NEYI wutiya mazu akutena nawu “wumi” ‘nispiritu,’ chumanyi chenzaña muyitoñojoka yeyi? Antu amavulu akuhwelela nawu awa mazu alumbuluka chuma chakamwekanaña nawa chakafwaña chekala mudetu. Atoñojokaña nawu neyi muntu nafwi, ichi chidi chamujimba wamuntu chakamwekanaña chafumaña mumujimba nakutwalekahu kuhanda. Hamuloña wakusweja kutanda kwaniyi ntañishilu, antu amavulu ahayamaña hakwiluka nawu ichi hidichi chuma chatañishaña Bayiboluku. Komana, wumi hichumanyi, nawa spiritu niyena hichumanyi kwesekeja nachahoshaña Izu daNzambi?

Chatachi, toñojokaku hawumi. Watela kwanuka neyi Bayibolu asambilili kuyisoneka sweje-e muchiHeberu nimuchiGriki. Hampinji yasonekeleñawu hansañu yawumi, ansoneki aBayibolu azatishili izu dachiHeberu dakwila nawu neʹphesh hela izu dachiGriki dakwila nawu psy·kheʹ. Awa mazu ayedi amwekanaña chachiwahi kubadika hamapampa 800 muNyikanda, nawa New World Translation yayitena chochimu nawu “wumi.” Neyi wukushinshika hanochu chazatishawu “wumi” hela “mawumi” muBayibolu, chikulumbuluka chiwahi nawu izwidi dahosha chikupu kutalisha kudi (1) antu, (2) atunyama, hela (3) wumi wukweti  muntu hela kanyama. Tusambilenu kushinshika hanyikanda yimu yamwekeshaña nawu iyi yitoñojoka yisatu yashiyashana.

Antu. ‘Mumafuku . . . aNowa . . . antu antesha, wowu [mawumi] antu atanu nasatu, ahandili kumenji.’ (1 Petulu 3:20) Ahanu izu dakwila nawu “mawumi” dinakwimenaku chikupu antu​—Nowa, ñodindi, anyanindi awamayala asatu, niañodi jawu. Kwidika 16:16 yashimunaña hajinshimbi jayinkeliwu aIsarela kutalisha hakukuñula manina. Ayilejeli nawu: ‘Chiña mukuñuli . . . mwomwakuyichindila antu [mawumi] ekala mumatenti enu.’ Komana kuvula kwamanina akuñwileñawu kwashindameneni hakuvula kwawantu amuchisaka hichisaka. Yakutalilahu yikwawu yamuBayibolu yazatisha “wumi” hela “mawumi” kutalisha kudi muntu wumu hela antu yawanikaña haKutachika 46:18; Yoshuwa 11:11; Yililu 27:37; niAroma 13:1.

Atunyama. Munsañu jamuBayibolu jahosha hakuleña, twatañaña nawu: ‘Nzambi wahosheli nindi, mumenji mukumini dakulumbama yendu yayuma yendaña, yikweti wumi, niatujila atuukaña hewulu damaseki hejima hahita luzwizu lwahewulu. Nzambi wahosheli nindi, Hamaseki hediki yuma yikweti wumi, hamutundu, hamutundu, niayimuna, niyuma yazalalaña, nianyama amumpata hamutundu, hamutundu; chila nikwila.’ (Kutachika 1:20, 24) Munichi chibaba, inshi, ayimuna, nianyama amumpata anayiteni nezu dodimu​—“mawumi.” Atujila nianyama amakwawu ayitenaña nawu mawumi haKutachika 9:10; Alevi 11:46; nihaKuchinda 31:28.

Wumi wamuntu. Mpinji yikwawu izu ‘dawumi’ daya mukwila nawu wumi wamuntu. Yehova walejeli Mosi nindi: ‘Amayala akeñeleña wumi weyi afwa dehi.’ (Kwidika 4:19) Ayilumbu jaMosi amukeñeleleña chumanyi? Akeñeleña kukisañana wumi waMosi. Kunyima kuna, hampinji yadiñayi Racheli nakuvwalayi mwanindi weyala Benjamini, ‘mwevulu [wumi] windi hiwukuya, muloña wafwili.’ (Kutachika 35:16-19) Hayina mpinji, Racheli wajimbesheli wumi windi. Toñojokaku cheñi mazu aYesu: “Ami yami kabiña walala; kabiña walala wukutula wumi windi hadi anyikoku.” (Yowanu 10:11) Yesu  waheni wumi hela muuya windi hanyijimba yamuchidi wamuntu. Muniyi yibaba yamuBayibolu, izu dakwila nawu “wumi” dinatalishi chikupu kuwumi hamu neyi muntu. Munateli kuwana yakutalilahu yikwawu yamuchidiwu yakundama ‘kuwumi’ ha 1 Anyanta 17:17-23; Matewu 10:39; Yowanu 15:13; niYililu 20:10.

Kudiza nankashi Izu daNzambi dikukuleja nawu kwosi nihamu muBayibolu yejima hakwatankeshawu mazu akwila nawu “kubula kunoña” hela “haya nyaka” nezu ‘dawumiku.’ Ilaña Nyikanda yahoshaña nawu wumi wanoñaña, dikwila nawu wafwaña. (Ezekeli 18:4, 20) Dichi dinu, Bayibolu yatenaña ona muntu wunafwi nawu “wumi wunafwi.”—Alevi 21:11, NW.

