1, 2. (a) Mpinjinyi yamwekanaña chawaana kulema kudeyi? (b) Muloñadi chitwatela kuhoshela netu ifutu danyiloña hichamukunkulu chabadika kulema chiwabulahu dehi kutambwila?

CHAWAANANYI chasweja kulema chiwatambwilahu dehi? Chawaana hichatela kwikala chawuseya mwaka chikali chalemaku. Cheñi nawa, kulema kwakweni kwachawaana hikwatela kuchesekeja namaliku. Hela chochu, neyi chawaana chinakuzañaleshi hela neyi chinakutiyishi kuwaha muwumi weyi, dikwila nawu chalema kudi eyaweni.

² Hadi yawaana yejima yiwatalilaña kutambwila, kudi chawaana chimu chasweja kubadika yejima. Hichamukunkulu chakufuma kudi Nzambi chenkayi muchidi wamuntu. Yehova watwinka yuma yayivulu, ilaña chamukunkulu chindi chabadika kulema kudetu hiifutu danyiloña daheniyi daMwanindi, Yesu Kristu. (Tañenu Matewu 20:28.) Neyi chitukumona mukanu kapetulu, ifutu danyiloña hichamukunkulu chabadika kulema chiwatela kutambwila chakubula kukala, muloña dinateli kukuletela muzañalu weneni chikupu nawa dikuwanisha yuma yejima yiwaswejesha kukeña. Ifutu danyiloña hichinjikijilu cheneni chikupu chakukeña kwaYehova kudi eyi.

3. Ifutu danyiloña hichumanyi, nawa chumanyi chitwatela kutiyisha mwaka tutiyishishi chikupu kulema kwanichi chamukunkulu?

³ Munhoshelu yapela, ifutu danyiloña hinjila yaYehova yakukulilamu muchidi wamuntu kufuma kunshidi nikufwa. (Aefwesesa 1:7) Hakwila tutiyishishi iyi ntañishilu yaBayibolu chiyalumbuluka, twatela kutoñojoka hayuma yamwekeni kunyima mwitempa daEdeni. Chiña neyi tusambila kwiluka chuma chajimbesheliyi Adama cheliliyi navulumuni dehi, dihu dinu hitukutiyisha chikupu kulema kwachamukunkulu chefutu danyiloña kudi etu.

4. Wumi wamuntu waloña walumbulukilidi kudi Adama?

⁴ Mpinji yamuleñeliwu Adama, Yehova wamwinkeli chuma chalema chikupu​—wumi wamuntu waloña. Toñojokaku ochichamulumbulukilili Adama. Amuleñeli namujimba wakola niyitoñojoka yaloña, hadi kukata, kukula hela kufwaku. Hakwikala muntu waloña, wadiña nawulunda walema naYehova. Bayibolu yahoshaña nawu Adama wadiña “mwana kaNzambi.” (Luka 3:38) Dikwila nawu Adama wadiluñishili wulunda waweni naYehova Nzambi, neyi wuna wekala hakachi kamwana natata yindi wukweti kukeña. Yehova wahosheleña namwanindi wahamaseki, wamwinkeli nyidimu yayiwahi nawa wamulejeli nichuma chakeñeleñayi kudi yena.​—Kutachika 1:28-30; 2:16, 17.

5. Indi Bayibolu yatalisha mudi hakuhosha nawu Adama amuleñeli neyi “chekalayi Nzambi”?

⁵ Adama amuleñeli neyi “chekalayi Nzambi.” (Kutachika 1:27) Ichi hichayili mukwila nawu Adama wadifwanini naNzambi mummwekenuku. Neyi chitwadizili muKapetulu 1 kawunu mukanda, Yehova hispiritu yakamwekanaña. (Yowanu 4:24) Dichi Yehova hakweti mujimba wamusunyi nimashiku. Kumuleña neyi chekalayi Nzambi chayili mukwila nawu Adama amuleñeli nayililu yidi neyi yaNzambi, kubombelahu kukeña, maana, wuñanji, niñovu. Adama wadiña neyi Tata yindi munjila yikwawu yalema muloña wadiña nawuswa wakudifuukwila. Dikwila nawu, Adama hadiña neyi ikina datela kuzata  chuma chadituñilawu hela yuma yadilejawu kwilaku. Hela chochu, wadiña nakufuukulahu yomwenindi, nakwambula yayiwahi nayatama. Neyi watondeli kumwovwahila Nzambi, mutenowu wadi kushakama haya nyaka muParadisa hamaseki.

