1. Muloñadi mukulumpi wamuchota chanyiloña wakuEtiyopiya chalombeleliyi chipapatishu?

‘TALA menji; chumanyi chikunlekesha kumpapatisha?’ Ilu lwihu alwihwili kudi mukulumpi wamuchota chanyiloña mwiniEtiyopiya muyaaka nkulakaji yakusambila. MwiniKristu wejina daFwilipu wamulejeli chikupu nindi Yesu wadiña diyi  Mesiya wakaniniwu. Iwu iyala kaEtiyopiya chatiyiliyi kuwaha nayuma yadiziliyi kufuma muNsona, welili kwesekeja nayuma yadiziliyi. Wahosheli nindi wakeñeleña kupapatishewa!​—Yililu 8:26-36.

2. Muloñadi chiwatela kutoñojokelahu chikupu hansañu yachipapatishu?

² Neyi wunadizi nakanañachima tupetulu twakusambila twawunu mukanda nawumu wawaYinsahu jaYehova, wunateli kudiloñesha nakwihula neyi, ‘Chumanyi chinakunkañesha kubula kupapatishewa?’ Chayinu mpinji wunadizi chikaninu chamuBayibolu chawumi wahaya nyaka muParadisa. (Luka 23:43; Chimwekeshu 21:3, 4) Wunadizi cheñi walala kutalisha chekalawu afu nikuchiñeja kwakusañuka. (Mukwakutaŋisha 9:5; Yowanu 5:28, 29) Hekwawu wapompaña nawaYinsahu jaYehova hakupompa kwawu nawa wunadimweni eyaweni chekalawu munsakililu yalala. (Yowanu 13:35) Chinasweji kulema, hadaha wunatachiki dehi kumwekesha wulunda weyi naYehova Nzambi.

3. (a) Lushimbinyi lwaheniyi Yesu kudi atumbanji twindi? (b) Indi chipapatishu chamumenji achilaña ñahi?

³ Wunatweshi kumwekesha ñahi neyi wunakukeña kumukalakela Nzambi? Yesu wayilejeli atumbanji twindi nindi: ‘Yenu mwakelishi atumbanji munyuza yejima, mwakayipapatishi.’ (Matewu 28:19) Yesu yomweni wemikili chakutalilahu kuhitila mukupapatishewa mumenji. Hiyamusansili menjiku, nawa hiyamuhuñunwini menji hamutu windiku. (Matewu 3:16) Izu dakwila nawu “kupapatisha” dafuma kwizu dachiGriki dalumbuluka nawu “kujimika.” Dichi chipapatishu chawiniKristu chalumbuluka kujimika chikupu, hela kutupika mumenji.

4. Chipapatishu chamumenji chamwekeshaña chumanyi?

⁴ Chipapatishu chamumenji hichuma chinakukeñeka kudi antu ejima anakukeña kwikala nawulunda naYehova Nzambi. Chipapatishu chahatooka chamwekeshaña mpwila yeyi yakumukalakela Nzambi. Chikumwekesha nawu wunakeñi kwila nkeñelu yaYehova. (Masamu 40:7, 8) Hela chochu, hakwila nawu wushikihu hakupapatishewa, watela kwiluka jinjila jikwawu.

5. (a) Indi njilanyi yatachi yiwatela kwila hakwila nawu wushikilimu kupapatishewa? (b) Muloñadi kupompa kwawiniKristu chikwalemena?

⁵ Watachika dehi kwila njila yatachi. Munjilanyi? Kuhitila mukudiza kwiluka kwaYehova Nzambi niYesu Kristu, hekwawu kuhitila munjila yakudiza chikupu Bayibolu. (Tañenu Yowanu 17:3.) Ilaña kuchidi yuma yayivulu yakudiza. EniKristu akeñaña ‘kusweja kwiluka nkeñelu yaNzambi.’ (Akolose 1:9.) Kuwanika kuchipompelu kukupompa kwawaYinsahu jaYehova chikukwasha nankashi muniyi mbadi. Chekala chalema kuwanika kukupompa kwamuchidiwu. (Aheberu 10:24, 25) Kuwanikewaña kukupompa mpinji yejima chikukwasha kumwiluka Nzambi chikupu.

