1. Chumanyi chafuukulayi Nzambi kwiseki?

KUFUUKULA kwaNzambi kwiseki kwakuwahi nankashi. Yehova nakukeña iseki dikenzali nawantu amuzañalu nawa akola kumujimba. Bayibolu yahoshaña nawu “Nzambi watumbili itempa . . . muEdeni” nawa “wabalwishili . . . nyitondu yejima yikweti lubanji kuyitala, yayiwahi nikuyidya.” Kufumahu Nzambi waleñeli iyala watachi nimumbanda watachi, Adama niEvu, Wayishili mudina itempa dadiwahi nakuyila nindi: “Semununenu, muvuleña, muwanini heseki, mudovwahishi.” (Kutachika 1:28; 2:8, 9, 15) Komana kwadiña kufuukula kwaNzambi kwakwila nawu antu avwali anyana nakutohesha ñinza yetempa daparadisa heseki dejima, nikuhemba atunyama.

2. (a) Tuneluki ñahi netu kufuukula kwaNzambi kwiseki kukashikijewa? (b) Indi Bayibolu yahoshañahu nawudi kutalisha kunshakaminu yawantu haya nyaka?

² Wunatoñojoki neyi kufuukula kwaYehova Nzambi hadi antu kwakwila nawu akashakama muparadisa hamaseki kwakashikijewa? Nzambi hakwila nindi, “Eña, nahoshi dehi, nukuchikoña nawa.” (Isaya 46:9-11; 55:11) Eña, chuma chafuukulayi Nzambi chalala wukachikoña! Wahosheli nindi “wadileñeli [iseki] dibuli kwikala damukunkulwayi” ilaña “wadiwumbili mushakami antu.” (Isaya 45:18) Antu amuchidinyi akeñeliyi Nzambi nindi ashakameña hamaseki? Nawa wakeñeli nindi ashakami kushika kumpinjinyi?  Bayibolu yakulaña nawu: ‘Akwakuloña akaswana ituña, akashakamamu haya nyaka.’​—Masamu 37:29; Chimwekeshu 21:3, 4.

3. Yumanyi yatama yinakumwekana makonu hamaseki, nawa ichi chinaleteshi kwihula malwihwinyi?

³ Mwamweni, ichi kanda chimwekani. Makonu antu anakukata nikufwa; anakuzuña nikudijaha wumu namukwawu. Chuma chimu chatamini. Hela chochu, Nzambi hakeñeli nindi iseki dikali neyi chididi makonuku! Chumanyi chamwekeni? Muloñadi kufuukula kwaNzambi chikunabuli kushikijewa? Kwosi mukanda wansañu yanyaka wakusoneka kudi muntu wunateli kutuleja, muloña kukala kweniku kwatachikilili mwiwulu.

4, 5. (a) Hinyi komana wahosheli naEvu kuhitila mudi kapela? (b) Indi muntu wadiña nayililu yayiwahi nawa wakashinshi natweshi kwikala ñahi ikombi?

⁴ Mukanda watachi wamuBayibolu washimuna hadi mukwakudimbulula Nzambi wadimwekesheli mwitempa daEdeni. Amulumbulula neyi ‘hikapela,’ ilaña iwu mukwakudimbulula hadiña kanyama hohuku. Mukanda wakukumishaku wamuBayibolu wamulumbulula hatooka hamu neyi ona “atenañawu nawu Diyabolu, diyi Satana, wadimbaña antu ampata yejima.” Amutenaña cheñi nawu ‘kapela mukulu.’ (Kutachika 3:1; Chimwekeshu 12:9) Iwu kañelu wañovu, hela chileñaleña wakuspiritu wakamwekanaña, wazatishili kapela kulonda amuhosheshi Evu, neyi chochinatweshiyi mukwamaana kwilisha izu dindi kutiyakana neyi dinakufumina mukadori kadi hakamwihi hela mudi kamama. Chakubula nikujinoka iwu chileñaleña wakuspiritu wadiña kwoku hampinji yadiñayi Nzambi nakuloñeshela antu iseki.​—Yoba 38:4, 7.