Twayenu tutali ntahi chazatisha Bayibolu izu dakwila nawu “spiritu.” Antu amakwawu atoñojokaña nawu “spiritu” hiizu dikwawu ‘dawumi.’ Ilaña dimu wanyi. Bayibolu yahoshaña hatoka to-o nawu “spiritu” ‘niwumi’ yatalisha kuyuma yiyedi yambuka. Yambuka ñahi?

Ansoneki aBayibolu azatishili izu dachiHeberu dakwila nawu ruʹach hela izu dachiGriki dakwila nawu pneuʹma hampinji yasonekeleñawu hansañu ‘yaspiritu.’ Nyikanda yayeni yamwekeshaña chalumbuluka awa mazu. Chakutalilahu, haMasamu 104:29 hahoshaña nawu “Wayitambulaña [Yehova] spiritu [ruʹach] yawu, hiyakufwa, hiyakufunta cheñi mulunkuñu lwawu [NW].” Nawa haYakoba 2:26 hahoshaña nawu ‘mujimba wakadi spiritu [pneuʹma] wafwa.’ Munawa mavasi, “spiritu” yinatalishi kuchuma china chahanaña wumi kumujimba. Chakadi spiritu, mujimba wafwaña. Komana muBayibolu izu dakwila nawu ruʹach hiyadibalumuna hohu nawu ‘spirituku,’ ilaña nawu “ñovu,” hela ñovu yahanaña wumi. Chakutalilahu, kutalisha kuDibaji damumafuku aNowa, Nzambi wahosheli nindi: ‘Hinukuleta dibaji damenji hamaseki, kulonda kujilumuna mwishina dewulu akwanyijimba ejima [ñovu yahanaña wumi] ahandaña [ruʹach] nakwona.’ (Kutachika 6:17; 7:15, 22) “Spiritu” komana yatalisha kuñovu yakamwekanaña (lusashi lwamuuya) lwahanaña wumi kuyileñaleña yejima yayumi.

Wumi nispiritu hichuma chimu wanyi. Mujimba watela kwikala naspiritu neyi chochakeñaña chisanji kesi kawuneñu​—hakwila nawu chizatiki. Hakwila nawu tulumbululi chumichi, toñojokaku hachisanji chakumakasa. Neyi wusha malola muchisanji chakumakasa , wuchambula nikuchambula, kesi kawuneñu kadi mumalola kakukojeja chisanji kuzatika. Chakadi malola, chisanji kwila chizatika nehi. Dichekalaña nimuchidi wukwawu wachisanji neyi anachifumishi kwedikilaña kesi kawuneñu. Munjila yoyimu, spiritu hiñovu yahanaña wumi kumujimba. Cheñi, neyi chochidi kesi kawuneñu, spiritu hiyikutwesha kutiya hela kutoñojokaku. Hiyikweti ñovu yawuntuku. Ilaña chakadi iyi spiritu, hela ñovu yahanaña wumi, nyijimba yetu ‘yafwaña, nakufunta cheñi mulunkuñu lwawu,’ neyi chahosheliyi ñimbi wamasamu.

Hakuhosha hansañu yakufwa kwamuntu, Mukwakutaŋisha 12:7 wahoshaña nindi: “Lunkuñu [lwamujimba windi] luchidi kanda lufunti cheñi mwiseki mulwadiñi, nimuuya [spiritu] wuchidi kanda wufunti cheñi kudi Nzambi wawuheni.” Neyi spiritu, hela ñovu yahanaña wumi yikufuma mumujimba, mujimba wafwaña nakufunta kuwafumini​—kwiseki. Chochimu, ñovu yahanaña wumi yafuntaña kuyafumini​—kudi Nzambi. (Yoba 34:14, 15; Masamu 36:9) Ichi hichinatwali mukwila nawu ñovu yahanaña wumi yakasaña lwendu lwakuya kwiwuluku. Ilaña, chinatwali mukwila nawu neyi muntu nafwi, chikuhwelelu chindi chakwikala nawumi wakumbidi chinashindameni hadi Yehova Nzambi. Tuhoshi netu, wumi windi wudi mumakasa aNzambi. Spiritu, hela ñovu yahanaña wumi atela kuyifuntisha chiña kuñovu yaNzambi hohu mwaka dinu muntu yohandi cheñi.

Chinekali chakukundeja hakwiluka nawu ichi dichakelayi Nzambi kudi antu ejima anakunooka “mumajamu achanukishu”! (Yowanu 5:28, 29, NW) Hampinji yakusañuka, Yehova wakelisha mujimba wawuha wamuntu wakamini mutulu twakufwa nakuwuleta cheñi kuwumi kuhitila mukushamu spiritu, hela ñovu yahanaña wumi muwuna mujimba. Owu muzañalu wukekala hadina ifuku!

Neyi mukukeña kwiluka jajivulu hansañu yamazu ‘awumi’ ‘nispiritu’ kwesekeja nachayizatishawu muBayibolu, mukuwana nsañu yalema mubuloshuwa waWhat Happens to Us When We Die? nihamafu 375-84 amukanda waReasoning From the Scriptures, yejima ayisoneka kudi aYinsahu jaYehova.