6. Kwiluka kwamuchidinyi kwamuBayibolu kuwatela kwiluka mwaka wushikilimu kupapatishewa?

⁶ Ilaña, hichinayi mukwila nawu watela wiluki yuma yejima yidi muBayibolu mwaka dinu wushikilimu kupapatishewaku. Mukulumpi wamuchota chanyiloña wakuEtiyopiya wadiña nakwiluka kwanti kwamunsona, ilaña wadiña nakukeña wukwashu kulonda atiyishishi yibalu yikwawu yamuNsona. (Yililu 8:30, 31) Chochimu, wukweti yuma yayivulu yakudiza. Nawa, hiwamba kakumisha kudiza hadi Nzambiku. (Mukwakutaŋisha 3:11) Hela chochu, henohu kanda akupapatishi watela kwiluka nikwiteja yuma yalema yatañishaña Bayibolu. (Aheberu 5:12) Chakutalilahu watela kwiluka nikwiteja walala hansañu yekalilamu afu nikulema kwejina daNzambi niWanta windi.

7. Indi kudiza kwaBayibolu kwatela kukuletela chumanyi?

⁷ Kwiluka hohu hikunashikiliku, muloña “chakadi kukuhwelela hichinatweshi kumutiyisha [Nzambi] kuwahaku.” (Aheberu 11:6) Bayibolu yatulejaña nawu chelili antu amakwawu amumusumba wawukulu waKorinda atiyi mazu adiñawu nakushimwinawu eniKristu, “etiya nikwitiya, hiyakuyipapatisha.” (Yililu 18:8) Munjila yoyimu, kudiza Bayibolu kwatela kukwinzesha nachikuhwelelu neyi  Hiizu daNzambi donenawu dehi. Kudiza Bayibolu kwatela kukukwasha kwikala nachikuhwelelu muyikaninu yaNzambi nimuñovu yakuhandisha yamulambu waYesu.​—Yoshuwa 23:14; Yililu 4:12; 2 Timotewu 3:16, 17.

8. Chumanyi chikukuletesha eyi kushimwina yuma yiwunadizi kudi antu acheñi?

⁸ Hampinji yinakupama chikuhwelelu mumuchima weyi, wukuchiwana neyi hichuma chakala neyi wukubula kulejaku amakwawu yuma yiwunadizi. (Yeremiya 20:9) Wukukoleshewa chikupu hakulejaku antu acheñi hadi Nzambi nihankeñelu yindi.​—Tañenu 2 Akorinda 4:13.

9, 10. (a) Wunatweshi kutachika kushimwina chalala chamuBayibolu kudanyi? (b) Chumanyi chiwatela kwila neyi wunakukeña kudibomba mumudimu waloñeshewa wakushimwina wawaYinsahu jaYehova?

⁹ Wunateli kutachika kushimwina chalala chamuBayibolu munjila yamaana kudi antu acheñi kutachikila kudi antaña jeyi, amabwambu jeyi, antuñi neyi, niantu yiwazataña nawu hamu. Mukuhita kwampinji, wakakeña kudibomba mumudimu waloñeshewa wakushimwina wawaYinsahu jaYehova. Hanoyu mpinji, ikalaku wakasunuka hakuhosha nsañu iyi naChinsahu wakudizishaña Bayibolu. Neyi chinamwekani nawu wunashikilimu kushimwina hatooka, akuloñesha kulonda eyi nintañishi yeyi mudiwani nawamaeluda ayedi amuchipompelu.

¹⁰ Ichi chikukwasha kulonda wudiluki nawaeluda awiniKristu, abiñaña nyikoku yaNzambi. (Yililu 20:28; 1 Petulu 5:2, 3) Neyi awa amaeluda akumona nawu wunatiyishishi nikwitiya ntañishilu yalema yamuBayibolu, nawa wunakushakama kwesekeja nanshimbi yaNzambi, cheñi nawu wunakukeña chikupu kwikala wumu wawaYinsahu jaYehova, akukuleja nawu wunashikilimu kushimwina mumudimu wahatooka neyi mukwakushimwina wansañu yayiwahi wabula kupapatishewa.

11. Antu amakwawu atela kuhimpa yililu yamuchidinyi henohu kanda ashikilimu kushimwina hatooka?

¹¹ Munjila yikwawu, wunakukeñeka kuhimpa nshakaminu  yeyi niyaaku hakwila nawu wushikilimu kushimwina mumudimu wahatooka. Ichi chatela kubombelamu kuleka kwila yuma yikwawu yiwaswekaña kudi antu acheñi. Dichi, henohu kanda wihuli jakwikala mukwakushimwina wabula kupapatishewa, watela kuleka nshidi yeneni yidi neyi, wuvumbi, kusheta nikuzatisha yitumbu chatama.—Tañenu 1 Akorinda 6:9, 10; Aŋalija 5:19-21.

