MUMUKANDA waChimwekeshu mwekala nhoshelu yakala kutiyishisha mukunyakashana. (Chimwekeshu 1:1) Chakutalilahu, mukanda weniwu watenaña mumbanda wudi nejina ‘daBabiloni Muneni’ dakusoneka hehama dindi. Iwu wamumbanda amushimuna nawu washakama ‘hamazaza nihanyuza.’ (Chimwekeshu 17:1, 5, 15) Chineli kwosi mumbanda yamweni watela kwila mwenimu, Babiloni Muneni watela kwikala wachifwikija. Hanu dinu, iwu chivumbi wachifwikija wemenañaku chumanyi?

HaChimwekeshu 17:18, mumbanda yowumu wachifwikija anamulumbululi hamu neyi “hiñanda yeneni yayulaña anyanta ankanu aheseki.” Izu dakwila nawu “ñanda” dinakumwekesha izaza dawantu adiloñesha. Chineli iyi “ñanda yeneni” yikweti  ñovu hadi “anyanta ankanu aheseki,” iwu mumbanda wudi nejina daBabiloni Muneni watela kwikala izanvu daletaña wufwinda dinatandi mukaayi kejima. Anateli kuditena nawu wanta wakaayi kejima. Wanta wamuchidinyi? Wanta wansakililu. Talaku ochu yibaba yikwawu yadifwanaku yamumukanda waChimwekeshu chiyikutwilombola kuniku kukunkulula.

Wanta wunateli kwikala wamatuña nachiyulu, wakulanda nakulandulula, hela wansakililu. Iwu mumbanda wuyatumba ijina nawu Babiloni Muneni hiwanta wamatuña nachiyuluku, muloña Izu daNzambi dahoshaña nawu “anyanta ankanu aheseki” hela mbadi jamatuña nachiyulu jakanu kaayi, ‘elili wuvumbi’ nindi. Wuvumbi windi watalishaña kukukwantankana kwindi nawanyanta aheseki nawa walumbululaña muloña waweni wamutenenañawu nawu “chivumbi muneni.”​—Chimwekeshu 17:1, 2; Yakoba 4:4.

Babiloni Muneni hanateli kwikala wanta wakulanda nakulandululaku muloña “niakwakulandulula aheseki,” anakwimenaku mbadi yakulanda nakulandulula, akamudila hampinji yakamukisañanawu. Mwamweni, ejima wawu anyanta niakwakulanda nakulandulula anayilumbululi neyi anakumutalila Babiloni Muneni “hahalehi.” (Chimwekeshu 18:3, 9, 10, 15-17) Hanu dinu, chidi chashikila kukunkulula netu Babiloni Muneni hiwanta wamatuña nachiyuluku hela wakulanda nakulandululaku, ilaña hiwanta wansakililu.

Chinjikijilu chansakililu yaBabiloni Muneni anachimwekeshi nawu chalala cheñi muniyi nsañu nawu wadimbaña nyuza yejima kuhitila ‘mukupanda kwindi.’ (Chimwekeshu 18:23) Chineli nyichidi yejima yakupanda yafuma kudi andemoni, hichidi chakuhayamaku ochu Bayibolu chiyamutenenaña Babiloni Muneni nawu ‘muwushakaminu wawandemoni.’ (Chimwekeshu 18:2; Kuhituluka 18:10-12) Iwu wanta anawulumbululi cheñi neyi wakola chikupu mukukañesha nsakililu yalala, nikuyandisha ‘atuprofwetu niakwakujila.’ (Chimwekeshu 18:24) Chalala, Babiloni Muneni wudi nankunyi yasweja hansakililu yalala chakwila tuhu wayiyandishaña chikupu nikuyijaha ‘ayinsahu jaYesu.’ (Chimwekeshu 17:6) Komana, iwu mumbanda wejina daBabiloni Muneni chakubula nikujinoka wemenañaku wanta wakaayi kejima wansakililu yakutwamba, kunabombelimu nsakililu yejima yemena hakulwisha Yehova Nzambi.