6. Chelili Adama nadikañi dehi naNzambi, chumanyi chajimbesheliyi, nawa anyanindi chayisambukilili ñahi?

⁶ Chalala, Adama chadikañiliyi naNzambi amufwishili namuloña wakufwa, wafweteli wuseya weneni nankashi. Nshidi yindi yaletesheli kujimbesha wumi windi waloña wawuntu ninkisu yejima. (Kutachika 3:17-19) Chawushona, Adama hajimbesheli wumi windi walema hohuku, ilaña niwawanyanindi akumbidi. Mazu aNzambi ahoshaña nawu: “Kudi iyala wumu [Adama] nshidi yeñilili mumpata yamunu mwishina, ninshidi yaleteli kufwa; chochenochu nawa nikufwa kwashikeneni antu ejima, muloña wejima wawu avulumwini.” (Aroma 5:12) Eña, wejima wetu twaswana nshidi kufuma kudi Adama. Dichi Bayibolu yahoshaña nawu ‘wadilandishili’ yomwenindi nianyanindi kuwuduñu wanshidi nikufwa. (Aroma 7:14) Kuchiñeja mudi Adama hela Evu kwadiña kwosi muloña atondelihu kudikaña naNzambi chakudikeñela. Chumanyi chayimwekeneni anyanawu, kushilahu ninetu?

7, 8. Yumanyi yiyedi yalumbulula ifutu danyiloña?

⁷ Yehova wapulwishili muchidi wamuntu kuhitila mukuhana ifutu danyiloña. Indi ifutu danyiloña hichumanyi? Ifutu danyiloña dalumbulula yuma yiyedi. Chatachi, ifutu danyiloña hiwuseya wakufweta hakukuula hela kulanda chuma cheñi. Datela kudesekeja nawuseya wakufweta hakukuula nachu mukwakaleya wamunjita. Chamuchiyedi, ifutu danyiloña hiwuseya wabutaña, hela kufweta wuseya wachuma. Chochimu nawuseya wakufweta kulonda kubuta hakutama kunakojeji makabi amuntu. Chakutalilahu, neyi muntu nelishi maposu, watela kufweta mali ashikilamu chikupu hela esekana nakulema kwachuma chakisañanayi.

 ⁸ Chadi kwikala ñahi chaswayi kubuta hachuma cheneni chajimbeli chaleteliyi Adama hadetu wejima nakutukuula kuwuduñu wanshidi nikufwa? Tusambilenu kutala hefutu danyiloña daloñesheliyi Yehova nichidinakulumbulukili.

9. Ifutwinyi danyiloña dakeñekeleña?

⁹ Chelili wumi wamuntu waloña diwajimbeli, kwosi wumi wamuntu wabula kuloña wunateli kuwikuulaku. (Masamu 49:7, 8) Chuma chakeñekeleña hiifutu danyiloña desekana wuseya hamu nawumi wajimbeli. Ichi chinakwantankani hamu nanshimbi yaloña yawuñanji yekala Mwizu daNzambi, yahoshaña nawu: “Wumi nawumi.” (Kuhituluka 19:21) Hanu dinu, chumanyi chadi kubuta hawuseya wawumi wamuntu waloña wajimbesheliyi Adama? Wumi wamuntu mukwawu waloña diwadiña ifutu danyiloña desekana nawuna wadiña nakukeñeka.​—1 Timothy 2:6.

