1. Tukuhetelamu ñahi neyi chakwila tudifukula kudi Nzambi munjila yayiwahi?

YEHOVA NZAMBI watwakamenaña nankashi nawa nakufwila nindi tuhetelimu muwunlomboli windi wawuwahi. Neyi tukudifukula kudi yena munjila yayiwahi, tukekala namuzañalu nawa tukatondolwela kukala kwakuvulu muwumi. Twakatambwila cheñi nkisu yindi niwukwashu windi. (Isaya 48:17) Hela chochu, kudi nsakililu yayivulu yahoshaña nawu yatañishaña walala hadi Nzambi. Ilaña, ambuka chikupu muntañishilu yawu hansañu yakwila nawu Nzambi hinyi nawa nichuma chakeñañayi kudi etu.

2. Tukutwesha ñahi kudiza njila yayiwahi yakudifukwilamu kudi Yehova, nawa chakutalilahwinyi chikutukwasha kutiyishisha?

² Munjilanyi muwukwilukila njila yayiwahi yakudifukwilamu kudi Yehova? Hiwunateli kudiza nikwesekeja ntañishilu yejima yansakililuku. Watela kudiza hohu hachuma chacheni chatañishaña Bayibolu hansañu yakudifukula kwalala. Tuhoshi netu: Mumatuña amavulu, mudi kukala kwamali akutwamba. Neyi chakwila akwinkeli mudimu wakwiluka mali akutwamba, wadi kuyiluka ñahi mali akutwamba? Kuhitila mukuswata muchidi wejima wamali akutwamba tahindi? Inehi. Chikubadika kuwaha neyi wukwiluka mali alala. Neyi wuneluki dehi chinakumwekana mali alala, wukutwesha kwiluka mali akutwamba. Munjila yoyimu, neyi tukudiza chakwiluka nsakililu yalala, tunatweshi kwiluka ninsakililu yakutwamba.

3. Kwesekeja nachahosheliyi Yesu, chumanyi chitwatela kwila neyi tunakukeña netu Nzambi yatwiteji?

 ³ Chidi chalema nankashi neyi tukudifukulaña kudi Yehova munjila yetejayi. Antu amavulu akuhwelela nawu nsakililu yejima yamuzañaleshaña Nzambi, ilaña Bayibolu hiyatañishaña mwenimuku. Hichinashikilimu kudi muntu kuhosha hohu nindi himwiniKristuku. Yesu wahosheli nindi: “Antu ejima akuntenatena nawu, Mwanta, Mwanta; hiyakawanina kwiñila muwanta wamwiwuluku, chiña muntu welaña muchima waTata yami wudi mwiwulu.” Hakwila nawu Nzambi yotwiteji, twatela kwiluka chuma chakeñañayi Nzambi kudi etu nikwilamu. Yesu wayiteneni antu abulaña kwila nkeñelu yaNzambi nindi “akoñaña yakuluwa.” (Matewu 7:21-23) Chochidi mali akutwamba, nsakililu yakutwamba hiyikweti nilumbwa lwalweniku. Chinataminiku dinu, nsakililu yamuchidiwu yafwana chikupu.

4. Indi mazu aYesu ahosha hajinjila jiyedi atalisha mudihi, nawa njila yimu nayimu yatwalaña kudihi?

⁴ Yehova wenkaña muntu wejima wahamaseki kukoleka kwakwikala nawumi wahaya nyaka. Hela chochu, hakwila nawu tuheti wumi wahaya nyaka muParadisa, twatela kudifukula kudi Nzambi chiwahi nakushakama nshakaminu yamakonu yetejayi. Chawushona, antu amavulu akanaña kwila mwenimu. Dimuloña waweni Yesu chahosheleliyi nindi: “Iñililenu kuchisu chanyanya; muloña chisu cheneni, ninjila yabwambañana yaya kukujilumuka, mweñilaña amavulu. Muloña chisu chanyanya, ninjila yanyanya yaya kuwumi, ayimonaña antesha.” (Matewu 7:13, 14) Nsakililu yalala yalombolaña kuwumi wahaya nyaka. Hakwila nsakililu yakutwamba yalombolaña kukujilumuka. Yehova hanakukeña muntu niwumu akafwiku, dimuloña wanakuyinkelayi antu kumaluña ejima kukoleka kwakudiza hadi yena. (2 Petulu 3:9) Hela chochu, njila yitwadifuukwilañamu kudi Nzambi yinakubalumuna kufwa hela wumi.