12. Muloñadi kubalumuka mumuchima chikunekalili kwalema?

¹² Jinjila jikwawu jatela kujila henohu kanda wushikili hakupapatishewa. Kapostolu Petulu wahosheli nindi: “Balumukenu munyichima yenu, mufunti kulonda akajimañeshi nyiloña yenu.” (Yililu 3:19) Kubalumuka mumuchima hikudishona nankashi hachuma chatama chiwuneli. Kubalumuka mumuchima kunashikili chikupu neyi muntu wahandaña chihandilu chakubula kujila, nawa cheñi kunashikili nikudi muntu hela chakwila wadiña nayililu yayiwahi. Muloñadi? Muloña antu ejima hiyakwanshidi nawa anakukeña Nzambi yoyanakeni. (Aroma 3:23; 5:12) Henohu kanda wutachiki kudiza Bayibolu, hiwelukili chadiña nkeñelu yaNzambiku. Dichi wadi kushakama ñahi kwesekeja nankeñelu yindi? Dichi dinu, kubalumuka mumuchima kwalema.

13. Indi kufutumuka hichumanyi?

¹³ Kufutumuka hela ‘kufunta’ kwenzaña hanyima yakubalumuka mumuchima. Watela kwila jajivulu kubadika kudishona hohu. Watela kuleka nshakaminu yeyi yanyaka nakufuukulahu chikupu kutwalekahu nakwila yuma yaloña kutachika tuhu dalelu. Kubalumuka mumuchima nakufutumuka hijinjila jiwatela kwila henohu kanda akupapatishi.

14. Njilanyi yalema yiwatela kulondela henohu kanda akupapatishi?

¹⁴ Kudi cheñi njila yikwawu yalema yawatela kulondela henohu kanda akupapatishi. Watela kudihana eyaweni kudi Yehova Nzambi.

15, 16. Kudihana eyaweni kudi Nzambi chalumbulukadi, nawa chumanyi chaleteshaña muntu kwila mwenimu?

 ¹⁵ Chiwadihana eyaweni kudi Yehova Nzambi mukulomba nanyikoyi, dikwila nawu wunamukani neyi wukumwakamaña chikupu haya nyaka. (Kuhituluka 6:15) Muloñadi dinu muntu chikukeñelayi kwikala ñamba yaNzambi? Hakwakula ilu lwihu, tusambilenu kushinshika hanichi chakutalilahu, twili netu, iyala natachiki dehi kukeña mumbanda wunakufwilayi kusumbula. Neyi iyala wukusweja kwiluka yuma yayivulu hadi ona wamumbanda nakumona nindi wukweti yililu yayiwahi, dihakuswejeshayi dinu kumukeña nankashi. Kutwala muna, chikuwaha kudi iyala kulejamu ona wamumbanda nindi nakukeña kumusumbula. Chalala, kusumbula kunakulumbulula nawu wunakuwejelahu nyidimu yikwawu. Ilaña kukeña kukumwilisha iyala kwila yina njila yalema.

¹⁶ Neyi wunamwiluki dehi nikumukeña Yehova, wukumukalakela chakubula chuma chakukañesha hela kwikala namwakukumina hakudifukula kudi yena. Muntu wejima wukukeña kumulonda Mwana kaNzambi, Yesu Kristu, watela ‘kudibonda.’ (Maku 8:34) Twadibondaña etwaweni kuhitila mukwiluka chikupu netu yuma yitwafwilaña niyikonkwanyi yetu hiyinakutukañesha kumwovwahila Nzambi chikupuku. Henohu kanda akupapatishi, kwila mwaya nkeñelu yaYehova Nzambi chatela kwikala chuma cheneni muwumi weyi.​—Tañenu 1 Petulu 4:2.

17. Muloñadi antu amakwawu chabulilañawu kudihana kudi Nzambi?

¹⁷ Antu amakwawu ajinokaña kudihana kudi Yehova muloña wakuchina kulondela yeniyi njila yalema. Atela atiyaña woma nawu akayisompesha kudi Nzambi hakwikala eniKristu adihana. Atoñojokaña nawu chachiwahi kubula kudihana kudi yena kuchina akenda kakañanya nakumusawisha Yehova.

18. Chumanyi chikukuletesha wudihani kudi Yehova?

¹⁸ Chiwunakudiza kumukeña Yehova, chikuletesha kudihana kudi yena nawa kwesekeja nakudihana kweyi. (Mukwakutaŋisha 5:4) Hanyima yakudihana, chalala  wukukeña ‘kwenda nakumutelela Yehova, nakumutiyisha kuwaha kwakweni.’ (Akolose 1:10) Hamuloña wakukeña kuwamukeña Nzambi, hiwukutoñojoka neyi nkeñelu yindi hiyakala kwilaku. Chakubula nikujina wukwiteja mwahosheli kapostolu Yowanu wasonekeli nindi: “Kumukeña Nzambi yowu kwila mwatulejañayi; mwatulejañayi himwakalaku.”​—1 Yowanu 5:3.