10. Yehova waheni ñahi ifutu danyiloña?

¹⁰ Yehova waheni ñahi ifutu danyiloña? Watemesheli mwanindi wumu waloña wakuspiritu hamaseki. Yehova hatemesheli chileñaleña wakuspiritu wudi wejimaku. Ilaña watemesheli wumu waswejeli kulema kudi yena, Mwanindi wumu hohu. (Tañenu 1 Yowanu 4:9, 10.) Iwu Mwana washiyili mukala windi wamwiwulu chakubula kumukanjikija. (Afwilipi 2:7) Neyi chitwadizili mukapetulu kanafumiku kawunu mukanda, Yehova welili chihayamisha mpinji yatuntulwiliyi wumi waMwanindi nakuwisha mwivumu daMariya. Kuhitila muspiritu yajila yaNzambi, Yesu wasemukili hamu neyi muntu waloña nawa hadiña nanshidiku.​—Luka 1:35.

11. Indi muntu wumu nateli kwikala ñahi ifutu danyiloña hayihita yawantu?

¹¹ Indi muntu wumu natweshi kwikala ñahi ifutu danyiloña dawantu amavulu, kafwampi yihita yawantu? Indi yihita yawantu ekalili ñahi akwanshidi  hakusambila? Anukaku neyi Adama cheliliyi nshidi, wajimbesheli chamukunkulu chindi chalema chawumi waloña. Chafuminimu, hatwesheli kuyiswanisha anyanindi nawuna wumi waloñaku. Ilaña, watwesheli kuyiswanishaku hohu nshidi nikufwa. Yesu atenañawu muBayibolu nawu “Adama wakukuminina,” wadiña nawumi waloña, nawa helilihu ninshidiku. (1 Akorinda 15:45) Munjila yikwawu Yesu wasinsili mwiluña daAdama kulonda yatupulwishi. Kuhitila mukuhana wumi windi waloña, nakutwalekahu kwikala wovwahila chikupu kudi Nzambi, Yesu wafweteli wuseya wanshidi yaAdama. Dichi Yesu waleteli kuchiñeja kudi anyana kaAdama.​—Aroma 5:19; 1 Akorinda 15:21, 22.

12. Makabi aYesu amwekesheli chumanyi?

¹² Bayibolu yalumbulula mukukunama nsañu yamakabi omikiliyi Yesu henohu kanda yofwi. Amweteli chatama, amupopeli nalukambu, nawa wafwili kufwa kwatama hamutondu wakukabishilahu. (Yowanu 19:1, 16-18, 30; Apendikisi, “Chabulilañawu eniKristu Alala Kuzatisha Kulusu haKudifukula”) Muloñadi chichekalili chalema hakwila nawu Yesu yakabakani chamuchidiwu? Mukapetulu kakumbidi kawunu mukanda tukadiza nawu, Satana wajinokeli neyi kwiji Yehova wukweti ambuñindi awantu atela kwikala ashinshika neyi anayeseki. Hela chakwila wadiña mumakabi asweja, Yesu waheni kwakula kwashikilamu kulwihu lwaSatana kuhitila mukuumika kwakashinshi. Yesu wachimwekesheli hatooka to-o nindi muntu waloña wukweti wuswa wakufuukula natweshi kuhemba kashinshi kakeni kudi Nzambi chakadi kwakamena yuma yakoñeliyi Diyabolu. Yehova watela wazañaleli nankashi hakashinshi kaMwanindi wakeñayi!​—Yishimu 27:11.

13. Indi ifutu danyiloña adifweteli ñahi?

¹³ Indi ifutu danyiloña adifweteli ñahi? Hefuku da 14 mukakweji wawaYudeya waNisani, 33 C.E., Nzambi wetejeli Mwanindi waloña nawa wakadi nshidi kulonda amujahi. Dikwila nawu Yesu walambwili wumi windi waloña “kamu hohu bweñi.” (Aheberu 10:10) Hefuku damuchisatu hanyima yakufwa kwaYesu, Yehova wamusañwili cheñi kuwumi wakuspiritu. Muna mwiwulu, Yesu waheni kudi Nzambi  wuseya wamulambu wawumi windi waloña wawuntu hamu neyi ifutu danyiloña dakuhimpa nanyana kaAdama. (Aheberu 9:24) Yehova wetejeli wuseya wamulambu waYesu neyi ifutu danyiloña wakeñekeleña hakukuula nachu muchidi wamuntu kufuma muwuduñu wanshidi nikufwa.​—Tañenu Aroma 3:23, 24.