5. Munjilanyi mutukwilukila antu ekala munsakililu yalala?

⁵ Indi ‘njila yaya kuwumi’ yinatweshi kuwanika ñahi? Yesu wahosheli nindi nsakililu yalala akayilukila kunshakaminu yawantu ekalamu. Wahosheli nindi: “Mukuyilukila kunyikabu yawu. Nyitondu yayiwahi yejima yasoñaña nyikabu yayiwahi.” (Matewu 7:16, 17) Mumazu amakwawu, antu ekala munsakililu yalala akuyilukila kuyuma yetiyawu nikuyililu yawu. Hela chakwila hiyawaninaku nawa akoñaña yiluwa, akwakudifukula alala hamu neyi izaza akeñaña kwila nkeñelu yaNzambi. Tusambilenu kutala hayuma yitanu nakamu yakwilukilaku antu ekala munsakililu yalala.

6, 7. Indi antu jaNzambi ayimonaña ñahi Bayibolu, nawa Yesu wemikili ñahi chakutalilahu muniyi mbadi?

⁶ Ntañishilu yawantu jaNzambi yashindamena haBayibolu. Bayibolu yayeni yahoshaña nawu: “Nyikanda yajila yejima ayonena dehi kudi Nzambi; yawaha kuleja nachu, nikutanyisha nachu, nikwolola nachu, nikufumba nachu mwaloña; kulonda muntu [hela mumbanda] waNzambi awanini chikupu, awahili nyidimu yayiwahi yejima.” (2 Timotewu 3:16, 17) Kapostolu Pawulu wasonekeleli akwawu eniKristu nindi: “Chimwatambwili kudetu izu dansañu yaNzambi, himwaditambwili neyi nsañu yawantuku, ilaña chochidekala izu daNzambi chalala.” (1 Atesalonika 2:13) Komana yuma yetiyawu niyililu yamunsakililu yalala hiyashindamena hammwenu yawuntu hela yachisemwaku. Yashindamena Hezu daNzambi donenawu dehi, Bayibolu.

⁷ Yesu Kristu wemikili chitalilu chachiwahi hakushindamesha ntañishilu yindi Hezu daNzambi. Hakulomba kudi Tata yindi wamwiwulu, wahosheli nindi: ‘Izu deyi hinsañu yalala.’ (Yowanu 17:17) Yesu wakuhweleleli Mwizu daNzambi, niyuma yejima yatañisheleñayi yendeleleña hamu naNsona. Kakavulu, Yesu wahosheleña nindi: “Anasoneki nawu.” (Matewu 4:4, 7, 10) Cheñi Yesu wadiña nakutena nsañu yamunsona. Chochimu, antu jaNzambi lelu dinu hiyatañishaña nsañu yawu aweniku. Akuhwelela nawu Bayibolu Hiizu daNzambi, nawa ashindamesha ntañishilu yawu chikupu hayuma yahoshaña Bayibolu.

8. Chumanyi chinabombelimu mukudifukula kudi Yehova?

 ⁸ Antu ekala munsakililu yalala adifukulaña kudi Yehova hohu nawa atiyakeshaña ijina dindi. Yesu wahosheli nindi: “Kadifukulaña kudi Yehova Nzambi yeyi, wakakalakelaña yena hohu kanka windi.” (Matewu 4:10) Dikwila nawu, antu jaNzambi adifukulaña kudi Yehova hohu. Iku kudifukula kunabombelimu kuleja antu eluki ijina daNzambi walala hinyi nawa ninochekalayi. Masamu 83:18 yahoshaña nawu: “Kulonda akeluki nawu yeyi hohu, yeyi wukweti ijina deyi daYEHOVA, yeyi Mukwakubadika Kwiwulu deseki dejima.” Yesu wemikili chitalilu chakukwasha antu amakwawu kulonda amwiluki Nzambi, neyi chahosheliyi mukulomba nindi: “Namwekeshi ijina deyi kudi antu wanyinkeli mukachi kawakwampata yamunu mwishina.” (Yowanu 17:6) Munjila yoyimu, akwakudifukula alala makonu atañishaña antu hejina daNzambi, nihankeñelu yindi niyililu yindi.