19. Muloñadi chiwukubulila kutiya woma wakudihana kudi Nzambi?

¹⁹ Hiwatela kwikala waloña mwaka dinu wudihani kudi Nzambiku. Yehova weluka hakumina ñovu jeyi nawa hanakukeña nindi wili yuma yiwukubula kutwesha kwilaku. (Masamu 103:14) Nakukeña nindi eyi wutweshi nawa wukukukwashaku.  (Tañenu Isaya 41:10.) Watela kwiluka chikupu neyi, neyi wumukuhwelela Yehova namuchima weyi wejima “niyena wakakwolwelaña njila jeyi.”​—Yishimu 3:5, 6.

20. Muloñadi kudihana kudi Yehova chikukubulila kwikala nsañu yakujinda?

²⁰ Kutoñojoka hayuma yitunahanjekihu yinateli kukukwasha kulonda wudihani halweyi kudi Yehova mukulomba. Muntu wejima wamukeña Nzambi chikupu watela cheñi ‘kwiteja  [hatooka] nakumona kuhanda.’ (Aroma 10:10) Wunateli kwiteja ñahi hatooka?

21, 22. Munjilanyi muwukumwekeshela ‘kwiteja kwahatooka’ kwachikuhwelelu cheyi?

²¹ Lejaku nkoñi wakutwaminina wahachipompelu chenu kulonda yeluki nindi wunakukeña kupapatishewa. Yena wukuleja aeluda amakwawu kulonda ahitulukimu naneyi mumalwihu amavulu ahosha hantañishilu yalema yamuBayibolu. Neyi awa amaeluda akwiteja nawu wunashikilumu, akukuleja nawu wukapapatishewa hampinji yinakwinzahu. * Mpanji yakuhitulukamu chalumbuluka chipapatishu ayihoshaña kakavulu hampinji yamuchidiwu. Nhoshi wehulaña ejima anakupapatishewa kwakula malwihu ayedi apela neyi hinjila yimu yakumwekeshelamu kuhosha ‘kwakwiteja hatooka’ kwachikuhwelelu chawu.

²² Chipapatishu hohu dichikukumwekesha hatooka nawu wunekali dehi muntu wunadihani kudi Nzambi nawa wunekali dehi wumu wawaYinsahu jaYehova. Antu anakupapatishawu ayijimikaña chikupu mumenji kulonda kumwekesha hatooka to-o nawu anadihani kudi Yehova.

23. Kupapatishewa ‘mwijina daTata, nidaMwana, nidaspiritu yajila’ chalumbulukadi?

²³ Yesu wahosheli nindi atumbanji twindi akayipapatisha ‘mwijina daTata, nidaMwana, nidaspiritu yajila.’ (Matewu 28:19) Ichi chinayi mukwila nawu muntu wunakupapatishewa neluki wuswa waYehova Nzambi niwaYesu Kristu. (Masamu 83:18; Matewu 28:18) Watela kwiluka cheñi chalumbuluka mudimu waspiritu yajila yaNzambi, hela ñovu yazatikaña.—​Aŋalija 5:22, 23; 2 Petulu 1:21.

24, 25. (a) Indi chipapatishu chemenañaku chumanyi? (b) Lwihwinyi lunakukeñeka kwakula?

²⁴ Hela chochu, chipapatishu hichatela kwikala nawu chakala  kujimika hohu mumenjiku. Hichinjikijilu chachuma chimu chasweja kulema nankashi. Kujimina kwishina damenji hichinjikijilu chalumbulula nawu wunafwi kuyililu yeyi yanyaka yamuchihandilu cheyi. Kukufumpula mumenji chinakumwekesha nawu ichi wunasañuki dehi kulonda wili nkeñelu yaNzambi. Anukaku neyi, wunadihani kudi Yehova Nzambi yomwenindi, bayi kumudimu, kudi antu acheñi, hela kumazanvu adi ejimaku. Kudihana kweyi nichipapatishu hintachikilu yawubwambu weyi naNzambi—wulunda waweni naNzambi.—​Masamu 25:14.

²⁵ Chipapatishu hichahanaña wamwinuku. Kapostolu Pawulu wasonekeli nindi: ‘Kalakalenu mumwekeshi wamwinu wenwenu aweni nawoma nakuzaala.’ (Afwilipi 2:12) Chipapatishu hintachikilu hohu. Lwihu ludi lwakwila nawu, Wunatweshi kushakama ñahi mukukeña kwaNzambi? Kapetulu ketu kakukumishaku kakwakula.