BAYIBOLU bayi neyi diyatachikili mafuku akunooka aya mpuhu ansakililu niakwituña anakwanakanawu mumaluña amavulu amukaayi makonuku. Hanu dinu, yidika yeniyi yafuma kudihi? Neyi wudi nawuswa wakusandujola mulayibulali, chatela kukuzañalesha hakumona chahosha nyikanda yikweti nsañu yahoshaña hamafuku akunooka ana aya mpuhu akwiluña diwashakamaña. Shinshikaku haniyi yakutalilahu yantesha.

 Esita. The Encyclopædia Britannica yahoshaña nawu: “Kwosi nihamu hamwekeshawu kwanakana kwachidika chaEsita muChitiyañenu Chachihaku.” Indi Esita yatachikili ñahi? Yafuma kukudifukula kwawusenji. Idi ifuku aditenaña kwikala dakwanakana kusañuka kwaYesu, ilaña tushidikilu twendelaña hamu nachilaka chaEsita hitushidikilu twawiniKristuku. Chakutalilahu, kutalisha kumpuhu “yakaana kakachinchi kahaEsita,” The Catholic Encyclopedia yahoshaña nawu: “Kachinchi hichinjikijilu chawasenji nawa neyi dikalu kekala hichifwikija chalusemu.”

Kwanakana Mwaka Wawuha. Ifuku nitushidikilu twendelaña hamu nakwanakana Mwaka Wawuha twambuka mumatuña ejima. Kutalisha hantachikilu yaniku kwanakana, The World Book Encyclopedia yahoshaña nawu: “Nyuli yawaRoma Julius Caesar diyi watachikili ifuku daJanuary 1 nindi dikali Ifuku daMwaka Wamuha mu 46 B.C. EniRoma akunjikili idi ifuku kudi Janus, nzambi wayisu, mapitu, nawa wakusambila. Kakweji waJanuary wafuma kwijina daJanus, wadiña namahama ayedi—ihama dimu datala kumbidi nidikwawu datala kunyima.” Komana kwanakana Mwaka Wamuha kwafuma kuyisemwa yawusenji.

Halloween. The Encyclopedia Americana yahoshaña nawu: “Yuma yachisemwa yendelaña hamu naHalloween yatela kuwanewa kuchidika chaDruid [kapristu wawaCeltic wakushankulu] chadiñaku henohu eniKristu kanda ekaliku. A Celts adiña nayawija yawanzambi amaneni ayedi—nzambi wetañwa ninzambi wawafu . . . , wukweti chawija chindi chadiña nakwanakanawu haNovember 1, hakutachika Mwaka Wamuha waCeltic. Mukuhita kwampinji chawija chawafu cheñilili nimuyaaku yaweniKristu.”

Mafuku Amakwawu Akunooka. Hichidi chaswayi kuhanjeka hayidika yejima yanakanañawu mukaayi kejimaku. Hela chochu, mafuku akunooka ahamekaña antu hela mazanvu awantu hiyetejewa kudi Yehovaku. (Yeremiya 17:5-7; Yililu 10:25, 26) Anukaku cheñi neyi ntachikilu yakwanakana yidika yansakililu yatela kumwekesha neyi yamuzañaleshaña Nzambi hela nehi. (Isaya 52:11; Chimwekeshu 18:4) Yishina yamuBayibolu yinashimuniwu muKapetulu 16 kawunu mukanda yikukwasha kwiluka ochamwonañayi Nzambi hakudibombamu munsañu jamafuku akunooka abula kwikala ansakililu.