⁵ Chineli yileñaleña yaYehova yejima yaloña, hinyi wamuleñeli iwu “Satana Diyabolu”? Tuhoshi netu, mwana wumu adi anyana kaNzambi akuspiritu wukweti ñovu wadibalumwini yomweni nakwikala Diyabolu. Indi ichi chazatikili ñahi? Chachiwahi, twatela kwiluka netu makonu mukuwana muntu wadiña nayililu yayiwahi nawa wakashinshi nekali dehi ikombi. Indi ichi chazatikaña ñahi? Ona muntu nateli kutachika kufwila yuma yatama  kwiñila mumuchima windi. Neyi yotwalekahu nakutoñojoka hayina yuma, kuna kufwila kwatama kunatweshi kutoha chikupu. Dichi neyi nawani mpinji yashikila, natweshi kukoña yuma yatama yadiña nakutoñojokayi.​—Tañenu Yakoba 1:13-15.

6. Indi mwana kaNzambi wakuspiritu wañovu wekalili ñahi Satana Diyabolu?

⁶ Ichi dichamwekeni kudi Satana Diyabolu. Wamutiyili Nzambi chadiñayi nakuyileja Adama niEvu nindi akasemi anyana nakuwanisha iseki dejima nawanyanawu. (Kutachika 1:27, 28) Satana watoñojokeli chikupu nindi: ‘Awantu ejima atela kudifukula kudami kubadika kudifukula kudi Nzambi!’ Dichi kufwila kwatama kwapamini mumuchima windi. Nkumininaku, wazatilimu kuhitila mukushimuna makudi kudi Evu hadi Nzambi. (Tañenu Kutachika 3:1-5.) Dihafumini yekaleña “Diyabolu,” chayamukwila nawu “Mukwakutwamba.” Hampinji yoyimu wekalili “Satana,” chayamukwila nawu “Mukwakudimbulula.”

7. (a) Muloñadi Adama niEvu chafwililiwu? (b) Muloñadi anyana kaAdama ejima chashinakajilañawu nikufwa?

⁷ Kuhitila mukuzatisha makudi nikafuta, Satana Diyabolu waletesheli Adama niEvu kudikaña naNzambi. (Kutachika 2:17; 3:6) Chafuminimu, atachikili kufwa neyi chochahosheliyi Nzambi nindi akufwa neyi adikaña. (Kutachika 3:17-19) Chelili Adama wekala dehi wabula kuloña nsañu yakuvulumuna kwindi, anyanindi ejima aswanini nshidi kufuma kudi yena. (Tañenu Aroma 5:12.) Iyi nsañu yatela kuyilumbulula nameña yazatishañawu hakwocha mankendi. Neyi meña yikweti ihuji, chumanyi chikumwekana kudi dinkendi didi dejima dikwochelawu muyina meña? Mankendi ejima akwikala nehuji, hela akuheña. Chochimu, muntu himuntu waswana “ihuji” dakubula kuloña kudi Adama. Dimuloña waweni chashinakajilañawu antu nikufwa.​—Aroma 3:23.

8, 9. (a) Kuzuñesha kwamuchidinyi kwaleteliyi Satana? (b) Muloñadi Nzambi chabuliliyi kuyijaha akwakudikaña hohenahana?

⁸ Satana chalombweliyi Adama naEvu kudikaña naNzambi, walombweleña kukudikaña chikupu. Wadiña nakuzuñisha chayulañayi Yehova. Munjila yikwawu, Satana wadiña nakuhosha nindi:  ‘ ‘Nzambi hinyuli watama. Wahoshaña jamakudi nawa wakanishaña yuma yayiwahi kudi antu jindi. Antu hiyanakukeñeka kwikala naNzambi hamu neyi nyuli yawuku. Atela kufuukulahu awenawu hayuma yayiwahi nihayuma yatama. Nawa akwikala chachiwahi neyi ami nikala nyuli yawu.’ Indi Nzambi wukwila ñahi naniwu muloña? Amakwawu atoñojokaña nawu Nzambi kachi wayijahili ana akwakudikaña. Ilaña kuyijaha kwadi  kwakula kuzuñisha kwaSatana? Komana chadi kumwekesha nawu njila yayulilañamu Nzambi yaloña?