14, 15. Hakwila nawu tutambwili ‘kwanakena kwanyiloña yetu,’ chumanyi chitwatela kwila?

¹⁴ Hela chakwila tuyakwakuputola, tunatweshi kudiluñisha nkisu yakadi wuseya muloña wefutu danyiloña. Tutalenu nkisu yamakonu niyampiji yakumbidi yachamukunkulu chabadika kuwaha chakufuma kudi Nzambi.

¹⁵ Kwanakena nshidi. Hamuloña wakuswana kubula kuloña, twatela kulwisha chacheni hakwila twili mwaloña. Wejima wetu twavulumunaña muyuma yitwahoshaña hela yitwelaña. Kuhitila mwifutu danyiloña daYesu, dimu tunatweshi kutambwila ‘kwanakena kwanyiloña yetu.’ (Akolose 1:13, 14) Hela chochu, hakwila nawu nyiloña yetu ayanakeni, chiña tufutumuka munyichima yetu chikupu. Twatela cheñi kudizoza kudi Yehova, nakumulomba kulonda yotwanakeni nakusha chikuhwelelu chetu hefutu danyiloña daMwanindi.​—Tañenu 1 Yowanu 1:8, 9.

16. Chumanyi chatukwashaña kudifukula kudi Nzambi nachinleji chitooka, nawa chinleji chamuchidiwu chalema ñahi?

¹⁶ Chinleji chamuchima chitooka kumesu aNzambi. Chinleji chamajilu chinatweshi kutwitwala kukubula chikuhwelelu nawa chikutwilisha kutiya neyi hitwashikilamuku. Hela chochu, kwanakena kunapeleshiwu kuhitila mwifutu danyiloña, kunakojeji Yehova kutwiteja kudifukula kudi yena nachinleji chitooka hela chakwila hitwaloñaku. (Aheberu 9:13, 14) Ichi chatukwashaña kwikala akasunuka kuhosha naYehova. Tudi akasunuka kuswila kudi yena mukulomba. (Aheberu 4:14-16) Kwikala nachinleji chitooka kwaletaña kuwunda kwamuyitoñojoka, nikudivumbika eyaweni, nawa kwaletaña muzañalu.

17. Nkiswinyi yinekali yaswayi hamuloña wakwila Yesu watufwilili?

 ¹⁷ Kuchiñeja kwawumi wahaya nyaka muparadisa hamaseki. Aroma 6:23 yahosha nawu, “Wufwetu wanshidi hikufwa.” Vasi yoyimu yinabombelihu nawu: “Ilaña chamukunkulu chaNzambi hiwumi wahaya nyaka, mudi Yesu Kristu Mwanta wetu.” MuKapetulu 3 kawunu mukanda, twahosheli hankisu yinakwinza yaParadisa yahamaseki. (Chimwekeshu 21:3, 4) Nkisu yejima yakumbidi kushilahu niwumi wahaya nyaka nanyijimba yakola, yinekali yaswayi muloña Yesu watufwilili. Hakutambula nkisu yamuchidowu, twatela kumwekesha kusakilila hachamukunkulu chefutu danyiloña.

18. Muloñadi chitunateleli kumusakilila Yehova hachamukunkulu chefutu danyiloña?

¹⁸ Muloñadi chitunateleli kumusakilila nankashi Yehova hefutu danyiloña? Chamukunkulu chekalaña chalema sweje-e neyi chinabombelimu mpinji, ñovu, hela mali kudi mukwakuhana. Twatiyaña kuwaha nankashi neyi twiluka netu chamukunkulu chamukwakuhana chinamwekeshi kukeña kwalala hadetu. Ifutu danyiloña dinabadiki kulema hayamukunkulu yejima, muloña Nzambi waheni mulambu wabulahu dehi kuhana. Yowanu 3:16 hahosha nawu, “Chaswejeliyi Nzambi kukeña  mpata yamunu mwishina, waheni Mwanindi wumu hohu.” Ifutu danyiloña dichinjikijilu chabadika kulema chakukeña kwaYehova kudetu. Cheñi, hiwunsahu wunakumwekesha kukeña kwaYesu hakudikeñela kuhana wumi windi hanyijimba yetu. (Tañenu Yowanu 15:13.) Chamukunkulu chefutu danyiloña chatela kutwilisha kwiluka chikupu netu Yehova hamu niMwanindi atukeña hamuntu-hamuntu.​—Aŋalija 2:20.

