WATOÑOJOKAÑAHU neyidi Hefuku daKusompesha? Antu amavulu atoñojokaña nawu mabiliyoni awantu hamuntu-hamuntu akayileta mumusululu kumesu etanda daNzambi. Kwenakuna, dikwakayisompeshelawu muntu hamuntu. Amakwawu akayinka paradisa yamwiwulu, amakwawu niwena akayihisha nakukabakana kwahaya nyaka. Hela chochu, Bayibolu yalumbululaña yuma yambukaku kutalisha kuniyi mpinji. Izu daNzambi dalumbululaña nawu hiyakekala mpinji yakutiyisha womaku, ilaña yakekala mpinji yakuchiñeja nikutuñulula.

HaChimwekeshu 20:11, 12, twatañañahu mazu akapostolu Yowanu akulumbulula Ifuku daKusompesha nawu: “Hinukumona itanda dawanta deneni ditooka, ninowu washakamahu; nimaseki nimawulu hiyakutemuka kumesu indi; hiyamweni kwakuyaku. Hinukumona afu, niamaneni nianyanya, hiyakwimena kumesu etanda dawanta; hiyakubakula nyikanda; hiyakubakula nimukanda wukwawu, wowu wawumi. Hiyakusompesha afu nansañu jayuma yelilañawu yasonekeluwu dehi munyikandoyu.” Indi iwu Nsompeshi anateniwu hanu hinyi?

Yehova Nzambi diyi Nsompeshi wabadika wamuchidi wamuntu. Hela chochu,   mudimu waweni wakusompesha wawuhana. Kwesekeja naYililu 17:31, kapostolu Pawulu wahosheli nindi Nzambi “nashumu dehi ifuku damba kasompeshayi matuña mwaloña, neyala anafuukuliyi dehi.” Nsompeshi watondawu diyi Yesu Kristu wasañwiliwu. (Yowanu 5:22) Hanu dinu, mpinjinyi yikatachika Ifuku daKusompesha? Indi kuleha kwampinji kukekala ñahi?

Mukanda waChimwekeshu washimunaña nawu Ifuku daKusompesha dikatachika hanyima yanjita yaAmagedoni, neyi ituña daSatana dahamaseki anadikisañani dehi. * (Chimwekeshu 16:14, 16; 19:19–20:3) Hanyima yaAmagedoni, Satana niandemoni jindi akayikasila mwikela hadi yaaka ikombakaji dimu. Hayina mpinji, a 144,000 answana akwiwulu akekala ansompeshi nawa akayula ‘neyi anyanta hamu naKristu hadi ikombakaji danyaka.’ (Chimwekeshu 14:1-3; 20:1-4; Aroma 8:17) Ifuku daKusompesha hididi neyi chatemukaña yuma nakumana mumaora 24 wanyi. Dakamana muyaaka ikombakaji dimu.

Muyina mpinji yekombakaji dimu, Yesu Kristu “wakasompesha amomi niafu.” (2 Timotewu 4:1) “Amomi” akekala “izaza deneni” dakapuluka haAmagedoni. (Chimwekeshu 7:9-17) Kapostolu Yowanu wamweni cheñi “afu . . . hiyakwimena kumesu etanda dawanta” dawunsompeshi. Neyi chakaniniyi Yesu, “antu ejima adi mumajamu achanukishu akatiya izu [daKristu]; akedikamu” kuhitila mukuyisañula. (Yowanu 5:28, 29, NW; Yililu 24:15) Hanu dinu wunsompeshi wejima wukashindamena hankahi?

Kwesekeja nachimwenu chakapostolu Yowanu, “hiyakubakula nyikanda,” nawa “hiyakusompesha afu nansañu jayuma yelilañawu yasonekeluwu dehi munyikandoyu.” (Chimwekeshu 20:12) Nyikanda yeniyi asonekamu nsañu jayuma yakoñeliwu antu kunyaka tahindi? Inehi, wunsompeshi hiwakashindamena hayuma yakoñeliwu antu henohu kanda afwiku. Tuneluki ñahi chenichi? Bayibolu yahoshaña nawu: ‘Muntu wunafwi nayiñi dehi, nshidi yindi yinamani dehi.’ (Aroma 6:7) Ana akasañulawu akekala nawumi wakulalamena nshidi yejima yakunyima. Nyikanda yatela kwimena yuma yikwawu yinakukeñeka yaNzambi. Hakwila nawu ashakami haya nyaka, ejima akapuluka haAmagedoni ninana  akasañuka atela kwovwahila nshimbi jaNzambi, kubombelahu niyuma yayiha hadaha Yehova yamba kasololayi hampinji yekombaji danyaka. Dikwila nawu, antu akayisompesha kwesekeja nayuma yakakoñawu mumpinji Yefuku daKusompesha.

Muyina mpinji Yefuku daKusompesha, mabiliyoni awantu akekala nakukoleka kwatachi kwakudiza nkeñelu yaNzambi nakuyovwahila. Ichi chinakulumbulula nawu mudimu weneni wakudizisha wukekala kwoku. Eña, “akwakushakama munu mwishina akadiza kuloña.” (Isaya 26:9) Hela chochu, bayi neyi antu ejima akakeña kwovwahila nkeñelu yaNzambiku. HaIsaya 26:10 hahoshaña nawu: “Mukwakukoña chatama, hela wukuwana wuselewa, hakadiza kuloñaku, mwituña dakwoloka saña elilayi chatama ho-o, hakamona niwanta waYehovaku.” Antu atama amba kayikisañana haya nyaka Hefuku daKusompesha.​—Isaya 65:20.

Hakumana Kwefuku daKusompesha, antu akapuluka ‘akekala cheñi nawumi’ wawuwahi neyi antu awanina. (Chimwekeshu 20:5) Mumpinji Yefuku daKusompesha, muchidi wamuntu akamufuntisha muchihandilu chachiwahi chakusambila. (1 Akorinda 15:24-28) Kufumahu dinu, kweseka kwakumishaku dihu kwamba kenza. Satana akamufumisha mukaleya nawa akamwiteja kweseka kuluwañesha muchidi wamuntu hakapinji kantesha kakukumisha. (Chimwekeshu 20:3, 7-10) Antu akamukana akamona kushikijewa kwakweni kwayikaninu yamuBayibolu yakwila nawu: “Akwakuloña akaswana ituña, akashakamamu haya nyaka.” (Masamu 37:29) Eñañi, Ifuku daKusompesha dakekala hinkisu kumuchidi wamuntu wachikuhwelelu!