⁹ Wuñanji waloña waYehova hiwadi kumwiteja kuyijaha ana akwakudikaña hohenahanaku. Wafuukwilihu nindi mpinji yakeñekeli kulonda kwakula kuzuñisha kwaSatana munjila yayiwahi kulonda kumwekesha nawu Diyabolu hisakutwamba. Nzambi wafuukwili nindi wukwiteja antu adiyuli awenawu hadi mpinji yashikila henohu Satana nakuluwañesha. Muloña weliliyi Yehova ñana, nimuloña wetejelayi mpinji yayilehi kuhita chakadi kumanisha iwu muloña wukahoshewa muKapetulu 11 kawunu mukanda. Hela chochu, chayinu mpinji twatela kutoñojoka hanichi: Indi Adama niEvu elili chiwahi hakwiteja chahosheliyi Satana, wabulili nikuyililahu chuma chachiwahi? Komana chadiña chaloña kudi wena kwiteja nawu Yehova wayinkeli yuma yejima yadiñawu nayu, hisakutwamba walukambu? Indeyi wadi kwiladi?

10. Wunatweshi ñahi kukwasha mbadi yaYehova hakwakula kuzuñisha kwaSatana?

¹⁰ Chachiwahi kutoñojoka hanawa malwihu muloña wejima wetu twahumañanaña yuma yamuchidiwu makonu. Eña, wudi nakukoleka kwakukwasha mbadi yaYehova kulonda kwakula lwihu lwaSatana. Wunatweshi kwiteja Yehova neyi diyi Nyuli yeyi kulonda kumwekesha nawu Satana hisakutwamba. (Masamu 73:28; tañenu Yishimu 27:11.) Chawushona, antu antesha hohu hadi mabiliyoni awantu amukanu kaayi diwu anatondihu kwila mwenimu. Ichi chinaleteshi kwihula lwihu lwalema, komana Bayibolu mwamweni yatañishaña nawu Satana diyi nyuli wadinu ituña?

11, 12. (a) Indi kutesha kwamutesheliwu Yesu kunamwekeshi ñahi nawu Satana diyi nyuli wayinu mpata? (b) Chumanyi chikwawu chinamwekeshi nawu Satana diyi nyuli wayinu mpata?

¹¹ Yesu hajinokeli nindi Satana diyi nyuli wayinu mpataku. Kuhitila muyihayamisha, ifuku dimu Satana wumulejeli  Yesu “mawanta ampata yamunu mwishina ejima, nikulema kwawu.” Kulondelahu Satana wamusanyikilili Yesu nindi: “Neyi wukudinata heseki nakudifukula kudami, nukukwinka yuma yejimiyi.” (Matewu 4:8, 9; Luka 4:5, 6) Chitoñojoki. Komana kuna kuhana kwadi kwikala hikutesha kudi Yesu neyi chakwila Satana hadiña nyuli wanana mawantaku? Yesu hakanini nindi nfulumendi jejima jampata yamunu mwishina jadiña jaSatanaku. Chalala Yesu wadi kwilochu neyi chakwila Satana hidiyi wadiña nakuhana ñovu kunfulumendiku.

¹² Eña, Yehova diyi Nzambi Watwesha yejima, Nleñi wayuma yejima yayiwahi. (Chimwekeshu 4:11) Hela chochu, kwosi nihamu muBayibolu hahoshawu nawu Yehova Nzambi hela Yesu Kristu diyi nyuli wayinu mpataku. Cheñi nawa, Yesu wamuteneni Satana nindi “mwanta wampata yamunu mwishina.” (Yowanu 12:31; 14:30; 16:11) Bayibolu yamushimunaña Satana Diyabolu hamu neyi “nzambi yampata yamakonu.” (2 Akorinda 4:3, 4) Kutalisha kudi iwu mukwakudimbulula hela Satana, kapostolu wawiniKristu Yowanu wasonekeli nindi: “Mpata yamunu mwishina yashakamaña mudi owu watama.”​—1 Yowanu 5:19.