9, 10. Munjilanyi mwamwekeshelañawu eniKristu alala kukeña kudi wumu namukwawu?

⁹ Antu jaNzambi amwekeshaña kukeña kwalala, kwakadi ichima kudi wumu namukwawu. Yesu wahosheli nindi: “Neyi mukukeñañana, dihu hakayilukilawu antu ejima nawu mudi atumbanji twami.” (Yowanu 13:35) EniKristu atachi adiña nakukeña kwamuchidiwu kudi wumu namukwawu. Kukeña kwawuNzambi kwafuñununaña chambu chanyichidi, munshakaminu, nimukoleku wahakachi kanyuza nakuyileta hamu nakukwantankesha hamu neyi anyana evumu dimu. (Tañenu Akolose 3:14.) Antu amunsakililu yakutwamba hiyakweti kukeña kwamuchidiwu kudi neyi kwanyana yevumu dimuku. Tuneluki ñahi ichi? Adijahaña mulwawu hamuloña wakushiyashana kwanyuza hela yisemwa. EniKristu alala hiyanyamunaña yitwa kulonda ajahi nachu ana kwawu eniKristu hela muntu wacheñiku. Bayibolu yahoshaña nawu: ‘Kweniku dikwamwekenaña anyana kaNzambi nianyana kaDiyabolu; muntu wabulaña kwila yaloña, hela wabulaña kukeña mana kwindi, hiwakudi Nzambiku. . . . Tukeñañani. Tubuli kwikala neyi Kena wadiñi wanowu watama, wajahili mana kwindi.’​—1 Yowanu 3:10-12; 4:20, 21.

 ¹⁰ Eña, kukeña kwalala kwabombelamu yuma yayivulu bayi neyi kujaha antu hohuku. EniKristu alala mukudikeñela azatishaña mpinji yawu, ñovu, niyuma yawu nakukwasha nikudikolesha wumu namukwawu. (Aheberu 10:24, 25) Adikwashaña wumu namukwawu mumpinji yamakabi, nawa ahembaña akwawu nakashinshi. Cheñi nawa, azatishaña kufumba kwamuBayibolu ‘kwakwilila antu ejima chachiwahi’ munshakaminu yawu.​—Aŋalija 6:10.

11. Muloñadi chichalemena kumwiteja Yesu Kristu neyi diyi njila yazatishayi Nzambi kulonda kutwipulwisha?

¹¹ EniKristu alala amwiteja Yesu Kristu neyi diyi muntu wazatishayi Nzambi kulonda kutwipulwisha. Bayibolu yahoshaña nawu: “Hikwekala kuhanda mudi wacheñuku, muloña munu mwishina mukachi kawantu hiyanenkumu ijina dacheñi dakuhanda nachuku.” (Yililu 4:12) Neyi chitwamweni muKapetulu 5, Yesu waheni wumi windi neyi ifutu danyiloña hanyijimba yawantu ovwahila. (Matewu 20:28) Kubombelahu, Yesu amutonda kudi Nzambi kwikala Mwanta muWanta wamwiwulu owu wamba kayula kaayi kejima. Nzambi nakukeña nindi tumwovwahili Yesu nakuzatisha ntañishilu yindi neyi tunakukeña wumi wahaya nyaka. Dimuloña waweni Bayibolu chiyahoshelaña nawu: “Muntu wukukuhwelela Mwana, wukweti wumi wahaya nyaka; hakwila muntu wabulaña kwovwahila Mwana hakamona wumuku.”​—Yowanu 3:36.

