu wokili antu amavulu hampinji yadiñayi hamaseki. (Matewu 9:35; Maku 1:40-42; Yowanu 5:5-9) Chineli hiMwanta waWanta waNzambi, Yesu wakooka antu ejima. Kwosi muntu wakahosha nindi: “Ami nakata.”—Isaya 33:24; 35:5, 6.

23. Chumanyi chakelayi Nzambi kudi afu?

²³ Afu akahanda cheñi. Nzambi washiika nindi wakasañula antu amavulu afwa dehi. “Kwamba kekala kusañuka kwawantu aloña niabula kuloña.”—Tañenu Yowanu 5:28, 29; Yilwilu 24:15

24. Munakutiya ñahi hansañu yakushakama muParadisa?

²⁴ Wejima wetu twatela kufuukulahu. Tunateli kutondahu kumwiluka nikumukalakela Yehova hela kwila yuma yitunakeñi kwila. Neyi tutondahu kumukalakela Yehova, twakekala nachihandilu chachiwahi kumbidi. Chelili iyala wumu yamwili Yesu nindi yakamwanuki neyi nafwi, Yesu wamushiikili nindi: “Wakekala nanami muParadisa.” (Luka 23:43) Tudizenu nsañu jajivulu hadi Yesu Kristu nichakashikijayi yuma yashiikayi yaNzambi.