13. Muloñadi ituña dadiha chidinakukeñekela?

¹³ Ituña denda ditaminaku hachaaka hachaaka. Anakuditamisha kudi amashidika anjita, akamatuña nachiyulu abula kashinshi, anfwikiji akulumpi jansakililu, niambanji akweti lukambu. Chinekali chakala kudiwahisha ituña dejima. Bayibolu yashimunaña nawu mpinji yidi kwakwihi yakafumishayi Nzambi ituña datama hanjita yindi yaAmagedoni. Idi ituña akadihiña kudi ituña dadiha dadiwahi.​—Chimwekeshu 16:14-16.

14. Hinyi atondawu kudi Nzambi kwikala Mwanta waWanta Windi, nawa ichi achishimwineñahu dehi ñahi?

¹⁴ Yehova Nzambi watonda Yesu Kristu kwikala Mwanta waWanta Windi  wakwiwulu, hela nfulumendi. Hayaaka haheni, Bayibolu yashimwineñahu dehi nawu: “Kudetu kunavwaliki mwana, anatwinki mwana weyala; wakasenda wanta hachifwiji chindi; ijina dindi akaditena nawu . . . Kalamba wakuwunda. Wanta windi nikuwunda kwindi kwakayaña ho-o, kukuma nehi.” (Isaya 9:6, 7, King James Version) Kutalisha kuniyi nfulumendi, Yesu wadizishili atumbanji twindi kulomba nindi: “Wanta weyi winzi. Muchima weyi awili hamaseki neyi chawilañawu mwiwulu.” (Matewu 6:10) Neyi chitukumona kumbidi muwunu mukanda, Wanta waNzambi wukafumishahu nfulumendi jejima jadinu ituña katataka, nawa wena diwukahiñahu. (Tañenu Danyeli 2:44.) Kulondelahu Wanta waNzambi wukaleta paradisa hamaseki.

15. Indi “iseki dadiha” hichumanyi?

¹⁵ Bayibolu yatulejaña nawu: “Hakwila etu twatalilaña mawulu amaha niiseki dadiha, mwakekala kuloña neyi chakaniniyi [Nzambi].” (2 Petulu 3:13; Isaya 65:17) Mpinji yikwawu neyi Bayibolu yinakuhosha hadi “iseki,” yatenaña antu ashakamaña hamaseki. (Kutachika 11:1) Dichi “iseki dadiha” dadiwahi himunza wawantu anetejiwu kudi Nzambi.

16. Chawaana chamukunkulu chakufuma kudi Nzambi chakenkayi owu etejayi hichumanyi, nawa chumanyi chitwatela kwila hakwila tukachitambuli?

¹⁶ Yesu wakanini nindi mwituña dadiha dinakwinza, owu etejewa kudi Nzambi akatambula chawaana ‘chawumi wahaya nyaka.’ (Maku 10:30) Mwani bakulenu Bayibolu yenu haYowanu 3:16 ni 17:3, mutañi chahosheliyi Yesu chitwatela kwila hakwila nawu tukatambuli wumi wahaya nyaka. Dichi toñojokenu hankisu yidi muBayibolu yikadiluñishawu ana anateleli kutambwila china chawaana chachiwahi kufuma kudi Nzambi muParadisa yinakwinza hamaseki.

17, 18. Tukwiluka ñahi netu kukekala kuwunda nikumwena mwituña dejima?

