APENDIKISI
Indi Mikeli Mukulumpi waWañelu Hinyi?
CHILEÑALEÑA wakuspiritu watenañawu nawu Mikeli hiyamutena kakavulu muBayiboluku. Hela chochu, neyi amutena, dikwila nawu nakukoña chuma chimu. Mumukanda waDanyeli, Mikeli nakulwisha nawañelu atama; munsona yaYuda, nakuditadikisha naSatana; nawa muChimwekeshu, nakulwa njita naDiyabolu niandemoni jindi. Kuhitila mukuhakwilaku kuyula kwaYehova nakuzuña nawayilumbu jaNzambi, Mikeli washakamaña kwesekana nachidalumbuluka ijina dindi—“Hinyi Wadifwana naNzambi?” Hanu dinu Mikeli diyinyi?
Mpinji yikwawu, antu ayilukaña kubadika tuhu nejina dimu. Chakutalilahu, nkakulula Yakoba amwiluka cheñi nawu diyi Isarela, nawa kapostolu Petulu, amwiluka cheñi nawu diyi Shimona. (Kutachika 49:1, 2; Matewu 10:2) Chochimu, hanyima nihambidi yawumi windi wahamaseki, Bayibolu yamwekeshaña nawu Mikeli hiijina dikwawu daYesu Kristu. Tutalenu yikuma yamuNsona hakukunkulula ñana.
Mukulumpi wawañelu. Izu daNzambi damutenaña Mikeli nawu “mukulumpi wawañelu.” (Yuda 9) Ilukenu nenu Mikeli amutenaña nawu mukulumpi wawañelu. Ichi chinakumwekesha nawu kwekala kañelu wumu hohu wamuchidiwu. Mwalala, izu dakwila nawu “mukulumpi wawañelu” damwekanaña muBayibolu neyi damuntu wumu hohu, bayi neyi dawantu amavuluku. Kubombelahu, Yesu amwesekeja nachifulu chamukulumpi wawañelu. Kutalisha kudi Mwanta wasañwiliwu Yesu Kristu, 1 Atesalonika 4:16 yashimuna nawu: “Yomweni Mwanta wakasuluka kwiwulu nakabobobu, nezu damukulumpi wawañelu.” Dikwila nawu izu daYesu anadilumbululi hamu neyi dina damukulumpi wawañelu. Iyi nsona yinashimuni nawu Yesu yomwenindi diyi Mikeli mukulumpi wawañelu.
Mukulumpi Wamashidika. Bayibolu yashimuna nawu ‘Mikeli nawañelu jindi hiyakwasa njita nanowu chazañombi; . . . niyena nawañelu jindi.’ (Chimwekeshu 12:7) Dikwila nawu, Mikeli hiMukulumpi wamashidika awañelu ovwahila. MuChimwekeshu nimwena amulumbulula Yesu neyi Mukulumpi wawamashidika awañelu ovwahila. (Chimwekeshu 19:14-16) Kapostolu Pawulu niyena wamutena jiika nindi “Mwanta Yesu” hamu ‘nawañelu jindi añovu.’ (2 Atesalonika 1:7; Matewu 16:27; 24:31; 1 Petulu 3:22) Dichi Bayibolu yahoshaña hadi Mikeli hamu “nawañelu jindi” niYesu ‘nawañelu jindi.’ (Matewu 13:41) Chineli kwosi hadi hejima hamwekesha Izu daNzambi nawu kwekala nyikanka yanjita yiyedi yawañelu ovwahila mwiwulu—wumu walombweliwu kudi Mikeli nawa wukwawu walombweliwu kudi Yesu—chidi chashikila kukunkulula netu Mikeli diyi Yesu Kristu muchifulu chindi chamwiwulu. *
^ para. 1 Nsañu jajivulu jamwekeshaña nawu ijina daMikeli datalisha kudi Mwana kaNzambi yawanikaña, mumukanda waInsight on the Scriptures, Volume 2, hamafu 393-394, wasonekawu kudi aYinsahu jaYehova.