12. Indi kubula kwikala ampata yamunu mwishina kwabombelañamu chumanyi?

¹² Akwakudifukula alala hiyampata yamunu mwishinaku. Chelili hiyakumusompesha kumesu anyuli waweniRoma, Pilatu, Yesu wahosheli nindi: “Wanta wami hiwampata yamunu mwishinaku.” (Yowanu 18:36) Hichidi namuloña netuña dashakamañawuku, atumbanji twaYesu alala hiyantu ayulañawu kudi Wanta windi wamwiwulu, nawa dikwila nawu hiyadibombaña munsañu jamatuña nachiyuluku. Hiyadibombaña munjita jamukaayiku. Hela chochu, akwakudifukula aYehova hiyakañeshaña akwawu kwila yuma yinatondiwu kwila yidi neyi yakudiñija muchipompelu chanfulumendi, kwikala nachifulu mujamatuña nachiyulu hela munsañu jakutondaku. Hela chakwila akwakudifukula alala aNzambi ekala hakachi nakachi munsañu jamatuña nachiyulu, wena dinu ovwahilaña nshimbi. Muloñadi? Muloña Izu daNzambi dayikonkomwenaña nawu   ‘ovwahileña anyanta’ janfulumendi. (Aroma 13:1) Neyi kunediki yikonkojola hakachi kayuma yakeñañayi Nzambi nansañu yinakukeña akamatuña nachiyulu, akwakudifukula alala alondelaña chakutalilahu chawapostolu, ahosheli nawu: “Chiña twovwahila Nzambi, bayi antuku.”​—Yililu 5:29; Maku 12:17.

13. Indi atumbanji twaYesu alala awumonaña ñahi Wanta waNzambi, nawa chumanyi chinakwilawu?

¹³ Atumbanji twaYesu alala ashimwinaña nawu Wanta waNzambi dikuchiñeja hohu kwamuchidi wamuntu. Yesu washimwinañahu dehi nindi: “Ninsañu iyi yawanta yayiwahi akayishimwañena  mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.” (Matewu 24:14) Chatela kukonkomwena antu kushindamena hadi anyuli awantu kulonda ayimanishili kukala kwawu, atumbanji twaYesu Kristu ashimwinaña haWanta waNzambi wamwiwulu neyi dikuchiñeja hohu kwamuchidi wamuntu. (Masamu 146:3) Yesu watudizishili kulombela haniyi nfulumendi yaloña hakuhosha nindi: “Wanta weyi winzi. Muchima weyi awili hamaseki neyi chawilañawu mwiwulu.” (Matewu 6:10) Izu daNzambi dashimwinañahu dehi nawu iwu Wanta wamwiwulu ‘wakahumona mawantawa [anakuyula chakatataka] ejima puchi puchi, nakuyinoñesha, wakemana mbe haya nyaka.’​—Danyeli 2:44.

14. Izanvwinyi dansakililu diwunakuhweleli neyi dinakushikija yuma yinakukeñeka yakudifukula kwalala?

¹⁴ Kwesekeja nayuma yitunahoshihu, dihuli eyaweni neyi, ‘Izanvwinyi dansakililu dikweti ntañishilu yachi yashindamena haBayibolu nawa datiyakeshaña ijina daYehova? Izanvwinyi damwekeshaña kukeña kwawuNzambi nikukuhwelela mudi Yesu nawu, hidampata yamunu mwishinaku, nawa dashimwinaña nawu Wanta waNzambi dikuchiñeja kwalala kwamuchidi wamuntu? Hakachi kansakililu yejima yidi hamaseki, nsakililu yimu yidihi yinakushikija yuma yejimiyi?’ Yikuma yinakumwekesha hatooka to-o nawu Ayinsahu jaYehova diwu​.—Tañenu Isaya 43:10-12.

15. Chumanyi chakeñañayi Nzambi kubombela hakukuhwelela kwakwila nawu wekala kwoku?

¹⁵ Kukuhwelela mudi Nzambi hohu hichinashikili hakumuzañaleshaku. Eña, Bayibolu yahoshaña nawu niandemoni eluka nawu Nzambi wekala kwoku. (Yakoba 2:19) Chakadi nikujinoka, hiyakoñaña nkeñelu yaNzambiku nawa hiyayiteja kudi yenaku. Hakwila nawu atwiteji kudi Nzambi, bayi tukumina dakukuhwelela netu Nzambi wekala kwokuku, chiña twilaña ninkeñelu yindi. Cheñi nawa twatela kwambukaku kunsakililu yakutwamba nakwitiya munsakililu yalala.

16. Chumanyi chitwatela kwila kutalisha kukwikalamu nambadi munsakililu yakutwamba?

 ¹⁶ Kapostolu Pawulu wachimwekesheli nindi bayi twikalamu nambadi mukudifukula kwakutwambaku. Wasonekeli nindi: “Dichi dinu Yehova nahoshi nindi, Fumenu mukachi kawu, ambukenumu, bayi mukunka kuchuma chatamaku, ninami nukuyitambula.” (2 Akorinda 6:17; Isaya 52:11) EniKristu wena kwawu atondolwelaña chuma chejima chendelaña hamu nakudifukula kwakutwamba.