19, 20. Munjilanyi muwatela kumwekeshela neyi walemesha chamukunkulu chaNzambi chefutu danyiloña?

¹⁹ Dichi dinu, wunatweshi kumwekesha ñahi neyi walemesha chamukunkulu chaNzambi chefutu danyiloña? Chatachi, zataku nañovu nakudiza jajivulu hadi Yehova Mukwakuhana Muneni. (Yowanu 17:3) Kudiza Bayibolu nawukwashu wawunu mukanda wukukwasha kwiluka jajivulu hadi Yehova. Chiwamwiluka Yehova chikupu, kukeña kweyi kwakudi yena kukuswejelaku. Chikufumamu, kukeña kwamuchidiwu kukukwilisheyi kufwila kwila chuma chakumuzañalesha.​—1 Yowanu 5:3.

²⁰ Mwekeshaku neyi wakuhwelela mumulambu wefutu danyiloña daYesu. Yesu yomweni wahosheli nindi: “Muntu wukukuhwelela Mwana wukweti wumi wahaya nyaka.” (Yowanu 3:36) Tunatweshi kumwekesha ñahi netu twamukuhwelela Yesu? Chikuhwelelu chamuchidiwu hiyachimwekeshaña namazu hohuku. HaYakoba 2:26 hahoshaña nawu, ‘Kukuhwelela kwakadi nyidimu kwafwa.’ Eña, chikuhwelelu chalala achesekaña nanyidimu, dikwila nawu nanzatilu yetu. Njila yimu yakumwekeshelamu nawu twamukuhwelela Yesu hikuzata nañovu yetu yejima hakumwimbujola, bayi mukuhosha hohuku, ilaña nimunyidimu yitwelaña.​—Yowanu 13:15.

21, 22. (a) Muloñadi chitwatelela kuwanika kuchidika chahachaaka hachaaka chaKudya kwaMwanta kwaMelela? (b) Chumanyi chikalumbululewa muTupetulu 6 ni 7?

²¹ Wanikaku kuchidika chahachaaka hachaaka chaKudya kwaMwanta kwaMelela. HaNisani 14, 33 C.E. nampinji yamelela, Yesu watachikili chidika chalema chatenañawu muBayibolu nawu ‘Kudya kwamwanta kwamelela.’ (1 Akorinda 11:20; Matewu 26:26-28) Ichi chidika achitenaña cheñi nawu Kwanakana kufwa kwaKristu. Yesu watachikili ichi chidika kulonda kukwasha apostolu indi ninana ejima akekala eniKristu alala  hanyima yawu akanukeña nawu kuhitila mukufwa kwindi hamu neyi muntu waloña, waheni wumi windi neyi ifutu danyiloña. Kutalisha hanichi chidika, Yesu wakonkomweneni nindi: “Ilenuña mwenimu muñanakanaña nachu.” (Luka 22:19) Kwanakana Chidika kwatwanukishaña kukeña kweneni kwamwekesheliyi Yehova niYesu kutalisha kwifutu danyiloña. Tunateli kumwekesha kusakilila kwetu hefutu danyiloña kuhitila mukuwanikaña kuchidika chahachaaka hachaaka chaKwanakana kufwa kwaYesu.. *

²² Ifutu danyiloña datwinkayi Yehova chalala hichamukunkulu chakadi wuseya. (2 Akorinda 9:14, 15) Ichi chamukunkulu chatela nikuhetesha ninana afwa dehi. Tupetulu 6 ni 7 tukulumbulula chichidi.