 ¹⁷ Kutama, njita, wubanji, nimadombu akayifumishahu. “Muntu watama hakekala nawa mwokuku . . . Ilaña akwakudizoza akaswana ituña.” (Masamu 37:10, 11) Kuwunda kukekala kwoku muloña ‘Nzambi wukakumisha majita mwakumina iseki dejima.’ (Masamu 46:9; Isaya 2:4) Kulondelahu “mukwakuloña wakashakama chachiwahi, mwakasweja nikuwunda, nichamba kakuma kakweji”​—dikwila nawu haya nyaka!​—Masamu 72:7.

¹⁸ Akwakudifukula aYehova akashakama chamwena. Nshakaminu yamwena yawaIsarela amumpinji yaBayibolu yashindameneni hakumwovwahila Nzambi. (Alevi 25:18, 19) Ochichakawaha kudiluñisha kuwunda kwadifwanaku muParadisa!​—Tañenu Isaya 32:18; Mika 4:4.

19. Muloñadi chitunelukili netu yakudya yikavula mwituña dadiha daNzambi?

¹⁹ Yakudya yakavula. Ñimbi wamasamu wembili nindi: “Hanu hamaseki hakavula kudya kwansaachi, [ni]hansa jampidi hakasweja kuvula yakudya.” (Masamu 72:16, NW) Yehova Nzambi wukakiswila nkisu antu jindi aloña, dichi ‘maseki akasoña nyikabu yawu.’​—Masamu 67:6.

20. Muloñadi wutunateleli kwiteja netu iseki dejima dikekala paradisa?

²⁰ Iseki dejima dikekala paradisa. Akatuña matala amaha nakudima matempa amawahi hamaseki akisiliwu kudi antu akwanshidi. (Tañenu Isaya 65:21-24; Chimwekeshu 11:18) Mukuhita kwampinji, yibalu yahamaseki yovwahishawu dehi yikatoha nakushika tuhu hakekalila iseki dejima dinekali dadiwahi dawushi neyi itempa daEdeni. Nawa Nzambi hakakañanya ‘kukamununa chikasa chindi, nakwikutisha yuma yejima yikweti wumi nayuma yakeñawuku.’​—Masamu 145:16.

21. Chumanyi chinamwekeshi nawu kuwunda kwakekala hakachi kawantu nawatunyama?

²¹ Kwakekala kuwunda hakachi kawantu nawatunyama. Atunyama amwisaña nawatunyama akutadika akadyila hamu. Hela mwana wanyanya hakachiina atunyama afwana makonuku.​—Tañenu Isaya 11:6-9; 65:25.

22. Chumanyi chikamwekana kuyikatu?

 ²² Yikatu yikamana. Hamu neyi Mwanta waWanta waNzambi wamwiwulu, Yesu wukooka antu kubadika chayukiliyi hampinji yadiñayi hamaseki. (Matewu 9:35; Maku 1:40-42; Yowanu 5:5-9) Kufumahu “mwenimbu hakahosha nindi, Ami nakataku.”​—Isaya 33:24; 35:5, 6.

23. Muloñadi kusañuka chikwakaletela muzañalu munyichima yetu?

²³ Antu yitwakeña afwa dehi akasañuka kuwumi nachikuhwelelu chakubula kufwa cheñi. Ejima akama dehi mutulu twakufwa adi muyitoñojoka yaNzambi akayisañula. Chalala, “kwamba kekala kusañuka kwawaloña nikwawabula kuloña.”—Yililu 24:15; tañenu Yowanu 5:28, 29.

24. Wunakutiya ñahi hansañu yakushakama muParadisa hamaseki?

²⁴ Oyu mbidi okuwaha yinakuhimbelela ana anatondihu kudiza hadi Nleñi yetu Muneni, Yehova Nzambi, nakumukalakela! Yesu wenyikileña kuParadisa yinakwinza hampinji yakaniniyi ona mukwakukoña chatama wafwilili hamu nindi, nindi: “Wukekala nanami muParadisa.” (Luka 23:43, NW) Komana chikwikala chalema kudiza yuma yayivulu hadi Yesu Kristu, kuhitila mudi yena nkisu yejimiyi yikekala yalala.