17, 18. “Babiloni Muneni” hichumanyi, nawa muloñadi chichinekalili chakunyakala ‘kufuma muñandoyu’?

¹⁷ Bayibolu yamwekeshaña nawu nyichidi yejima yansakililu yakutwamba yekala kukabadi ‘kaBabiloni Muneni.’ * (Chimwekeshu 17:5) Ijina denidi datwanukishaña musumba wakushankulu waBabiloni, mwatachikilili nsakililu yakutwamba hanyima yaDibaji damumafuku aNowa. Ntañishilu yayivulu niyililu yinavuli munsakililu yakutwamba yafumini dehi kunyaka kwakweni muBabiloni. Chakutalilahu, eniBabiloni adifukwileña kudi anzambi asatu. Makonu, ntañishilu yayeni yansakililu yayivulu yidi hadi Anzambi asatu. Ilaña Bayibolu yatañishaña hatooka to-o nawu kwekala Nzambi walala wumu hohu, Yehova, nawa Yesu Kristu hiMwanindi. (Yowanu 17:3) Cheñi nawa eniBabiloni akuhweleleli nawu antu akweti wumi wakafwaña wahandaña hanyima yakwila neyi mujimba wunafwi nawa watela kuyanda kwiluña dakukabishilaku. Makonu, kwitiya nawu wumi hiwafwañaku hela spiritu nawu yayandaña mukesi kahelu anakuyitañisha kunsakililu yayivulu nankashi.

¹⁸ Chineli kudifukula kwaweni Babiloni akunyima kwatandili iseki dejima, Babiloni Muneni wamakonu watela kwilukewa chikupu neyi wanta wakaayi wansakililu yakutwamba. Nzambi nashimwinuhu dehi nindi iwu wanta wansakililu yakutwamba wukafumishewahu chakukashimwisha. (Chimwekeshu 18:8) Wunamoni muloña waweni chichinekalili chalema kudambulaku eyaweni kuyuma yinakundami kuBabiloni Muneni? Yehova Nzambi nakukeña eyi ‘wufumi muñandoyu’ swayi-swayi henohu mpinji kanda yishiki.​—Tañenu Chimwekeshu 18:4.

19. Yumanyi yiwukuhetilamu kuhitila mukumukalakela Yehova?

 ¹⁹ Chikufumamu mukufuukula kweyi kwakuleka kwikala munsakililu yakutwamba, antu amakwawu atela kuleka kuhanjeka neyi. Hela chochu, kuhitila mukuzatila Yehova hamu nawantu jindi, wakaheta yuma yayivulu kubadika yiwukujimbesha. Kufwana atumbanji twaYesu atachi ashiyiili yuma yikwawu nakumulondela Yesu, wakekala nawana kweyi niaheleyi akuspiritu amavulu. Wakekala hakachi kachisaka cheneni chamukaayi kejima chayihita yaweniKristu alala, owu akukumwekeshela kukeña kwalala. Nawa wukwikala nachikuhwelelu cheneni chawumi wahaya nyaka ‘mwituña dinakwinza.’ (Tañenu Maku 10:28-30.) Mukuhita kwampinji hekwawu ana akutemwokeleña hamuloña wakwitiya kweyi akashinshika hayuma yatañishaña Bayibolu nakwikala akwakudifukula aYehova.

20. Indi ana adi munsakililu yalala akweti mbidi yamuchidinyi?

²⁰ Bayibolu yatañishaña nawu Nzambi keña yojilumuni yinu mpata yamakonu yatama nakuhiñishahu nshakaminu yetuña dadiha dadiwahi dikayulewaña naWanta windi. (2 Petulu 3:9, 13) Okuwaha ituña odu chidakekala! Nawa mudina ituña dadiha dadiwahi, mwakekala nsakililu yimu hohu, nimuchidi wumu walala wakudifukula. Komana hichatela kwikala chamaana kuwudeyi kusakulahu njila yayiwahi yakudikunda nawakwakudifukula alala chakatatakaku?